Emigani 3:5, 6—‘Orhahîraga Okayegemera Obwenge Bwawe Wenene’

“Oyegemere Nyamuzinda n’omurhima gwawe gwoshi, orhanahîraga okayegemera obwenge bwawe wenene. Omu mirimo yawe yoshi orhahiraga okamuhaba, wàbona oku ayumanyanya enjira zawe.”—Emigani 3:5, 6.

Amahugûlo g’Olwandiko lw’Emigani 3:5, 6

Erhi akaba rhugwerhe omuhigo gw’obulagirire gw’okurhôla, rhushinganine rhuhûne Yehovaa Nnâmahanga ihano ahali h’okuhiga rhwenene ebi rhwajira.

“Oyegemere Nyamuzinda n’omurhima gwawe gwoshi.” Rhunayerekane oku rhuyegemire Nnâmahanga erhi rhujira ebimushagalusa. Rhushinganine rhumuyegemere loshi-loshi, k’okuderha n’omurhima gwirhu goshi. Omu Bibliya, kanji-kanji omurhima gunaganirire omuntu w’ekandalala, guhiziremo okurhuciyumva, ebirhushumya, engererezo n’entanya zirhu. Cikone, okuyegemera Nnâmahanga kuhiziremwo binji kulusha okurhuciyumva. Guba muhigo rhurhôla bulya rhuyemire n’obwalagale oku Omulemi wirhu ayishi ebiba binja kuli rhwe.—Abaroma 12:1.

“Orhanahîraga okayegemera obwenge bwawe wenene.” Rhushinganine rhukayegemera Nnâmahanga bulya nta bunguke boshi-boshi entanya zirhu zirhal’inyima zakarhulerhera. Erhi rhwakaciyegemera rhwenene erhi kuleka entanya zirhu zishumye emihigo yirhu, rhwanarhôla emihigo ebonekine oku murhondero nk’eri minja, cikone buzinda eyish’irhulerhera amazibu. (Emigani 14:12; Yeremiya 17:9) Obwenge bwa Nnâmahanga buba bulushire obwirhu. (Izaya 55:8, 9) Erhi rhwakaleka alongoze entanya zirhu akalamo kirhu kanayololoka.—Ennanga 1:1-3; Emigani 2:6-9; 16:20.

“Omu mirimo yawe yoshi orhahiraga okamuhaba.” Rhushinganine rhukalonza entanya za Nnâmahanga omu bintu by’obulagirire by’akalamo kirhu n’omu mihigo y’obulagirire rhwakarhôla. Rhunajire ntyo erhi rhumushenga obulongozi n’omukukulikira ebi adesire omu Kanwa kage, Bibliya.—Ennanga 25:4; 2 Timoteyo 3:16, 17.

“Ayumanyanya enjira zawe.” Nnâmahanga anayumanyanye enjira zirhu omu kurhurhabala rhulame kushimbana n’amakanuni gage mashinganyanya. (Emigani 11:5) Omu kujira ntyo, rhunayake mazibu manji rhunanabe na bushagaluke bunji omu kalamo.—Ennanga 19:7, 8; Izaya 48:17, 18.

Akanga Ebinwa Biri omu Emigani 3:5, 6 Byaderhagwamwo

Ecitabu c’Emigani cirimo amakanuni g’omusingi, garhurhabala okuba n’akalamo kashagalusa Nnâmahanga n’okuba n’omwishingo. Ebigabi mwenda birhangiriza byayandisirwe nka mahano omubusi w’obuzigire ahîre omugala muzigirwa. Ecigabi ca 3 cisegize obunguke abantu baba nabo omu kubona oku amahano ga Nnâmahanga gaba ga bulagirire n’okugakolesa.—Emigani 3:13-26.