Yozefu ali muguma w’omu bagala ba Yakobo. Bakulu ba Yozefu babona oku ye ishe al’izigire bwenene. Gurhi orhanyize baciyumvirhe lugenda oko? Bayagalwa enyanya z’oko, banashomba Yozefu. Erhi Yozefu alorha ebilorho by’okusomeza, abiganirira bakulu bage. Barhanya oku ebyo bilorho bihugwîre oku hali amango banamufukamire omu kalamo. Bashub’imushomba kulusha!

Lusiku luguma bakulu ba Yozefu bakag’iyabula ebibuzi hofi n’evile y’e Sikemu. Yakobo arhuma Yozefu oku aj’ilaba gurhi bayosire. Bakulu ba Yozefu bamulangira banabwirana ntya: ‘Olya okacilorhesa oyo oyishire. Rhumunige!’ Bamugwarha banamukweba omu mwina mulî. Cikone, mukulu wage muguma wakag’ihamagalwa Yuda aderha ntya: ‘Rhurhamuyirhaga! Cikone rhumuguze ly’aba muja.’ Ntyo baguza Yozefu nsaranga 20 oku barhunzi Bamidiyani bakag’ija e Misri.

Enyuma z’aho bakulu ba Yozefu bageza omushangi gwage omu muko gw’empene bagurhumira ishe, banamubwira ntya: ‘Ka gurhali mushangi gwa mugala wawe ogu?’ Ntyo Yakobo arhanya oku ensimba y’emuzirhu yanizire Yozefu. Avunika omurhima. Ntaye wakamurhulirizize.

Erhi abo Bamidiyani bahika e Misri, baguza Yozefu emwa murhambo muguma mukulu wakag’ihamagalwa Potifari. Cikone Yehova ali haguma na Yozefu. Potifari abona oku Yozefu ali mukozi mwinja n’oku ali wa kulangalirwa. Enyuma z’aho Yozefu ajirwa mwimangizi w’ebintu byoshi bya Potifari.

Muka Potifari abona oku Yozefu ali musole w’iranga linja ananali wa misi. Ngasi lusiku muka Potifari akag’ibwira Yozefu oku bajire eby’enshonyi. Gurhi Yozefu akajijire? Alahira anaderha ntya: ‘Nanga! Oko kuli kubi bwenene. Nnawirhu aba anangalire, onali mukage. Erhi nakajira eby’enshonyi haguma na nawe, nanaba njirire Mungu ecaha!’

Lusiku luguma muka Potifari alonza okuseza Yozefu bajire eby’enshonyi. Amugwarhira omu mishangi, cikone Yozefu alibirha. Erhi Potifari agaluka ekâ, mukage amubwira oku Yozefu anal’ikola amubaka. Oko kwali kunywerha. Potifari akunira bwenene, anakweba Yozefu omu prizo. Cikone Yehova arhayibagiraga Yozefu.

Erhi Yozefu ali omu prizo, Faraoni, mwami w’e Misri alorha ebilorho na nta muntu wakahashire amuhugûlira byo. Muguma w’omu bakozi ba Faraoni amubwira oku Yozefu akahashire amuhugûlira ebyo bilorho. Ho n’aho Faraoni aderha oku balerhe Yozefu.

Faraoni amudosa ntya: ‘Ka wamampugûlira ebilorho byani?’ Yozefu abwira Faraoni ntya: ‘Omu cihugo c’e Misri mwayish’iba biryo binji bwenene omu kasanzi ka myaka nda, enyuma z’aho hayish’iba yindi myaka nda y’ishali linji. Ocishoge muntu mulebe mwenge wakahaka ebiryo ly’abantu bawe barhagiyish’ifâ n’ishali.’ Faraoni amushuza ntya: ‘We ncishozire! Waba muntu wa kabirhi mukulu na wa buhashe omu cihugo c’e Misri!’ Gurhi Yozefu amanyagamwo amahugûlo g’ebilorho bya Faraoni? Yehova ye warhabalaga Yozefu.

Omu myaka nda yakulikiraga, Yozefu akahaka ebiryo. Enyuma z’aho haba ishali linji omw’igulu lyoshi, nk’oku Yozefu anaderhaga. Abantu bakarhenga omu ngasi cihugo lyo bayish’igulira Yozefu ebiryo. Yakobo, ishe wa Yozefu, ayumva oku ebiryo biri e Misri, na ntyo arhuma bagala bage ikumi lyo bajigula ebiryo.

Bagala ba Yakobo baja emwa Yozefu, anabamanya ho n’aho. Cikone bakulu ba Yozefu barhamumanyaga. Bamufukamira nk’oku analorhaga erhi ali mwana. Yozefu alonza okumanya erhi bakulu bage baciba bantu ba mujina. Ntyo ababwira ntya: ‘Muli ndolerezi. Mwal’ilaba obuzamba bw’ecihugo ciru.’ Bamubwira ntya: ‘Nanga! Rhuba bana 12 b’omu cihugo c’e Kanani. Mwene wirhu muguma afîre, n’omurho ali haguma na larha.’ Enyuma z’aho Yozefu aderha ntya: ‘Lyo mulangalira, mulerhe oyo mulumuna winyu murho.’ Ntyo bagaluka emwabo.

Erhi omulala gwa Yakobo gushub’iba n’obulagirire bw’ebiryo, Yakobo ashub’irhuma abagala e Misri. Mw’ako kasanzi bagenda na Benyamini, mulumuna wabo murho. Ly’apima oborhere bwa bakulu bage, Yozefu afulika igopo lyage ly’amarhale omu nshoho ya Benyamini anabashobeka oku bo balizimbaga. Erhi abakozi ba Yozefu babona er’igopo omu nshoho ya Benyamini, bakulu ba Benyamini baciyumva kubi bwenene. Bayinginga Yozefu abahane ahali h’okuhana Benyamini.

Yozefu abonaga oku bakulu bage bashanjire. Yozefu arhacihashaga afulika oku akag’iciyumva. Arhondera alaka anaderha ntya: ‘Nie mwene winyu Yozefu. Ka ho larha aciba?’ Bakulu bage basomerwa bwenene. Ababwira ntya: ‘Mumanye mwakaciyumva kubi enyanya z’ebi mwanjirire. Mungu antumire eno munda lyo nyokola obuzine bwinyu. Kanyagi mujinderhera larha.’

Bagaluka ekâ lyo baj’ibwira ishe ogo mwanzi mwinja lyo banamulerha e Misri. Enyuma za myaka minji, Yozefu n’ishe bashub’ibonana.