Amûko ikumi g’obwami bw’e Israheli gagwerhe bami banji babi, cikone Ahabu ye wali mubi kulusha. Arhôla omukazi mubi wakag’iharamya Baali. Izino lyage ye wali Yezebeli. Ahabu na Yezebeli bayunjuza ecihugo coshi mw’enterekêro ya Baali bananiga abalebi ba Yehova. Gurhi Yehova ajijire? Arhuma omulebi Eliya ly’aj’ibwira Ahabu kantu kalebe.

Eliya abwira Mwami Ahabu oku enyanya z’obubi bwage, enkuba erhacinie omu cihugo c’e Israheli. Emburho zayusa myaka erhalusire isharhu zirhamera n’ishali lyaba omu cihugo. Enyuma z’aho Yehova ashub’irhuma Eliya emwa Ahabu. Mwami aderha ntya: ‘We orhudwirhire ebi byoshi! We oli warhuma rhwalibuka.’ Eliya ashuza ntya: ‘Arhali nie ntumire eci canda caba. Byabire ntyo bulya muli mwaharamya Baali. Rhwajira kantu kalebe lyo rhumanya indi Mungu w’okuli. Ohamagale abantu boshi n’abalebi ba Baali baje oku Ntondo Karmeli.’

Abantu barhimanana oku ntondo. Eliya aderha ntya: ‘Mwene mucishoge. Akaba Yehova ye Mungu w’okuli, mumurhumikire. N’erhi akaba Baali ye w’okuli, mwanamurhumikira. Rhwajira ntya; balebi 450 ba Baali barheganya enterekêro n’okuhamagala mungu wabo, na nani narheganya enterekêro nampamagale Yehova. Owakashuza omu kulerha omuliro ye Mungu w’okuli.’ Abantu bayemera.

Abalebi ba Baali barheganya enterekêro. Bayusa olusiku loshi bali bahamagala mungu wabo. Bakaderha ntya: ‘Wekasinga Baali, orhushuze!’ Erhi Baali abula bwashuza, Eliya akamushekera. Aderha ntya: ‘Muhamagale n’izu linene. Nkaba ajire iro ly’akadodo, analagirire oku muntu waj’imuzusa.’ Ebijingo byahika, n’abalebi ba Baali bagendekera bahamagala. Cikone Baali arhashuzagya.

Eliya ahira enterekêro yage oku mazabahu anagabulagirakwo amishi. Enyuma z’aho ashenga ntya: ‘Wekasinga Yehova, oleke abantu bamanye oku we Mungu w’okuli.’ Ho n’aho, Yehova arhuma omuliro kurhenga empingu gwanayoca eyo nterekêro. Abantu bayama ntya: ‘Yehova ye Mungu w’okuli!’ Eliya aderha ntya: ‘Mumanye mwakayemera abalebi ba Baali balibirha!’ Olo lusiku, balya balebi 450 ba Baali banigwa.

Erhi ecitu cisungunu cibonekana enyanya z’enyanja, Eliya abwira Ahabu ntya: ‘Enkuba nnene eyishire. Oje omu mutuga gwawe, onagaluke ekâ.’ Enkuba yatunga [yahinda], haba mwizimya munji n’empusi, n’enkuba yarhondera yania. Buzinda, cirya canda cahwa. Ahabu alibisa omutuga gwage nk’oku akanahashire. Kugerera oburhabale bwa Yehova, Eliya alibirha bwenene kulusha ogo mutuga! Cikone k’amazibu goshi ga Eliya gahwerire aho? Rhwayish’ibona.

Yezebeli ayumva ebyahikire abalebi ba Baali, anagaya bwenene. Arhuma abantu baj’ibwira Eliya ntya: ‘Irhondo, nawe wafâ ak’abalebi ba Baali.’ Eliya ayoboha bwenene anayakira omw’irungu. Ashenga ntya: ‘Yehova, ntacihash’ilembera. Ondeke nfê.’ Bulya Eliya al’irhamire, aj’iro idako z’omurhi.

Malahika muguma amuzusa anamubwira ntya n’obutudu: ‘Zuka olye.’ Eliya abona omugati gw’omuviringo guli oku mabuye madurhu n’akabindi k’amishi. Alya ananywa anashubigend’igwishira. Malahika ashub’imuzusa anaderha ntya: ‘Olye. Olagirire oku misi bulya wajira omubalamo mulî.’ Ntyo Eliya ashub’ilya. Enyuma z’aho Eliya alambagira nsiku 40 mushi n’obudufu, ahika oku Ntondo Horebu. Erhi Eliya ali eyo munda aja omu lwala ly’agwishira. Cikone Yehova amuganiza. Aderha ntya: ‘Eliya , bici oli wajira hano?’ Eliya ashuza ntya: ‘Abaisraheli bavunyire eciragane bakuhâga. Basherezize amazabahu gawe bananiga abalebi bawe. Na buno bali balonza okuniga nani.’

Yehova amubwira ntya: ‘Ogende oyimange oku ntondo.’ Burhangiriza, empusi nnene yagera enyanya z’olo lwala. Enyuma z’aho, haba omusisi gw’idaho na kandi haba omuliro. Buzinda, Eliya ayumva izu lisungunu na lya butudu. Acibwikira obusu n’igoti lyage anayimanga embuga z’olo lwala. Enyuma z’aho Yehova amudosa bici byarhumire ayâka. Eliya ashuza ntya: ‘Niene ncisigire.’ Cikone Yehova amubwira ntya: ‘Orhali wene. Hacili bantu 7 000 omu Israheli bali bamparamya. Ogende ojihiraho Elisha abe mulebi ahali hawe.’ Ho n’aho, Eliya agend’ijira nk’oku Yehova anamubwiraga. K’orhanyize oku nawe Yehova anakurhabala amango oli wajira ebi alonzize ojire? Neci, anakurhabala. Rhulabe akandi kantu kajirikine omu mango enkuba erhacikag’inia.