Erhi hagera nsiku, Abaisraheli bashub’ileka Yehova banarhondera baharamya rhumungu rhw’obunywesi. Abamidiyani bayusa myaka nda bali bazimba ebishwekwa by’Abaisraheli n’okushereza emburho zabo. Ly’Abamidiyani barhag’ibashereza, Abaisraheli bakacifulika omu lwala n’omu ntondo. Bayinginga Yehova abayokole. Muli ntyo Yehova arhuma malahika emwa musole muguma gwakag’ihamagalwa Gideoni. Malahika amubwira ntya: ‘Yehova anacishozire we ly’oba mulwi w’ivita ogwerhe emisi.’ Gideoni adosa ntya: ‘Gurhi nakayokolamwo bene Israheli? Ndi wa busha bwenene.’

Bici byakayemezize Gideoni n’obwalagale oku kobinali Yehova anacishozire ye? Gideoni arhôla oboya bw’ecibuzi abuhira okw’idaho, buzinda abwira Yehova ntya: ‘Irhondo sezi nkarhimana olume luli kw’obu boya, cikone okw’idaho kukazire, nanayemera n’obwalagale oku kobinali wacishozire nie lyo nyokola bene Israheli.’ Erhi buca sezi oboya bwaliko olume, cikone okw’idaho kwal’ikazire! Cikone olusiku lwakulikiraga, Gideoni ahûna Yehova oku kuca sezi arhimane oboya bukazire, cikone okw’idaho kube kuli olume. Erhi oko nako kujirikana, Gideoni ayemeraga oku kobinali Yehova anacishozire ye ly’ayokola Abaisraheli. Arheganya abasoda bage ly’alwisa Abamidiyani.

Yehova abwira Gideoni ntya: ‘Abaisraheli bahima er’ivita. Cikone bulya ogwerhe basoda banji, hali amango wakarhanya oku mwene mwe mwalihimire. Obwire ngasi yeshi oyobohire agaluke emwage.’ Muli ntyo basoda 22 000 bagaluka emwababwe, na basoda 10 000 babêra. Enyuma z’aho Yehova aderha ntya: ‘Abo basoda baciri banji. Obahêke okw’iriba, onababwire banywe amishi. Oberane abakaba bali balabiriza abashombanyi babo amango baba bali banywa amishi bone.’ Balume 300 bone babezire bali masu omu kasanzi bakag’iba bali banywa amishi. Yehova alaganya oku abo balume basungunu bahima basoda 135 000 b’Abamidiyani.

Erhi buba budufu, Yehova aganiza Gideoni, amubwira ntya: ‘Akasanzi kamahika k’okurhera Abamidiyani!’ Gideoni aha abantu bage emishekera n’orhubindi rhunenene al’ifulisiremwo amatara. Ababwira ntya: ‘Mundabe, munajire ngasi byoshi nakajira.’ Gideoni abuha omushekera gwage, abera akabindi kage, alengeza itara lyage enyanya anaderha ntya: ‘Engorho ya Yehova n’eya Gideoni!’ Abasoda bage 300 boshi bajira ntyo. Abamidiyani bayoboha bwenene banalibirha ngasi muguma omu yage njira. Enyanya z’obo boba, Abamidiyani barhondera balwisanya bone na nnene. Yehova ashub’irhabala Abaisraheli bahime abashombanyi babo.

Mulume muguma Muisraheli wakag’ihamagalwa Elkana agwerhe bakazi babirhi, Ana na Penina, cikone al’izigire Ana bwenene. Ngasi mango Penina akag’ishekera Ana bulya Ana arhagwerhe bana, cikone Penina yehe agwerhe bana banji. Ngasi mwaka, Elkana akag’ihêka omulala gwage e Shilo lyo baj’iharamya Yehova omu ihema ly’entimanano. Mango maguma erhi bali e Shilo, abona oku mukage muzigirwa Ana, agayire bwenene. Aderha ntya: ‘Ana, wekasinga omanye wankalaka. Ndi haguma nawe. Na nkuzigire.’

Enyuma z’aho, Ana aciyegula ly’asalira. Akag’ilaka erhi ali ashenga Yehova amurhabale. Alaganya Yehova ntya: ‘Yehova, erhi wakampa omwana-rhabana, nanayish’ikuha ye ly’akukolera akalamo kage koshi.’

Erhi Kuhani Mukulu Eli abona Ana ali alaka, arhanya oku Ana analalusire. Ana amushuza ntya: ‘Nanga, nnawirhu, ntalalusiri. Ngwerhe amazibu madarhi bwenene, na ndi nagaganirira Yehova.’ Eli ahugûkwa oku anacirhebire, amubwira ntya: ‘Mungu akuhe ebi olonzize byoshi.’ Ana aciyumva bwinja anagaluka emwage. Erhi hagera hofi mwaka muguma, Ana aburha omwana-rhabana anamuha izino lya Samweli. Ka wanarhanya kunganaci Ana ashagalusire?

Ana arhayibagiraga eciragane ahaga Yehova. Erhi Samweli aleka okuyonka, ho n’aho Ana amuhêka ly’agend’ikakolera omw’ihema ly’entimanano. Abwira Eli ntya: ‘Ye mwana-rhabana oyu nakag’ihûna Yehova. Akalamo kage koshi, mmuhozize Yehova.’ Ngasi mwaka Elkana na Ana bakag’ilambagirira Samweli n’okumulerhera igoti lihyahya lirhagwerhi maboko. Yehova aha Ana bandi bana-rhabana basharhu na banyere babirhi.