Bici Ebibliya Edesire Okubiyerekire Okugeza Izimi?

Ishuzo ly’Ebibliya

Ebibliya erhakolesizi oluderho “kugeza izimi” omukuganirira okuhulusa omwana orhacihisa amango g’okuburhwa omu nda. Cikone mandiko manji g’Ebibliya gaba gayerekine entanya za Nnâmahanga lugenda obuzine bw’omuntu, kuhiramo n’ob’omwana orhac’iburhwa.

Obuzine eba ngalo kurhenga emwa Nnâmahanga. (Omurhondêro 9:6; Ennanga 36:9) Anabone ngasi buzine oku buli bwa ngulo ndarhi kuhiramo n’ob’omwana ociri omu nda. Co cirhumire erhi omuntu akayirha n’obulonza omwana orhaciburhwa, anabe ajijire ecaha c’obunizi.

Irhegeko Nnâmahanga ahâga Abaisraheli lyali lidesire ntya: “Erhi bantu babirhi bankagwarhana balwa, bakahukula omukazi oli izimi, nyamukazi akamoma, ciru akaba arhafîri, barhegesirwe balyûle nk’olu iba wa nyamukazi anahûnyire, n’oku batwirirwe n’abaciranuzi. Ci erhi ankafâ, bajuhe obuzine oku buzine.”​—Olubungo 21:22, 23.a

• Mangaci obuzine bw’omuntu burhondera?

• Ka Nnâmahanga anababalira omuntu wagezize izimi?

• K’okugeza izimi kuli kubi erhi akaba obuzine bw’omuzire erhi obw’omwana buli omu mazibu?

Mangaci obuzine bw’omuntu burhondera?

Erhi omukazi ahêka izimi, ho n’aho Nnâmahanga anabone oku obuzine bw’omuntu bwamarhondera. Omu Kanwa kage Bibliya, Nnâmahanga ayerekine oku omwana orhac’iburhwa naye ali muntu. Rhuganirire nyiganyo nguma na nguma ziyerekine oku Nnâmahanga arhaba ahizire ho olubero egarhi k’obuzine bw’akabonjo kaciri omu nda n’obw’omuntu wabusirwe.

• Mwami Daudi alongozibwa n’iroho litagatifu erhi abwira Nnâmahanga ntya: “Amango naciri cibumburugu wakag’imbona.” (Ennanga 139:16, Mashi Bible) Nnâmahanga akag’ibona Daudi oku ali muntu ciru n’embere aburhwe.

• Na kandi, Nnâmahanga al’imanyire oku akabire n’omuhigo gwago-gwago lugenda omulebi Yeremiya emebere Yeremiya aburhwe. Nnâmahanga amubwira ntya: “Embere nkuleme omu nda ya nyoko, erhi nkuyishi, embere orhenge omu nda erhi namakwishoga, nakujira nti obe mulêbi w’amashanja.”​—Yeremiya 1:5.

• Luka, mwandisi w’Ebibliya wali munganga, akolesize luderho luguma lw’Ecigiriki erhi aganirira omwana orhaciburhwa n’erhi aganirira omwana wabusirwe.​—Luka 1:41; 2:12, 16.

Ka Nnâmahanga anababalira omuntu wagezize izimi?

Nnâmahanga anababalira abantu bagezize amazimi. Erhi bakayemera entanya za Nnâmahanga lugenda obuzine, barhacishinganini bagendekere bacitumuza. “Nyamuzinda ye lumbiba lukogo na bwonjo . . . Nka kulya ebushoshokero eri kuli n’ebuzikiro, ko Nnâmahanga ahirika kulî ebyaha birhu.”b (Ennanga 103:8-12) Yehova anababalira abaciyunjuzize okunali ebyaha bajiraga mîra, bihiziremo n’okugeza izimi.​—Ennanga 86:5.

K’okugeza izimi kuli kubi erhi akaba obuzine bw’omuzire erhi obw’omwana buli omu mazibu?

Nk’oku biyerekinwe omu Bibliya lugenda obuzine bw’akabonjo karhaciburhwa, omuntu arhakacihalira lugenda okugeza izimi omukuderha oku anajiraga ntyo bulya amagala g’omuzire erhi ag’omwana gali omu mazibu.

Gurhigi byakaba erhi omu kasanzi omuzire akola aburha byakahûna okucishoga egarhi k’okuyokola obuzine bw’omuzire erhi obw’omwana waburhwa? Omu kanga ka ntyo, ngasi muguma ashinganine acirhôlere omuhigo lugenda obuzine ayokola.