Ecimanyiso c’‘Ensiku Nzinda’ Erhi “Buzinda” co Cihi?
Ishuzo ly’Ebibliya
Ebibliya eganirire ebintu, ehali, n’olugenzi byakayerekine “okuhwa kw’igulu.” (Mateyo 24:3) Ebibliya ehamagire kano kasanzi rhulamiremo “nsiku nzinda” erhi mango ga “buzinda.”—2 Timoteyo 3:1; Daniyeli 8:19.
Bulebi buhi buguma na buguma bw’Ebibliya buganirire ‘ensiku nzinda’?
Ebibliya yali erhi yalebire bintu binji byakabire byoshi haguma “cimanyiso” cakayerekine ensiku nzinda. (Luka 21:7) Rhuganirire nyiganyo nguma na nguma:
Okuluga kw’amavita. Yezu alebire ntya: “Ecihugo cayimukire ecindi, n’obwami obundi bwami.” (Mateyo 24:7) Ko n’oko, Amafulûlo 6:4 gali erhi gaganirire omulume w’olwiganyo oshonyire oku nfarasi oshushanyize amavita ‘gakarhenzize omurhûla omu igulu.’
Ishali. Yezu alebire ntya: “Ishali lidarhi lyaba.” (Mateyo 24:7, Mashi Bible) Ecitabu c’Amafulûlo cali erhi caganirire owundi mulume w’olwiganyo oshonyire oku nfarasi, n’oko kuyishonako kwakadwirhe ishali linji bwenene.—Amafulûlo 6:5, 6.
Emisisi minene y’idaho. Yezu adesire oku ‘emisisi yakabire hanji.’ (Mateyo 24:7; Luka 21:11) Eyo misisi minene y’idaho yakadwirhe mazibu manji omw’igulu n’okurhuma bantu banji bafâ kulusha oku byali embere.
Endwala. Nk’oku Yezu aderhaga hakabire “ecahira” erhi ndwala ndarhi bwenene z’okuyahukira.—Luka 21:11.
Obubi. Ciru akaba obubi bwahali kurhenga mîra, Yezu ali alebire oku omu nsiku nzinda “amabi gayushûka.”—Mateyo 24:12.
Okushereza igulu. Olwandiko lw’Amafulûlo 11:18 lwali erhi lwalebire oku bene bantu ‘bakasherezize igulu.’ Bakajijire ntyo omu njira nyinji, arhali omukujira obuminya kone n’okulya ebituliro, cikone kandi omukushereza amazingira.
Olugenzi lubi. Omu 2 Timoteyo 3:1-4, Mashi Bible, Ebibliya yali erhi yalebire oku bantu banji bakabire “bantavuga-munkwa na bakurhâkenga ngasi kantu kimana, . . . bantafâ bwonjo, bakâkoza, ba binkanyali [bakurhacihasha], bakulisa abandi amagala na bashombanyi b’aminja, ba kukâhâna abandi, ntumva, na bakucibona bwenene.” Olo lungenzi lwakayushûsire bwenene, n’oko ko kwarhumire Ebibliya yagahamagala “mango madarhi.”
Okushabûka kw’emilala. Omu 2 Timoteyo 3:2, 3, NWT, Ebibliya yali erhi yalebire oku bantu banji barhakabire n’“obuzigire bw’akaburhano” oku bantu b’omu milala yabo, n’oku abana bakabire “ba kurhayumva ababusi.”
Okunyiha kw’obuzigire kuli Nnâmahanga. Yezu alebire ntya: “Obuzigire bwa banji bwanyihe.” (Mateyo 24:12) Yezu alonzagya okuhugûla oku obuzigire bwa bantu banji kuli Nnâmahanga bwakanyihire. Ko n’oko, 2 Timoteyo 3:4 gadesire oku omu nsiku nzinda abantu ba ntyo bakabire ‘bakusima irala libi ahali h’okusima Nnâmahanga.’
Obulyalya bw’amadîni. Omu 2 Timoteyo 3:5, Ebibliya yali erhi yalebire oku abantu bakabonekine nka abakombîre ebya Nyamuzinda cikone barhakalamire kushimbana n’amakanuni gage.
Okuhugûkwa bwinja obulebi bw’Ebibliya. Ecitabu ca Daniyeli cali calebire oku omu “mango mazinda,” bantu banji bakabire na bumanye bunji bw’okuli kw’Ebibliya, n’okuhugûkwa bwinja obu bulebi.—Daniyeli 12:4.
Omukolo gw’amahubiri omu igulu lyoshi. Yezu alebire ntya: ‘Ogu mwanzi mwinja gw’Akalembe gudesire ogw’Obwami bw’e mpingu gwayalîzibwa omw’igulu lyoshi.’—Mateyo 24:14, Mashi Bible.
Bantu banji okurhaba masu n’okushekera abandi. Yezu ali erhi alebire oku bantu banji barhakashibirire ebintu biyerekine n’obwalagale oku obuzinda buyegerire. (Mateyo 24:37-39) Na kandi, 2 Petro 3:3, 4 galebire oku bantu baguma na baguma bakakaziri gayaguza n’okushekera ebintu biyerekine oku obuzinda buyegerire, n’okurhahugûkwa kantu koshi-koshi.
Obulebi boshi bwahikirire. Yezu adesire oku ensiku nzinda zakabonekine kugerera okuhikirira k’obo bulebi boshi oku liguma cikone arhali omu kuhikirira kwa buguma erhi ciru bunji bwa muli bo.—Mateyo 24:33.
Ka rhulamire omu “nsiku nzinda”?
Neci. Ehali ziri omw’igulu, n’akasanzi Ebibliya eganirire biyerekine oku ensiku nzinda zarhonderaga omu mwaka gwa 1914, ogo gwo mwaka Ivita Lirhanzi ly’Igulu lyarhonderaga. Ly’obona gurhi ehali ziri omw’igulu ziyerekine oku rhulamire omu nsiku nzinda, olole evideo ekulikire:
Omu mwaka gwa 1914, Obwami bwa Nnâmahanga bwarhondera bwarhambula empingu n’egarhi k’ebintu birhangiriza bwajijire, kwaba kufukuza Shetani n’abazimu bage empingu na ntyo nta handi bakacijirire emikolo yabo ahanyuma n’okw’igulu. (Amafulûlo 12:7-12) Oku Shetani ali ashumyamwo bene bantu kwanabonekana kugerera morhere manji mabi n’ebijiro bibi by’abantu biri byarhuma ensiku nzinda gaba “mango madarhi.”—2 Timoteyo 3:1, Mashi Bible.
Bantu banji bali balibuzibwa bwenene n’ago mango madarhi. Bali baciyumva kubi okubona gurhi olubaga luli lwasherera. Ciru baguma na baguma bayobohire bwenene lugenda amango gayisha ga bene bantu.
Mw’ako kasanzi ko n’ako, abandi bantu bali balibuzibwa bwenene n’ehali z’igulu bagwerhe obulanagalire lugenda amango gayisha. Bayemire n’obwalagale oku hano hofi-hofi Obwami bwa Nnâmahnaga bwayusa amazibu goshi g’er’igulu. (Daniyeli 2:44; Amafulûlo 21:3, 4) Bali balindirira oku Nnâmahanga ahikiriza ebiragane byage, banali baba n’oburhulirize kugerera ezi nderho za Yezu: “Owanazibuhe [owanalembere] kuhika oku buzinda, oyo ye wacizibwa.”—Mateyo 24:13, Mashi Bible; Mikeyo 7:7.