E Chaîne y’e Satelite ya JW Enahike omu Eneo e Enternete Erhabamwo

Ngasi mwezi, rhunakalindirira emyanzi n’evideo z’ekiroho zigera oku JW Télédiffusion. Cikone bene wirhu na bali birhu banji b’omu Afrique barhajira obulyo bw’okubona n’okuyumva eyo myanzi kugerera e Enternete. Bulya gurhi?

Eneo nyinji z’omu Afrique zirhalugibamo Enternete. N’omu maeneo galimo e Enternete, enakakola bunyi-bunyi erhi enabe eri y’ibeyi linji. Kwa lwiganyo, mwangalizi muguma w’omuzunguko olama e Madagascar alipaga hofi dolare 14 ly’aja omu nyumpa ebamo e Enternete lya télécharger JW Télédiffusion nguma. Ezo nsaranga ziri nyinji kulusha omushahara bantu baguma na baguma bakamarha oku mugobe!a

Ciru ankaba hali ago mazibu, bantu banji b’omu Afrique bakola bali bashagalukira okulola JW Télédiffusion buzira kuilolera oku Enternete. Gurhi bali bajiramwo ntyo?

Kurhondera omu mwaka gwa 2017, abantu b’omu Afrique Subsaharienne bakola balola JW Télédiffusion kugerera e chaîne y’e televizyo kugerera e satelite. Abantu banabone ayo chaîne omu ndimi 16 lusiku oku lundi na mugobe oku gundi buzira kuhâna kantu.

Lyo bihikira aho, Abahamirizi ba Yehova barhôla emipango haguma n’abajira eby’e télédiffusion bijirwa kugerera e satelite. Esatelite bakolesa enakakolesibwa omu bihugo 35 by’e Afrique Subsaharienne. Ago mapatano bajiraga ganakayusa dolore 12 000 ngasi mwezi. Mango maguma na maguma Abahamirizi ba Yehova banalipe ezindi nsaranga z’enyanya amango hali ebintu byago-byago byagera oku chaîne. Oko kunarhume ebihumbi by’abantu byashagalukira entimanano erhi bintu byago-byago byajirwa erhi akaba hali olambagirire etawi.

Bantu banji, kuhiramwo n’abarhali Bahamirizi banalolere e chaîne ya JW Télédiffusion aha mwabo kugerera esatelite oku matelevizyo gabo. Cikone, hali bene wirhu banji barhajira buhashe bw’okugula ebikolanwa byakabarhabala lyo bakakulikira eyo chaîne. Lyo rhubarhabala, Nyumpa z’Entimanano 3 670 na kulusha zahâbirwe ebikolanwa bene wirhu na bali birhu bakola bakalolerako e chaîne ya JW Télédiffusion. Okugula ebyo bikolanwa n’okubirhuma emunda byaja, binahwere dolare 70 erhi akaba Enyumpa y’Entimanano ekola ebamo e téléviseur erhi e projecteur. Erhi akaba ebyo birhahali ibeyi lyanaba linji, byanagulwa dolare 530.

Bene wirhu na bali birhu banashagalukire eyo chaîne bwenene. Mugula muguma olama e Cameroun, adesire ntya: “Omulala gwani gunakabona eyo chaîne nka mana garhogire omw’irungu.” Mwene wirhu Odebode, olama e Nigéria, adesire ntya: “Omu mulala gwirhu rhunakalola eyo chaîne kasharhu omu mugobe. Abana banakalindirira bwenene oku ako kasanzi kahika. Banarhubwire oku rhulole e chaîne ya JW amango rhurhaba rhupanzire okujira ntyo.” Rose, naye olama e Nigéria, adesire ntya: “Nshagalusire bwenene okuderha oku e chaîne ya JW Télédiffusion ekola erhuma ntacilola ezindi chaîne ziganirira ebiri byagera omw’igulu. Amango nakagilola ezo chaîne nakagigaya duba-duba n’okuciyumva kubi enyanya z’ebi nakagibona. Cikone e chaîne ya JW Télédiffusion eba yakuyigiriza na yakurhuliriza! Eyo yo chaîne nsima bwenene. Eri ngalo nnene kurhenga emwa Yehova.”

Mwangalizi muguma w’omuzunguko oba e Mozambique adesire oku omu muzunguko gwage, Enyumpa z’Entimanano bazihiziremo ebikolanwa byakahashisa okulola eyo chaîne kugerera esatelite. Bene wirhu na bali birhu b’omu muzunguko banahike nsa nguma embere erhi kulusha lyo balola e JW kugerera esatelite.

Omu mango g’entimanano nkulu y’omw’igulu lyoshi y’omwaka gwa 2019 yajiriragwa e Johannesburg, omu Afrique du Sud, eyo chaîne yakolesibwe ly’eyerekana hotuba nguma na nguma, kwa lwiganyo, ehotuba zajiragwa na bene wirhu b’Embaraza Eri Yalongoza, abantu bali omu maeneo mwenda baziyumvirhe. Mwene wirhu Sphumelele, okola omu biro by’e télédiffusion by’omu tawi y’e Afrique du Sud, adesire ntya: “Embere byakagihûna okucibigeza ezo hotuba kugerera e Enternete. Cikone oko kwakagihûna okuba n’ekoneksyo nyinja n’okulipa ensaranga. E chaîne ya JW Télédiffusion kugerera esatelite eri nyinja erhanali y’ibeyi linji.”

Rhummuvuzire omunkwa kuli obo burhabale bwinyu bw’okulunga okuboko omukolo gw’omw’igulu lyoshi, bene wirhu na bali birhu banji b’omu Afrique banalolaga e JW Télédiffusion kugerera esatelite. Rhushagalukire bwenene oburhabale bwinyu muhâna omu njira za ngasi lubero kugerera donate.jw.org.