Ka Rhwanalangalira oku Enjira z’Okukolesa Obuhirhi bw’Ecihugo (Système Économique) Zirhalimo Obubule bw’Obushinganyanya Zanacibeho?
Omu bihugo binji, abantu bali bajira amaandamano bulya bali barhanya oku enjira obuhirhi bw’ebihugo byabo buli bwakolesibwamwo ziri mbi. Ago mazibu gabire madarhi bwenene enyanya z’endwala y’Ekorona, bulya yadwire amazibu nk’okurhacirhenga ahaka, okubulirwa n’ebintu by’obulagirire, okubula gurhi abantu bakabukwamwo, n’oko kwalerha akavulindi egarhi k’abagale n’abakenyi.
Ka hali amango ago mazibu g’okukolesa obuhirhi kubi ganacihwe omw’igulu? Neci. Ebibliya eganirire ebi Nnâmahanga ayish’ijira ly’ayusa ago mazibu.
Amazibu Nnâmahanga anayuse lugenda okukolesa kubi obuhirhi
Amazibu: Bene bantu bayabirwe okukolesa obuhirhi omu njira erhimusize abantu boshi.
Ebi Nnâmahanga ayish’ijira: Nnâmahanga ayish’ikûla amarhegesi ga bene bantu, n’okuhiraho oburhegesi bwage buhamaghalwa; Bwami bwa Nnâmahanga. Bwayish’irhambula igulu lyoshi kurhenga omu mpingu.—Daniyeli 2:44; Mateyo 6:10.
Ebi oko kwayish’ilerha: Bulya bwayish’iba burhegesi bw’igulu lyoshi, Obwami bwa Nnâmahanga, bwayish’iyimangira obuhirhi bw’igulu omu bushinganyanya. Abantu barhakacirhindibuka n’obukenyi barhakanacibula ciru n’ehitya ebintu balagirireko lyo balama. (Ennanga 9:7-9, 18) Lubero n’oko, bayish’ishagalukira amalehe g’emikolo yabo n’okuba n’akalamo kinja na kakurhimukwa haguma n’emilala yabo. Ebibliya elaganyize ntya: “Bakaz’iyûbaka enyumpa banazibêremwo, bakaz’irhwera olukoma lw’emizabibu banalye amalehe gayo. Barhakaciyûbaka enyumpa mpu owundi muntu abe ye oyihandamwo, barhakacirhwera mpu owundi muntu abe ye obirya.”—Izaya 65:21, 22.
Amazibu: Bene bantu barhakahash’iyaka ebirhuma balibuka, barhakanahash’iyaka ebirhuma babula ebi balagirireko.
Ebi Nnâmahanga ayish’ijira: Kugerera Obwami bwage, Nnamahanga ayish’ikûla ngasi byoshi biyobohya bene bantu binarhuma barhaciyumva omu murhûla.
Ebi oko kwayish’ilerha: Bulya Nnâmahanga ayish’iba ali ashibirira abantu, abantu barhakacihikirwa n’akanga kakarhuma bo n’emilala yabo babula ebintu balagirireko omu kalamo. Kwa lwiganyo, amavita, ecizombo, n’endwala z’okuyahukira, byayish’iba bintu bya mîra. (Ennanga 46:9; 72:16; Izaya 33:24) Nnâmahanga adesire ntya: “Olubaga lwani lwayubaka ahantu h’omurhûla, omu nyumpa zirimwo akahwenyenye n’omu ndaro zirimwo obuholo.”—Izaya 32:18.
Amazibu: Kanji-kanji abantu b’okucikaliza bone, banasîma eby’en’igulu, banakalibuza abandi.
Ebi Nnâmahanga ayish’ijira: Bacikala b’Obwami bwa Nnâmahanga bayish’iyiga okuhira obuzigire bwabo kuli abandi oku nafasi ntanzi ahali h’obunguke bwabo bonene.—Mateyo 22:37-39.
Ebi oko kwayish’ilerha: Amango Obwami bwa Nnâmahanga bwayish’iba buli bwarhambula, ngasi muntu ayish’iyiga obuzigire bwa Nnâmahanga, “burhacikaliza.” (1 Abakorinti 13:4, 5, Mashi Bible) Ebibliya edesire ntya: “Nta bubi na nta buligo bwacikolwe oku ntondo yani ntagatifu yoshi, bulya ecihugo [igulu] cayunjula bumanye bwa Nyakasane [Yehova]a, nka kula omuhengere gw’enyanja guyunjulira mishi.”—Izaya 11:9.
Ebibliya eyerekine oku rhulamire omu nsiku nzinda za gano mango girhu n’oku hano hofi-hofi Nnâmahanga ahikiriza eciragane cage c’okuyusa amazibu g’okukolesa kubi obuhirhi.b (Ennanga 12:5) Embere ako kasanzi kahike, amakanuni g’Ebibliya ganakurhabala okulwisa amazibu oli wahikirwa nago bulya obuhirhi bw’ecihugo cinyu buli bwakolesibwa kubi. Kwa lwiganyo, olole omwanzi gudesire, “Gurhi Rhwakalama na Bintu Bisungunu” na “Namna ya Kuwa na Mawazo ya Muzuri Juu ya Feza.”
a Ebibliya eyerekine oku izino lya Nnâmahanga ye Yehova.—Ennanga 83:18, NWT.
b Ly’oyiga bulya gurhi wakalangalira Ebibliya, olole omwanzi gudesire “Ebibliya Ciri Citabu Cirhurhabala Okumanya Okuli.”