Musa alamire e Midiyani myaka 40. Aja omu buhya anaburha abana. Lusiku luguma erhi ali ayabula ebibuzi hofi n’Entondo Sinayi, abona kantu kaguma k’okusomeza. Ishaka lyakag’igulumira, cikone lirhakag’isingonoka! Erhi Musa ayegera ly’abona bulya gurhi, ayumva izu lyarhenga mw’er’ishaka lyamubwira ntya: ‘Musa! Omanye wakayegera hano. Hogola ebirato byawe bulya obudaka oyimanzireko buli budaka butagatifu.’ Yehova ye wakag’iganiza Musa kugerera malahika.

Musa al’iyobohire, muli oko acibwikira obusu. Er’izu lyaderha ntya: ‘Nabwine amalibuko g’Abaisraheli. Nabayokola kurhenga omu maboko g’Abamisri n’okubaheka omu cihugo cinja. We warhenza abantu bani e Misri.’ K’orharhanyizi oku oko kwasomezize Musa?

Musa adosa ntya: ‘Gurhi nayish’ishuza hano abantu bandosa ndi wantumaga?’ Mungu amushuza ntya: ‘Obabwire oku Yehova, Mungu wa Abrahamu, Mungu wa Izaki, na Mungu wa Yakobo ye wakurhumaga.’ Enyuma z’aho Musa aderha ntya: ‘Gurhigi erhi abantu bakabula bwanyumvirhiza?’ Yehova aha Musa ebintu by’okumuyemeza oku akamurhabire. Abwira Musa akwebe akarhi kage okw’idaho. Enyuma z’aho ako karhi kahinduka njoka! Erhi Musa ayigwarhira oku mucira, yashub’ihinduka karhi. Yehova aderha ntya: ‘Hano ojira eci cisomerine, cayish’iyerekana oku nie nakurhumaga.’

Musa aderha ntya: ‘Ntayish’iderha bwinja.’ Yehova amulaganya ntya: ‘Nayish’ikubwira ebi waderha, narhuma na mwene winyu Aroni ly’akurhabala.’ Bulya al’ikola amanyire oku Yehova ali haguma naye, Musa arhôla mukage n’abagala banagaluka e Misri.

Abaisraheli bal’isezibwe bwenene okukola nka baja. Yehova arhuma Musa na Aroni baj’ibwira Faraoni ntya: ‘Oleke abantu bani bagende lyo bakamparamya omw’irungu.’ Faraoni ashuza ntya n’obucibone: ‘Ebyo Yehova anadesire birhandabiri, ntanayemere Abaisraheli bagende.’ Enyuma z’aho Faraoni abaseza bakole ciru bwenene kulusha. Yehova ahîre Faraoni obuhane enyanya z’oko. Gurhi ajijiremwo ntyo? Alerha Mahanya Ikumi omu cihugo c’e Misri. Yehova abwira Musa ntya: ‘Faraoni arhali anyumva. Irhondo sezi aba ali aha Lwishi Nile. Oje emunda ali onamubwire oku bulya analahire okuleka abantu bani bagende, amishi goshi g’olwishi Nile gahinduka muko.’ Musa arhumikira anaja emunda Faraoni ali. Faraoni akag’ilaba erhi Aroni ashurha akarhi kage oku lwishi Nile, n’amishi g’olo lwishi gahinduka muko. Olo lwishi lwarhondera lwabaya, ensamaki zoshi zafâ, n’abantu babula amishi g’okunywa bulya ntaye wakacinywire amishi g’omu lwishi Nile. Faraoni agendekera alahira oku Abaisraheli bamanye bakagenda.

Nsiku nda enyuma z’aho, Yehova ashub’irhuma Musa emwa Faraoni ly’amubwira ntya: ‘Akaba orhalesiri abantu bani bagende, ecihugo c’e Misri coshi cabumba bikere.’ Aroni alengeza akarhi kage, n’ebikere byabumba omu cihugo coshi. Abantu bakabona ebikere omu mwabo, oku ncingo zabo, n’omu masahani gabo. Ebikere byali ngasi hoshi! Faraoni abwira Musa ayinginge Yehova ayuse obo buhanya. Faraoni alaganya oku akalesire Abaisraheli bagende. Yehova ayusa obo buhanya, n’Abamisri bagusha ebirundo by’ebyo bikere byafîre. Ecihugo carhondera cabaya. Cikone, kandi Faraoni arhalekaga Abaisraheli bagende.

Enyuma z’aho Yehova abwira Musa ntya: ‘Aroni ashurha akarhi kage okw’idaho, n’akatulo kahinduka migu [mihusha].’ Ho n’aho emigu yaba ngasi hosi. Bakozi baguma ba Faraoni bamubwira ntya: ‘Obu buhanya burhenzire emwa Mungu.’ Cikone kandi, Faraoni arhayemeraga Abaisraheli bagende.