Amadoso G’abantu Basoma Ebitabu Birhu

Bulya gurhi Abakristu bashinganine babe masu lugenda okukolesa eprograme z’okurhuma emesage oku telefone erhi oku ordinatere?

Bene wirhu banji bali bakolesa eteknoloji ya muli gano mango lyo bagendekera baganira na bene wabo b’omulala erhi na bene wirhu bw’omu cigamba. Abakristu bakuzire kiroho bashinganine bakakengera er’ihano: “Omwenge akabona obuhanya anacîfulike, omuhwinja yehe mpu abugeraho acîyandulire.”​—Mig. 27:12.

Rhuba rhumanyire oku Yehova alonzize okurhulanga. Co cirhumire, rhurhakomerana n’abantu bakalerha emberuluka, abatengwa, erhi abalerha enyigirizo zirhashinganini. (Rm. 16:17; 1 Kr. 5:11; 2 Yn. 10, 11) Baguma banaba bali baja omu cigamba cikone barhagwerhi olugenzi lwinja. (2 Tm. 2:20, 21) Amango rhukola rhwakomerana na lebé, rhushinganine rhukakengera ebyo byoshi. Cikone okucishoga abira binja kurhakaba kulembu amango rhuli rhwakolesa eprograme y’okurhumirana amamesaje.

Rhushinganine rhube masu lugenda okucishoga bwinja abira birhu amango rhuli omu cikundi c’okurhumirana amamesaje. Bene wirhu baguma bajire omu cikundi c’okurhumirana amamesaje, n’okwo kwabadwirhire amalehe mabi. Gurhi mwene wirhu erhi mwali wirhu akacishoga bwinja abira omu cikundi c’amagana g’abantu bali barhumirana amamesaje? Kwanaba kuzibu okumanya ehali y’ekiroho ya ngasi muntu oli mw’eco cikundi. Ennanga 26:4 zidesire ntya: “Ntatamala ahali ababi, ntanaja omu ndêko y’endyalya.” K’oko kurhayerekini oku kuli kwinja okukolesa eprograme y’okurhumirana amamesaje na balya omanyire bwinja bone?

Na ciru ankaba ecikundi c’okurhumirana amamesaje olimo ciri c’abantu basungunu, bihunyire orhanye oku kasanzi ojira oli warhuma ezo mesaje na bici muli mwaganirira. Kurhali kuderha oku rhusezibwe okushuza kuli ngasi mesaje, ciru akaba ederherire bici erhi ciru akaba ehunyire kasanzi kanji. Paolo arhondire Timoteyo lugenda abantu “b’akalimi, bw’okuba mwanzi.” (1 Tm. 5:13) Ene, kuli kulembu okujira ebintu bya mwene ebyo kugerera enjira y’ ecielektroniki.

Nta Mukristu okuzire ekiroho wakaja waderha kubi bene wabo erhi kuyumvirhiza abali babaderha kubi erhi kuderha-derha ebintu birhamuyerekiri. (Enna. 15:3; Mig. 20:19) Arhakanajaderha emyanzi arhamanyiri bwinja erhi eyi bahebiremw’omunyu. (Ef. 4:25) Kobinali ngasi mango rhunahâbwe ebiryo by’ekiroho n’emyanzi y’okucikubagirwa kugerera e site yirhu jw.org n’eprograme ya JW Télédiffusion ya ngasi mwezi.

Bene wirhu baguma baguma banakolese eprograme y’okurhumirana amamesaje omu by’okugula, erhi omu kuguza erhi omu by’okuhâna akazi. Okujira ntyo kuyerekire eby’okusaka, ci kurhayerekiri ebintu by’eciteokrasi. Abakristu barhalonzizi “okusîma enfaranga” banayake eyo njira y’okulongeza efaranga kuli bene wirhu.​—Hb. 13:5, Bible Mashi.

Ka rhwanakolesa ezo programe z’okurhuma amamesaje omu kuhûnira oburhabale bene wirhu bahikirwe n’obuhanya erhi balya bali omu bulagirire? Rhuba rhuzigire bene wirhu na kanji kanji rhunarhabale abali omu bulagirire n’okubahâ omurhima. (Yk. 2:15, 16) Cikone okujira ntyo kugerera ecikundi c’abantu banji kwanarhuma emipango yarhozirwe n’ebiro by’etawi erhi n’ecigamba cabo erhacijirikana bwinja. (1 Tm. 5:3, 4, 9, 10, 16) Na kandi, ntaye muli rhwe wakalonza abandi barhanye oku agwerhe omukolo gwago-gwago kuyerekera olubaga lwa Nnamahanga.

Rhunakalonza rhujire ebyalerhera Nnamahanga irenge. (1 Kr. 10:31) Co cirhumire nka rhwakahiga okukolesa eprograme y’okurhuma amamesaje erhi eyindi teknoloji, rhushinganine rhube masu n’okuhugûkwa amazibu gw’okujira ntyo.