Abaisraheli bashub’ileka okukolera Yehova banarhondera baharamya rhumungu rhw’obunywesi. Erhi Abaamoni barhera n’okulwisa Abaisraheli, orho rhumungu rhw’obunywesi rhurhabarhabalaga. Abaisraheli bayusa myaka minji bali balibuka. Buzinda babwira Yehova ntya: ‘Rhwajijire ecaha. Wekasinga orhuyokole kurhenga oku bashombanyi birhu.’ Abaisraheli bashereza ensanamu zabo banashub’irhondera baharamya Yehova. Yehova arhal’ilonzize abone gurhi bagendekire balibuka.

Omulwi w’ivita wakag’ihamagalwa Yifta acagulwa ly’alongoza Abaisraheli lyo balwisa Abaamoni. Abwira Yehova ntya: ‘Erhi wakarhurhabala rhukahima er’ivita, nkulaganyize oku hano ngaluka emwani, nakuha omuntu murhanzi wayishiyisha al’inyankirira.’ Yehova ayumvirhiza isala lya Yifta anamurhabala ly’ahima er’ivita.

Erhi Yifta agaluka emwage, omuntu murhanzi wayishir’imuyankirira ali mwali wage, yene mwana anagwerhe. Akag’isama n’okushurha engoma. Gurhi Yifta ajijire? Akengera eciragane ajiraga anaderha ntya: ‘Yaga wee! Mwali wani! Wamamvuna omurhima. Nahire Yehova eciragane. Lyo ncihikiriza, bihunyire oje e Shilo ly’oyish’ikakolera ebw’ihema ly’entimanano.’ Cikone mwali wage aderha ntya: ‘Larha, akaba wahire Yehova eciragane, oshinganine ocihikirize. Nkuhûnyire kone ondeke ngend’iyusa myezi ibirhi omu ntondo haguma n’abîra bani b’abanyere. Enyuma z’aho nanagenda.’ Mwali wa Yifta akolera ebw’ihema ly’entimanano n’obwishwekerezi akalamo kage koshi. Ngasi mwaka, abîra bage bakag’imulambagirira e Shilo.

Kuhani Mukulu Eli agwerhe bagala babirhi bakag’ikola nka bakuhani ebw’ihema ly’entimanano. Abo bana bakag’ihamagalwa Hofni na Finehasi. Barhakag’irhumikira amarhegeko ga Yehova, banakag’ijirira abantu kubi bwenene. Erhi Abaisraheli bakalerhire Yehova enterekêro, Hofni na Finehasi bakag’iciha enyama nyinja bwenene. Eli ayumva ebi abagala bakag’ijira cikone arhabarhondaga. Ka Yehova akalesire ebyo bigendekere byajirikana?

Ciru akaba Samweli ali murho bwenene kulusha Hofni na Finehasi, arhayigaga olwiganyo lwabo. Yehova akag’ishagalukira Samweli. Budufu buguma erhi Samweli ali iro, ayumva izu liri lyamuhamagala. Azuka, alibirhira emunda Eli ali, anaderha ntya: ‘Ndi hano!’ Cikone Eli aderha ntya: ‘Ntali nakuhamagala. Genda ojigwishira.’ Samweli agaluka aha ncingo. Enyuma z’aho ashub’iyumva bamuhamagala. Erhi Samweli ayumva er’izu obwa kasharhu, Eli ahugûkwa oku Yehova ye oli wahamagala Samweli. Eli abwira Samweli oku akashub’iyumva ely’izu, anashuza erhi: ‘Yehova, oderhage. Bulya omukozi wawe ali ayumva.’

Samweli ashub’igaluka aha ncingo. Buzinda ayumva bamuhamagala: ‘Samweli! Samweli!’ Ashuza ntya: ‘Oderhage, bulya omukozi wawe ali akuyumva.’ Yehova amubwira ntya: ‘Obwire Eli oku namuha obuhane ye n’omulala gwage. Amanyire oku bagala bage bali bajira ebintu bibi omw’ihema lyani ly’entimanano, cikone nta kantu ajijire lugenda oko.’ Erhi buca sezi Samweli ayigula enyumvi z’ihema ly’entimanano nk’oku anayorhaga ajira. Ayoboha okubwira kuhani mukulu ebi Yehova anamubwiraga. Cikone Eli amuhamagala anamubwira ntya: ‘Mwana wani, bici Yehova anakubwizire? Ombwire ngasi kantu.’ Ntyo Samweli abwira Eli ngasi kantu.

Oku Samweli agendekire akula, ko Yehova anagendekire aba haguma naye. Abaisraheli b’omu cihugo coshi bamanya oku Yehova anacishozire Samweli ly’aba mulebi na muzuzi.