Oburhulirize oku Banyakazi b’omu Bitaro Bali Baciyumva Kubi

Bryn, olama e Nord y’e Caroline, omu États-Unis, aba muguma w’omu komite ejira olushangi n’ebitaro. Aba omu lushangi n’ebitaro ly’ashibirira Abahamirizi ba Yehova balwazire.

Okubona obulwala bw’e COVID-19, bitaro binji birhali byayemera okulambagirirwa. Bryn anatelefoner omwimangizi w’ebitaro ly’amanya bici akajira ly’arhabala Abahamirizi ba Yehova balwazire.

Erhi Bryn ahamagala, omulonda w’omwimangizi ye washuzize oku telefone. Okubona okulambagirira ebitaro kurhaciyemerirwi, Bryn aderha oku bamurhabale bahe Abahamirizi ba Yehova balwazire enimero yage y’etelefone ly’abaganiza. Bayemera.

Buzinda, Bryn arhanya oku bantu bakola omu bitaro. Abwira omulonda w’omwimangizi oku ashagalukîre bwenene omukolo ebitaro biri byajira n’oku alangalire oku abantu boshi bagwerhe amagala minja. Ayushûla aderha oku anasomire emyanzi eyerekine oku abakozi bali okuciyumva kubi enyanya z’obulwala bw’okuyahukira.

Omulonda w’omwimangizi ayemera n’obwalagale oku e COVID-19 yalesire okuciyumba kubi.

Bryn ashuza ntya: “Esite yirhu y’Enternete eriko amahano g’obulagirire gakarhabala okulwisa okuciyumva kubi. Erhi wakaja oku site jw.org oyandike “okuciyumva kubi” ah’okujirira obusagasi, wabona emyanzi minja yakarhuliriza abanganga.”

Erhi baba baciri baganira omulonda w’omwimangizi aja oku site, ayandika oluderho “okuciyumva kubi” ah’okujirira obusagasi, ho n’aho abona emyanzi yarhondera yabonekana. Aderha ntya: “Awa! Nabiyereka omwimangizi. Eri myanzi yabulagirire bwenene oku bakozi n’oku bandi bantu. Nacapa mwanzi muguma buzinda ngugabire abakozi.”

Migobe misungunu enyuma z’aho, Bryn aganira n’omwimangizi, naye amubwira oku anajire oku site yirhu, n’oku acapireko myanzi miguma na miguma lugenda okuciyumva kubi n’eyindi myanzi eshushine n’eyo. Bagabira abanganga n’abandi bantu eyo myanzi.

Bryn adesire ntya: “Omwimangizi amvuga omunkwa oku mukolo gwirhu n’oku myanzi miyandike bwinja, yabarhabire bwenene.”