Bici Ebibliya yali Erhi Yalebire Lugenda Emisisi y’Idaho?

Amakumi g’ebihumbi by’emisisi ganagere ngasi mwaka. Ciru akaba minji muliyo eba misungunu-ngunu, emisisi midarhi y’idaho yanashereza bintu binji bwenene, yanalerha amalibuko n’olufû. Misisi miguma na miguma enalerhe e tsunami zishereza bwenene amaeneo gaba hofi n’enyanja n’okuyirha bantu banji balamire eyo munda. K’Ebibliya yali erhi yalebire oku emisisi ya ntyo yanahabe?

Mw’eci cigabi rhwaganirira eyi myanzi ekulikire:

• K’Ebibliya yali erhi yalebire oku hanabe emisisi y’idaho?

• K’emisisi y’idaho eri yagera ene eri yahikiriza obulebi bw’Ebibliya?

• Bici obulebi bw’Ebibliya lugenda emisisi y’idaho buhugwîre kuli rhwe?

• Entanya z’obunywesi lugenda obulebi bw’Ebibliya n’emisisi y’idaho

K’Ebibliya yali erhi yalebire oku hanabe emisisi y’idaho?

Yezu aganirire emisisi y’idaho omu bulebi buganirirwe omu Bibliya. Enderho zage okubiyerekire emisisi y’idaho ziganirirwe omu bitabu bisharhu by’Ebibliya, nk’oku biyerekinwe aha:

“Ecihugo cayimukire ecindi n’obwami obundi bwami. Ecizombo n’omusisi byayish’iba hanji.”​—Mateyo 24:7.

“Ishanja lyarhêre elindi ishanja, n’obwami obundi bwami. Omusisi gw’idaho gwayish’iba hanji, habe n’ecizombo.”​—Marko 13:8.

“Hâbe omusisi munene gw’idaho, n’ecizombo n’ecahira byabe hanji.”​—Luka 21:11.

Yezu ali erhi alebire oku “omusisi munene gw’idaho” gwakabire “hanji,” muli ago mango hakabire amavita, ecombo n’ecahira. Ebyo bintu biyerekine amango gahamagalwa “okuhwa kw’amango,” erhi “nsiku za buzinda.” (Mateyo 24:3; 2 Timoteyo 3:1, Mashi Bible) Erhi rhukolesa Ebibliya omu kuciyigiriza kwa buliri akasanzi, rhunahugûkwe oku, “ensiku za buzinda” zarhangiraga omu mwaka gwa 1914 zirhanasag’ihwa.

K’emisisi y’idaho eri yagera ene eri yahikiriza obulebi bw’Ebibliya?

Neci. Obulebi bwa Yezu buhiziremo ebi aderhaga lugenda emisisi y’idaho bupatine n’ebintu biri byajirikana. Kurhangira omu mwaka gwa 1914, habire misisi y’idaho midarhi 1 950 na kulusha. Eyo misisi yanizire bantu barhalusire miliyoni ibirhi.a Olole enyiganyo nsungunu z’eyi myaka igana egezire.

2004​—Océan Indien. Omusisi gwa magnitude 9.1 gwalerha e tsunami yageraga omu bihugo ikumi na bibirhi yanayirha bantu hofi 225 000.

2008​—Chine. Omusisi gwa magnitude 7.9 gwasherezize amavilaje n’amavile, byanabonekine oku gwayisire bantu 90 000, gwayagaza bantu 375 000 n’emiliyoni y’abantu babêra buzira nyumpa.

2010​—Haïti. Omusisi gwa magnitude 7.0 gwal’ikulikirwe n’eyindi misisi misungunu-ngunu gwayisire bantu 300 000 na kulusha gwanarhumire bantu muliyoni muguma babêra buzira nyumpa.

2011​—Japon. Omusisi gwa magnitude 9.0 n’e tsunami gwalerhaga, byayisire bantu hofi 18 500 gwanarhuma amagana g’ebihumbi by’abantu babunga. E izine ehamagalwa Fukushima yasherera n’amabombe galimo gabasha ganalerha mazibu manji. Myaka ikumi enyuma z’aho, bantu hofi 40 000 bacigwerhe amazibu g’okugaluka omu nyumpa zabo hofi n’eyo izine enyanya z’amazibu g’amagala okulama aho kwakabadwirhire.

Bici obulebi bw’Ebibliya lugenda emisisi y’idaho buhugwîre kuli rhwe?

Obulebi bw’Ebibliya lugenda emisisi y’idaho burhurhonzire okubiyerekire ebyahikirira hano hofi-hofi. Yezu adesire ntya: “Amango mwabona okwo kuba mumanye oku Obwami bwa Nyamuzinda buli hofi.”​—Luka 21:31.

Ebibliya ehugwîre oku Obwami bwa Nnâmahanga buli burhegesi bw’okunali buli empingu, buli bwarhambulwa na Yezu Kristu. Obo Bwami bo Yezu ayigiragya abanafunzi bage bakashenga oku buyishe.​—Mateyo 6:10.

Hano Obwami bwa Nnâmahanga burhondera bwarhambula igulu, harhakaciba buhanya bw’igulu bulerhera bene bantu amazibu nk’omusisi gw’idaho. (Izaya 32:18) Na kulusha byoshi, Nnâmahanga ayish’iyusa amazibu g’omubirhi n’ag’ekandalala gali galerhwa n’emisisi y’idaho mwa gano mango. (Izaya 65:17; Amafulûlo 21:3, 4) Ly’omanya binji, olole omwanzi gudesire “Bici Obwami bwa Nnâmahanga Bwayish’Ihikiriza?”