Oyige Olwiganyo lwa Bamalahika Bishwekerezi

1-2. (a) Gurhi rhubamwo lubero na bamalahika? (b) Bici rhuba rhushushineko na bamalahika?

ERHI Yehova akukulula ly’oja omu okuli, akulalisire omu mulala gw’obuzigire gw’abakozi bage bishwekerezi bali lubero, guhiziremwo emiliyoni ya bamalahika bishwekerezi. (Dan. 7:9, 10) Erhi rhugerereza lugenda bamalahika, nkaba rhwanarhanya kunganaci baba lubero na nirhu. Kwa lwiganyo, bamalahika babaho kurhenga mîra bwenene embere rhubeho. (Ayu. 38:4, 7) Baba ba misi bwenene kurhulusha. Kandi, baba batagatifu na bashinganyanya oku lugero rhurhakahash’ihikira rhuli bene bantu barhali bimana.​—Lk. 9:26.

² Cikone, ciru akaba hali olo lubero, hali ebi rhuba rhushushineko na bamalahika. Kwa lwiganyo, aka bamalahika, rhwanayerekana amorhere minja ga Yehova. Aka bamalahika, rhujira oluhuma lw’okucishoga. N’akabo, ngasi muguma wirhu ajira izino, oborhere buli lubero n’obw’owundi, n’emikolo eri lubero. Kandi aka bamalahika, rhujira obulagirire bw’okuharamya Omulemi wirhu.​—1 Pt. 1:12.

3. Bici rhwakaciyigiriza kugerera bamalahika bishwekerezi?

³ Bulya hali binji rhuba rhushushineko na bamalahika, olwiganyo lwabo lwinja lwanarhuha omurhima n’okurhuyigiriza. Kobinali, rhwanayiga masomo manji minja kugerera bamalahika. Mw’eci cigabi, rhwaganirira gurhi rhwakayigamwo obwirhohye bwa bamalahika, obuzigire bwabo oku bantu, obulembedu bwabo, n’obushiru bajira ly’ecigamba cigendekera caba cicîre.

BAMALAHIKA BABA BIRHOHYE

4. (a) Gurhi bamalahika bayerekanamwo obwirhohye? (b) Bulya gurhi bamalahika baba birhohye? (Ennanga 89:7)

⁴ Bamalahika bishwekerezi baba birhohye. Ciru akaba baba bamanyire binji, baba ba misi na ba bwenge, banarhumikire obulongozi bwa Yehova. (Enna. 103:20) Amango bali bahikiriza emikolo yabo, nta mango bacikungira ebi bajijire erhi kuciyerekana oku obuhashe bwabo buba bulushire obwa bene bantu. Banajire obulonza bwa Mungu n’omwishingo ciru akaba amazino gabo garhamanyikini.a (Murh. 32:24, 29; 2 Bam. 19:35) Banalahire okuhâbwa irenge lyoshi-lyoshi Yehova ashinganine ahâbwe. Bulya gurhi bamalahika baba birhohye bwenene? Bulya baba bazigire Yehova bananamukenge bwenene.​—Osome Ennanga 89:7.

5. Gurhi malahika muguma ayerekinemwo obwirhohye erhi akubûla entumwa Yowane? (Olole n’enfoto.)

⁵ Rhuganirire kanga kaguma kayerekine oku bamalahika baba birhohye. Omu mwaka gwa 96 ntya Kano Kasanzi Kirhu (K.K.K.), malahika orhamanyikini izino ayeresa entumwa Yowane ecibonekerezi c’okurhangaza. (Maf. 1:1) Gurhi Yowane ajijire erhi abona eco cibonekerezi? Alonza okuharamya oyo malahika. Cikone, oyo malahika mwishwekerezi amulahiza duba-duba omu kuderha ntya: “Omanye wankajira ntyo! Nani ndi mushizi akawe n’aka bene winyu . . . Oharâmye Nyamuzinda.” (Maf. 19:10) Ery’ishuzo lyali lya bwirhohye kobinali! Oyo malahika arhal’ilonzize okuhâbwa obukuze erhi irenge. Ho n’aho abwira Yowane aharamye Yehova Nnâmahanga. Mw’ako kasanzi ko n’ako, oyo malahika arhagayaguzagya Yowane. Ciru akaba oyo malahika ali amakolera Yehova myaka minji bwenene anali wa buhashe bunji bwenene kulusha Yowane, omu njira y’obwirhohye ahamagala eyo ntumwa wabo mushizi. Na ciru akaba al’igwasirwe akubûle Yowane, arhamumokeraga erhi kujirira eyo ntumwa yal’ishosihire omu njira y’obukali. Lubero n’oko, oyo malahika amuganiza omu njira y’olukogo. Byanahashikana ahugûsirwe oku Yowane al’irhangazibwe bwenene n’ebi abonaga.

6. Gurhi rhwakayigamwo obwirhohye bwa bamalahika?

⁶ Gurhi rhwakayigamwo obwirhohye bwa bamalahika? Nirhu rhwanahikiriza emikolo yirhu buzira kucikunga erhi kulonza okuhâbwa irenge enyanya z’ebi rhwahikirizize. (1 Kr. 4:7) Kandi, rhurhashinganini rhuciyumve oku rhulushire abandi erhi akaba rhwakolire Yehova myaka minji kubalusha erhi rhugwerhe mikolo milebe omw’ikubuliro. Kobinali, oku rhugwerhe mikolo minji omw’ikubuliro ko rhunashinganine rhucibone oku abandi barhulushire bwenene. (Lk. 9:48) Aka bamalahika, rhunalonze okukolera abandi. Rhurhaba rhulonzize okucikuza.

7. Gurhi rhwakayerekanamwo obwirhohye amango rhugwasirwe rhukubûle erhi kuhanûla muntu mulebe?

⁷ Kandi rhwanayerekana obwirhohye erhi akaba rhugwasirwe rhukubûle erhi kuhanûla muntu mulebe, kwa lwiganyo, owirhu mwemezi erhi omwana wirhu. Hali amango bihûna rhuhâne ihano kwa buzibu-zibu. Cikone aka malahika wahanûlaga Yowane omu njira y’olukogo, erhi akaba rhurhacibwini oku rhulushire abandi, rhwanahâna ihano liyimangire oku Bibliya omu njira y’obukenge na ya bwonjo.​—Kl. 4:6.

BAMALAHIKA BABA BAZIGIRE ABANTU

8. (a) Kushimbana na Luka 15:10, gurhi bamalahika bayerekanamwo oku bazigire bene bantu? (b) Gurhi bamalahika barhabalamwo omu mukolo gw’okuhubiri? (Olole n’enfoto eri oku cijalada.)

⁸ Bamalahika banashibirire ebihikira bene bantu barhanarhanya oku abantu barhali ba bulagirire. Lubero n’oko, baba bazigire abantu. Banashagaluke erhi omunya-byaha aciyunjuza, kuli kuderha, amango ecibuzi cal’ihezire cigalukira Yehova erhi amango omuntu ashanja olugenzi lwage n’okuyisha omu okuli. (Osome Luka 15:10.) Kandi bamalahika banarhurhabale n’obushiru omu mukolo gw’okuhubiri Obwami. (Maf. 14:6) Ciru akaba bone barhahubiri muntu mulebe, banalongoza omuhubiri oku muntu olonzize okuyiga lugenda Yehova. Kobinali, rhurhakaderha n’obwalagale oku bamalahika bo barhulongozize kuli muntu mulebe. Yehova anakolesa ezindi njira, kwa lwiganyo nk’iroho lyage litagatifu, ly’arhabala abantu erhi ly’alongoza abakozi bage. (Ebj. 16:6, 7) Ciru akaba ntyo, anakolese bamalahika bage bwenene. Co cirhumire amango rhuli rhwahubiri omwanzi mwinja, rhwanayemera n’obwalagale oku bamalahika babaho lyo barhurhabala.​—Olole ecisanduku cidesire “Amasala Gabo Gashuzibwe.”b

9. Gurhi rhwakayigamwo obuzigire bamalahika bajira kuli bene bantu?

⁹ Gurhi rhwakayigamwo obuzigire bamalahika bajira kuli bene bantu? Erhi rhwakayumva itangazo oku muntu mulebe anagalukire Yehova omu cigamba, rhwanashagaluka aka bamalahika. Rhwanajira okwirhu koshi lyo rhuyegereza oyo mwene wirhu n’okumuyeresa oku rhumuzigire. (Lk. 15:4-7; 2 Kr. 2:6-8) Kandi, rhwanayiga olwiganyo lwa bamalahika omu kujira ebi rhwakanahasha byoshi omu mukolo gw’amahubiri. (Muh. 11:6) Na nk’oku bamalahika barhulunga okuboko amango rhuli rhwahubiri omwanzi mwinja, nirhu rhwanalonza enjira rhwakalungamwo bene wirhu na bali birhu okuboko omu mukolo gw’amahubiri. Kwa lwiganyo, ka rhwanajira omupango gw’okuhubiri haguma n’omuhubiri orhagwerhi bulenga bunji? Ka rhwanarhabala bene wirhu bakola bashosi erhi bali birhu bakola bagikulu erhi abagwerhe buzamba bulebe bw’omubiri lyo bashangira haguma na nirhu oku mukolo gw’amahubiri?

10. Bici rhwakaciyigiriza kugerera olwiganyo lwa Sara?

¹⁰ Gurhigi erhi akaba rhurhagwerhi obuhashe bw’okujira binji enyanya z’akanga kirhu? Rhwanalonza ezindi njira rhwakakolamwo haguma na bamalahika omu mukolo gw’amahubiri. Rhuganirire olwiganyo lwa Sara,c mwali wirhu muguma w’omu Inde. Enyuma z’okujira omukolo gw’obupainiya myaka 20 ntya, Sara alwala arhanacigwerhe obuhashe bw’okurhenga oku ncingo. Biyumvikine oku avunisire omurhima bwenene. Cikone kugerera oburhabale bw’obuzigire bw’omulala gwage gw’ekiroho n’obusomi bw’Ebibliya bwa ngasi lusiku, bunyi-bunyi Sara acib’iba n’entanya nyinja. Kobinali, al’ishinganine alonze enjira mpyahya z’okuhubiri zipatine n’akanga kage. Bulya ciru arhakahashire okutamala ly’ayandika amaruba, akahubiri kugerera etelefone yone. Muli ntyo, akahamagala kugerera etelefone abantu akag’igalukira, nabo bakamumanyisa abandi bantu bakalonza okuyiga Ebibliya. Malehe gahi oko kwadwirhe? Omu myezi milebe, Sara apata mafunzo 70 g’Ebibliya, arhakanacihashire okugalongoza goshi! Co cirhumire, aha abandi bahubiri b’omu cigamba mafunzo maguma na maguma muli go. Banji muli abo banafunzi bakola baja oku ntimanano zirhu. Bamalahika bagwasirwe babe banashagalukire bwenene okukola haguma na bene wirhu na bali birhu bajira okwabo koshi omu mukolo gw’amahubiri, aka Sara!

BAMALAHIKA BANAYEREKANE OBULEMBEDU

11. Gurhi bamalahika bishwekerezi bayerekinemwo obulembedu omu njira yago-yago?

¹¹ Bamalahika bishwekerezi baba nyiganyo nyinja bwenene z’obulembedu. Bakola bagwerhe ebihumbi by’emyaka bali balembera obubule bw’obushinganyanya n’obubi. Babwine oku Shetani n’abandi bamalahika banji bakag’ikola haguma nabo bagomera Yehova. (Murh. 3:1; 6:1, 2; Yd. 6) Ebibliya eganirire malahika muguma mwishwekerezi wahagalikagwa n’omuzimu w’obuhashe omu njira y’obwalagale. (Dan. 10:13) Kandi, omu mango goshi bene bantu bamakabaho, bamalahika babwine bantu basungunu bone bashimba enterekêro y’okuli. Ciru akaba ebyo byoshi, abo bamalahika bishwekerezi bagendekire okukolera Yehova banagwerhe omwishingo n’obushiru. Bamanyire oku omu kasanzi kashinganine, Nnâmahanga arhenzaho obubule boshi bw’obushinganyanya.

12. Bici byakarhurhabala lyo rhulembera?

¹² Gurhi rhwakayigamwo obulembedu bwa bamalahika? Aka bamalahika, nkaba rhwanacibonera obubule bw’obushinganyanya erhi kandi rhwanahagalikwa. Cikone rhuba rhuyemire akabo oku Mungu ayish’ikulaho obubi boshi oku kasanzi kashinganine. Co cirhumire aka bamalahika bishwekerezi, “rhurharhamaga okukajira aminja.” (Gl. 6:9) Na Mungu arhulaganyize oku arhurhabala lyo rhulembera. (1 Kr. 10:13) Rhwanashenga Yehova arhuhe iroho lyage, bulya lyo lirhurhabala okuba n’obulembedu n’omwishingo. (Gl. 5:22; Kl. 1:11) Gurhigi erhi wakahagalikwa? Olangalire Yehova loshi-loshi, orhanayobohaga. Ensiku zoshi Yehova akurhabala n’okukuzibuhya.​—Hb. 13:6.

BAMALAHIKA BANARHABALE LY’ECIGAMBA CIGENDEKERA CABA CICÎRE

13. Mukolo guhi gwago-gwago bamalahika bagwerhe muli zino nsiku nzinda? (Mateyo 13:47-49)

¹³ Muli zino nsiku nzinda, Yehova ahîre bamalahika omukolo gwago-gwago. (Osome Mateyo 13:47-49.) Omukolo gw’amahubiri gunakulule emiliyoni y’abantu ba ngasi lubero. Baguma na baguma muli bo banajire ebihûnyirwe lyo baba Bakristu b’okunali, cikone abandi barhajira ntyo. Bamalahika bahâbirwe omukolo gw’‘okuberûla ababi oku binja.’ Oko kuli kuderha oku bahâbirwe omukolo gw’okurhabala ecigamba lyo cigendekera caba cicîre. Oko kurhali kuderha oku ngasi muntu walesire okucilunga haguma na nirhu enyanya za cirhumire cihi arhakacigaluka; kurhanali kuderha oku harhakaciba ciru n’ehitya amazibu omu cigamba. Ciru akaba ntyo, rhwanayemera n’obwalagale oku bamalahika bagendekire bakola bwenene lyo barhabala ecigamba cigendekere caba cicîre.

14-15. Gurhi rhwakayigamwo oku bamalahika bashibirira ecigamba lyo cigendekera caba cicîre omu njira y’ekiroho n’omu lugenzi? (Olole n’enfoto.)

¹⁴ Gurhi rhwakayigamwo oku bamalahika bashibirira okucêsibwa kw’ecigamba? Omu kujira ecirhu cigabi ly’ecigamba cirhu cigendekera caba cicîre omu lugenzi n’omu njira y’ekiroho. Lyo rhujira ntyo, rhunacihangane okulanga omurhima gwirhu omu kucishoga abîra binja n’omu kuyaka ngasi mashumi gakashereza obwîra bwirhu haguma na Yehova. (Enna. 101:3) Kandi rhwanarhabala abirhu bemezi lyo bagendekera baba bishwekerezi kuli Yehova. Kwa lwiganyo, gurhi rhwakajira erhi rhwakayumva oku owirhu mwemezi anajijire ecaha cizibu? Enyanya z’obuzigire bwirhu kuli oyo muntu, rhushinganine rhumuyinginge aj’iganiza abagula. Erhi akaba arhajijiri ntyo, rhushinganine rhumanyise abagula lugenda eco caha. Rhuba rhulonzize ngasi wirhu mwemezi wakaba ali muzamba omu njira y’ekiroho afume duba-duba!​—Yk. 5:14, 15.

¹⁵ Eby’okugayisa kuli kubona oku, baguma na baguma bajijire ebyaha bizibu baba bagwasirwe barhenzibwe omu cigamba. Omu kanga ka ntyo, rhunaleke ‘okukômera’ abo bantu.d (1 Kr. 5:9-13) Ogo mupango gunarhabale okujira ecigamba cigendekere caba cicîre. Kandi, omu kuhiga okurhakomerana n’abarhenzibwe omu cigamba, rhunabayerese olukogo. Okuhiga loshi-loshi okurhakomerana nabo kunabarhabale bagalukirwe n’obukengere. Erhi bajira ntyo, rhunashagaluke haguma na Yehova na bamalahika bage.​—Lk. 15:7.

16. Omu njira zihi wacihanganamwo okuyiga olwiganyo lwa bamalahika?

¹⁶ Luli lukengwa lunene okubona Yehova arhuyemerire okuyiga lugenda bamalahika n’okukola haguma nabo! Lekagi rhuyige amorhere gabo minja: obwirhohye bwabo, obuzigire bwabo oku bantu, obulembedu bwabo, n’okushibirira kwabo okucêsibwa kw’ecigamba omu njira y’ekiroho n’omu lugenzi. Erhi rhwakayiga olwiganyo lwa bamalahika bishwekerezi, nirhu rhwanaba cigabi c’omulala gwa Yehova gw’abakozi bage emyaka n’emyaka.