Omunara gw’e Babeli

Enyuma z’Enkuba y’Ecihonzi, bagala ba Nuhu na bakabo baburha bana banji. Emilala yabo yayushuka, banarhondera baja omu maeneo gali lubero g’igulu nk’oku Yehova anababwiraga.

Cikone, milala miguma na miguma erharhumikiraga Yehova. Yaderha ntya: ‘Rhuyubake olugo [vile] rhucibereremwo. Rhwayubaka omunara gwahika oku nkuba. Ntyo abantu bakaderha oku nirhu rhuli balume.’

Yehova arhashagalukiraga ebi abo bantu bakag’ijira, ntyo ahiga okubiyimanza. K’omanyire gurhi ajijiremwo ntyo? Ho n’aho abajira baderhe endimi ziri lubero. Bulya ntaye wakaciyumvirhe ebi owabo ali aderha, bayimanza ogo mukolo gw’obubasi. Buzinda eyo vile bakag’iyubaka yahikira okuhamagalwa Babeli, izino lihugwîre “Kushandaza.” Abantu bashandala omu maeneo gali lubero g’igulu. Cikone bagendekera bajira ebintu bibi omu maeneo mahyahya bal’ikola balamiremwo. Ka hacili omuntu wal’izigire Yehova? Rhwabona ishuzo omw’isomo likulikire.