Bahamirizi ba Yehova banga oyishi? Nkaba balungu bawe, aba mukola mweshi nabo erhi bira bawe, erhi nkaba abazindigi kushambaza lugenda Ebibliya. Kobinali, rhwe bandi, na kandi bici birhuma rhuja rhwashambaza abantu oku biyerekire obuyemere bwirhu?

Rhwe Bahamirizi ba Yehova ko rhunali nk’abandi bantu. Rhurhenzire omu ngasi lubaga, omu ngasi buko, n’omu ndimi zoshi z’omwigulu. Baguma muli rhwe bakagishengera omu gandi madîni, hali n’abandi barhali yemire Nnamahanga. Cikwone rhweshi rhwaciha akasanzi k’okuyiga bwinja-bwinja enyigirizo z’Ebibliya. (Ebijiro 17:11) Rhwayemera ezo nyigirizo z’Ebibliya na buzinda rhwacishoga okuharamya Yehova.

Enyigirizo z’Ebibliya zinarhuhe bunguke bunji. Amazibu ganarhuhikire, rhunajira obuzamba nk’abandi bantu. Cikwone, rhunaciseze ngasi lusiku okukolesa enyigirizo z’Ebibliya, okujira ntyo kunayinjihye akalamo kirhu. (Ennanga 128:1, 2) Co cirhuma rhukashambalira abantu oku myanzi minja rhwayizire omu Bibliya.

Rhulamira oku marhegeko ga Yehova. Okushimbulira amarhegeko gali omu Bibliya kunarhuhe akalamo kinja, kunarhujire rhube n’obukenge oku bandi, kunarhurhabale rhube n’oborhere bwinja, kwa lwiganyo obushinganyanya n’omurhima mwinja. Ago marhegeko ganarhurhabale rhube n’amagala minja na kandi ganarhujire bakozi binja, ganarhume omulala gwayumvikana n’okuba n’olugenzi lwinja. Bulya rhuyemire oku “Nyakasane arhajira kabôlo,” rhuli mulala muguma omw’igulu lyoshi buzira endibi z’obûko, z’embaga, z’endimi, n’ebihugo, bulya obuguma bwirhu buyimangire oku buyemere bwirhu. Rhuli bantu nk’abandi, cikwone ecinyabuguma cirhu ciba ca kusomeza.​—Ebijiro 4:13; 10:34, 35.

• Omu njira nci Abahamirizi ba Yehova bali nk’abandi bantu?

• Marhegeko maci Abahamirizi ba Yehova bayizire omu Bibliya?

Bantu banji bacikebwa mpu Abahamirizi ba Yehova lir’izino ly’idîni lihyahya. Cikwone, hamagera miaka kulusha 2 700 kurhenga amango Nyamuzinda w’okuli ahamagalaga abakozi bage okw’izino ly’‘abahamirizi.’ (Izaya 43:10-12). Embere z’omwaka gwa 1931 rhwakagihamagalwa Banafunzi b’Ebibliya. Bici byarhumire rhwarhole izino ly’Abahamirizi ba Yehova?

Er’izino liyerekine ndi Nyamuzinda wirhu. Izino lya Nyamuzinda, Yehova, lyaliyandisirwe kali bihumbi omu mandiko marhanzi-rhanzi g’Ebibliya. Cikwone, bahinduzi banji b’Ebibliya balesire er’izino, bakazikayandika Nyakasane erhi Nnamahanga ahali h’er’izino. Nyamuzinda w’okuli acimanyisize emwa Musa oku izino lyage lya Yehova, anamubwira erhi: “Eri lyo izino lyani ensiku n’amango.” (Olubungo 3:15, NW) Ntyola, Yehova ayerekana oku arhashushini n’abandi ba nyamuzinda boshi b’obunywesi. Rhunacishingire bwenene okuhamagalwa okw’izino litagatifu lya Nnamahanga.

Er’izino liyerekine mukolo muci rhujira. Omu mango ga mira, hali bantu banji bwenene bashinganyanya, kurhangirira kuli Abeli, bali yemire Yehova banahamiriza oku biyerekire obuyemere bwabo. Nuhu, Abrahamu, Sara, Musa, Daudi, n’abandi bakozi ba Nnamahanga nabo bacilunga kw’eco “citu c’Abahamirizi.” (Abahabraniya 11:4–12:1) Oku tribinale, omuhamirizi aba wa kuyerekana embere z’abazuzi oku muntu mulebe arhagwerhi bubi, nirhu rhunahamirize okuli oku biyerekire Yehova.

Rhunayiganye Yezu, muhamirizi mukulu. Ebibliya eyerekine oku Yezu ye “muhamirizi w’okuli na mwikubagirwa.” (Amafulûlo 3:14) Naye yene adesire oku ‘amanyisize izino lya Nnamahanga n‘okuhamiriza okuli.’ (Yowane 17:26; 18:37) Co cirhumire Abanafunzi bage b’okuli bagwasirwe bahamagalwe kwer’izino lya Yehova n’okulimanyisa abandi bantu. Ogwo go mukolo Abahamirizi ba Yehova boshi baciseza okujira.

• Bici byarhumire Abanafunzi b’Ebibliya barhola izino ly’Abahamirizi ba Yehova?

• Kurhenga mangaci Yehova ajira Abahamirizi han’igulu?

• Omuhamirizi mukulu wa Yehova ye ndi?

Ebibliya yali yadesire oku enyuma ly’okufa kwa Yezu, abigiriza b’obunywesi bankajire omu Bakristu ba burhanzi n’oku bankazinzize enyigirizo z’okuli. (Ebijiro 20:29, 30) Na ntyo ko byanabire. Enyigirizo za Yezu bazigusha n’enyigirizo z’ecipagani. Muli ntyo, barhondeza Obukristu bw’obunywesi. (2 Timoteyo 4:3, 4) Bicigi byankarhuyemeza ene oku rhumanyire kobinali enyigirizo z’Ebibliya?

Amango g’okushubimanyisa okuli gahika. Yehova ali adesire oku ‘omu nsiku nzinda, obumanye bw’okuli bwayushuka.’ (Daniyeli 12:4) Omu mwaka gwa 1870, ecigamba cisungunu c’abantu baligwerhe irâla ly’okuli babona oku enyigirizo nyinji z’amadîni zirhagwarhini n’Ebibliya. Na ntyo barhondera okulongereza enyigirizo z’okuli z’Ebibliya na Yehova abagisha.

Bayiga Ebibliya bwinja-bwinja. Abo Banafunzi b’Ebibliya bakagiciyigiriza nk’oku rhuciyigiriza ene: bakagiyiga mwanzi muguma-muguma gw’Ebibliya. Bayusa baguyumva bwinja barhangire ogundi. N’erhi bankahisire oku lwandiko luzibu lulya barhayumvirhi bwinja, bakagifukula agandi maandiko g’Ebibliya lyo gabarhabaza okuyumva olwo lwandiko bwinja. Erhi babaga bamayumvikana oku iwazo lishinganine n’okuli kw’Ebibliya, bakagi liyandika. Mwoko kuleka Ebibliya ecihugule, Abanafunzi b’Ebibliya bahikira okumanya okuli lugenda izino lya Nnamahanga, Obwami bwage, omuhigo gwage kuyerekera igulu n’abantu. Ntyo, ebyo bakagilongereza byabalikuza omu buja bw’enyigirizo n’ebijiro by’obunywesi.​—Yowane 8:31, 32.

Erhi bahika omu mwaka gwa 1879, Abanafunzi b’Ebibliya babona oku amango gahisire g’okufululira abantu okuli. Barhangira okuyandika ejurnale ederhwa omu Ciswahiri Munara wa Mulinzi Unaotangaza Ufalme wa Yehova, eyo jurnale eciri yayandikwa kuhika ene. Mwa gano mango rhuli rhwayigiriza okuli kw’Ebibliya omu bihugo 240 n’omu ndimi kulusha 750. Nta lusiku okuli kwamanyikine nka mwa gano mango!

• Enyuma ly’okufa kwa Yezu, bici byahikire enyigirizo z’okuli?

• Bici byarhurhabire lyo rhushubi manya okuli kw’Ebibliya?

Omu miaka minji, Abahamirizi ba Yehova bakagikolesa mpindulo mberuluka z’Ebibliya, bakagizicapa, ciru n’okuzigabira abantu. Cikwone, rwabona obulagirire bw’okuba n’empindulo mpyahya lyo rhurhabala abantu ‘bamanye eby’okuli,’ nk’oku Mungu alonzize. (1 Timoteyo 2:3, 4) Ntyo, omu mwaka gwa 1950, Ebibliya Tafsiri ya Ulimwengu Mpya (Enpindulo y’igulu lihyahya) yarhangira okuyandikwa omu Cingereza bihande-bihande. Eyo mpindulo ekola ehindwirwe omu ndimi kulusha 130, enayandikwe n’obushinganyanya bwoshi na buzira magosa, na kandi ekolesize ebinwa by’ene.

Eli mpindulo ndembu okuyumva. Bulya endimi zinahinduke erhi hagera ensiku, empindulo nyinji zigwerhe enderho nyinji zirhamanyikini bwinja erhi zirhaciderhwa, n’ezindi ziri nzibu okuyumva. Na kandi, ebitabu bya mira by’Ebibliya byabonekine, ebyo bitabu birhabamwo magosa na kandi bishinganine bwenene n’Ebibliya ntanzi, byarhurhabala okuyumva bwinja endimi Ebibliya yayandikagwamo, ezo ndimi ciri Ci-habraniya, Ciharamiya n’Ecigiriki.

Eyo mpindulo eshinganine n’omwanzi gwa Nnamahanga. Abahinduzi b’Ebibliya baligwasirwe bacilange n’okukaba emyanzi yali omu bitabu birhanzi by’Ebibliya yafululagwa na muka mutagatifu. Cikwone bisomerine okubona oku abo bahinduzi bakagi hindula Ebibliya barhahebaga izino lya Nnamahanga, Yehova, omu mpindulo nyinji.

Eyo mpindulo ekengesize owayandikisagya Ebibliya. (2 Samweli 23:2) Nk’oku onabibwine aho idako, Ebibliya Tafsiri ya Ulimwengu Mpya yagalwire kali 7 000 izino lya Yehova ngasi aha lyali liyandisirwe omu mandiko ga mira g’Ebibliya. (Ennanga 83:18, NW) Abahindulaga eyo Bibliya balongerezize okuli kw’eyo myanzi miaka minji. Co cirhumire nk’omuntu ali asoma eyo Bibliya, anayumve omurhima gushagaluke bulya eri Bibliya eyerekine n’obwalagale entimanya za Nnamahanga. Obe ogwerhe eyo mpindulo omu lulimi lwawe erhi nanga, rhukuhunyire okasoma Akanwa ka Yehova ngasi lusiku.​—Yozwe 1:8; Ennanga 1:2, 3.

• Bici byarhumire rhwabona obulagirire bw’empindulo mpyahya y’Ebibliya?

• Ngasi muntu olonzize amanye obulonza bwa Nnamahanga, bici ahunyirwe okujira ngasi lusiku?