Obulangalire Bwawe Lugenda Amango Gayisha Bwahikirira

1. Bulya gurhi Abrahamu agendekire alangalira oku aba n’omwana-rhabana?

YEHOVA al’ilaganyize omwîra wage Abrahamu oku amashanja goshi g’igulu gakagishirwe kugerera iburha lyage. (Murh. 15:5; 22:18) Bulya Abrahamu al’igwerhe obuyemere busezire muli Nnâmahanga, al’iyemire n’obwalagale oku eciragane ca Nnâmahanga cakahikirire. Ciru akaba ntyo, erhi Abrahamu agwerhe myaka 100 na mukage myaka 90, oyo mulume na mukage bishwekerezi barhal’iciba n’omwana. (Murh. 21:1-7) Cikone, Ebibliya edesire ntya: “Omu kulangalira, . . . Abrahamu ayemire, na ntyo ahinduka ishe w’amashanja mwandu, nk’oku âli abwizirwe.” (Rm. 4:18) Omanyire oku obulangalire bwa Abrahamu bwahikirire. Aba ishe wa Izaki, mwana alangaliraga omu kasanzi kanji. Bulya gurhi Abrahamu al’iyemire n’obwalagale oku Yehova akahikirizize eco ciragane cage?

2. Bulya gurhi Abrahamu al’iyemire n’obwalagale oku eciragane ca Yehova cakahikirire?

² Enyanya z’obwîra bwa hofi-hofi na bwago-bwago agwerhe haguma na Yehova, Abrahamu “âli amanyire buzira karhinda emurhima oku Nyamuzinda agwerhe obuhashe bw’okuyunjuza eciragane cage.” (Rm. 4:21) Yehova ayemire Abrahamu anamuhamagala mushinganyanya erhi buyemere bwage burhuma. (Yk. 2:23) Nk’oku biyerekinwe omu olwandiko lw’Abaroma 4:18, Abrahamu al’igwerhe obuyemere n’obulangalire. Lekagi rhuganirire ebi entumwa Paolo yaderhaga lugenda obulangalire biri omu citabu c’Abaroma cigabi ca 5.

3. Bici Paolo ahugwîre lugenda obulangalire?

³ Paolo ahugwîre bulya gurhi rhwakayemera n’obwalagale oku “obulangalire burhavuna murhima.” (Rm. 5:5, NWT) Kandi arhurhabire rhuhugûkwe gurhi obulangalire bwirhu bw’Ecikristu bwakazibuhamwo. Orhanye kw’ebi wacibwinire wene, amango rhuli rhwaganirira ebi Paolo aderhaga omu lwandiko lw’Abaroma 5:1-5. Omu kujira ntyo, nkaba wanahikira aha wahugûkwa oku obulangalire bwawe bw’Ecikristu bwagendekire bwazibuha omu kasanzi ka myaka minji. Kandi ogu mwanzi gwayerekana gurhi wakajira ly’obulangalire bwawe bugendekera bwazibuha kulusha oku buyosire ene. Lekagi rhurhang’iganirira obulangalire bwinja bwenene Paolo aderhaga burhakavuna omurhima.

OBULANGALIRE BWIRHU BWINJA BWENENE

4. Bici biganirirwe omu Abaroma 5:1, 2?

⁴ Osome Abaroma 5:1, 2, Mashi Bible. Paolo ayandikiraga ecigamba c’e Roma ezo nderho. Bene wirhu na bali birhu ba mw’eco cigamba bayizire lugenda Yehova na Yezu, baba n’obuyemere, banahikira okuba Bakristu. Co carhumire Nnâmahanga ‘abajira bashinganyanya erhi bwemere [bwabo] burhuma,’ anabashiga amavurha kugerera iroho litagatifu. Bagwerhe obulangalire bwinja bwenene banal’iyemire n’obwalagale oku bwahikirira.

5. Bulangalire buhi Abakristu bashige amavurha bajira?

⁵ Buzinda Paolo ayandikire Abakristu bashige amavurha b’omu cigamba c’e Efezi lugenda obulangalire bahâbagwa. Obo bulangalire bwal’ihiziremwo okuhâbwa ‘akashambala kabo babikirwe omu karhi k’abatagatifu.’ (Ef. 1:18) Na kandi Paolo abwizire Abakristu b’e Kolosi ngahi obulangalire bwabo bwakahikirigizibwe. Abuhamagala ‘bulangalire babikîrwe omu mpingu.’ (Kl. 1:4, 5) Muli ntyo, obulangalire bw’Abakristu bashige amavurha, kuli kufûlwa lyo bahâbwa obuzine bw’ensiku n’amango e mpingu, emunda bayish’irhegeka haguma na Kristu.—1 Ts. 4:13-17; Maf. 20:6.

6. Bici mwene wirhu muguma mushige amavurha adesire lugenda obulangalire bwage?

⁶ Abakristu bashige amavurha baba bashagalukire obo bulangalire. Omu mwaka gwa 1991, mwene wirhu muguma wakag’ihamagalwa Frederick Franz, adesire kurhenga oku murhima ntya: “Obulangalire bwirhu, bwahikirira kobinali na ngasi muguma muli rhwe bantu 144 000 ahâbwa ebi Nnâmahanga arhulaganyize. Oluhembo lwirhu lwayish’iba lwinja bwenene kulusha akandi kantu koshi-koshi rhugwerhe.” Enyuma z’okukolera Nnâmahanga n’obwishwekerezi myaka minji, Mwene Wirhu Franz aderha ntya: “[Rhucigendekire] rhwabona obulangalire bwirhu oku buli bwa bulagirire bwenene. . . . Rhuli rhwabushagalukira omu kasanzi koshi rhugendekire rhwabulindirira. Kali kantu rhushinganine okulinda ciru kakarhôla omuliyoni gw’emyaka. Nshagalukire bwenene obulangalire bwirhu kulusha agandi mango goshi.”

7-8. Bulangalire buhi banji ba muli rhwe bagwerhe? (Abaroma 8:20, 21)

⁷ Bantu banji bali baharamya Yehova ene bagwerhe obulangalire buli lubero. Obo buli bulangalire Abrahamu agwerhe, ko kuderha okuba n’akalamo k’ensiku n’amango hanw’igulu idako ly’Obwami bwa Nnâmahanga. (Hb. 11:8-10, 13) Paolo ayandisire lugenda obo bulangalire bwinja bwenene. (Osome Abaroma 8:20, 21.) Erhi oyiga oburhangiriza lugenda eciragane c’Ebibliya c’amango gayisha, bici washagalukire bwenene lugenda obo bulangalire? Ka kwali kumanya oku lusiku luguma wayish’iba mwimana, onalame buzira kujira ecaha? Erhi ka washagalukire bwenene okumanya oku abazigirwa bawe bafîre bayish’ifûlwa n’okulama omu paradizo hanw’igulu? Oko kwarhumire waba na binji bya kulindirira bulya ‘ocilangalire.’

⁸ Rhube rhuli rhwalindirira okushagalukira akalamo k’ensiku n’amango omu mpingu erhi hanw’igulu, rhugwerhe obulangalire bwinja bwenene burhuhîre ecirhumire cinja c’okushagaluka. N’obo bulangalire bwirhu bw’okushagalusa bwanazibuha ciru bwenene. Paolo ahugwîre gurhi oko kwakahashikanamwo. Lekagi rhuganirire ebi ayandisire okubiyerekire obulangalire bwirhu. Okujira ntyo kwarhurhabala rhuyemere n’obwalagale oku obulangalire bwirhu bwanagendekera bwazibuha n’oku nta mango bwakarhuvuna omurhima.

OKU OBULANGALIRE BWIRHU BUZIBUHAMWO

9-10. Nk’oku olwiganyo lwa Paolo luyerekine, bici Abakristu bakalangalira? (Abaroma 5:3) (Olole n’enfoto.)

⁹ Osome Abaroma 5:3. Paolo ayerekine oku amalibuko ganazibuhya obulangalire bwirhu. Nkaba oko kwanarhusomeza. Kobinali, abanafunzi ba Kristu boshi bashinganine bamanye oku banahikirwa n’amalibuko. Rhuganirire olwiganyo lwa Paolo. Abwizire Abakristu Batesalonika ntya: “Amango rhwaciri haguma, rhwamubwira bulya nti rhukol’ilibuka, kwo byanayishirig’iba.” (1 Ts. 3:4, Mashi Bible) Ayandikira n’Abakristu Bakorinti ntya: “Bene wirhu, rhurhalonzizi muhabe amalibuko rhwabwine. . . . Ciru rhurhâli rhucilangalire nti rhwabêramwo omuka.”—2 Kr. 1:8; 11:23-27.

¹⁰ Abakristu b’ene nabo bashinganine bamanye oku banahikirwa n’amalibuko omu njira ndebe. (2 Tm. 3:12) Gurhigi nawe? K’amalibuko gakola gakuhikire enyanya z’okuba n’obuyemere muli Yezu, n’okumukulikira? Nkaba abîra bawe n’abantu b’omulala gwawe bakushekire. Nkaba ciru bakujirire omu njira y’obukali. K’omuhigo gwawe gw’okuba mwikubagirwa omu bintu byoshi gwakudwirhire amazibu ebwa kazi? (Hb. 13:18) K’okola ohagalisirwe n’oburhegesi bw’ecihugo cinyu enyanya z’okuganirira abandi obulangalire bwawe? Cikone, Paolo adesire oku rhwanashagaluka ciru rhwakahikirwa na malibuko gahi. Bulya gurhi?

11. Bulya gurhi rhushinganine rhuhige okulembera ngasi mazibu?

¹¹ Rhwanashagaluka ciru akaba rhuli rhwalibuka bulya rhumanyire oku ago malibuko garhurhabala rhube na borhere bulebe bw’obulagirire. Olwandiko lw’Abaroma 5:3 ludesire oku, “amalibuko galerha obushibirizi [obulembedu, NWT].” Abakristu boshi bahikirwa n’amalibuko, co cirhumire boshi bagwasirwe babe n’obulembedu. Rhushinganine rhuhige okulembera ngasi mazibu gakarhuhikira. Erhi rhwakajira ntyo, lyone rhwakahash’ibona okuhikirizibwa kw’obulangalire bwirhu. Rhurhalonzizi rhube nk’abantu Yezu akag’irhanyako erhi aganirira emburho zarhogeraga oku mabuye. Oku murhondero bayemera oluderho n’omwishingo, cikone basarhala erhi ‘amalibuko n’amalumwa’ gabahikira. (Mt. 13:5, 6, 20, 21) Kobinali, okulwisa okuhagalikwa erhi amalibuko kurhaba kulembu erhi kwa kushagalusa, cikone okugalembera kunalerhe emigisho y’okunali. Omu njira nci?

12. Gurhi rhuyungukamwo erhi rhulembera amazibu?

¹² Entumwa Yakobo yayerekine obunguke bw’okulembera amazibu. Ayandisire ntya: “Obwo buzibu bw’okulembera amalibuko bukole ebijiro nkana, lyo muba bantu bashinganine na bimâna, abarhabuziri cici.” (Yk. 1:2-4) Yakobo aganirire obulembedu nka bujira omukolo gw’okuhikiriza. Mukolo guhi obulembedu buhikiriza? Bwanarhurhabala rhuyerekane bwenene amorhere nk’okulinda, obuyemere, n’okucikubagira Nnâmahanga. Cikone, okulembera kunarhulerhere obunguke omu yindi njira y’obulagirire.

13-14. Bici obulembedu bulerha, na gurhi oko kupatine n’obulangalire bwirhu? (Abaroma 5:4)

¹³ Osome Abaroma 5:4. Paolo ayerekine oku obulembedu bunalerhe “enkomedu nyinja [ehali y’okuyemerwa, NWT].” Obulembedu bwawe bunarhume wayemerwa na Yehova. Oko kurhali kuderha oku Yehova anashagaluke bulya oli wagera omu marhangulo erhi mazibu. Cikone anashagaluke okubona oli walembera n’obwishwekerezi. Rhuhâbirwe omurhima bwenene omu kumanya oku erhi rhulembera rhunashagaluse Yehova!—Enna. 5:12.

¹⁴ Okengere oku Abrahamu alembire amarhangulo n’oko kwarhuma ayemerwa na Nnâmahanga. Yehova amubona nka mwîra wage anamuhamagala muntu mushinganyanya. (Murh. 15:6; Rm. 4:13, 22) Nirhu byanaba ntyo kuli rhwe. Okuyemerwa kwirhu na Nnâmahanga kurhaba kuyimangire oku kujira binji omu mukolo gwage erhi kuba na lukengwa lulebe. Rhunayemerwe naye enyanya z’okulembera kwirhu n’obwishwekerezi. Na ciru rhwakaba rhugwerhe myaka minganaci, ciru rhwakaba rhuli omu kanga kahi, erhi rhube rhugwerhe buhashe buhi, rhweshi rhwanahash’ilembera. Ka hali mazibu malebe oli walembera n’obwishwekerezi ene? Akaba ntyo, orhulirizibwe omu kumanya oku oyemirwe na Nnâmahanga. Okumanya oku rhuyemirwe na Nnâmahanga kwanarhurhabala bwenene. Kwanazibuhya obulangalire bwirhu.

OBULANGALIRE BURHAVUNA MURHIMA

15. Kandi kantu kahi Paolo acibir’iderha, na bulya gurhi oko kwanasomeza baguma na baguma?

¹⁵ Nk’oku Paolo ahugûlaga, rhwanayemerwa na Yehova erhi rhwakalembera amazibu n’obwishwekerezi. Olole gurhi Paolo agendekize enganîro zage: “Ehali y’okuyemerwa enalerhe obulangalire, n’obo bulangalire burhavuna murhima.” (Rm. 5:4, 5, NWT) Bantu baguma na baguma banayabirwe okuhugûkwa oko. Bulya gurhi? Bulya embere z’aho, nk’oku biyerekinwe omu Abaroma 5:2, Paolo adesire oku abo Bakristu b’e Roma bal’ikola bagwerhe obulangalire, ko kuderha “obulangalire bw’okuyish’ihika omu irenge lya Nnâmahanga.” Co cirhumire, hali omuntu wakadosa ntya: ‘Akaba abo Bakristu bal’ikola bagwerhe obulangalire, bulya gurhi Paolo abuganirire buzinda omu nganîro zage?’

16. Gurhi obulangalire burhondera bwayushuka omu muntu? (Olole n’enfoto.)

¹⁶ Rhwanahugûkwa ebi Paolo alonzagya okuderha erhi rhwakakengera oku obulangalire kali kantu kayushuka erhi kuzibuha. Kwa lwiganyo: K’okengire amango wayumvagya oburhangiriza lugenda obulangarire bwinja bwenene buba omu Kanwa ka Nnâmahanga? Ago mango, nkaba wakag’irhanya oku entanya z’okulama emyaka n’emyaka omu paradizo hanw’igulu kali kantu karhakahikirira. Cikone, oku wagendekire wayiga binji kuli Yehova n’ebiragane byage ko wanagendekire wayemera bwenene oku obo bulangalire bwahikirira.

17. Gurhi obulangalire bwawe bugendekera bwayushuka enyuma z’okucihâna emwa Yehova n’okubatizibwa?

¹⁷ Ciru n’enyuma z’okucihâna emwa Yehova n’okubatizibwa, obulangalire bwawe bwagendekire bwayushuka omu kugendekera wayiga binji n’okuba Mukristu okuzire kiroho. (Hb. 5:13–6:1) Nkaba wacibwinire oku ebidesirwe omu lwandiko lw’Abaroma 5:2-4 biri by’okuli. Wagwerhe amalibuko gali lubero, cikone wagalembera wanaciyumva oku oyemirwe na Nnâmahanga. Bulya omanyire oku akuzigire anakushagalukire, okola ogwerhe ciru birhumire binji by’okulangalira oku wahâbwa ebi alaganyize. Obulangalire bwawe bwazibuhire bwenene kulusha oku bwal’iyosire oku murhondero. Okola obona oku buli bw’okunali bwenene kuli we, onabushagalukire bwenene. Bukuhumire oku murhima bwenene omu kushumya ngasi cigabi c’akalamo kawe n’omu kushanja oku ojirira abantu b’omulala gwawe, oku orhôla emihigo, na ciru oku okolesamwo akasanzi kawe.

18. Bici Yehova arhuyemezize n’obwalagale lugenda obulangalire bwirhu?

¹⁸ Entumwa Paolo eganirire akandi kantu k’obulagirire bwenene lugenda obulangalire oba nabo enyuma z’okuyemerwa na Nnâmahanga. Akuyemezize n’obwalagale oku obulangalire bwawe bwahikirira. Bulya gurhi wakayemera ntyo n’obwalagale? Omu kulongozibwa n’iroho litagatifu, Paolo ayemezize Abakristu ntya: “Obulangalire burhavuna murhima; bulya obuzigire bwa Mungu bwabulagirwe omu mirhima yirhu, kugerera iroho litagatifu rhwahâbagwa.” (Rm. 5:5, NWT) Ogwerhe ngasi cirhumire c’okuyemera n’obwalagale oku obulangalire Yehova akuhire buli bw’okunali.

19. Bici wakayemera n’obwalagale okubiyerekire obulangalire bwawe?

¹⁹ Orhanye oku ciragane Yehova ahaga Abrahamu na gurhi Abrahamu ayemirwe naye anaba mwîra wage. Ebi Abrahamu al’ilangalire byahikirire. Ebibliya edesire ntya: “Abrahamu âli mulembêdu, kwo kwanarhumire ashobola ebi Nnâmahanga amulaganyize.” (Hb. 6:15, Mashi Bible; 11:9, 18; Rm. 4:20-22) Arhavunikaga omurhima ciru n’ehitya. Wanayemera n’obwalagale oku erhi wakagendekera wabêra mwishwekerezi, wanayish’ihâbwa oluhembo olangalire. Obulangalire bwawe buli bw’okunali; bwanakulerhera omwishingo, ciru burhakakuvuna omurhima! (Rm. 12:12) Paolo ayandisire ntya: “Mashi Mungu ohâna obulangalire amuyunjuze omwishingo goshi n’omurhûla bulya mumuyegemire, lyo muyushuka omu bulangalire kugerera emisi y’iroho litagatifu.”—Rm. 15:13, NWT.