Balembêdu Erhi ba Padiri Bayish’ibashambulira n’Obukali

Artur, mwangalizi w’omuzunguko omu Armenie, ali omu ziyara omu cigamba cilebe c’Abahamirizi ba Yehova. Ayishibugana oku eco cigamba cirhakagijira amahubiri g’aha bantu banji, k’okuderha kukolesa e prezantware eriko ebicapo biyimangire oku Bibliya. Ly’arhabala abahubiri barhondeze amahubiri ga mwenere ago, Artur na mukage, Anna, balusibwa n’owundi Muhamirizi ohamagalwa Jirayr, buzinda bahira e prezantware yabo omu lugo lulebe. Bacishoga aha abantu bali balambagira oku magulu bali banji.

Abantu barhondera bashagalukira oko n’okurhola ebitabu. Cikoki abapizani babona oku eyo njira mpyahya y’okuhubiri eri ya bulenga bunji. Ba padiri babirhi babayegerera, na buzira kulaliza, muguma wa mulibo ashurha eprezantware ecipasi yarhogera okw’idaho. Buzinda ashurha Artur oluhi na ntyo elineti lyage lyarhoga. Artur, Anna, na Jirayr balonza okurhuliriza abo ba padiri, cikoki wapi. Abo ba padiri balabarhalabarha eprezantware n’okushandaza ebicapo. Enyuma z’okucamba n’okulonza okujira Abahamirizi ba Yehova kubi, abo ba padiri bagenda.

Artur, Anna, na Jirayr baja oku lapolisi y’eyo lyo baciyerekana ebyabire. Baderha ebyabire banaganirira abapolisi n’abandi bakozi emyanzi y’Ebibliya kwa bofofi. Babahêka omu biro by’omukulu wabo. Oku murhondero oyo mukulu alonza okumanya gurhi ebintu byali kone. Cikoki erhi abona oku Artur, ali munenene na wa misi c’arhagaluliraga oyo padiri wamushurhaga oluhi, aleka okudosa amadoso lugenda ebyo byajiragwa, arhondera adosa amadoso lugenda obuyemere bw’Abahamirizi ba Yehova. Oko kwarhabala bajire enganîro nsa ini zoshi. Omukulu asomerwa n’ebi ayumvagya kuhika aderha ntya: “Idîni linja eri wani! Nani naba muguma wa muli mwe!”

Olusiku lwakulikiraga Artur ashubira omu mahubiri g’aha bantu banji, na mw’ako kasanzi mulume muguma wabonaga ebyabaga olusiku lwageraga amujaho. Oyo mulume amuvuga omunkwa okubona abezire mutûdu olo lusiku n’okubona arhagaluliraga owamushurhaga oluhi. Ayushûla oku ebyabwine olo lusiku byarhumire abona oku arhakacikenga ba padiri.

Bijingo, omukulu w’abapolosi abwira Artur ashubiyisha. Cikoki ahali baganirire emyanzi ya balya ba padiri, amudosa amadoso lugenda Ebibliya. Bapolisi babirhi bayisha kw’ezo nganîro.

Olusiku lwakulikiraga Artur ashubilambagirira oya mukulu w’abapolisi, muli ako kasanzi lero amuyeresa amavideo gayimangire oku Bibliya. Oyo mukulu ahamagala abandi bapolisi balole kw’ago mavideo nabo.

Kugerera olugenzi lubi lw’aba padiri, bapolisi banji bahikira aha bayumva obuhamirizi oburhanzi. Oko kwabarhabala babe n’entanya nyinja lugenda Abahamirizi ba Yehova.