AMADOSO EMISOLE ECIDOSA
Gurhi Ebibliya Yakantabala?—Cigabi ca 2: Ojire Obusomi Bwawe Bube bwa Kusimisa
Musole muguma guhamagalwa Will gudesire oku “Okusoma Ebibliya kwanarhamya erhi akaba omuntu arhamanyiri enjira y’okuyisomamwo.”
K’olonzize okumanya bintu bihi byakakurhabala okashagalukira okusoma Ebibliya? Eci cigabi cakurhabala.
Orhanye kw’ebi oli wasoma
Ocihire oku nafasi y’abantu baganirirwe omu mwanzi oli wasoma. Wanajira ebi bintu bikulikire:
Ocishoge omwanzi gw’Ebibliya olonzize okuyiga. Wanacishoga mwanzi mulebe erhi lwandiko lulebe lw’omu bitabu by’e Injili erhi wanacishoga mwanzi muguma egarhi k’emyanzi eri omu Busomi bw’Ebibliya buli oku jw.org.
Osome ogo mwanzi. Wanagusoma wenene erhi kandi wanagusoma n’izu linene haguma n’abîra bawe erhi n’abantu b’omu mulala gwawe. Muntu muguma anasoma enderho z’owaganiriraga ogo mwanzi, n’abandi banasoma enderho z’abandi bantu baganirirwemo.
Ocihangane okucib’ijira ntya:
Ocape enfoto zihugwîre ogo mwanzi. Erhi ocape enfoto ziyerekine gurhi bintu bilebe byajirikanaga byal’ikulikirine. Oyandike myanzi misungunu ehugwîre gurhi ebintu biri byajirikana oku nfoto.
Amango oli wasoma mwanzi mulebe guganirire muntu mulebe wali mwishwekerezi, oyandike amorhere gage n’ebijiro byage binja n’emigisho abire nayo enyanya z’ago morhere.
Amango oli wasoma, obe nka weri waganirira ogo mwanzi. Oganirire ogo mwanzi omu njira ziri lubero, obe nk’oli “wadosa amadosa” abantu baganirirwe omu mwanzi oli wasoma erhi abantu baliho erhi ebi oli wasoma bijirikana.
Erhi akaba omuntu oganirirwe omu mwanzi oli wasoma al’irhôzire emihigo mibi, wanarhanya gurhi byakabire acirholaga emihigo minja. Kwa lwiganyo, orhanye gurhi Petro ahakanaga Yezu. (Marko 14:66-72) Gurhi Petro al’ishinganine ajire mw’ako kanga?
Erhi akaba orhanyize oku nanawe wanajira kantu kalebe kahyahya, wanacihangana okuyandika edrame eyimangire oku mwanzi mulebe wasomaga omu Bibliya. Ohiremo masomo maguma na maguma waciyigirizize mw’ogo mwanzi.—Abaroma 15:4.
Byanahashikana obe nk’oli wabona gurhi ebintu oli wasoma biri byajirikana!
Olonze okumanya binji kulusha!
Erhi wakasegeza ebintu bisungunu-ngunu, wanahikira aha wavumbula bintu binji omu mwanzi oli wasoma omu Bibliya. Kobinali, hali amango luderho luguma erhi ibirhi ziri omu Bibliya zirhuyigiriza bintu binji bwenene.
Kwa lwiganyo, oshushanye Mateyo 28:7 na Marko 16:7.
Bici byarhumire Marko ayushula oku Yezu akabonekire abanafunzi “ci bwenene Petro”?
Ebyakakurhabala ohugûkwe: Marko arhaciboneraga ebyo byajirikanaga; bihashikine oku Petro yemuganiriraga ebyajirikine.
Obuhirhi buli bufulike: Bulya gurhi nkaba Petro aciyumvirhe bwinja erhi ayumva oku Yezu alonzize okucib’imubona? (Marko 14:66-72) Gurhi Yezu ayerekinemwo oku ali mwîra w’okuli wa Petro? Gurhi wakayigamwo olwiganyo lwa Yezu lw’okuba mwîra w’okuli w’abandi?
Erhi wakakarhanya bwenene kw’ebi oli wasoma n’okucihangana okumanya binji kulusha, wanahikira aha wakashagalukira okusoma Ebibliya!