Oyige Olwiganyo lwa Yehova, Obe wa Lugero

1. Omu njira nci Abakristu bagwasirwe babe nka murhi? (Olole n’enfoto.)

“AGARHI kalembu karhakubwa na mpusi.” Ogo mugani guyerekine oku ly’emirhi egendekera yabêra eyimanzire, eshinganine ekagomba amango empusi eri yahusa bwenene. Lyo rhugendekera bwinja omu hali y’ekiroho, nirhu rhugwasirwe rhube babidu okugomba erhi kukacipatanisa n’ehali. Gurhi rhwakajiramwo ntyo? Rhugwasirwe rhube ba lugero omu kucipatanisa n’ehali erhi akanga kirhu kakashanja n’omu kukakenga entanya n’emihigo y’abandi.

2. Morhere gahi gakarhurhabala lyo rhucipatanisa n’ehali erhi hakaba empindulo omu kalamo kirhu, na bici rhwaganirira mw’eci cigabi?

² Rhuli bakozi ba Yehova, rhulonzize rhube ba lugero. Kandi rhulonzize rhube birhohye na ba bwonjo. Mw’eci cigabi, rhwaganirira gurhi ago morhere garhabiremwo Bakristu baguma na baguma lyo bacipatanisa n’empindulo zabahikire omu kalamo. Kandi rhwabona gurhi ago morhere gakarhurhabalamwo. Burhangiriza, lekagi rhuciyigirize kugerera Yehova na Yezu, nyiganyo nyinja bwenene z’okuba ba lugero.

YEHOVA NA YEZU BABA BA LUGERO

3. Gurhi rhumanyiremwo oku Yehova aba wa lugero?

³ Yehova ahamagirwe “Ibuye” bulya aba asimisire, arhanadundagana. (Lush. 32:4) Ciru akaba ntyo, kandi aba wa lugero. Oku ebintu bigendekera byajirikana, ko na Nnâmahanga wirhu agendekera acipatanisa n’ehali ly’ajira omuhigo gwage guhikirizibwe. Yehova alemire bene bantu oku nshusho yage anabalema n’obuhashe bw’okucipatanisa n’akanga erhi hakaba empindulo omu kalamo kabo. Arhuhîre amakanuni g’Ebibliya g’obwalagale garhurhabala lyo rhurhôla emihigo y’obwenge omu ngasi kanga kakarhuhikira. Olwiganyo lwa Yehova n’amakanuni gage birhuyemezize n’obwalagale oku ciru akaba aba “Ibuye,” kandi aba wa lugero.

4. Ohâne olwiganyo luyerekine oku Yehova aba wa lugero. (Bene-Levi 5:7, 11)

⁴ Enjira za Yehova ziba nyimana zinaba za lugero. Arhahûna bene bantu binji bwenene. Kwa lwiganyo, rhuganirire gurhi Yehova ayerekinemwo olugero okubiyerekire Abaisraheli. Arhahûnaga Abaisraheli oku bakahâna nterekêro nguma boshi, babe bali bagale erhi bakenyi. Omu kanga kaguma na kaguma, al’iyemerire ngasi muntu akahâna enterekêro kushimbana n’obuhashe bwage.​—Osome Bene-Levi 5:7, 11.

5. Ohâne olwiganyo luyerekine oku Yehova aba mwirhohye na wa bwonjo.

⁵ Obwirhohye bwa Yehova n’obwonjo bwage binamushumye abe wa lugero. Kwa lwiganyo, Yehova ayerekine obwirhohye amango ali hofi ashereze abantu bagalugalu b’omu Sodoma. Kugerera bamalahika bage, Yehova arhegeka omulume mushinganyanya Loti oku ayakire omu eneo y’entondo. Loti ayoboha okuja eyo munda. Muli ntyo ayinginga Yehova oku amuyemerere ye n’omulala gwage bayakire e Sowari, vile nsungunu Yehova al’ihizire okushereza. Yehova akasegize oku kuhika Loti ajire ebi anamurhegekaga byoshi. Lubero n’oko, ayemera ebi Loti amuhûnaga ciru akaba okujira ntyo kwakarhumire arhashereza evile y’e Sowari. (Murh. 19:18-22) Magana g’emyaka enyuma z’aho, Yehova ayumviza Abaninawi obwonjo. Arhuma omulebi Yona ayalagaze obushereze bwal’iyegerire bw’eyo vile n’abantu bagalugalu bal’ilamiremwo. Cikone erhi Abaninawi baciyunjuza, Yehova abayumviza obwonjo, arhanacisherezagya eyo vile.​—Yon. 3:1, 10; 4:10, 11.

6. Oganirire gurhi Yezu ayiziremwo olwiganyo lwa Yehova lw’okuba wa lugero.

⁶ Yezu ayizire olwiganyo lwa Yehova lw’okuba wa lugero. Arhumirwe hanw’igulu ly’ahubiri “abanabuzi bahezire b’Israheli.” Cikone ayerekine olugero omu kuhikiriza ogo mukolo. Mango maguma, mukazi muguma orhali Muisraheli amuyinginga oku afumye omwali ‘waliyisirwe na Shetani.’ Enyanya z’obwonjo bwage, Yezu ajira nk’oku oyo mukazi anamuhûnaga, afumya omwali. (Mt. 15:21-28) Rhuganirire olundi lwiganyo. Oku murhondero gw’omukolo gwage, Yezu aderha ntya: “Owandahire . . . , nani namulahire.” (Mt. 10:33) Cikone, k’alahire Petro wamulahiraga kasharhu koshi? Nanga. Yezu abwine oku Petro al’iciyunjuzize, ananal’igwerhe obuyemere. Enyuma z’okufûlwa, Yezu abonekera Petro anamuyemeza n’obwalagale oku amubabalire anacimuzigire.​—Lk. 24:33, 34.

7. Kushimbana n’Abafilipi 4:5, gurhi rhulonzize abandi bakarhubona?

⁷ Rhwabwine oku Yehova Nnâmahanga na Yezu Kristu baba ba lugero. Gurhigi na nirhu? Yehova alonzize rhube ba lugero. (Osome Abafilipi 4:5.) Mpindulo nguma y’Ebibliya ehindwire olo lwandiko ntya: “Oyerekane kugerera olugenzi lwawe oku oba wa lugero.” Rhwanacidosa ntya: ‘K’abantu banabone oku mba wa lugero, wa kuyemera entanya z’abandi, na wa kulembera? Erhi ka banambone nka muntu mukali na ntabwirwa? Erhi ka nanseze abandi bajire ebintu nk’oku ntanyize bishinganine bijirwe? Erhi ka nanyumvirhize abandi n’okuyemera ebi balonzize nka bihashikine?’ Oku rhugendekera rhwayerekana olugero ko rhunaba rhuli rhwayiga olwiganyo lwa Yehova na Yezu. Lekagi rhuganirire hali ibirhi rhugwasirwe rhubemwo ba lugero; amango akanga kirhu kamashanja n’amango entanya n’emihigo y’abandi eri lubero n’eyirhu.

OKU RHWAKABAMWO BA LUGERO AMANGO AKANGA KIRHU KAMASHANJA

8. Bici byakarhurhabala lyo rhuba ba lugero amango akanga kirhu kamashanja? (Olole n’amahugûlo g’idako.)

⁸ Okuba wa lugero kuhiziremwo okucipatanisa n’ehali amango akanga kirhu kamashanja. Ezo mpindulo zanarhulerhera amazibu rhurhal’irhanyizeko. Rhwanahikirwa n’akanga k’obulwala buhûnyire rhubukwe duba-duba. Erhi buzira kulaliza, hanaba empindulo okubiyerekire obuhirhi bw’ecihugo erhi omu by’epolitike omu eneo rhulamiremwo, n’oko kwanarhuma akalamo kirhu kaba kazibu bwenene. (Muh. 9:11; 1 Kr. 7:31) Ciru n’empindulo omu mukolo gw’eciteokrasi zanarhangula obuyemere bwirhu. Ciru mpindulo zihi zakarhuhikira, rhwanahasha okucipatanisa n’akanga kahyahya erhi rhwakajira ebi bintu bini bikulikire: (1) oyemere oku akanga kawe kakola kali lubero, (2) osegeze obwenge oku mango gali embere, (3) okasegeza obwenge bwawe oku bintu binja, na (4) okarhabala abandi.b Lekagi rhuganirire nyiganyo nguma na nguma z’ebyahikire abantu omu kalamo lyo rhubona gurhi okujira ebyo bintu bini kwakarhabala.

9. Gurhi mulume muguma na mukage bamisiyonere balwisizemwo amazibu barhal’irhanyizeko?

⁹ Oyemere oku akanga kawe kakola kali lubero. Emanuele na Francesca bal’irhumirwe omu mukolo gw’obumisiyonere omu cindi cihugo. Erhi barhondera okuyiga olulimi n’okudekerera omu cigamba cabo cihyahya, obulwala bw’e COVID-19 bwarhibuka byanahûna barhaciyegeraga abandi. N’enyuma z’aho nnina wa Francesca akanuka. Francesca al’ilonzize bwenene abe haguma n’omulala gwage, cikone enyanya z’obo bulwala bw’okuyahukira birhakahashikine abalame. Gurhi ahashiremwo okulwisa ago mazibu g’okuvuna omurhima? Burhangiriza, Emanuele na Francesca bombi haguma bakahûna Yehova obwenge kugerera isala lyo barhakag’ihangayikira eby’irhondo. Yehova ashuzize oku masala gabo kugerera ebiryo by’ekiroho bakag’ipata oku kasanzi kashinganine. Kwa lwiganyo, bahâbirwe omurhima kugerera enganîro za mwene wirhu muguma waderhaga ntya omu video: “Oku rhuyemera duba-duba akanga kahyahya ko n’omwishingo gwirhu gurhugalukira duba-duba, ko rhunaba n’obulyo bw’okukolesa bwinja ako kanga kahyahya.”c Bwa kabirhi, bashumibwa okuba na bulenga bunji bw’okuhubiri kugerera etelefone, ciru banarhondeza ifunzo ly’Ebibliya. Bwa kasharhu, balesire bene wabo na bali babo babarhabale banavuga omunkwa oku buzigire babayeresire. Mwali wirhu muguma wakag’irhanya bwenene ayusize mwaka muguma ali abarhumira ngasi lusiku emesaje nyofi erimwo entanya z’Amandiko. Nirhu erhi rhwakayemera akanga kirhu kahyahya, rhwanashagalukira ebi rhugwerhe obuhashe bw’okujira.

10. Gurhi mwali wirhu muguma acipatanisizemwo n’empindulo nnene yamuhikiraga omu kalamo?

¹⁰ Osegeze obwenge oku mango gali embere, n’oku bintu binja. Christina, mwali wirhu muguma w’e Roumanie olama omu Japon, avunika omurhima erhi ecigamba cabo c’Ecingereza akag’ijamwo cishandwa. Cikone, arhagendekeraga asegeza obwenge kw’ebyo byabaga. Lubero n’oko, ahiga okujira ebi akanahashire byoshi omu cigamba c’olulimi lw’Ecijaponé n’okuhubiri n’obuhashe bwage boshi mw’olo lulimi. Ahûna owabo munyakazi wa mîra amurhabale ly’amanya okuderha olo lulimi bwinja. Oyo mukazi ayemera okukolesa Ebibliya n’ebroshire Oshagalukire Akalamo Ensiku n’Amango! ly’ayigiriza Christina Ecijaponé. Oko kurharhabalaga Christina kone ly’amany’iderha olulimi lw’Ecijaponé bwinja, cikone kandi kwarhabala oyo mukazi arhondera okushagalukira okuli. Erhi rhwakasegeza obwenge oku mango gali embere n’oku bintu binja, empindulo zakarhuhikira buzira kulaliza zanarhulerhera emigisho rhurhal’irhanyizeko.

11. Gurhi mulume muguma na mukage balwisizemwo amazibu bagwerhe g’okubula ensaranga?

¹¹ Okarhabala abandi. Mulume muguma na mukage balamire omu cihugo omukolo gwirhu guhanzibwemwo barhondera okuba n’amazibu g’okubula ensaranga erhi obuhirhi bw’ecihugo cabo busharha. Bici byabarhabire lyo bacipatanisa n’akanga kahyahya? Burhangiriza, barhôla mihigo milebe lyo balama akalamo karhahûnyiri bintu binji. Buzinda, ahali h’okusegeza obwenge oku mazibu gabo bo nnene, bahiga okubusegeza oku kurhabala abandi omu kugendekera bajira binji omu mukolo gw’amahubiri. (Ebj. 20:35) Omulume adesire ntya: “Okuba na binji bya kujira omu mukolo gw’amahubiri kwarhuma rhwaba na kasanzi kasungunu k’okusegeza obwenge oku ntanya mbi, kwanarhuma rhwaba na kasanzi kanji k’okubusegeza oku kujira obulonza bwa Nnâmahanga.” Amango akanga kirhu kamashanja, rhugwasirwe rhukengere oku kuli kwa bulagirire bwenene rhugendekere rhwarhabala abandi, bwenene kugerera omukolo gwirhu gw’amahubiri.

12. Gurhi olwiganyo lw’entumwa Paolo lwakarhurhabala lyo rhucipatanisa n’ehali omu mukolo gwirhu gw’amahubiri?

¹² Omu mukolo gwirhu gw’amahubiri, rhushinganine rhukacipatanisa n’ehali. Abantu rhurhimanana nabo baba bagwerhe obwemere buli lubero n’entanya ziri lubero, banaba barhenzire ahantu hali lubero. Entumwa Paolo yakag’icipatanisa n’ehali, na nirhu rhwanayiga binji kugerera olwiganyo lwage. Yezu ajijire Paolo “ntumwa y’abarhali Bayahudi.” (Rm. 11:13, Mashi Bible) Mw’ogo mukolo gwage, Paolo akag’ihubiri Abayahudi, Abagiriki, abasomire bwenene, abantu barhalengeriri, abarhambo, n’abami. Ly’ahuma oku mirhima y’abo bantu bali lubero, Paolo acijijire ‘byoshi kuli boshi.’ (1 Kr. 9:19-23) Akag’irhanya oku bûko bw’abumvirhiza bage, aha bakuliraga, n’obwemere bwabo n’oko kwamurhabala ly’akamanya enjira akolesa ly’ahubiri ngasi muntu. Na nirhu rhwanaba n’amalehe minja omu mukolo gwirhu gw’amahubiri erhi rhwakakacipatanisa n’ehali n’okurhanya lugenda enjira nyinja rhwakahubirimwo ngasi muntu.

OKAKENGA ENTANYA Z’ABANDI

13. Mazibu gahi gaganirirwe omu 1 Abakorinti 8:9 rhwakayaka erhi rhwakakakenga entanya z’abandi?

¹³ Kandi olugero lunarhurhabale rhukenge entanya z’abandi. Kwa lwiganyo, bali birhu baguma na baguma baba basimire okuciyinjihya (kucipamba), cikone abandi barhasima okujira ntyo. Bakristu baguma na baguma banashagalukire okunywa amamvu n’olugero, cikone abandi baba bahizire okurhaganywa ciru n’ehitya. Abakristu boshi baba balonzize babe n’amagala minja, cikone banacishoge enjira ziri lubero z’okubukwa. Erhi ensiku zoshi rhwakabona nk’ebi rhusima byo binja n’okujira okwirhu koshi lyo rhubiyemeza bene wirhu na bali birhu, rhwanasarhaza abandi n’okurhuma rhwagabikanamwo. Kobinali rhurhakalonza okujira ntyo! (Osome 1 Abakorinti 8:9; 10:23, 24) Lekagi rhuganirire nyiganyo ibirhi ziyerekine gurhi okukolesa amakanuni g’Amandiko kwakarhurhabala lyo rhuba ba lugero n’okugendekeza omurhûla.

14. Makanuni gahi g’Ebibliya gashinganine garhulongoze amango rhuli rhwarhôla emihigo lugenda emyambalo yirhu n’eby’okuciyinjihya?

¹⁴ Emyambalo n’eby’okuciyinjihya. Ahali h’okurhuhiriraho amarhegeko makali lugenda ebi rhushinganine rhuyambale, Yehova arhuhîre amakanuni rhwakakulikira. Rhugwasirwe rhuyambale omu njira eshinganine abakozi ba Nnâmahanga, enayerekine “olugero.” (1 Tm. 2:9, 10; 1 Pt. 3:3) Co cirhumire rhurhayambala omu njira yakarhuma abandi barhusegezako obwenge. Kandi amakanuni g’Ebibliya ganarhabala abagula bayake okucihiriraho amakanuni gabo bonene lugenda emyambalo n’enjira z’okumomwa erhi okusukwa. Kwa lwiganyo, abagula omu cigamba ciguma bal’ilonzize barhabale misole miguma yali yamayahukirwa n’enjira y’okumoma emviri zibe nyofi cikone zirhashibirirwi. Gurhi abo bagula bakarhabiremwo eyo misole buzira kubahiriraho irhegeko? Mwangalizi w’omuzunguko ahanula abagula babwire abo bene wirhu ntya: “Erhi wakaba oli oku jukwa n’abumvirhiza bawe basegeze obwenge bwenene k’oku oyosire ahali h’okubusegeza bwenene kw’ebi oli wababwira, wanamanya oku ogwerhe amazibu lugenda emyambalo yawe n’okuciyinjihya kwawe.” Ago mahugûlo masungunu gayusa ago mazibu buzira bulagirire bw’okuhiraho irhegeko.d

15. Marhegeko na makanuni gahi g’Ebibliya garhulongoza amango rhwarhôla emihigo lugenda eby’okubukwa? (Abaroma 14:5)

¹⁵ Eby’okubukwa. Ngasi Mukristu agwasirwe acirhôlere omuhigo gwage yenene lugenda oku ashibiriramwo amagala gage. (Gl. 6:5) Amango Abakristu barhôla emihigo lugenda eby’okubukwa, baba bashinganine barhumikire amarhegeko g’Ebibliya garhuhûnyire rhucilange n’omuko n’eby’obukurungu. (Ebj. 15:20; Gl. 5:19, 20) Lubero n’oko, ngasi muntu anacishoga eby’okubukwa akayemera. Bantu baguma na baguma banayegemere enjira z’okubukwa abanganga bamanyire, abandi banacishoge ezindi njira z’okubukwa. Ciru rhwakaba rhugwerhe ntanya zihi lugenda njira ndebe y’okubukwa, rhushinganine rhukenge oluhûma bene wirhu na bali birhu bagwerhe lw’okucirhôlera emihigo bonene lugenda eby’okubukwa. Lugenda oko, rhushinganine rhukakengera ebi bintu bini bikulikire: (1) Obwami bwa Nnâmahanga bone bwayish’ifumya endwala z’abantu loshi-loshi. (Iz. 33:24) (2) Ngasi Mukristu agwasirwe ‘ayemere bwinja-bwinja’ ebiri binja kuli ye. (Osome Abaroma 14:5.) (3) Rhurhatwira abandi olubanja rhurhanajira akantu koshi-koshi kakabasarhaza. (Rm. 14:13) (4) Abakristu banayerekane obuzigire barhanabona oluhûma bagwerhe lw’okucirhôlera emihigo oku lo lw’obulagirire kulusha ecinyabuguma c’ecigamba. (Rm. 14:15, 19, 20) Erhi rhwakakengera ebyo bintu bini, rhwanagendekera rhwaba n’obwîra bwa hofi-hofi haguma na bene wirhu na bali birhu n’okugendekeza omurhûla omu cigamba.

16. Gurhi omugula akayerekanamwo olugero amango ali haguma n’ababo bagula?

¹⁶ Abagula bagwasirwe bayerekane olwiganyo lwinja omu kuba ba lugero. (1 Tm. 3:2, 3) Kwa lwiganyo, omugula arhashinganini akarhanya mpu entanya zage zo zayemerwa ensiku zoshi mpu bulya kone agwerhe myaka minji kulusha abandi bagula. Anahugûkwe oku iroho lya Yehova lyanashumya ngasi muntu omu mbaraza y’abagula ly’ahâna entanya zakabarhabala barhôle omuhigo mwinja. N’erhi akaba nta kanuni k’Ebibliya kavunyirwe, abagula b’olugero banabe babidu okulunga okuboko omuhigo guyemirwe na bagula banji omu mbaraza ciru akaba bakalonzize barhôle omuhigo guli lubero.

OBUNGUKE BW’OKUBA WA LUGERO

17. Gurhi rhuyungukamwo omu kuba ba lugero?

¹⁷ Abakristu banabe na bunguke bunji omu kuba ba lugero. Rhunashagalukire obwîra bwinja haguma na bene wirhu na bali birhu, n’ecigamba cinabe n’omurhûla. Rhunashagalukire amorhere n’enkomedu ziri lubero z’abantu ba Yehova. Na kandi, kuba kwinja okumanya oku ciru akaba rhweshi rhuba lubero, rhunaharamye Nnâmahanga nka mulala gugwerhe ecinyabuguma. N’akantu k’obulagirire bwenene, rhunashagaluke omu kumanya oku rhuli rhwayiga olwiganyo lwa Yehova, Nnâmahanga wirhu w’olugero.