Okulanga Amagala g’Abantu Aha Nyumpa z’Obwami omu Mango g’Ekorona

“Embaraza Eri Yalongoza yahiga oku akaba birhahanzibwi n’amarhegeko g’ecihugo, ebigamba byoshi byarhondera okujira entimanano za busu oku busu omu mugobe gw’Olusiku 1, Mwezi gwa Kani.” Er’itangazo lyahiragwa oku jw.org omu Mwezi gwa Kasharhu, 2022, lyashagalusa Abahamirizi ba Yehova b’omw’igulu lyoshi. Cikone endwala y’Ekorona erhal’icihwa.a Mpindulo zihi, burhabale buhi na bintu bihi byal’ilagirirweko lyo rhulanga abaja oku ntimanano barhayahukiragwa n’obo bulwala? Enyuma z’okuyusa myaka ibirhi rhurhajira entimanano za busu oku busu, k’Enyumpa zirhu z’Obwami zakabire ziri nteganye lyo ziyankirira abantu?

Hali hamagera myezi minji bene wirhu bali bacirheganya okugalukira entimanano za busu oku busu aha Nyumpa z’Obwami.

Amalagirire Gali Lubero Gahikirizibwa

Mwezi muguma gone enyuma z’okuleka okujira entimanano za busu oku busu omu mwaka gwa 2020, e Service Mondial de Développement-Construction, y’e Warwick, omu New York, yarhondera yalabiriza gurhi Ekorona yakahumire oku njira rhukolesamwo Enyumpa zirhu z’Obwami n’ebyal’ishinganine bijirwe lyo zigendekera zabêra zicîre.

Ebi bantu balebe bakag’iba balagirireko omu maeneo malebe g’igulu, byakag’iba lubero n’ebi abandi b’omu gandi maeneo balagirireko. Matthew De Sanctis, okola haguma n’e Service Mondial de Développement-Construction, ahugwîre ntya: “Omu maeneo maguma na maguma hali obulagirire bw’okuba n’ahantu h’okukalabira enfune. Erhi akaba aha Nyumpa y’Obwami harhaba mishi, binahûne okugagula erhi okuj’igadoma e lwishi. Omu bindi bihugo, amaguvernema gahâna amarhegeko lugenda ebishinganine bijirwe ly’aha abantu bali haba ehewa nyinja na lugenda ebimanyiso by’okubandikwa biyerekire amagala minja n’okuca.”

Gurhi bene wirhu balwisizemwo ago mazibu? Matthew adesire oku babona oku okubiyerekire Nyumpa nyinji z’Obwami, “byal’ihûnyire okukolesa ebintu birhahûne nsaranga nyinji.” Kwa lwiganyo, omu Papouasie-Nouvelle-Guinée, enjerekani za kujamwo litre 20 zahirwako amarobine zanakakolesibwa omu kukakalaba enfune. Ntyo bene wirhu baba n’obulyo bw’okurhumira Enyumpa z’Obwami zali kuli n’evile eby’okukolesa lyo bakalaba enfune omu kukolesa dolare 40. Okubiyerekire Enyumpa z’Obwami z’omu Afrique, ebikolanwa binja bwenene by’okukalabira enfune birhalusire 6 000 byagulwa kurhenga e Asie.

Ezindi mpindulo zajijirwe zal’ihiziremwo okukubûla e climatiseurs n’ebindi bintu by’okuhira ehewa omu Nyumpa z’Obwami. Bigamba binji byagula ebintu bilîri emikro yakagwarhirako ly’abantu barhagikayihuma-humako amango bakola bashuza. Rhwacihanganyire bwenene okukacesa n’okuyirha emikrobe ahantu abantu balug’ihumako n’okuhanza abantu barhakag’ihahuma-huma bwenene lyo barhag’iyahukirwa n’Ekorona. Aho hantu hahiziremwo; e poignées z’enyumvi, n’amarobine. Bigamba biguma na biguma byahira omu WC zabyo amarobine g’okuciyigula gone. Omu Chili, ly’ago malagirire gahikirizibwa, byahûnyire dolare 1 400 kuli ngasi Nyumpa y’Obwami.

Ciru akaba omuhigo mukulu gwali gwakulanga amagala g’abaja oku entimanano omu Nyumpa z’Obwami, bene wirhu bajira okwabo koshi lyo bakolesa ensaranga bwinja. Kwa lwiganyo, bayemera oburhabale eguvernema zakag’ihâna lugenda okugula ebikolanwa by’okukolesa amango g’okukalaba enfune n’ebyombo by’okuhirako emikro. Tawi nyinji zakola haguma lyo zigulira haguma ebintu by’okukolesa n’oko kwarhuma barhakolesa nsaranga nyinji bwenene. Kanji-kanji Etawi n’Edepartema y’omw’Igulu Lyoshi y’Okugula Ebintu byakag’ikola haguma lyo bigulira ebintu ababitula, n’oko kwanyihya oku nsaranga zakakolesibwe n’oku kasanzi kal’ihûnyirwe lyo bipatikana.

“Obulanzi Nal’ilagirireko”

Okurhôla emipango lugenda okulanga amagala g’abakayishire oku ntimanano aha Nyumpa z’Obwami, kwalanzire abantu kwanarhuma barhondera okuja oku ntimanano za busu oku busu buzira boba. Mwali wirhu muguma w’e Pérou ohamagalwa Dulcine, adesire oku ‘al’iyobohire hisungunu’ erhi amanya oku rhukola rhwacib’irhondera okujira entimanano za busu oku busu aha Nyumpa y’Obwami. Adesire ntya: “Hisanzi hisungunu enyuma z’okurhondera kw’Ekorona, yanyahukira. Ntyo nakabona oku kurhali kulembu kuli nie okuja aha Nyumpa y’Obwami, bulya nal’imanyire oku okujira ntyo kwakarhumire nacib’iyahukirwa n’Ekorona. Cikone erhi mpika aha Nyumpa y’Obwami nabona oku abagula barhôzire mipango minji lyo balanga amagala g’abantu. Eyo mipango yal’ihiziremwo okuba n’ahantu h’okukalabira enfune, ebyombo bilîri by’okuhirako emicro ly’abantu barhayihumagako, n’omupango lugenda okuyirha emikrobe yakaba eri omu nyumpa y’obwami embere n’enyuma za ngasi ntimanano. Ebyo byoshi byarhuma naba n’obulanzi nal’ilagirireko.”b

Mwali wirhu muguma w’e Zambie ohamagalwa Sara, alwisize amazibu gali lubero. Ahugwîre ntya: “Hali hamagera myezi minji ibanie afîre enyanya z’endwala y’Ekorona. Nal’iyobohire lugenda oku nakaciyumvirhe omu kuja oku ntimanano za busu oku busu niene oburhanzi ntanali haguma naye.” Gurhigi ali aciyumva ene lugenda okuja oku ntimanano aha Nyumpa y’Obwami? Adesire ntya: “Entimanano za busu oku busu zanyeresire oku kobinali Yehova ali haguma na nirhu mw’ezi nsiku nzinda. Ene, ciru na kulusha oku byali embere, ndi naciyumva oku ndi nahâbwa omurhima, obuzigire, n’oburhabale ndagirireko kurhenga oku bagula na bene wirhu na bali birhu.”

Bene wirhu na bali birhu b’omu igulu lyoshi, bashagalusire bwenene okucibiba n’obulyo bw’okugaluka aha Nyumpa z’Obwami. Koko bwenene oku burhabale bwinyu, burhabale bunji bwahânyirwe kugerera donate.jw.org. Obo burhabale buli bwarhuhashisa rhuyinjihye ahantu rhuharamiza Yehova n’okujira abantu bali barhimanana aho babe omu bulanzi.