Erhi Solomoni ayus’iba mwami w’e Israheli, Yehova amudosa ntya: ‘Bici olonzize nkuhe?’ Solomoni ashuza ntya: ‘Nciri musole, ntanamanyiri ebi ndi najira. Wekasinga ompe obwenge lyo nshibirira abantu bawe.’ Yehova aderha ntya: ‘Bulya wahûnyire obwenge, nakujira obe muntu mwenge bwenene kulusha abandi boshi okw’igulu. Na kandi nakujira obe mugale bwenene. N’erhi wakantumikira, wanalama nsiku nyinji.’

Solomoni arhondera ayubaka ehekalu. Akolesa enoro nyinja, amarhale, empaho, n’amabuye. Ebihumbi by’abalume n’abakazi bagwerhe obulenga barhabala oku mukolo gw’okuyubaka ehekalu. Enyuma za myaka nda, ehekalu yayunjula banayiha Yehova. Yagwerhe amazabahu, n’enterekêro zalikw’ago mazabahu. Solomoni afukama embere z’amazabahu anashenga ntya: ‘Yehova, eyi hekalu erhali nnene erhanali nyinja bwenene kuli we, cikone wekasinga oyemere enterekêro yirhu onayumvirhize amasala girhu.’ Gurhi Yehova arhanyize lugenda eyo hekalu n’isala lya Solomoni? Ho n’aho erhi Solomoni ayus’isalira, omuliro gwarhenga emalunga gwanayoca enterekêro zali oku mazabahu. Yehova ayemera eyo hekalu. Erhi Abaisraheli babona ntyo, bashagaluka bwenene.

Mwami Solomoni al’imanyikine omu Israheli yoshi enyanya z’obwenge bwage, al’imanyikine ciru n’omu maeneo ga kulî bwenene. Abantu bakag’ija emwa Solomoni ly’abarhabala oku mazibu bagwerhe. Ciru na mwami-kazi w’e Sheba ayish’ipima erhi kobinali Solomoni agwerhe bwenge bunji omu kumudosa amadoso mazibu. Erhi oyo mwami-kazi ayumva amashuzo ga Solomoni, aderha ntya: ‘Ntakag’iyemera ebi abantu bakag’iderha lugenda we, cikone lero namabonaga oku oli mwenge bwenene ciru kulusha oku bakag’iderha. Mungu wawe, Yehova, akugishire.’ Ishanja ly’Abaisraheli lyal’igwerhe akalamo kinja, n’abantu bagwerhe omwishingo. Cikone ebintu byali hofi bishanje.

Akasanzi koshi Solomoni agendekire aharamya Yehova, omurhûla gwali omu Israheli. Cikone Solomoni arhôla bakazi banji b’omu bindi bihugo, n’abo bakazi bakag’iharamya ensanamu. Bunyi-bunyi, Solomoni ashanja, anarhondera naye aharamya ensanamu. Yehova agaya bwenene. Abwira Solomoni ntya: ‘Nanyaga omulala gwawe obwami bw’e Israheli n’obo bwami bwagabikanamwo kabirhi. Naha mukozi wawe muguma ecigabi cinene c’obo bwami, n’omulala gwawe gwarhegeka ecigabi cisungunu.’

Yehova akolesa eyindi njira ly’ayerekana omuhigo gwage n’obwalagale. Yerobowamu, mukozi muguma wa Solomoni, ali omu mubalamo erhi arhimanana n’omulebi Ahiya. Ahiya abera omushangi gwage mwo bigabi 12 anabwira Yerobowamu ntya: ‘Yehova anyaga omulala gwa Solomoni obwami bw’e Israheli anabugabemwo kabirhi. Orhôle bigabi ikumi by’ogu mushangi bulya wayish’irhegeka mûko ikumi.’ Mwami Solomoni ayumva lugenda oko analonza okuniga Yerobowamu! Oko kwarhuma Yerobowamu ayâkira e Misri. Erhi hagera akasanzi, Solomoni afâ n’omugala Robowami aba mwami. Yerobowamu ayumva oku kal’ikola kasanzi kinja k’okugaluka e Israheli.

Abagula b’e Israheli babwira Robowami ntya: ‘Erhi wakajirira abantu bwinja, banaba bishwekerezi kuli we.’ Cikone abîra ba Robowami bali misole, bamubwira ntya: ‘Oshinganine olibuze abantu! Onabakolese ciru bwenene!’ Robowami arhumikira amahano g’abo bîra bage b’emisole. Alibuza abantu, n’abantu bahagalika oburhegesi bwage. Bajira Yerobowamu abe mwami wa mûko ikumi, gayishir’imanyikana nka bwami bw’e Israheli. Ago gandi mûko abirhi gahikira aha gamanyikana nka bwami bw’e Yuda, n’abantu ba mw’ago mûko babêra bishwekerezi kuli mwami Robowami. Amûko 12 g’e Israheli gal’ikola gagabikinemwo.

Yerobowamu arhal’ilonzize abantu bakaj’iharamiza e Yeruzalemu, bulya eyo vile yali omu bwami bwa Robowami. K’omanyire bulya gurhi? Yerobowamu al’iyobohire oku bamuleka banarhondere balunga Robowami okuboko. Ntyo atula nsanamu ibirhi z’orhunina rhw’enoro, anabwira abantu ntya: ‘E Yeruzalemu eri kulî bwenene. Mukaharamiza hano.’ Abantu barhondera baharamya orho rhunina rhw’enoro banashub’iyibagira Yehova.