Bici Eciryanyi ca Marhwe Nda Ciganirirwe omu Amafulûlo Cigabi ca 13 Cihugwîre?
Ishuzo ly’Ebibliya
Eciryanyi ca Marhwe Nda Ciganirirwe omu Amafulûlo Cigabi ca 13:1 Cihugwîre ecigabi c’er’igulu ciyerekire epolitike.
Cigwerhe emisi, obuhashe, n’entebe, n’ebyo byo biyerekine oku eco ciryanyi cishushanyize eby’epolitike.—Amafulûlo 13:2.
Cinarhambule “ngasi bûko, na ngasi mulala, na ngasi lulimi, na ngasi ishanja,” k’okuderha oku cigwerhe obuhashe kulusha oburhegesi bw’ishanja liguma bone.—Amafulûlo 13:7.
Cigwerhe amorhere goshi g’ebiryanyi bini biganirirwe omu bulebi bwa Daniyeli 7:2-8, k’okuderha oku cishushire engwi (léopard), cigwerhe amagulu ga mpangaza (ours), n’akanwa k’entale (lion), na mahembe ikumi. Ebiryanyi biganirirwe omu bulebi bwa Daniyeli biganirirwe nka bami erhi mami g’epolitike gali garhambula buguma oku bundi. (Daniyeli 7:17, 23) K’okuderha oku eciryanyi ciganirirwe omu Amafulûlo 13, cishushanyize ikubuliro ly’epolitike.
Ciyinamusire “omu nyanja,” k’okuderha egarhi k’akavango k’amashanja manji ga bene bantu gaba nshôko y’amarhegesi goshi.—Amafulûlo 13:1; Izaya 17:12, 13.
Ebibliya eyerekine oku enimero erhi izino ly’eco ciryanyi ali 666. Edesire oku eyo eri “nimero ya muntu.” (Amafulûlo 13:17, 18) Olo luderho luyerekine oku eco ciryanyi ciganirirwe omu Amafulûlo cigabi ca 13 ciyerekire ecigabi c’er’igulu ca bene bantu c’arhali c’iroho erhi c’abazimu.
Ciru akaba amashanja ganayumvikane omu bintu bisungunu, ganacilunge haguma omu muhigo gwabo gw’okugendekera garhambula ahali h’okuyemera garhambulwa n’Obwami bwa Nnâmahanga. (Ennanga 2:2) Na kandi gayish’icilunga haguma lyo galwisa omurhwe gwa Nnâmahanga gwayish’ilongozibwa na Yezu Kristu okw’ivita lya Armagedoni, cikone er’ivita lyayish’ishereza amashanja.—Amafulûlo 16:14, 16; 19:19, 20.
“Mahembe ikumi na marhwe nda”
Hali ebi mibalè miguma na miguma ekolesibwa omu Bibliya eba eshushanyize. Kwa lwiganyo, omubalè ikumi n’omubalè nda, eba eshushanyize ebintu biyenire. Lyo rhuhugûkwa ebi “mahembe ikumi na marhwe nda” g’eciryanyi ciganirirwe omu Amafulûlo 13 gahugwîre, ihwe liri omu “nshushano y’eciryanyi” ciganirirwe enyuma z’aho omu citabu c’Amafulûlo. K’okuderha eciryanyi cidukula-cidukula cigwerhe marhwe nda na mahembe ikumi. (Amafulûlo 13:1, 14, 15; 17:3) Ebibliya edesire oku amarhwe nda g’eciryanyi cidukula-cidukula gashushanyize “bami nda,” erhi marhegesi.—Amafulûlo 17:9, 10.
Ko n’oko, amarhwe nda g’eciryanyi ciganirirwe omu Amafulûlo 13:1 gashushanyize marhegesi nda. K’okuderha amarhegesi ga gwerhe buhashe bunji bwenene gamakarhambula igulu, ganahikire aha galibuza abakozi ba Nnâmahanga. Ago marhegesi ali Misri, Asiriya, Babiloni, Abamedi n’Abapersi, Bugiriki, Roma na Amérique na Angleterre. Erhi akaba ago mahembe ikumi gashushanyize amarhegesi goshi g’epolitike, gabe makulu erhi nanga, k’okuderha oku amashungwe gali oku ngasi liguma ly’ago mahembe gayerekine oku ago marhegesi goshi ganarhambule mango maguma haguma n’oburhegesi bukulu buli bwarhambula mw’ako kasanzi.