‘Mugendekere Mwashimba Okuli’

1. Okuganirira gurhi rhwamanyagamwo “okuli,” bunguke buci kurhulerhera?

“GURHI wamanyagamwo okuli?” Buzira karhinda, nkaba washuzize kw’er’idoso kanji-kanji. Eryo liri liguma ly’omu madoso marhanzi owirhu Muhamirizi wa Yehova arhudosa amango alonzize arhumanye bwinja. Rhunashagaluke okuyumva gurhi bene wirhu na bali birhu bamanyagamwo Yehova n’okumuzigira, rhunanashagaluke okubaganirira bulya gurhi rhuba rhuzigire okuba Bahamirizi ba Yehova. (Rm. 1:11) Ezo nganîro za ntyo zinarhukengeze bulya gurhi okuli kuba kwa bulagirire bwenene kuli rhwe. Kandi, zinazibuhye omuhigo gwirhu gw’‘okugendekera rhwashimba okuli,’ k’okuderha okugendekera rhwalama omu njira yakarhuma Yehova arhugisha n’okurhuyemera.​—3 Yn. 4.

2. Bici rhwaganirira mw’eci cigabi?

² Mw’eci cigabi, rhwaganirira bintu biguma na biguma birhuma rhuzigira okuli. Buzinda rhwaganirira gurhi rhwakagendekera rhwayerekanamwo oku rhuba rhuzigire eyo ngalo y’obulagirire bwenene. Buzira karhinda, ezi nganîro zarhurhabala rhube ba kuvuga omunkwa bwenene kw’ebi Yehova ajijire omu kurhukulula lyo rhumanya okuli. (Yn. 6:44) Na kandi zayushula irala lirhu ly’okulonza okukaganirira abandi lugenda okuli.

BULYA GURHI RHUBA RHUZIGIRE “OKULI”?

3. Cirhumire ciguma cihi c’obulagirire bwenene cirhushumya rhuzigire okuli?

³ Rhugwerhe birhumire binji birhushumya rhuzigire okuli. Ecirhumire c’obulagirire bwenene, rhuba rhuzigire Yehova Nnâmahanga, Nshoko y’okuli. Kugerera Akanwa kage, Bibliya, rhwahikire aha rhwamanya oku aba Mulemi ogala-byoshi w’empingu n’igulu cikone kandi oku aba Larha w’obuzigire w’omu mpingu orhushibirira. (1 Pt. 5:7) Rhumanyire oku aba Nnâmahanga “w’olukogo n’obwonjo, arhakunîra duba anaba wa buzigire bunji bwishwekerezi n’okuli.” (Lub. 34:6, NWT) Yehova aba azigire obushinganyanya. (Iz. 61:8) Anaciyumve kubi erhi abona rhuli rhwalibuka anaba alonzize okuyusa amazibu girhu goshi anali alindirira akasanzi ahizireho ly’agayusa. (Yer. 29:11) Nirhu rhuli rhwalindirira ako kasanzi kinja bwenene! Buzira karhinda, rhuba rhuzigire Yehova bwenene!

4-5. Bici byarhumaga entumwa Paolo yashushanya obuyemere bwirhu n’enanga?

⁴ Cindi cirhumire cihi cirhushumya rhuzigire okuli? Okuli kunarhulerhere bunguke bunji. Rhuganirire lwiganyo luguma. Okuli kw’Ebibliya kuba kuhiziremwo obulangalire bwirhu lugenda akasanzi kayisha. Entumwa Paolo yayerekine akamaro k’obo bulangalire omu kuyandika ntya: “Rhugwerhe obo bulangalire nka nanga y’obuguma-guma bwirhu, buli bw’okunali bunasêzire.” (Hb. 6:19, NWT) Nka kula enanga erhabala amashuwa lyo garhag’ihêkwa n’empusi, obulangalire bwirhu buyimangire oku Bibliya bunarhurhabale rhurhadundaganaga erhi rhurhimanana n’amazibu omu kalamo.

⁵ Mw’olo lwandiko, Paolo akag’iganirira obulangalire bw’okuja empingu Abakristu bashige amavurha bashagalukira. Cikone kandi, enderho zage ziyerekire Abakristu bagwerhe obulangalire bw’okulama ensiku n’amango omu paradizo hanw’igulu. (Yn. 3:16) Kobinali, okuyiga okubiyerekire obo bulangalire bw’akalamo k’ensiku n’amango kwarhumire akalamo kirhu kaba n’omuhigo.

6-7. Gurhi okumanya okuli lugenda akasanzi kayisha kwarhabiremwo Yvonne?

⁶ Rhuganirire ebi mwali wirhu muguma ohamagalwa Yvonne acibwinire. Arhakuliraga omu okuli, n’amango aciri murho akag’iyoboha olufû. Akengire oku hali amango asomaga ezi nderho zanamubêra omu bwenge: “Hali amango irhondo lirhakacihaba.” Adesire ntya: “Ezo nderho zakarhuma ntahunira obudufu boshi enyanya z’okurhanya lugenda akasanzi kayisha. Nakarhanya ntya, ‘Kobinali akalamo kashinganine kabe na muhigo mulebe. Bulya gurhi rhuba hanw’igulu?’ Ntal’ilonzize okufâ!”

⁷ Buzinda, erhi Yvonne aba akola ali mwana wa mushuko, arhimanana n’Abahamirizi ba Yehova. Adesire ntya: “Narhondera okuyemera n’obwalagale oku nanaba n’obulangalire bw’okulama ensiku n’amango omu Paradizo hanw’igulu.” Gurhi okumanya okuli kwarhabiremwo oyo mwali wirhu? Acibir’iderha: “Ntacibula iro budufu enyanya z’okuyoboha akasanzi kayisha erhi lufû.” Nk’oku wakanarhanya, Yvonne aba azigire okuli bwenene ananashagalukire okuganirira abandi lugenda obulangalire bwage bw’akasanzi kayisha.​—1 Tm. 4:16.

8-9. (a) Omu lwiganyo luguma lwa Yezu, gurhi mulume muguma ayerekinemwo oku obuhirhi abonaga bwali bwa ngulo ndarhi kuli ye? (b) Gurhi obona okuli?

⁸ Kandi okuli kw’Ebibliya kuhiziremwo omwanzi mwinja guyerekire Obwami bwa Nnâmahanga. Yezu ashushanyize okuli lugenda obo Bwami n’obuhirhi bwali bufulike. Omu lwandiko lwa Mateyo 13:44, Yezu aderha ntya: “Obwami bw’empingu bwanagererwa oku buhirhi bufulike omu ishwa; omuntu wabubonaga, ashub’ibubishamwo, agend’asimire, aj’iguza ebi âli agwerhe byoshi, okuhandi agula eryo ishwa.” Obwine oku oyo mulume arhali kulonza ajag’alonza obo buhirhi. Cikone erhi abubona, aleka bintu binji bwenene ly’aba nabo. Aguza ngasi kantu al’igwerhe. Bulya gurhi? Al’imanyire oku obo buhirhi bwali bwa ngulo ndarhi bwenene. Bwali bwa bulagirire bwenene kulusha ngasi kantu koshi al’ishinganine aleke.

⁹ Ka ntyo ko nawe obona okuli? Neci, kobinali! Rhumanyire oku nta kantu kaba ka ngulo ndarhi bwenene mw’er’igulu kulusha omwishingo rhugwerhe omu kukolera Yehova ene, n’obulangalire bw’akalamo k’ensiku n’amango omu kasanzi kayisha idako ly’oburhegesi bw’Obwami bwa Nnâmahanga. Olukengwa rhugwerhe lw’okuba n’obwîra bwa hofi-hofi haguma na Yehova luba lwa bulagirire bwenene kulusha ngasi kantu rhwakaleka. Rhunabe n’omwishingo munji omu ‘kumusimisa muli byoshi.’​—Kl. 1:10.

10-11. Bici byashumyagya Michael ly’ajira empindulo nnene omu kalamo kage?

¹⁰ Banji muli rhwe balesire bintu binji bwenene lyo bayemerwa na Yehova. Hali abalesire akazi kinja bwenene mw’er’igulu. Abandi balesire okulongereza obuhirhi. Ciru n’abandi bashanjire loshi-loshi oku bakag’ilama erhi bayiga lugenda Yehova. Ntyo ko Michael ajijire. Arhakuliraga omu okuli. Amango ali musole, ayiga akaraté. Adesire ntya: “Nakag’icidinira okugendekera naba n’amagala minja n’emisi minji y’omubiri. Hali amango nakag’iciyumva nka ntakahimwa.” Cikone erhi Michael arhondera okuyiga Ebibliya, amanya entanya za Yehova lugenda obuminya. (Enna. 11:5) Okubiyerekire mulume muguma na mukage bakag’imuyigiriza Ebibliya, Michael adesire ntya: “Nta lusiku bambwizire oku nshinganine ndeke akaraté; bagendekera kone okunyigiriza okuli kw’Ebibliya.”

¹¹ Oku Michael agendekire ayiga binji lugenda Yehova, ko n’obuzigire bwage kuli ye bwagendekire bwayushuka. Olukogo Yehova ayeresa abakozi bage lwo lwamuhumire oku murhima bwenene. Erhi hagera kasanzi kalebe, Michael ahugûkwa oku al’ishinganine arhôle omuhigo gw’obulagirire bwenene omu kalamo kage. Adesire ntya: “Nal’imanyire oku okuleka akaraté go muhigo muzibu bwenene nakarhôzire omu kalamo kani. Cikone kandi nal’imanyire oku ogo muhigo gwakashagalusize Yehova nanaliyemire n’obwalagale oku okumukolera ko kulushire ngasi kantu nakalesire.” Michael al’imanyire oku okuli abonaga kwali kwa ngulo ndarhi bwenene, n’okumanya ntyo kwamushumya ajira empindulo nnene omu kalamo kage.​—Yk. 1:25.

12-13. Gurhi okuli kw’Ebibliya kwarhabiremwo Mayli?

¹² Ly’Ebibliya eyerekana oku okuli kuba kwa ngulo ndarhi, eshushanyize okuli n’itara liri lyamoleka omu mwizimya. (Enna. 119:105; Ef. 5:8) Mayli, w’omu Azerbaïdjan, ashagalukire bwenene oburhabale ahâbagwa n’Akanwa ka Nnâmahanga. Akuliraga omu mulala ngasi mubusi agwerhe elyage idîni. Ishe ali Mwislamu na nnina ali Muyahudi. Adesire ntya: “Ciru akaba ntal’igwerhe akarhinda okubiyerekire okubaho kwa Nnâmahanga, nal’igwerhe madoso manji bwenene. Nakag’icidosa ntya: ‘Bici byarhumaga Nnâmahanga alema abantu, na bici byakarhuma omuntu alibuka omu kalamo kage koshi na buzinda alibuzibwe omu muliro gw’ensiku n’amango?’ Bulya abantu bakag’iderha oku ngasi kantu kaba buba bulonza bwa Nnâmahanga, nakacidosa ntya: ‘Ka Nnâmahanga analerhere abantu amazibu gabahikira na buzinda ashagalukire amalibuko gabo?’”

¹³ Mayli agendekera okulongereza amashuzo oku madoso gage. Enyuma za kasanzi kalebe, ayemera okuyiga Ebibliya anahikira okuba Muhamirizi wa Yehova. Adesire ntya: “Entanya zipatine n’obwenge ziri omu Bibliya, zahindwire akalamo kani kaba kinja. Amahugûlo g’okulangalirwa napasire kurhenga omu Kanwa ka Nnâmahanga garhuma naba n’omurhûla gw’ekandalala.” Aka Mayli, rhweshi rhunakuze Yehova, Ye ‘warhukulaga omu mwizimya, arhuhamagala mpu rhuje omu bulangashane bwage bw’okusomeza.’​—1 Pt. 2:9.

14. Gurhi rhwakayushulamwo obuzigire bwirhu lugenda okuli? (Olole n’ecisanduku cidesire, “Ebindi Bishushanyizibwe n’Okuli.”)

¹⁴ Ezo ziri nyiganyo nsugunu ziyerekine oku okuli kuba kwa ngulo ndarhi. Nkaba wanarhanya oku zindi nyiganyo nyinji. Omu programe y’ifunzo lyawe wene, wanacihiriraho omuhigo gw’okulonza ebindi birhuma rhuba rhuzigire okuli. Oku rhwagendekera rhwazigira okuli, ko rhwanagendekera rhwabona enjira z’okuyerekanamwo obuzigire bwirhu lugenda okuli.

GURHI RHUYEREKANAMWO OKU RHUBA RHUZIGIRE OKULI?

15. Njira ehi nguma rhwakayerekanamwo oku rhuba rhuzigire okuli?

¹⁵ Rhwanayerekana oku rhuzigire okuli omu kukasoma Ebibliya ngasi mango n’ebicapo biyimangire oku Bibliya. Kobinali, ciru rhwakaba rhukola rhugwerhe myaka minji omu okuli, ngasi mango rhunabe na binji by’okuyiga. Enimero ntanzi y’eyi gazeti yal’idesire ntya: “Okuli kuba nka hiuwa hisungunu omw’irungu ly’obuzine, kuzungulusirwe n’olubala lubi lukuzire lw’enyigirizo z’obunywesi, kwananaba kuzibu okumanya okuli. Ly’obona okuli, oshinganine ogendekere walongereza. . . . Oshinganine ojire okwawe koshi ly’opata okuli. Orhashagalukiraga okupata liuwa liguma ly’okuli. . . . Ogendekere wagahumba, olongereze manji.” Okuyiga guba mukolo muzibu, cikone kurhaba kuheza akasanzi busha.

16. Njira ehi y’okuyiga obona oku enakulerhere obunguke? (Emigani 2:4-6)

¹⁶ Arhali rhweshi rhushagalukira okusoma n’okuyiga. Cikone Yehova arhuhûnyire oku rhugendekere ‘rhwafûkula’ rhunagendekere ‘rhwalongereza’ lyo rhuhugûkwa okuli bwinja. (Osome Emigani 2:4-6, Mashi Bible.) Ensiku zoshi rhunayunguke erhi rhucihangana okujira ntyo. Lugenda eprograme yage y’okusoma Ebibliya, Corey adesire oku anacihê akasanzi k’okusegeza obwenge oku lwandiko luguma-luguma. Ahugwîre ntya: “Nansome ngasi mahugûlo g’idako, nandonze ngasi referanse y’amandiko, nanjire n’obundi busagasi. . . . Okusoma Ebibliya omu njira ya ntyo kunanderhere bunguke bunji!” Rhube rhunakolese eyo njira erhi yindi, rhunayerekane oku okuli kuba kwa ngulo ndarhi kuli rhwe erhi rhucihâ akasanzi n’obushiru lyo rhukuyiga.​—Enna. 1:1-3.

17. Okulama kushimbana n’okuli k’okuderha gurhi? (Yakobo 1:25)

¹⁷ Kobinali, rhumanyire oku rhushinganine rhujire binji ahanyuma n’okuyiga kone okuli. Lyo rhuba na bunguke bunji, rhushinganine rhulame kushimbana n’okuli, k’okuderha oku rhushinganine rhukakolesa ebi rhuli rhwayiga omu kalamo kirhu. Okujira ntyo kone kwakarhuma okuli kwarhulerhera omwishingo gw’okunali. (Osome Yakobo 1:25.) Bici byakarhuyemeza n’obwalagale oku rhuli rhwalama kushimbana n’okuli? Mwene wirhu muguma adesire oku rhukwanine rhukacilabiriza rhwene lyo rhumanya ebi rhuli rhwajira bwinja n’ebi rhushinganine rhukubûle omu kalamo kirhu. Entumwa Paolo yadesire ntya: “Ngasi aha rhwakaba rhuhisire omu kujira amajambere, rhugendekere rhwalambagira omu lugenzi lo n’olo buzira kavulindi.”​—Fl. 3:16, NWT.

18. Bulya gurhi rhujira okwirhu koshi lyo ‘rhugendekera rhwashimba okuli’?

¹⁸ Orhanye oku bunguke rhuba nabo erhi rhujira okwirhu koshi lyo ‘rhugendekera rhwashimba okuli’! Omu kujira ntyo, akalamo kirhu kanabe kinja rhunanalerhere Yehova omwishingo na bene wirhu na bali birhu. (Mig. 27:11; 3 Yn. 4) Kobinali, ebyo biri birhumire binja birhushumya rhuzigire okuli n’okulama kushimbana n’okuli.