Orhabale Omwanafunzi Wawe w’Ebibliya Ahige Okukolera Yehova

1-2. (a) Bulya gurhi banafunzi balebe b’Ebibliya barhindira okurhôla omuhigo gw’okukolera Yehova? (b) Bici rhwaganirira mw’eci cigabi?

KA HALI ebintu wal’iyobohire byakag’irhuma warhindira okuba Muhamirizi wa Yehova? Nkaba wal’iyobohire oku abinyu banyakasi, abîra bawe, erhi abantu b’omu mulala gwawe bakushomba. Erhi nkaba wakag’iciyumva oku orhakahasha ciru n’ehitya okulama kushimbana n’amakanuni ga Mungu. Erhi akaba ntyo ko wakag’iciyumva, wanahugûkwa bwinja abanafunzi b’Ebibliya babonekana nka bali barhindira okurhôla omuhigo gw’okukolera Yehova.

² Yezu al’ihugûsirwe oku kwanaba kulembu oboba bwa ntyo burhume omuntu arhajira amajambere g’ekiroho. (Mt. 13:20-22) Cikone arhalekaga okurhabala abakag’irhindira okumukulikira. Lubero n’oko, kugerera ebi ajijire, Yezu arhuyeresire olwiganyo lugenda gurhi rhwakarhabalamwo abantu ba ntyo (1) lyo bamanya ebiri byarhuma barhajira amajambere, (2) lyo baseza obuzigire bwabo kuli Yehova, (3) lyo bashanja ebi bahira oku nafasi ntanzi, na (4) lyo bahima amazibu gabo. Gurhi rhwakakolesamwo ebi Yezu abwiraga abanafunzi bage, amango rhuli rhwakolesa ecitabu Oshagalukire Akalamo Ensiku n’Amango! lyo rhurhabala omwanafunzi w’Ebibliya ahige okukolera Yehova?

ORHABALE OMWANAFUNZI WAWE AMANYE EBIRI BYARHUMA ARHAJIRA AMAJAMBERE

3. Bici nkaba byakag’irhuma Nikodemu arhaba muguma w’omu banafunzi ba Yezu?

³ Nikodemu, cirongozi cal’imanyikine c’Abayahudi, ahikirwe n’amazibu lugenda okucishoga okuba mwanafunzi wa Yezu. Hofi myezi ndarhu yone enyuma za Yezu okurhondera omukolo gwage gw’amahubiri, Nikodemu amanya Yezu nka muntu warhumagwa na Nnâmahanga. (Yn. 3:1, 2) Cikone, Nikodemu acishoga okukarhimanana na Yezu bufunda-funda erhi “kuyoboha Abayahudi” kurhuma. (Yn. 7:13; 12:42) Nkaba akag’irhanya oku akahezize binji bwenene omu kuba mwanafunzi wa Yezu.a

4. Gurhi Yezu arhabiremwo Nikodemu ly’ahugûkwa ebi Nnâmahanga al’ilonzize ajire?

⁴ Nikodemu al’imanyire bwinja bwenene amarhegeko Mungu ahâga Abaisraheli, cikone al’ilagirire oku kuhugûkwa ebi Yehova al’ilonzize ajire. Gurhi Yezu amurhabiremwo? Yezu ali mubidu okugeza akasanzi kage haguma na Nikodemu, ciru n’okurhimanana naye budufu. Na Yezu ayerekana n’obwalagale ebi Nikodemu al’igwasirwe ajire ly’aba mwanafunzi: okuciyunjuza ebyaha byage, okubatizibwa omu mishi, n’okuba n’obuyemere muli Mugala wa Nnâmahanga.​—Yn. 3:5, 14-21.

5. Gurhi wakarhabalamwo omwanafunzi wawe w’Ebibliya ly’amanya ebiri byarhuma arhajira amajambere?

⁵ Ciru akaba omwanafunzi w’Ebibliya amanyire bwinja Amandiko, anaba alagirire oku burhabale ly’amanya ebiri byarhuma arhajira amajambere. Akasi erhi okuhagalikwa n’omulala, nkaba byanarhuma arhacihiriraho emihigo y’ekiroho. Co cirhumire ocihangane okukageza akasanzi haguma n’omwanafunzi wawe. Nkaba wanamulalika lyo mushangira ebiryo haguma erhi ly’akulusa hantu halebe. Omu hali ya ntyo, nkaba wanaba n’obuhashe bw’okumurhabala ly’akuganirira amazibu gage. Ohe omwanafunzi wawe omurhima ajire ngasi mpindulo ziri za bulagirire, arhali ly’akushagalusa, cikone ly’ayerekana obuzigire bwage kuli Yehova.

6. Gurhi wakarhabalamwo omwanafunzi w’Ebibliya ly’aba n’oburhwali bw’okukolesa ebi ali ayiga? (1 Abakorinti 16:13)

⁶ Erhi omwanafunzi w’Ebibliya akaba n’obulangalire oku Yehova amurhabala ly’alama kushimbana n’amakanuni g’Ebibliya, anaba n’oburhwali bw’okukolesa ebi ali ayiga. (Osome 1 Abakorinti 16:13.) Omukolo gwawe gwanashushanyizibwa n’ogw’omwalimu. Erhi wakarhanya oku mango wakag’ija emasomo, mwalimu ohi wal’isimire bwenene? Bihashikine oku ali mwalimu wakag’ikurhabala n’obulembedu ly’olangalira obuhashe ojira. Ko n’oko, mwalimu mwinja w’Ebibliya arhayigiriza kone ebi Mungu arhuhûnyire rhujire, cikone kandi anayemeze omwanafunzi wage w’Ebibliya oku kugerera oburhabale bwa Yehova, anahash’ijira empindulo z’obulagirire omu kalamo kage. Gurhi wakajiramwo ntyo?

ORHABALE OMWANAFUNZI WAWE ASEZE OBUZIGIRE BWAGE KULI YEHOVA

7. Gurhi Yezu arhabiremwo abakag’imuyumvirhiza lyo bayushula obuzigire bwabo kuli Yehova?

⁷ Yezu al’imanyire oku obuzigire kuli Nnâmahanga bwakashumize abanafunzi bage lyo bakolesa ebi bakag’iyiga. Kanji-kanji ayigirizize ebintu byakarhabire abanafunzi bage lyo bayushula obuzigire bwabo kuli Ishe wabo w’empingu. Kwa lwiganyo, ashushanyize Yehova n’omulume oha abana bage ebintu binja. (Mt. 7:9-11) Baguma na baguma omu bumvirhiza ba Yezu nkaba barhal’igwerhe ishe w’obuzigire oli nk’oyo. Orhanye gurhi bagwasirwe babe baciyumvirhe erhi Yezu ahâna olwiganyo lw’omushamuka w’obwonjo wayegerezagya omugala wajiraga bintu binji bibi. Bakabwine obwonjo Yehova ajira oku bana bage b’en’igulu.​—Lk. 15:20-24.

8. Gurhi wakarhabalamwo omwanafunzi w’Ebibliya ly’aseza obuzigire bwage kuli Yehova?

⁸ Nawe wanarhabala omwanafunzi w’Ebibliya aseze obuzigire bwage kuli Yehova omu kusegeza amorhere ga Nnâmahanga amango oli wamuyigiriza. Ngasi kasanzi k’okuyiga, orhabale omwanafunzi wawe ahugûkwe olushangi luli egarhi k’ebi ali ayiga n’obuzigire bwa Yehova. Amango muli mwaganirira engombôlo, osegeze gurhi emuyerekiremwo. (Rm. 5:8; 1 Yn. 4:10) Omwanafunzi anashumibwa okuzigira Yehova amango ali arhanya oku buzigire Yehova amujirako yenene.​—Gl. 2:20.

9. Bici byarhabire mulume muguma ohamagalwa Michael okushanja akalamo kage?

⁹ Rhuganirire olwiganyo lwa Michael, w’e Indonésie. Aleragwa omu okuli, cikone arhabatizibagwa. Erhi agwerhe myaka 18, aja omu cindi cihugo lyaj’ikola nka shoferi w’ebituga binenene. Buzinda aja omu buhya, cikone asiga omulala gwage ly’agendekera akolera omu cindi cihugo. Mw’ako kasanzi ko n’ako, mukage n’omwali barhondera okuyiga Ebibliya banajira amajambere. Enyuma za nnina wa Michael okufâ, Michael ahiga okugaluka ekâ ly’ashibirira ishe anayemera okuyiga Ebibliya. Erhi bali baganirira ehigabi “Humbirira ly’Ohugûkwa” hy’isomo lya 27 ly’ecitabu Oshagalukire Akalamo Ensiku n’Amango! Michael ahumwa oku murhima bwenene. Omu kurhanya gurhi Yehova agwasirwe abe aciyumvirhe omu kubona Omugala ali alibuka, Michael arhondera avugumula emirenge. Aba wa kuvuga omunkwa bwenene lugenda engombôlo, ashumibwa okushanja akalamo kage, anabatizibwa.

ORHABALE OMWANAFUNZI WAWE W’EBIBLIYA LY’ASHANJA EBI AHIRA OKU NAFASI NTANZI

10. Gurhi Yezu arhabiremwo abanafunzi bage b’omu kagana karhanzi lyo bashanja ebi bakag’ihira oku nafasi ntanzi? (Luka 5:5-11) (Olole n’enfoto.)

¹⁰ Abanafunzi b’omu kagana karhanzi, bamanyire duba-duba oku Yezu ye Masiya walaganyizibagwa, cikone bal’ilagirire oku burhabale lyo bahira omukolo gw’amahubiri oku nafasi ntanzi omu kalamo kabo. Petro na Andreya bal’ikola bali banafunzi ba Yezu kasanzi kalebe amango Yezu abalalikaga bamushimbe akasanzi koshi. (Mt. 4:18, 19) Bal’icihânyire bwenene omu mukolo gw’okuduba ensamaki gwagwerhe amalehe minja, bihashikine oku bal’icilunzire haguma na Yakobo na Yowane. (Mk. 1:16-20) Erhi Petro na Andreya “baleka orhweshe rhwabo,” bashinganine babe barhôzire emipango lugenda okuhikiriza amalagirire g’emilala yabo amango bakag’ishimba Yezu. Bici byabashumize okushanja ebi bal’ihizire oku nafasi ntanzi? Omwanzi guli omu Luka gurhubwizire oku Yezu ajijire ecisomerine cazibuhyagya obulangalire bwabo omu buhashe bwa Yehova bw’okuhikiriza amalagirire gabo.​—Osome Luka 5:5-11.

11. Gurhi rhwakakolesamwo ebi rhwacibwinire omu kalamo kirhu lyo rhuzibuhya obuyemere bw’omwanafunzi w’Ebibliya?

¹¹ Rhurhankahash’ijira ebisomerine nk’oku Yezu ajiraga, cikone rhwanaganirira omwanafunzi ebi rhwacibwinire biyerekine gurhi Yehova arhabala balya bamuhira oku nafasi ntanzi omu kalamo kabo. Kwa lwiganyo, k’okengire gurhi Yehova akurhabalaga erhi orhondera waja oku ntimanano? Nkaba wal’igwasirwe orhimanane n’omukulu wawe w’akasi n’okumuhugûlira bulya gurhi orhakacikola enyuma z’ensa z’akasi erhi akaba oko kwakag’irhuma orhahika oku ntimanano. Omu kasanzi oli waganirira omwanafunzi wawe ebi wacibwinire omu kalamo kawe, ohugûle gurhi obuyemere bwawe bwasezire omu kubona Yehova ali alunga okuboko omuhigo gwawe gw’okuhira enterekêro yage oku nafasi ntanzi.

12. (a) Bulya gurhi rhushinganine rhulalike abahubiri bali lubero okw’ifunzo ly’Ebibliya? (b) Gurhi wakakolesamwo evideo ly’oyigiriza bwinja omwanafunzi wawe? Ohâne olwiganyo.

¹² Omwanafunzi wawe, kandi ayunguka omu kuyumvirhiza gurhi abandi Bakristu bashanjiremwo ebi bakag’ihira oku nafasi ntanzi omu kalamo kabo. Co cirhumire, okalalika bene wirhu na bali birhu bali lubero bacilunge haguma na nawe okw’ifunzo ly’Ebibliya. Obahûne bahugûle gurhi bajagamwo omu okuli na bici bajijire lyo bahira omukolo gwa Yehova oku nafasi ntanzi omu kalamo kabo. Kandi, okarhôla akasanzi k’okulaba haguma n’omwanafunzi wawe evideo z’omu higabi, “Humbirira ly’Ohugûkwa” erhi ez’omu higabi, “Ociyigirize kwa Bulîri” hy’ecitabu Oshagalukire Akalamo Ensiku n’Amango! Kwa lwiganyo, amango muli mwaganirira isomo lya 37, wanasegeza amakanuni gali omu video edesire, Yehova Ahikiriza Amalagirire Girhu.

ORHABALE OMWANAFUNZI WAWE LY’AHIMA AMAZIBU

13. Gurhi Yezu arheganyizemwo abanafunzi bage lugenda okuhagalikwa?

¹³ Yezu abwizire kanji-kanji abanafunzi bage oku bakahagalisirwe n’abandi bantu, ciru n’ab’omu mulala gwabo. (Mt. 5:11; 10:22, 36) Erhi omukolo gwa Yezu guyegerera obuzinda, arhonda abanafunzi bage oku bakanizirwe. (Mt. 24:9; Yn. 15:20; 16:2) Ababwira babe ba kucikema omu mukolo gwabo gw’amahubiri. Abahanûla barhakag’ijisa kadali ababahagalika, banabe ba kubîka ihwe lyo bagendekera bahubiri.

14. Gurhi rhwakarhabalamwo omwanafunzi ly’acirheganya lugenda okuhagalikwa? (2 Timoteyo 3:12)

¹⁴ Rhwanarhabala omwanafunzi b’Ebibliya ly’acirheganya lugenda okuhagalikwa omu kumuhugûlira ebi akayumva kurhenga oku babo banyakasi, abîra, erhi abantu b’omu mulala. (Osome 2 Timoteyo 3:12.) Baguma na baguma omu babo banyakasi banamushekera enyanya z’enjira yage mpyahya y’okulama. Abandi bantu, ciru n’abantu ba hofi-hofi b’omu mulala, banagayaguza obwemere bwage buyimangire oku Bibliya. Erhi rhwakarheganya abanafunzi birhu embere lyo balembera okuhagalikwa, banaba n’obuhashe bw’okumanya bwinja ebi bakaderha erhi ebi bakajira amango bamahagalikwa.

15. Bici byakarhabala omwanafunzi w’Ebibliya ly’alembera okuhagalikwa omu mulala?

¹⁵ Lugenda okuhagalikwa omu mulala, ohe omwanafunzi wawe omurhima arhanye bulya gurhi abantu b’omu mulala gwage nkaba banaba burhe. Nkaba banarhanya oku ahabusire, erhi nkaba banaba kone bagwerhe entanya mbi lugenda Abahamirizi ba Yehova. Ciru n’omulala gwa Yezu gwarhanyize oku anasirahire. (Mk. 3:21; Yn. 7:5) Oyigirize omwanafunzi wawe okugendekera aba wa kulembera n’okuganira omu njira nyinja haguma n’abandi, kuhiramwo n’abantu b’omu mulala gwage.

16. Gurhi rhwakarhabalamwo omwanafunzi w’Ebibliya ly’aganirira abandi obwemere bwage omu njira nyinja?

¹⁶ Ciru n’amango abantu b’omu mulala bamayerekana oku basimisibwe, omwanafunzi w’Ebibliya anakolesa obwenge omu kurhaganirira ngasi byoshi amanyire ho n’aho. Erhi akahugûla ebi amanyire byoshi, abazigirwa bage nkaba banaciyumva bazidohirwe, n’enyanya z’oko, banarhindira okushambala naye agandi mango. Co cirhumire ohe omwanafunzi wawe omurhima akaganirira abandi obwemere bwage omu njira yarhuma bayemera okushub’iganira naye agandi mango. (Kl. 4:6) Nkaba analalika abantu b’omu mulala gwage bayigule esite yirhu jw.org. Oko kwanabarhabala bayige binji lugenda Abahamirizi ba Yehova nk’oku bakanahasha.

17. Gurhi wakakomerezamwo omwanafunzi wawe ly’akahash’ishuza oku madoso abantu bakadosa lugenda Abahamirizi ba Yehova? (Olole n’enfoto.)

¹⁷ Wanakolesa omwanzi gwa bigabi binji guli oku jw.org gudesire, “Amadoso Galug’idosibwa Okubiyerekire Abahamirizi ba Yehova” ly’orhabala omwanafunzi wawe arheganye amashuzo malembu oku madoso abantu b’omu mulala erhi ababo banyakasi bakamudosa. (2 Tm. 2:24, 25) Oku buzinda bwa ngasi isomo, mukaganirira ehigabi, “Hali Abantu Baderha Ntya” erhi “Hali Omuntu Wakadosa Ntya” hy’ecitabu Oshagalukire Akalamo Ensiku n’Amango! Ohe omwanafunzi wawe omurhima akacikomereza okuhâna amashuzo omu nderho zage yene. Orharhindiraga okumuha amahano lugenda oku akakubûlamwo amashuzo gage. Orhusanzi rhwa ntyo rhw’okucikomereza rhwamurhabala akahalira obuyemere bwage buzira boba.

18. Gurhi wakahamwo omwanafunzi wawe omurhima ly’arhondera ahubiri haguma n’ecigamba? (Mateyo 10:27)

¹⁸ Yezu arhegesire abanafunzi bage bayaligize abantu omwanzi mwinja. (Osome Mateyo 10:27.) Oku omwanafunzi wawe arhondera duba-duba okuganirira abandi obuyemere bwage, ko anayiga duba-duba okulangalira Yehova. Gurhi wakarhabalamwo omwanafunzi w’Ebibliya ly’acihiriraho ogo muhigo? Amango bamatangaza omu cigamba oku haba akampanye k’amahubiri, ohe omwanafunzi wawe omurhima arhanye lugenda oku akahikirizamwo ebihûnyirwe ly’aba muhubiri. Omuhugûlire bulya gurhi bantu banji babwine oku kwali kulembu bwenene okurhondera bahubiri omu mango g’akampanye. Ogundi muhigo akacihiriraho kuli kurhondera ageza ebigabi by’abanafunzi oku ntimanano z’omu kagarhi k’omugobe. Omu kasanzi ali acihangana okugeza ebyo bigabi, ayiga okuganirira abandi obwemere bwage buzira boba.

OYEREKANE OKU OLANGALIRE OMWANAFUNZI WAWE

19. Gurhi Yezu ayerekinemwo oku al’ilangalire abanafunzi bage, na gurhi rhwakayigamwo olwiganyo lwage?

¹⁹ Embere Yezu afê n’okugaluka empingu, abwizire abanafunzi bage oku bakashubir’iba haguma naye. Barhahugûkagwa oku Yezu akag’iganirira okuja kwabo empingu. Ciru akaba ntyo, asegeza obwenge bwage oku bwishwekerezi bwabo ahali h’okubusegeza oku karhinda bal’igwerhe. (Yn. 14:1-5, 8) Al’imanyire oku bal’ilagirire oku kasanzi lyo bahugûkwa bintu biguma na biguma, kwa lwiganyo, obulangalire bw’okuja empingu. (Yn. 16:12) Aka Yezu, nirhu rhwanayerekana oku rhulangalire oku omwanafunzi wirhu alonzize okushagalusa Yehova.

20. Gurhi mwali wirhu muguma w’e Malawi ayerekinemwo oku alangalire omwanafunzi wage?

²⁰ Rhunagendekere rhwalangalira oku omwanafunzi wirhu alonzize okujira ebintu bishinganine. Rhuganirire olwiganyo lwa Chifundo, mwali wirhu muguma w’e Malawi. Arhondera okuyiga Ebibliya haguma na mukazi muguma Mukatolika waciri musole ohamagalwa Alinafe kugerera ecitabu Oshagalukire Akalamo Ensiku n’Amango! Erhi bayusa baganirira isomo lya 14, Chifundo adosa omwanafunzi wage ebi arhanyize lugenda okukolesa ensalamu omu nterekêro. Alinafe agaya bwenene anashuza erhi, “Ogo guli muhigo gwani niene!” Enyanya z’oko, Chifundo arhanya oku nkaba Alinafe aleka okuyiga Ebibliya. Cikone omu njira y’obulembedu agendekera ayiga Ebibliya haguma na Alinafe analangalire oku omu mango gashinganine, anahugûkwe oku kuli kubi okukolesa ensalamu. Enyuma za myezi milebe, Chifundo adosa omwanafunzi wage idoso liri omw’isomo lya 34 lidesire ntya: “Kuhikira buno ebi wamakayiga omu Bibliya na kuli Yehova Nnâmahanga, bunguke buci byamakakulerhera?” Chifundo aganirire gurhi Alinafe ashuzize omu kuderha ntya: “Aganirira bintu binji bwenene binja, kaguma mw’ebyo bintu kuli kuba Abahamirizi ba Yehova barhacihira omu nkomedu Ebibliya edesire oku ziri mbi.” Kasanzi kasungunu enyuma z’aho, Alinafe aleka okukolesa ensalamu anahikiriza ebihûnyirwe ly’abatizibwa.

21. Gurhi rhwakarhabalamwo omwanafunzi wirhu ly’arhôla omuhigo gw’okukolera Yehova?

²¹ Ciru akaba Yehova ye “okuza emburho,” rhwanarhabala omwanafunzi w’Ebibliya ly’ajira amajambere. (1 Kr. 3:7) Rhunajire binji bwenene kulusha okumuyigiriza kone ebi Nnâmahanga alonzize ajire. Rhunamurhabale abe n’obuzigire busezire kuli Yehova. Kandi rhunamuhe omurhima ly’ayerekana obuzigire bwage omu kushanja ebi ahira oku nafasi ntanzi omu kalamo kage. Rhunanamuyigirize gurhi akalangaliramwo Yehova amango ali ahagalikwa. Omu kuyerekana oku rhulangalire omwanafunzi wirhu, rhunabe rhuli rhwamurhabala ly’aba n’obulangalire busezire oku naye anahasha okulama kushimbana n’amakanuni ga Yehova n’okurhôla omuhigo gw’okumukolera.