K’Ocirheganyize oku Malibuko Madarhi?

1. Bulya gurhi okucirheganya oku buhanya kuli kukolesa obwenge?

OKUCIRHEGANYA kunayokole obuzine. Kwa lwiganyo, erhi obuhanya bwakarhibuka, kanji-kanji abantu bal’iyosire bacirheganyize bo bayokoka obo buhanya bananahashe okurhabala abandi. Ikubuliro liguma ly’Ebulaya lirhabala abantu lyadesire ntya: “Okucirheganya bwinja kwanayokola obuzine.”

2. Bulya gurhi rhushinganine rhucirheganye oku malibuko madarhi? (Mateyo 24:44)

² ‘Amalibuko [madarhi]’ gayish’irhibuka buzira kulaliza. (Mt. 24:21) Cikone amalibuko madarhi gayish’iba lubero n’agandi mahanya manji bulya rhumanyire oku gayisha. Hakola hali hofi myaka 2 000 Yezu arhonzire abanafunzi bage oku bayorhe bacirheganyize kw’olo lusiku. (Osome Mateyo 24:44.) Erhi rhwakaba rhucirheganyize, kwayish’iba kulembu kuli rhwe okulembera ago mango mazibu n’okurhabala abandi nabo bajire ntyo.​—Lk. 21:36.

3. Gurhi obulembedu, obwonjo, n’obuzigire bwayish’irhurhabala lyo rhucirheganya oku malibuko madarhi?

³ Rhuganirire morhere asharhu gayish’irhurhabala lyo rhucirheganya oku malibuko madarhi. Gurhi rhwayish’ijira erhi bakarhuhûna rhuyaligize abantu barhali bemezi barhuhagalika omwanzi mudarhi gw’olubanja? (Maf. 16:21) Rhwayish’iba rhulagirire oku bulembedu lyo rhurhumikira Yehova n’okulangalira oku arhulanga. Gurhi rhwayish’ijira erhi bene wirhu bakaheza bintu biguma na biguma by’omubiri erhi baheze byoshi? (Hab. 3:17, 18) Rhwayish’iba rhulagirire oku borhere bw’obwonjo lyo burhushumya rhubarhabale. Gurhi rhwayish’ijira erhi enyanya z’ecirhero c’omulungano gw’amashanja, byakarhuhûna rhulame hantu halebe haguma na bene wirhu na bali birhu banji omu kasanzi kalebe? (Eze. 38:10-12) Rhwayish’iba rhulagirire oku buzigire busezire kuli bo lyo burhurhabala rhulembere ago mango mazibu.

4. Gurhi Ebibliya eyerekinemwo oku rhugwasirwe rhugendekere rhwayerekana oborhere bw’obulembedu, obwonjo, n’obuzigire?

⁴ Akanwa ka Nnâmahanga karhuhîre omurhima rhugendekere rhwayerekana oborhere bw’obulembedu, obwonjo n’obuzigire. Olwandiko lwa Luka 21:19 ludesire ntya: “Bulêmbezi [erhi bulembedu] bwinyu mwacizemwo obuzine bwinyu!” Olwandiko lw’Abakolosi 3:12 ludesire ntya: “Mucihundikire . . . obwonjo.” N’olwandiko lwa 1 Abatesalonika 4:9, 10 ludesire ntya: “Nyamuzinda yêne wammuyigirizagya okuzigirana mwêne na nnene, . . . Rhummuhunyire nti muyushûle okuja embere, bene wirhu.” Ago mandiko goshi gayandikiragwa abanafunzi bal’ibamakayerekana obulembedu, obwonjo, n’obuzigire. Cikone, bal’igwasirwe baciyigirize okugendekera bayerekana ago morhere. Nirhu rhugwasirwe rhujire ntyo. Lyo rhuhasha okujira ntyo, rhwaganirira gurhi Abakristu b’omu myaka igana mirhanzi bayerekinemwo ngasi buguma bw’ago morhere. Buzinda rhwabona gurhi rhwakayigamwo olwiganyo lw’abo banafunzi, n’okuyerekana oku rhucirheganyize oku malibuko madarhi.

OZIBUHYE OBULEMBEDU BWAWE

5. Gurhi Abakristu b’omu myaka igana mirhanzi balembiremwo amazibu gabo?

⁵ Abakristu b’omu myaka igana mirhanzi bal’ishinganine balembere. (Hb. 10:36) Ciru akaba bakag’ilwisa amazibu gahikira abantu boshi, balwisize agandi mazibu. Ahanyuma n’okulibuzibwa n’ebirongozi by’idîni ly’Eciyahudi n’abarhegesi b’Abaroma, banji mulibo balibuzibwe n’abantu b’emilala yabo. (Mt. 10:21) N’omu cigamba, hali amango bal’igwasirwe balwise enshumi z’abagoma n’enyigirizo zabo zakarhumire ecigamba cagabikanamwo. (Ebj. 20:29, 30) Cikone, abo Bakristu balembera. (Maf. 2:3) Bici byabarhabire? Bakag’irhanya bwenene oku nyiganyo z’abantu balemberaga baganirirwe omu Mandiko, nk’olwiganyo lwa Ayubu. (Yk. 5:10, 11) Bakag’ishenga Yehova abahe emisi. (Ebj. 4:29-31) Na kandi bakag’isegeza obwenge oku malehe minja g’obulembedu bwabo.​—Ebj. 5:41.

6. Bici ociyigirizize kugerera ebi Merita ajiraga ly’alembera okuhagalikwa?

⁶ Nirhu rhwanalembera erhi ngasi mango rhwakakayiga enyiganyo z’abantu balemberaga ziganirirwe omu Kanwa ka Nnâmahanga n’omu bicapo birhu n’okuzirhanyako. Okujira ntyo kwarhabire mwali wirhu Merita w’omu cihugo c’e Albanie ly’ahasha okulembera okuhagalikwa bwenene n’abantu b’omulala gwage. Adesire ntya: “Nahumirwe oku murhima bwenene erhi nyiga omwanzi gw’Ebibliya guganirire Ayubu. Alibûsire bwenene arhanal’imanyire owakag’imulerhera ago marhangulo; na ciru akaba ntyo, aderha ntya: “Kuhika nninde nfâ, nta mango nanaleke obwishwekerezi bwani!” (Ayu. 27:5, NWT) Nakarhanya lugenda gurhi amarhangulo ga Ayubu gali madarhi bwenene kulusha agani. Lubero naye, niehe nal’imanyire ndi wakag’indêrhera ago marhangulo.”

7. Ciru akaba buno rhurhali rhwalwisa amazibu madarhi, bici rhushinganine rhuciyigirize okujira ene?

⁷ Kandi rhwanazibuhya obulembedu bwirhu omu kukasalira Yehova kanji-kanji n’okumubwira ebiri byarhuhangayisa byoshi. (Fl. 4:6; 1 Ts. 5:17) Nkaba nta mazibu madarhi oli walwisa buno. Ciru akaba ntyo, k’onalonze obulongozi bwa Yehova ngasi mango erhi akaba oli burhe, ohwerirwe, erhi orhamanyiri oku wajira? Erhi akaba ene onahûne Nnâmahanga oburhabale ngasi mango ly’olwisa amazibu gawe ga ngasi lusiku, orhayish’irhindire okujira ntyo hano olwisa amazibu madarhi omu mango gayisha. Ago mango wayish’iyemera n’obwalagale oku amanyire bwinja-bwinja amango akakurhabala na gurhi akakurhabalamwo.​—Enna. 27:1, 3.

8. Gurhi olwiganyo lwa Mira luyerekinemwo oku okulembera amazibu g’ene kwanarhurhabala lyo rhulembera amazibu g’amango gayisha? (Yakobo 1:2-4) (Olole n’enfoto.)

⁸ Rhwayish’ihasha okulembera amalibuko madarhi erhi akaba rhunalembere amazibu gali garhuhikira ene. (Rm. 5:3) Bulya gurhi rhwakaderha ntyo? Bene wirhu banji babwine oku ngasi irhangulo ly’obuyemere balembire lyabarhabire lyo balembera agandi mazibu. Obulembedu bwabarhabire baba Bakristu binja, bwanazibuhya obuyemere bwabo oku Yehova ali mubidu okubarhabala ananalonzize okujira ntyo. Obuyemere nabo, bwabarhabire balembere agandi mazibu. (Osome Yakobo 1:2-4.) Painiya muguma w’omu Albanie ohamagalwa Mira acibwinire oku okulembera alemberaga omu mango gageraga kwamurhabire ly’agendekera alembera. Ayemire oku mango maguma na maguma anaciyumve nka yene ogwerhe mazibu manji bwenene. Cikone, erhi aciyumva ntyo anakengere ebi Yehova amujirire byoshi omu myaka 20 egezire ly’amurhabala, na buzinda anacibwire ntya: ‘Ogendekere waba mwishwekerezi. Orhaleke eyo myaka yoshi n’ezo ntambala zoshi wahimire kugerera oburhabale bwa Yehova bifê busha.’ Nawe wanarhanya bwenene lugenda gurhi Yehova akurhabire ly’olembera. Oyemere n’obwalagale oku ngasi mango erhi olembera amazibu anabone n’oku ayish’ikuhemba. (Mt. 5:10-12) Muli ntyo, hano amalibuko madarhi garhondera, wayish’iba waciyigirizize gurhi wakalemberamwo na kandi wayish’ihiga okugendekera walembera.

OYEREKANE OBWONJO

9. Gurhi ecigamba c’omu Antiyokiya y’e Siriya cayerekinemwo obwonjo?

⁹ Rhuganirire ebyabire erhi Abakristu b’omu Yudeya bahikirwa n’ishali lidarhi. Erhi Abakristu b’omu Antiyokiya y’e Siriya bayumva lugenda er’ishali, buzira karhinda bayumviza bene wabo b’omu Yudeya obwonjo. Cikone enyuma z’aho bayerekana obwonjo bwabo kugerera ebijiro. “Banacihiga mpu ngasi muguma, nk’oku anahashire, arhumire bene wabo b’e Yudeya oburhabale.” (Ebj. 11:27-30) Ciru akaba bene wirhu bahikiragwa n’er’ishali bal’ilamire kuli, Abakristu b’omu Antiyokiya bahiga okubarhabala.​—1 Yn. 3:17, 18.

10. Njira zihi rhwakayerekanamwo obwonjo erhi abirhu bemezi bakahikirwa n’obuhanya? (Olole n’enfoto.)

¹⁰ Ene nirhu rhwanayerekana obwonjo erhi rhwakayumva oku abirhu bemezi bahikirwe n’obuhanya. Rhunajire duba-duba, nkaba omu kudosa abagula erhi rhwanarhabala omu kujira mukolo mulebe, omu kuhâna emicango ly’omukolo gw’omw’igulu lyoshi gugendekera, erhi omu kusalira enyanya za balya bahikirwe n’obuhanya.b (Mig. 17:17) Kwa lwiganyo, omu mwaka gwa 2020, Komite zilushire 950 z’Okuhâna Oburhabale omu Mango g’Obuhanya zahizirweho omw’igulu lyoshi lyo zishibirira abal’ilagirire oku burhabale omu mango g’obulwala bw’okuyahukira bw’e COVID-19. Abakola omu komite z’okuhâna oburhabale bashinganine okuvugwa omunkwa. Okuyumviza bene wabo na bali babo obwonjo kwabashumize babahe oburhabale bw’omubiri, babashibirire omu hali y’ekiroho, n’omu kanga kaguma na kaguma, balumwire erhi kuyubaka buhyahya enyumpa n’enafasi z’okuharamiza Yehova.​—Oshushanye na 2 Abakorinti 8:1-4.

11. Gurhi ebijiro birhu by’obwonjo byakalerherha Larha wirhu w’omu mpingu obukuze?

¹¹ Erhi rhuyerekana obwonjo enyuma z’obuhanya, abandi banabone ebijiro birhu by’okucihâna. Kwa lwiganyo, omu mwaka gwa 2019, empusi ndarhi ehamagalwa Dorian yashereza Enyumpa y’Entimanano omu Bahamas. Erhi bene wirhu baba bali bacib’iyubaka eyo Nyumpa y’Entimanano, badosa mubasi muguma orhali Muhamirizi nsaranga inga bakamulipa ly’ajira ogo mukolo. Ababwira ntya: “Nakalonzize mpane . . . ebyombo, abantu bajira ogo mukolo, n’ebintu by’okuyubaka. . . . Ndonzize okuha ikubuliro linyu obo burhabale. Nanshagalukire bwenene oku [muciyumva] lugenda abîra binyu.” Bantu banji omw’igulu barhamanyiri Yehova. Cikone banji mulibo banabone ebi Abahamirizi ba Yehova bajira lyo barhabala abandi. Luli lukengwa bwenene okumanya oku ebijiro birhu by’obwonjo byanakulula abantu emunda Yehova ali, Ye oba “Ntahwa-lukogo”!​—Ef. 2:4.

12. Gurhi okuyerekana obwonjo ene kwakarhurheganya oku malibuko madarhi? (Amafulûlo 13:16, 17)

¹² Bulya gurhi okuyerekana obwonjo kwayish’iba kwa bulagirire omu mango g’amalibuko madarhi? Ebibliya eyerekine oku abalahira okulunga okuboko eby’epolitike bahikirwa n’amazibu ene n’omu mango g’amalibuko madarhi. (Osome Amafulûlo 13:16, 17.) Bene wirhu na bali birhu banaba balagirire oku burhabale lyo bahikiriza amalagirire gabo. Hano Omwami wirhu, Kristu Yezu, ayish’itwira abantu olubanja, rhulonzize arhurhimane rhuli rhwayerekana obwonjo anarhulalike ‘rhucigandalize omu Bwami.’​—Mt. 25:34-40.

OZIBUHYE OBUZIGIRE BWAWE

13. Nk’oku biyerekinwe omu Abaroma 15:7, gurhi Abakristu b’omu myaka igana mirhanzi bazibuhizemwo obuzigire bwabo?

¹³ Obuzigire co cali cimanyiso cakag’iyerekana Abakristu b’omu myaka igana mirhanzi. Cikone, ka kwali kulembu kuli bo okuyerekana obuzigire? Orhanye oku bantu bali lubero bali omu cigamba c’e Roma. Baguma muli bo bali Bayahudi, bal’iyigirizibwe okurhumikira Irhegeko lya Musa, cikone abandi bali b’omu gandi mashanja, banakuliraga omu nkomedu ziri lubero. Bibonekine oku Bakristu baguma na baguma bali bajà cikone abandi bali bantu bal’igwerhe oluhûma, nkaba baguma na baguma muli bo ciru bal’igwerhe abajà babo. Gurhi abo Bakristu bakahimiremwo ezo mbero zoshi zali egarhi kabo n’okuzibuhya obuzigire bwabo? Entumwa Paolo yabahûna ‘bakayankirirana bone na nnene.’ (Osome Abaroma 15:7.) Bici al’ilonzize okuderha? Oluderho lwahindwirwe “kuyankirira” luhugwîre okuyegereza muntu mulebe n’olukogo, nk’okumuyegereza omu nyumpa yawe erhi kumuyemera omu mubalè gw’abîra bawe. Kwa lwiganyo, Paolo abwizire Filemoni gurhi akayankiriremwo Onezimo mujà watorokaga. Abwira Filemoni ntya: “Omuyankirire nk’oku wankanyankirira.” (Fm. 17) Na Akila na Prisila bayankirire Apolo orhal’imanyire binji akabo lugenda idîni ly’Ecikristu, omu ‘kumuhêka haguma nabo.’ (Ebj. 18:26, Mashi Bible) Ahali h’okuleka ezo mbero zali egarhi kabo zirhume bagabikanamwo, abo Bakristu bahimire ezo mbero banayankirirana bone na nnene.

14. Gurhi Anna n’iba bayerekinemwo obuzigire?

¹⁴ Nirhu rhwanayeresa bene wirhu na bali birhu obuzigire omu kuba bîra babo n’okukageza akasanzi haguma nabo. Kanji-kanji, oko kwanabashumya nabo barhuyerese obuzigire. (2 Kr. 6:11-13) Rhuganirire ebi Anna n’iba bacibwinire. Kasanzi kasungunu enyuma z’okurhumwa omu eneo mpyahya y’omu Afrique de l’Ouest omu mukolo gwabo gw’obumisiyonere, obulwala bw’okuyahukira bw’e COVID-19 bwarhondera. Enyanya z’obo bulwala, barhakahashire okurhimanana n’abantu b’omu cigamba cabo busu oku busu n’obo baciri bahyahya. Gurhi oyo mulume na mukage bakayerekinemwo obuzigire bwabo? Bakag’ikolesa e vidéoconférence lyo baganira na bene wabo na bali babo b’eyo munda n’okubabwira kunganaci balonzize babamanye bwinja. Emilala yahumwa oku murhima yanakabahamagala kanji-kanji n’okubarhumira ama mesaje. Bici byarhumire abo bamisiyonere bajira okwabo koshi lyo bamanya bene wabo na bali babo b’omu cigamba cabo cihyahya? Anna adesire ntya: “Ntakayibagira ebijiro by’obuzigire bene wirhu na bali birhu banyeresire nie n’omulala gwani omu kasanzi kinja n’omu kasanzi kabi, n’oko kwanshumize nkayerekana obuzigire.”

15. Bici wakaciyigiriza kugerera olwiganyo lwa Vanessa lugenda okuzigira bene wirhu na bali birhu boshi? (Olole n’enfoto.)

¹⁵ Banji muli rhwe bali omu bigamba bibamwo bene wirhu na bali birhu banji bagwerhe enkomedu ziri lubero n’obumuntu buli lubero. Rhwanazibuhya obuzigire bwirhu kuli bo boshi omu kusegeza obwenge oku morhere gabo minja. Mwali wirhu muguma ohamagalwa Vanessa, okolera omu Nouvelle-Zélande, akag’ibona oku kwali kuzibu okuyumvikana na bantu baguma na baguma b’omu cigamba cabo. Cikone buzinda ahiga okukageza kasanzi kanji haguma n’abagwerhe amorhere gakag’imugayisa, ahali h’okubayaka. Okujira ntyo kwamurhabala bwenene ly’abona ebirhuma Yehova abazigira. Adesire ntya: “Kurhenga amango ibanie abaga mwangalizi w’omuzunguko, rhunageze akasanzi haguma na bene wirhu na bali birhu banji bwenene bagwerhe amorhere gali lubero, nankola mbona oku kuli kulembu okuyumvikana nabo. Lero nkola mba nzigire emberuluka. Bibonekine oku Yehova naye aba azigire emberuluka bulya abantu ayemerire bamuharamye boshi baba lubero ngasi muguma n’owundi.” Erhi rhuciyigiriza okubona abandi nk’oku Yehova ababona, rhunayerekane oku rhubazigire.​—2 Kr. 8:24.

16. Bulya gurhi obuzigire bwayish’iba bwa bulagirire omu mango g’amalibuko madarhi? (Olole n’enfoto.)

¹⁶ Obuzigire bwayish’iba bwa bulagirire omu mango g’amalibuko madarhi. Hano ago malibuko garhondera, ngahi rhwayish’ilongeza obulanzi? Rhuganirire ebi Yehova abwiraga abantu bage bajire amango evile ya mîra y’e Babiloni yarheragwa. Aderha ntya: “Kanya, lubaga lwani, oje omu nyumpa zawe [byumpa byawe by’endani, NWT], onaciyigalirekwo enyumvi; orhang’icifulika kasanzi kasungunu kuhika obukunizi bugere.” (Iz. 26:20) Bibonekine oku ezo nderho nirhu zirhuyerekire rhwe rhwayish’ilembera amalibuko madarhi. Nkaba ebyo “byumpa by’endani “ bishushanyize ebigamba birhu. Omu mango g’amalibuko madarhi, rhwayish’ipata obulanzi Yehova alaganyize omu kugendekera rhwaba n’ecinyabuguma haguma n’abirhu bemezi. Co cirhumire ene, rhugwasirwe rhucihangane bwenene, arhali lyo rhulembera bene wirhu na bali birhu kone cikone kandi lyo rhubazigira. Okujira ntyo kwanayish’irhuma rhwayokoka!

OCIRHEGANYE ENE

17. Erhi rhwakacirheganya ene, bici rhwayish’ihasha okujira omu mango g’amalibuko madarhi?

¹⁷ “Olusiku ludârhi lw’obukunizi bwa Nyakasane [Yehova, NWT]” kayish’iba kasanzi kazibu bwenene kuli bene bantu boshi. (Sof. 1:14, 15) Abantu ba Yehova nabo bayish’ihikirwa n’amazibu. Cikone erhi rhwakacirheganya ene, rhwayish’ihasha okurhulirira n’okurhabala abandi. Rhwayish’ihasha okulembera ngasi mazibu gakarhuhikira. Hano bene wirhu na bali birhu baba bali balibuka, rhwayish’ijira okwirhu koshi lyo rhubarhabala omu kubayeresa obwonjo n’okubahikirigiza amalagirire gabo. N’erhi rhwakaciyigiriza okuzigira bene wirhu na bali birhu ene, rhwayish’ibayeresa obuzigire omu mango gayisha. Buzinda, Yehova ayish’irhuhemba omu kurhuha obuzine bw’ensiku n’amango omw’igulu obuhanya boshi n’amalibuko byayish’iyibagirwa.​—Iz. 65:17.