Bulya Gurhi Abahamirizi ba Yehova Barhajira Idinye lya Noweri?
Entanya za Bantu Banji
Obunywesi: Ecirhuma Abahamirizi ba Yehova barhajira idinye lya Noweri, kuli kuba barhajira obuyemere muli Yezu.
Okuli: Rhuba Bakristu. Rhuba rhuyemire oku Yezu Kristu yene wakarhulerhera obokoke.—Ebijiro by’Entumwa 4:12.
Obunywesi: Munarhume emilala erhabamwo ecinyabuguma omukuyigiriza oku abantu barhashinganini bajire idinye lya Noweri.
Okuli: Rhunashibirire bwenene emilala, rhunanakolese Ebibliya lyo rhuyirhabala ebemwo ecinyabuguma.
Obunywesi: Murhayunguka n’ebintu binja bijirwa oku “Noweri” nk’okuba bahânyi, okulongezanya omurhûla, n’okujirira abantu aminja.
Okuli: Rhunacihangane okuba bahânyi na bakujira omurhûla ngasi lusiku. (Emigani 11:25; Abaroma 12:18) Kwa lwiganyo, rhunajire entimanano zirhu n’omukolo gwirhu gw’amahubiri kushimbana n’er’irhegeko lya Yezu lidesire ntya: “Mwahâbirwe busha ninyu muhâne busha.” (Mateyo 10:8) Na kandi, rhugwerhe obulangalire bw’okunali oku Obwami bwa Nnâmahango bone bwayish’ilerha omurhûla okw’igulu.—Mateyo 10:7.
Bulya gurhi Abahamirizi ba Yehova barhajira idinye lya Noweri?
Yezu arhurhegesire rhukakengera olufû lwage c’arhali okuburhwa kwage.—Luka 22:19, 20.
Entumwa za Yezu n’abanafunzi b’omu myaka igana mirhanzi barhajiraga idinye lya Noweri. Citabu ciguma cihamagalwa New Catholic Encyclopedia cidesire ntya: “Abantu barhonderaga okugenkera olusiku lw’okuburhwa kwa Yezu omu mwaka gwa 243, K.K.K. (Kano Kasanzi Kirhu), myaka igana enyuma z’okufâ kw’entumwa nzinda.
Nta kantu koshi-koshi kayerekine oku Yezu aburhagwa omu nsiku 25, z’omwezi gw’Ikumi na Kabirhi, olusiku lw’okuburhwa kwage lurhayerekinwi omu Bibliya.
Rhuba rhuyemire oku Nnâmahanga arhaba ayemire idinye lya Noweri bulya lyarhenganaga n’ebijiro n’enkomedu z’ecipagani.—2 Abakorinti 6:17.
Bulya gurhi omuntu akabula buzigirwa n’abandi mpu bulya kone arhajijiri idinye lya Noweri?
Bantu banji banagendekere bajira idinye lya Noweri ciru akaba bamanyire oku lyarhondezibagwa n’abapagani n’oku lirhaba liyemirwe n’Ebibliya. Abantu ba ntyo banadosa ntya: Bulya gurhi Abakristu bayemera bashombwe n’abandi enyanya z’okurhajira er’idinye?
Ebibliya erhuhîre omurhima rhukarhanya bwenene n’okukolesa “obuhashe [bwirhu] bw’okurhanya.” (Abaroma 12:1, 2, NWT) Erhuyigirizize rhukashagalukira okuli. (Yowane 4:23, 24) Kobinali rhunashibirire oku abandi barhubona, cikone rhunarhumikire amakanuni g’Ebibliya ciru akaba okujira ntyo kwanarhuma rhwajira ebintu biri lubero n’ebi bantu banji bashagalukira.
Ciru akaba rhurhajira idinye lya Noweri, rhunakakenga ehaki ya ngasi muntu y’okucishoga erhi alijira erhi nanga. Rhurhahanza abandi okujira idinye lya Noweri.