K’Ensaranga y’Eba Nshôko y’Ebintu Bibi?

Ishuzo ly’Ebibliya

Nanga. Ebibliya erhadesiri oku ensaranga ziba mbi, arhanadesiri oku zo ziba nshôko ya ngasi kantu kabi. Enderho “ensaranga zo ziba nshôko ya ngasi kantu kabi” zirhaba ziyenire zirhanaba ziyerekine okuli kuba omu Bibliya. Ebibliya eba edesire oku “okusima enfaranga k’okulerha ngasi mabi.”a—1 Timoteyo 6:10, Mashi Bible, rhwe rhusegize luderho luguma.

Bici Ebibiya eba edesire lugenda ensaranga?

Ebibliya eyerekine n’obwalagale oku erhi ensaranga zakakolesibwa n’obwenge zanaba “lwakiro.” (Omuhanûzi 7:12) Ebibliya ehîre omurhima balya boshi baba bahânyi, n’oko kuhâna kwanaba kuhiziremo okuha abandi ensaranga.—Emigani 11:25.

Cikone kandi, Ebibliya erhurhonzire lugenda okusegeza obwenge bwirhu oku kulongereza ensaranga. Edesire ntya: “Mumanye okusîma enfaranga kwankamurhambula omu bijiro binyu. Mushagalukire ebi mugwerhe.” (Abahabraniya 13:5, Mashi Bible) Isomo rhukuzire aho kuli kukakolesa ensaranga bwinja, n’okuyaka okushimbulira obuhirhi. Lubero n’oko, rhushinganine rhukarhimukwa n’ebintu by’obulagirire nk’ebiryo, emishangi, n’ah’okulama.—1 Timoteyo 6:8.

**Bulya gurhi Ebibliya eba erhurhonzire lugenda okuzigira ensaranga?**

Abantu bahubira eby’en’igulu barhakapata obuzine bw’ensiku n’amango. (Abefezi 5:5) Bulya okuba muhubu ko kunali nk’okuharamya ensanamu. (Abakolosi 3:5) Na kandi, omukulonza okuba n’ebi balalikire, abantu bahubu banakavuna amakanuni g’Ebibliya. Emigani 28:20, edesire oku “olonza okugala duba arhabula butumula.” Ciru banahikire aha bajira ebintu bibi bwenene nk’okuyandikira abantu amamesaje g’okubayobohya, okunyaga abandi, okuzimba, okugwarha abandi cirimisi n’okubahêka, ciru n’okuniga.

Ciru okusîma ensaranga kwakaba kurharhumiri rhwaba n’olugenzi lubi, hali agandi mazibu kwakarhulerhera. Ebibliya edesire oku “balya balonza okubona amahirhi kuhirima bahirima omu mashumi n’omu murhego n’omw’irala lya ngasi lubero ly’obuhwinja n’obuhanya.”—1 Timoteyo 6:9.

Gurhi rhwakayunguka kugerera amahano Ebibliya ehânyire lugenda ensaranga?

Erhi akaba rhurhavunyiri amakanuni ga Nnâmahanga lugenda ensaranga, rhwanayemerwa na Nnâmahanga ananarhurhabala n’abandi banakarhukenga. Ntya ko Nnâmahanga alaganyize balya boshi bajira okwabo koshi ly bamushagalusa: “Ntakakuleka, ntakanakulîkirira.” (Abahabraniya 13:5, 6) Na kandi arhuyemezize n’obwalagale oku “orhabêsha yenabûmba mugisho.”—Emigani 28:20.

Amandiko g’Ebibliya gaganirire ensaranga

Omuhanûzi 7:12, NWT: “Ensaranga buba bulanzi.”

Ebi oko kuhugwîre: Erhi rhwakakolesa ensaranga n’obwenge, zanarhulerhera obunguke bulya zanarhuma rhwaba n’ehy’obulanzi.

Luka 12:15: “Bulya omuntu obuzine bwage burhaba omu bunji bw’ebirugu byage.”

Ebi oko kuhugwîre: Arhali ensaranga ko kantu k’obulagirire bwenene omu kalamo, zirhakanarhuma rhwayokoka.

1 Timoteyo 6:10: “Buly’ecisisi c’amabi goshi gaba magene g’ebirugu [okusima enfaranga, Mashi Bible]. Erhi kubishwira kurhuma, baguma bahabusire, baheza obuyemere, bacifunda malumwa manji omu murhima.”

Ebi oko kuhugwîre: Ensaranga zirhaba mbi. Cikone abantu basîma ensaranga, bazisegezako obwenge omu kalamo kabo, banacilerhere amazibu bonene nk’okushabûka kw’emilala n’okuba n’amazibu g’amagala enyanya z’okukola okurhalusire olugero.

Abahabraniya 13:5, Mashi Bible: “Mumanye okusîma enfaranga kwankamurhambula omu bijiro binyu. Mushagalukire ebi mugwerhe.”

Ebi oko kuhugwîre: Ahali h’okukashimbulira obuhirhi, kwanaba kwinja bwenene erhi rhwakakarhimukwa n’ebintu by’obulagirire.

Mateyo 19:24 Mashi Bible: “Ensimba ederhwa ngamiya okugera omu murhule gw’ensindani kwo kulembu kulusha omugale okuja omu Bwami bwa Nnâmahanga.”

Ebi oko kuhugwîre: Yezu ali amalalika musole muguma mugale amukulikire erhi aderha ezo nderho. Oyo mulume alahira bulya alicishwekerire oku buhirhi bwage. Co canarhumaga Yezu ahâna obwola burhonde. Omuntu ohira obugale oku nafasi ntazi ahali ha Nnâmahanga anaheza obulyo bw’okuba n’obuzine bw’ensiku n’amango.

a Olo lwandiko lwanacib’ihindulwa ntya: “Okuzigira ensaranga co cisisi c’ebintu bibi byoshi.”