Musa na Aroni bahekera Faraoni ogu mwanzi gwa Mungu: ‘Akaba orhalesiri abantu bani bagende, narhuma ensusi omu cihugo.’ Nsusi nyinji zakaja omu nyumpa z’Abamisri, babe bagale erhi bakenyi. Ecihugo coshi cabumba nsusi. Cikone omu eneo y’e Gosheni, Abaisraheli bal’ilamire, murhali nsusi. Bamisri bone bahumirweko n’ago mahanya, kurhonderera oku buhaya bwa kani. Faraoni ayinginga ntya: ‘Muhûne Yehova arhenze ezi nsusi. Abantu binyu banagenda.’ Cikone erhi Yehova arhenza ezo nsusi, Faraoni ashanja entanya zage. Ka lero Faraoni ayemera?

Yehova aderha ntya: ‘Akaba Faraoni arhalesiri abantu bani bagende, ensimba z’abantu b’e Misri zalwala zinafê.’ Olusiku lwakulikiraga ensimba zarhondera zafâ. Cikone ensimba z’Abaisraheli zirhafâga. Cikone Faraoni agendekera aba n’amarhwiri mazibu arhanalekaga Abaisraheli bagende.

Yehova abwira Musa acibija emwa Faraoni anakwebe oluvu omu malunga. Olo luvu lwahinduka katulo kabumba omu cirere n’omu cihugo coshi c’e Misri. Ako katulo kameza amahurhe oku Bamisri n’oku nsimba zabo. Ciru akaba ntyo, Faraoni arhayemeraga Abaisraheli bagende.

Yehova ashub’irhuma Musa ajibwira Faraoni ntya: ‘K’orhanaciyemera okuleka abantu bani bagende? Irhondo olubula lwania omu cihugo.’ Olusiku lwakulikiraga, Yehova alerha olubula, emikungulo, n’omuliro. Abamisri barhalisag’ibona enkuba ndarhi eri nk’eyo. Emirhi yoshi n’emburho zoshi byasherera, cikone ebyali e Gosheni birhashereraga. Faraoni aderha ntya: ‘Muyinginge Yehova ahumbye eyi nkuba! Enyuma z’aho namuleka mugende.’ Cikone erhi olubula n’enkuba bihumba, Faraoni ashub’ishanja entanya zage.

Enyuma z’aho Musa aderha ntya: ‘Enzige zalya ngasi byasi byoshi olubula lwalesire.’ Emiliyoni y’enzige yalya ngasi kantu koshi kali omu mashwa n’akali oku mirhi. Faraoni asemberera ntya: ‘Muyinginge Yehova arhenze ezi nzige.’ Cikone ciru n’enyuma za Yehova okurhenza ezo nzige, Faraoni acigwerhe amarhwiri mazibu.

Yehova abwira Musa ntya: ‘Oyinamule okuboko kwawe e malunga.’ Ho n’aho, ahantu hoshi haba omwizimya munji. Abamisri bayusa nsiku isharhu barhali babonana, barhanali babona akantu koshi-koshi. Abaisraheli bone bagwerhe obumoleke omu mwababwe.

Faraoni abwira Musa ntya: ‘We n’abantu bawe mwanagendaga. Muleke kone ensimba zinyu hano.’ Musa aderha ntya: ‘Rhushinganine rhuhêke ensimba zirhu lyo rhuyish’iha Mungu wirhu enterekêro.’ Faraoni akunira bwenene. Akaliha ntya n’izu linene: ‘Murhenge embere zani! Nkashub’imubona, nanamuniga.’

Musa alaganya Faraoni oku arhakacimubona bundi. Cikone embere agende, abwira Faraoni ntya: ‘Omu kagarhi k’obudufu, ngasi nfula y’Abamisri, kurhonderako mugala wa Faraoni kuhika uku bana-rhabana b’abaja, bafâ.’

Yehova abwira Abaisraheli balye ebiryo byago-byago. Ababwira ntya: ‘Munige engandabuzi erhi empene egwerhe mwaka muguma, munashige omuko gwayo oku kadrema k’enyumvi z’enyumpa zinyu. Muyoce enyama zayo, munazilire omugati gurhalimwo lwango. Mube muyambirhe emishangi yinyu n’ebirato binyu, munabe tayari okugenda. Namukûla omu buja mw’obu budufu.’ Ka wanarhanya kunganaci Abaisraheli bashagalusire enyanya z’oko?

Omu kagarhi k’obudufu, malahika wa Yehova agera oku nyumpa z’Abamisri boshi. Aniga enfula y’omu ngasi nyumpa arhimanyire erhashizirwiko omuko oku kadrema k’olumvi. Cikone arhaluka ngasi nyumpa yal’ishizirweko omuko. Omwana afâ omu ngasi mulala gw’Abamisri, gube gwa bagale erhi gwa bakenyi. Cikone nta mwana ciru n’omuguma w’Abaisraheli wafîre.

Ciru na mugala wa Faraoni naye afâ. Faraoni arhacihashaga okulembera oko. Ho n’aho abwira Musa na Aroni ntya: ‘Muyimuke. Murhenge hano. Mugend’iharamya Mungu winyu. Murhôle ensimba zinyu munagende!’

Mw’obo budufu Abaisraheli barhengaga e Misri, omwezi goshi gwakag’ibasha guyenire, obûko boshi n’emilala yoshi y’Abaisraheli yagenda. Hali balume 600 000 Baisraheli na bakazi banji na bana banji. Na kandi, bandi bantu banji bagenda haguma nabo lyo nabo bakaharamya Yehova. Abaisraheli balikulwa!

Lyo bakakengera gurhi Yehova abayokolagamwo, bal’ishinganine bakalya ebyo biryo byago-byago ngasi mwaka. Byakag’ihamagalwa Pasaka.