Omu mango enkuba erhakag’inia, Yehova abwira Eliya ntya: ‘Oje e Zarefati. Mukana muguma w’eyo munda akuha ebiryo.’ Erhi Eliya ahika oku muhango gw’evile, abona mukana muguma wali mukenyi wakag’ishenya enshali. Eliya ahûna oyo mukana igopo ly’amishi. Erhi ali agend’ilerha ago mishi, Eliya amuhamagala anamubwira ntya: ‘Wekasinga, onderhere n’ecihimbi c’omugati.’ Cikone oyo mukana aderha ntya: ‘Ntagwerhi mugati nakuha. Ngwerhe hishano hisungunu hyone n’orhuvurha nadekamwo ebiryo nalya nie na mugala wani.’ Eliya amubwira ntya: ‘Yehova alaganyize oku okanjirira omugati nalya, enshano yawe n’amavurha gawe birhahwe kuhika amango enkuba yashub’inia.’

Ntyo oyo mukana aja emwage agend’ijirira omulebi wa Yehova omugati. Nk’oku Yehova analaganyagya oyo mukana n’omugala ngasi mango bakag’iba n’eby’okulya omu kasanzi koshi enkuba erhakag’inia. Enshano yage n’amavurha gage birhahwaga.

Enyuma z’aho akantu kabi bwenene kahikira. Mugala w’oyo mukana alwala bwenene kuhika afâ. Ahûna Eliya oburhabale. Eliya arhôla oyo mwana-rhabana amuhêka omu cumpa c’enyanya c’enyumpa y’oyo mukana. Amugwishiza oku ncingo anashenga ntya: ‘We kasinga Yehova, ofûle oyu mwana.’ K’omanyire bulya gurhi Yehova okujira ako kantu kwakabire kwa kusomeza bwenene? Bulya nk’oku rhunamanyire, nta wundi muntu walisag’ifûlwa embere z’aho. N’oyo mukana n’omugala barhali ciru Baisraheli.

Cikone oyo mwana-rhabana afûka anarhondera ayisa! Eliya abwira oyo mukana ntya: ‘Ala! Mugala wawe azine.’ Oyo mukana ashagaluka bwenene anabwira Eliya ntya: ‘Kobinali oli muntu wa Mungu. Manyire ntyo bulya ngasi mango onaderhe ebi Yehova akubwizire oderhe byone.’

Mwami Ahabu akag’ibona kugerera idirisha ly’enyumpa yage yali e Yezreheli, ishwa ly’emizabibu lya mulume muguma wakag’ihamagalwa Naboti. Ahabu acifinja ely’ishwa ly’emizabibu analonza okuligulira Naboti. Cikone Naboti alahira oku arhaguza ely’ishwa bulya Irhegeko lya Yehova lyal’ihanzize okuguza obwimo. Ka Ahabu akenzire Naboti bulya anarhumikire ely’irhegeko lya Yehova? Nanga. Ahabu akunira bwenene. Agaya bwenene kuhika alahira oku arhazuke, arhanalya.

Yezebeli, muka Ahabu, wali Mugoli mubi, amubwira ntya: ‘We mwami w’e Israheli. Wanaba na ngasi kantu koshi olonzize. Nakuha ely’ishwa.’ Ayandikira abagula b’omu lugo amaruba, anababwira bashobeke Naboti oku anajacire Mungu n’oku bamunige omu kumushurha amabuye. Abagula bajira nk’oku Yezebeli anaderhaga, na buzinda Yezebeli abwira Ahabu ntya: ‘Naboti anafîre. Liry’ishwa ly’emizabibu likola lyawe.’

Arhali Naboti yene muntu orhagwerhi igosa Yezebeli anizire. Anizire bantu banji bal’izigire Yehova. Akag’iharamya ensanamu anajira ebindi bintu bibi bwenene. Yehova akag’ibona ebintu byoshi bibi Yezebeli akag’ijira. Gurhi Yehova ajirire Yezebeli?

Enyuma z’okufâ kwa Ahabu, omugala Yehoramu aba mwami. Yehova arhuma omulume wakag’ihamagalwa Yehu ly’aha Yezebeli n’omulala gwage obuhane.

Yehu aja omu mutuga gwage ly’aja e Yezreheli emunda Yezebeli al’ilamire. Yehoramu ayisha omu mutuga ly’arhimanana na Yehu anamudosa ntya: ‘Ka buholo bukudwirhe?’ Yehu aderha ntya: ‘Nta buholo bwakahaba na nyoko Yezebeli acili ajira ebintu bibi.’ Yehoramu alonza okuhindula omutuga gwage ly’alibirha. Cikone Yehu amulasha n’omwampi na Yehoramu afâ.

Enyuma z’aho Yehu aja emwa Yezebeli. Erhi Yezebeli ayumva oku Yehu ayishire, aciyinjihya, asanura emviri zage, anamulingira oku cigabi c’enyanya c’enyumpa yage anakamulabira omw’idirisha. Erhi Yehu ahika, Yezebeli amulamusa n’obucibone. Yehu ayakuza n’izu linene anabwira abakozi ba Yezebeli ntya: “Mumukwebe okw’idaho!” Bakweba Yezebeli omw’idirisha arhogera okw’idaho anafâ.

Enyuma z’aho, Yehu aniga bagala ba Ahabu 70 anarhenza ecihugo coshi mw’enterekêro ya Baali. K’obwine oku Yehova aba amanyire ngasi kantu, n’omu kasanzi kashinganine anahane balya bajira ebintu bibi?