Oyunguke Kugerera Agandi Mandiko Gaganirire Entanya Zishushine

Amandiko gaganirire entanya zishushine omu Bibliya​—Tafsiri ya Ulimwengu Mupya, ganayerekane oku ebigabi biri lubero by’Ebibliya biba bipatine n’ebindi. Ago mandiko ganayerekane agandi mandiko gaganirire omwanzi go n’ogo gahânyire agandi mahugûlo manji. Ly’obona amandiko gaganirire entanya zishushine, orhang’ilola eherufi nsungunu eri aha burhambi bw’oluderho. Enyuma z’aho, erhi akaba oli wakolesa Ebibliya y’orhuradasi, olonze eyo herufi yo n’eyo egarhi k’emistari eba omu garhi kw’obukurasa. Oku jw.org erhi omu JW Library^®, ohume oku herufi nsungunu eri aha burhambi bw’oluderho ly’obona agandi mandiko.

Amandiko gaganirire entanya zishushine ganakuhêka kw’ebi bikulikire n’ebindi:

Omwanzi gushushine n’ogu oli wasoma: Eyo herufi nsungunu enayerekane ahandi omwanzi go n’ogo guganirirwe. Kwa lwiganyo, olole 2 Samweli 24:1 na 1 Enganîro 21:1.

Enderho zaderhagwa n’owundi: Eyo herufi nsungunu enayerekane ngahi omusemwa erhi enderho zikolesibwe zarhengaga. Kwa lwiganyo, olole Mateyo 4:4 na Olushika 8:3.

Obulebi bwahikirire: Eyo herufi nsungunu enahêke oku lwandiko luyerekine gurhi obulebi oli wasoma bwahikirizibwe. Kwa lwiganyo, olole Mateyo 21:5 na Zakariya 9:9.