Hofi n’e Babeli, hali evile yakag’ihamagalwa Uru yalimwo abantu bakag’iharamya orhundi rhumungu ahali h’okuharamya Yehova. Cikone, hali omulume w’e Uru wakag’iharamya Yehova yene. Izino lyage ye Abrahamu.

Yehova abwira Abrahamu ntya: ‘Orhenge omu cihugo cinyu omu mulala gwawe n’omu nyumpa ya sho, oje omu cihugo nakuyereka.’ Enyuma z’aho, Mungu alaganya Abrahamu ntya: ‘Nakujira ishanja linene, najirira bantu banji b’okw’igulu ebintu binja erhi we orhuma.’

Abrahamu arhal’imanyire aha Yehova amurhuma, cikone amulangalira. Ntyo Abrahamu, mukage Sara, ishe Tera, na Loti mugala w’omulumuna bashana ebintu byabo banarhumikira Mungu omu kurhondera omubalamo gwabo muli.

Abrahamu agwerhe myaka 75 erhi ye n’omulala gwage bahika omu cihugo Yehova al’ilonzize abahe. Eco cali cihugo c’e Kanani. Erhi Abrahamu ali eyo munda, Mungu amuganiza anamulaganya ntya: ‘Iburha lyawe lyo naha eci cihugo coshi oli wabona.’ Cikone Abrahamu na Sara bal’ikola bashosi barhanalisag’iburha omwana. Gurhigi Yehova akahikirizizemwo eco ciragane?

Abrahamu na Sara bali bamayusa myaka minji bali omu buhya. Balesire enyumpa yabo nyinja e Uru banalikola balamire omu ihema. Cikone Sara arhakag’iciduduma bulya al’ilangalire Yehova.

Sara al’ilonzize okupata omwana co carhumaga abwira Abrahamu ntya: ‘Erhi omuja-kazi wani Hagari akaburha omwana, nanakabona oku oyo mwana anali wani.’ Erhi hagera akasanzi, Hagari aburha omwana-rhabana. Izino lyage ye Ismaeli.

Myaka minji enyuma z’aho, erhi Abrahamu agwerhe myaka 99 na Sara myaka 89, bantu basharhu babalambagirira. Abrahamu abaheka omu cihoho c’omurhi lyo balya ebiryo haguma. K’omanyire abo bantu basharhu bamulambagiriraga bali ba ndi? Bali bamalahika! Babwira Abrahamu ntya: ‘Mwaka irhondo omu kasanzi kali nka kano, we na mukawe Sara mwaburha omwana-rhabana.’ Sara akag’iyumvirhiza erhi ali omu ihema. Ashekera emurhima anarhanya ntya: ‘Ka kobinali nanaciburha omwana ciru akaba nkola ndi mugikulu?’

Nk’oku malahika wa Yehova analaganyagya, omu mwaka gwakulikiraga Sara aburha omwana-rhabana. Abrahamu aha oyo mwana izino lya Izaki, izino lihugwîre “Ecishesa.”

Erhi Izaki agwerhe hofi myaka irhanu, Sara alangira Ismaeli ali ashekera Izaki. Bulya Sara al’ilonzize okulanga omugala, aj’ibona Abrahamu anamuhûna afukuze Hagari na Ismaeli. Oku murhondero, Abrahamu arhalonzagya okubafukuza. Cikone Yehova abwira Abrahamu ntya: ‘Oyumve ebi Sara akubwizire. Nashibirira Ismaeli. Cikone ebiragane byani byahikirira kugerera Izaki.’