Ecikolanwa Cago-cago c’Okurhabala Okuyiga Ebibliya

Omu Mwezi gwa Buranzi, 2021, Embaraza Eri Yalongoza yatangaza okuhânwa kw’ecikolanwa cihyahya c’okurhurhabala okuyiga Ebibliya. K’okuderha ecitabu cidesire; Oshagalukire Akalamo Ensiku n’Amango!a Gurhi waciyumvirhe erhi batangaza okuhânwa kw’eco citabu? Matthew olama e Canada adesire ntya: “Nashagaluka bwenene. N’obushagaluke bwani bwayushuka erhi ehotuba n’amavideo bihugûla bulya gurhi eco citabu ciri ca bulagirire n’ebi abarhanzir’icikolesa bacibwinire. Nagwerhe irala ly’okuba n’ecani ho n’aho n’okurhondera okucikolesa.”

Ecitabu Oshagalukire Akalamo Ensiku n’Amango! cirimo enjira mpyahya y’okulongoza amafunzo g’Ebibliya. Cikone arhali olo lone lubero luli egarhi k’eco citabu n’ebi rhwakag’ikolesa embere. Erhi akaba oli wakolesa ecitabu Oshagalikire Akalamo Ensiku n’Amango! cicape oku rhuradasi, byanahashikana erhi wabwine oku ciri lubero n’ebi rhwakag’ikolesa embere. Rhulole binji lugenda eco citabu.

Ecitabu Cihyahya Ciri Cago-cago

Orhuradasi rhuzibu-zibu. Bulya gurhi rhuli rhwabulagirire? Ecitabu Oshagalukire Akalamo Ensiku n’Amango! cirimo nfoto 600 z’amarangi. Kuli kuderha oku cirimo enfoto zilushire kali ikumi ezali omu citabu Bici Ebibliya Erhuyigiriza? Kandi eco citabu cihyahya cigwerhe enafasi ngali oku ngasi bukurasa zirhali nyandikeko kantu. Ebyo bintu bibirhi bijira amazibu: Erhi orhudasi rhwakaba rhulembu-rhulembu, enfoto ziri oku bukurasa bukulikire zanakabonekana. Ly’oko kurhagihikira, bene wirhu b’omu Departema y’Okucapa y’omw’Igulu Lyoshi eba e Wallkill, omu New York, e États-Unis, bapimire okukolesa rhuradasi rhuni rhuli lubero rhulug’ikolesa omu imprimeries zirhu. Ekomite y’Obwandisi y’Embaraza Eri Yalongoza yalolerezize orho rhuradasi rhoshi, yanacishoga akaradasi karhag’iyerekana ebiri embere n’ebiri enyuma. Ciru akaba orho rhuradasi rhuli rhw’ibeyi kali 16 okw’igana kulusha orhundi rhuradasi rhulug’ikolesa omu bitabu birhu, orho rhurhasi rhuhîre ngasi mwanafunzi w’Ebibliya obulyo bw’okusoma ngasi bukurasa bw’ecitabu Oshagalukire Akalamo Ensiku n’Amango! buzira kubona enfoto ziri oku bundi bukurasa.

Ecijalada Cago-cago. Ecijalada c’eco citabu cihyahya ciri lubero n’ebijalada by’ebindi bitabu birhu bulya cirhali cakuharabika duba. Lubero n’irangi lilug’ikolesibwa oku bijalada by’ebindi bitabu, irangi likolesibwe oku cijalada c’eco citabu cihyahya liri lyarhabala enfoto ekuli eje yabonekana. Na kandi liri lyakurhabala ecijalada cirhaharabikaga duba ciru eco citabu cakakolesibwa kanji-kanji. Er’irangi liba ly’ibeyi karhanu kulusha erindi irangi lya ntyo likalangala. Tawi nyinji zakozire haguma lyo rhupata ebijalada birhahûnyiri nsaranga nyinji bwenene.

Bulya gurhi rhwacishozire okukolesa ebikolanwa by’ibeyi linji? Mwene wirhu muguma okola omu Departema y’Okucapa y’omw’Igulu Lyoshi adesire ntya: “Rhulangalire oku eci citabu cakolesibwa bwinja, cocirhumire rhulonzize cibêrane irangi linja ciru omuntu akacikolesa kanji-kanji.” Eduardo, okolera omu Biro by’Okucapa by’oku Tawi y’e Brésil adesire ntya: “Rhushagalusire bwenene okubona ikubuliro lya Yehova lyacishozire okukolesa ebikolanwa binja ly’eci citabu ciba cinja, cakukolesibwa nsiku nyinji, na cakushagalula oli wacikolesa, lyanakolesa bwinja oburhabale bwa bene wirhu na bali birhu.”

Cacapirwe omu Kasanzi k’Ekorona

Rhwarhonderaga okucapa ecitabu Oshagalukire Akalamo Ensiku n’Amango! omu Mwezi gwa Kasharhu, 2021. Ago mango Ekorona yakag’ilandira bwenene, n’oko kwalerha amazibu. Bulya babetelite bali omu confinement, e imprimeries zirhu zirhakalangalire okuhâbwa oburhabale bwa bavolontere rhurhakanahamagire bene wirhu bahyahya okuyish’ikolera oku Beteli. Oko kwarhuma imprimeries nguma na nguma zirhaba na bantu banji b’okuzikolamo ciru n’ezindi zaleka okukola enyanya z’amarhegeko abakulu b’ecihugo bal’ihizireho enyanya z’ekorona.

Gurhi rhwahimiremo ago mazibu? Erhi e imprimeries zicib’irhondera okukola, bene wirhu na bali birhu b’omu zindi departema z’oku Beteli, bakag’ihâbwa omukolo gw’okugend’irhabala oku mukolo gw’okucapa eco citabu. Joel okola omu Departema y’Okucapa y’omw’Igulu Lyoshi adesire ntya: “Iroho lyabo ly’okucihâna n’okuba kwabo babidu okuyiga omukolo muhyahya, kwarhabire ogo mukolo guhikirire.”

Ciru akaba hali ago mazibu goshi, rhwamakacapa emiliyoni y’ecitabu Oshagalukire Akalamo Ensiku n’Amango! Okucapa ebyo bitabu kuhûnyire bikolanwa binji. Ebyo bikolanwa bihiziremo; e clichés, irangi, orhuradasi, obwino n’ekolo. Omu myezi irhanu mirhangiriza y’okucapa eco citabu dolare zilushire miliyoni 2.3 zakolesibwe omukugula ebikolanwa byone. Lyo rhurhag’ikolesa nsaranga nyinji bwenene, rhwacapa ebitabu ebigamba bilagirireko byonene.

“Ciri Citabu Cicape Bwinja”

Bici Abalimu b’Ebibliya n’abanafunzi badesire lugenda eci cikolanwa cihyahya c’okurhabala abantu bayige Ebibliya? Mwene wirhu muguma w’e Australie, ohamagalwa Paul, adesire ntya: “Ecitabu Oshagalukire Akalamo Ensiku n’Amango! ciri cinja bwenene okukolesa, cinarhume nashaglukira bwenene okulongoza amafunzo g’Ebibliya. Oku eco citabu cipanzirwe, kuli kwakushagalusa, kobinali canarhabala omuntu ayige Ebibliya omu kuganira. Cirimo emyanzi eyumvikine bwinja, amadoso g’okuhuma oku murhima, evideo, enfoto, amakarte, n’emihigo omwanafunzi akacihiriraho. Ciri citabu cicape bwinja ciri canshumya nkubûle omukolo gwani gw’okuyigiriza.”

Mwanafunzi muguma w’Ebibliya w’e États-Unis, adesire ntya: “Nsimire bwenene eci citabu cihyahya. Enfoto ziri zantabala mpugûkwe ebintu by’obulagirire. Evideo ziri zampuma oku murhima, zinali zanshumya okujira ebintu bipatine n’ebi naciyigirizagya.” Oyu mwanafunzi ali ayiga Ebibliya kabirhi omu mugobe anali aja oku ntimanano ngasi mango.

Ecitabu Oshagalukire Akalamo Ensiku n’Amango! cacicapwa omu ndimi nyinji. Kuhika buno, Embaraza Eri Yalongoza, yayemire eco citabu cicapwe omu ndimi 710, kuli kudera zindi ndimi 340 zilushire ezi ecitabu Bici Ebibliya Erhuyigiriza? cacapagwamo.

Ngahi rhukûla ensaranga zirhurhabala rhucape ebitabu birhu? Zinarhenge omu burhabale bw’okulunga okuboko omukolo gw’omw’igulu lyoshi. Burhabale bunji bunahânwe kugerera donate.jw.org. Rhumuvuzire omunkwa mweshi kw’er’iroho linyu ly’okuhâna, liri lyarhurhabala okucapa ebikolanwa by’okurhabala okuyigiriza Ebibliya balya balonzize okumanya Yehova n’‘okushagalukira akalamo ensiku n’amango.’​—Ennanga 22:26, NWT.