Abaisraheli barhenga oku Ntondo Sinayi bagera omu irungu ly’e Parani baja omu eneo yakag’ihamagalwa Kadeshi. Erhi bahika eyo munda Yehova abwira Musa ntya: ‘Ocishoge balume 12, muguma kurhenga omu ngasi bûko, obarhume baj’ilolereza ecihugo c’e Kanani, eci naha bene Israheli.’ Muli ntyo Musa acishoga balume 12 anababwira ntya: ‘Muje e Kanani, muj’ilaba erhi eco cihugo canayeramwo emburho. Muj’ilolereza erhi abantu b’eyo munda bali ba misi nisi erhi barhagwerhi misi, mulabe erhi banalame omu mahema erhi omu mavile.’ Ezo ndolerezi 12 zalimwo Yozwe na Kalebu, zaja e Kanani.

Enyuma za nsiku 40, ezo ndolerezi zagaluka zinagwerhe emizabibu, amakomamanga, n’emitini. Ezo ndolerezi zaderha ntya: ‘Ciri cihugo cinja, cikone abantu bamuli bali ba misi minji bwenene n’evile za mw’eco cihugo ziyubasirwe n’enkuta ndirî bwenene.’ Enyuma z’aho Kalebu aderha ntya: ‘Rhwanabahima. Rhuyije bo na buno!’ K’omanyire ecarhumaga Kalebu aderha ntyo? Bulya ye na Yozwe bal’ilangalire Yehova. Cikone ezindi ndolerezi ikumi zaderha ntya: ‘Nanga! Abantu b’eyo munda bali baliri na banene bwenene! Rhwakag’ikabonekana nka mahanzi embere zabo.’

Abaisraheli bavunika omurhima. Barhondera baciduduma banakabwirana ntya: ‘Rhulonze owundi muntu warhulongoza rhucigalukire e Misri. Rhumanye rhwakaja mw’eco cihugo bakaj’irhuniga.’ Yozwe na Kalebu baderha ntya: ‘Mumanye mwakagokeza Yehova, murhanayobohaga. Yehova arhulanga.’ Cikone Abaisraheli barhayumvagya. Balonza ciru okuniga Yozwe na Kalebu!

Bici Yehova ajijire? Abwira Musa ntya: ‘Abaisraheli barhacirhondera okuntumikira namabajirira ebi bintu byoshi. Bakolaga bayusa myaka 40 omw’irungu, banafîremwo. Abana babo bone na Yozwe na Kalebu bo balama mw’eco cihugo nabalaganyagya.’

Kasanzi kalebe enyuma z’aho, erhi Abaisraheli bali omw’irungu, Kora, Datani, Abiramu, na bandi bantu 250 bahagalika Musa. Bamubwira ntya: ‘Rhwamarhama enyanya zawe! Bulya gurhi we oshinganine okarhulongoza na bulya gurhi Aroni ye kuhani mukulu? Yehova ali haguma nirhu rhweshi, arhali haguma na nawe wene erhi haguma na Aroni yene.’ Yehova arhashagalukiraga oko. Abona oku ye Abaisraheli bagomire!

Musa abwira Kora n’abakagimulunga okuboko ntya: ‘Irhondo muyishe aha ihema ly’entimanano, munalerhe ebikolanwa by’okuyoceramwo obuku. Yehova arhuyeresa indi acishozire.’

Olusiku lwakulikiraga, Kora na balya balume 250 barhimana Musa ah’ihema ly’entimanano. Erhi bali eyo munda bayoca obuku nk’oku bakuhani bakag’ijira. Yehova abwira Musa na Aroni ntya: ‘Muyake Kora n’abantu bage.’

Ciru akaba Kora ajire emunda Musa ali ebw’ihema ly’entimanano, Datani, Abiramu n’emilala yabo bohe barhayemeraga baja yo. Yehova abwira Abaisraheli bamanye bakayegera amahema ga Kora, Datani, na Abiramu. Ho n’aho, Abaisraheli bayaka. Datani, Abiramu, n’emilala yabo bayimanga embuga z’amahema gabo. Ho n’aho, obudaka bwagabikanamwo kabirhi bwanabamira boshi! Erhi Kora ali ebw’ihema ly’entimanano, omuliro gwarhenga empingu gwamuyoca haguma n’abantu bage 250.

Enyuma z’aho Yehova abwira Musa ntya: ‘Obwire ngasi mwimangizi w’obûko akuhe akarhi kage onakayandikeko izino lyage. Cikone oku karhi k’obûko bwa Levi, oyandikeko izino lya Aroni. Ohire orho rhurhi omw’ihema ly’entimanano, n’akarhi k’oyu nacishoga kamerako amauwa.’

Olusiku lwakulikiraga, Musa ahulusa orho rhurhi rhoshi anarhuyeresa abimangizi ba ngasi bûko. Akarhi ka Aroni kaliko amauwa n’amalehe gahire. Kugerera eyo njira, Yehova ayerekana oku anacishozire Aroni ly’aba kuhani mukulu.