K’Obuzinda bw’Igulu Buli Hofi? Apokalipse byo Bici?

Bici orhanya erhi oyumva oluderho “apokalipse”? Nkaba onarhanye oku buhanya b’w’igulu lyoshi, nkaba bulya bwakashereza obuzine boshi okw’igulu. Hali abantu baba bayemire oku obuhanya bwa ntyo bwaba hano hofi-hofi, bwenene erhi basoma emyanzi eri nk’eyi ekulikire:

• “Ivita ly’ebombe nucléaire lyanarhondera buzira kulaliza, libe lyarhondezibwa n’obulonza bw’abantu, buzira kumanya, erhi enyanya z’okurhayumvikana.”​—Bulletin of the Atomic Scientists.

• “Omu myaka ikumi yazindig’igera, habire bushereze bunji bwenene omw’igulu: bakalemêra, emiliro y’okurhenga omu mizirhu, okubula enkuba, okusherera kw’irangi ly’ebiremwa bisungunu-ngunu by’omu nyanja, okuyushuka kw’idurhu, n’obushereze bwadwirhwe n’amishi manji omw’igulu lyoshi.​—National Geographic.

• “Hakola hali myaka minji ebigusho by’enzige biri byalerha obushereze bunji omu Afrique.”​—The Associated Press.

K’igulu lyasherezibwa kugerera e apokalipse? Gurhi Ebibliya edesire?

K’igulu lirhu, erhi idaho, lyanasherezibwe?

Nanga. Ebibliya, Kanwa ka Nnâmahanga, eyerekine n’obwalagale oku igulu lyabêraho ensiku n’amango. (Omuhanûzi 1:4) Ahali h’okushereza igulu alemaga, Nnâmahanga ‘ayish’iherêrekeza balya bashereza igulu.’​—Amafulûlo 11:18.

K’obuzinda bw’igulu buli hofi?

Kushimbana n’Ebibliya, “igulu” lyahwa bali bantu balahira obulongozi bwa Nnâmahanga n’okucijirira ebi balonzize. Nk’oku Nnâmahanga ajiraga omu mango ga Nuhu, ayish’ishereza ‘igulu ly’abantu babi.’​—2 Petro 2:5; 3:7.

Nk’oku olwandiko lwa 1 Yowane 2:17 ludesire, “igulu kugera lyagera haguma n’irala lyalyo.” Olu lwandiko luyerekine oku Nnâmahanga ayish’ishereza abantu bagendekire okujira amabi, cikone arhali igulu ly’obudaka.

Mangaci obuzinda bwayisha?

Ebibliya arharhubwiziri n’obwalagale olusiku obuzinda bwayisha. (Mateyo 24:36) Cikone, eyerekine oku obuzinda buli hofi. Ebibliya yali erhi yalebire oku:

• Amavita, ishali, endwala z’okuyahukira, emisisi midarhi y’idaho byakajirikine hantu “hanji.”​—Mateyo 24:3, 7, 14; Luka 21:10, 11; Amafulûlo 6:1-8.

• Bantu banji bakabire bakucikaliza. Kwa lwiganyo, bakabire ‘bakusîma ensaranga,’ “bantavuga-munkwa,” na bantu barhali bakucihasha.​—2 Timoteyo 3:1-5, Mashi Bible.

Bantu banji bayemire oku, kurhenga omu mwaka gwa 1914, ebiri byajirikana omw’igulu bishushine n’ebi Ebibliya yal’ilebire n’oku obuzinda buli hofi. Ly’omanya binji, olole omwanzi gudesire “Mfuatano wa Matukio Katika Biblia Unaonyesha Nini Kuhusu Mwaka wa 1914?” n’omwanzi gudesire, “Ecimanyiso c’ ‘Ensiku Nzinda’ co Cihi?”

Bici oluderho “apokalipse” luhugwîre omu Bibliya?

Oluderho lwa mira lw’ Ecigiriki lwahindwirwe “apokalipse” omu Bibliya luhugwîre “okufulûla ebifulisirwe” erhi “kufunula.” Kanji-kanji olo luderho luba luhugwîre okufulûla emyanzi yal’ifulisirwe. Ebibliya nayo eganirire “amafulûlo [erhi, apokalipse] ga Nnawirhu Yezu,” gaba amango Yezu aciyerekana nka muntu ogwerhe obuhashe bw’okuyusa amabi goshi okw’igulu n’okuhemba abaharamya Nnâmahanga.​—2 Abatesalonika 1:6, 7; 1 Petro 1:7, 13.

Ecitabu cizinda c’Ebibliya cinahamagalwe A·po·kaʹly·psis, erhi Amafulûlo, bulya ciyerekine ebyaba omu mango gayisha. (Amafulûlo 1:1) Eco citabu cirimwo omwanzi mwinja n’ omwanzi gw’obulangalire. (Amafulûlo 1:3) Ciyerekine oku Nnâmahanga ayish’iyusa obubule bw’obushinganyanya n’okuhindula igulu libe paradizo. Ago mango, nta malumwa abantu banacibe nago, barhakacilibuka, ciru barhakanacifâ.​—Amafulûlo 21:3, 4.

Ka wanalonza okumanya binji lugenda ebyo biragane binja bwenene? Abahamirizi ba Yehova bajira eprograme y’okuyigiriza abantu Ebibliya buzira kubahûna akantu. Kwanaba kwinja oganire na muguma wa mulibo.