Bantu banji barhacija omu makanisa gabo bulya ciru bankajamwo nta bunguke bakulamwo: barhabona amashuzo oku madoso g’obulagirire rhucidosa omu kalamo na kandi nta burhulirize bakulamwo. Bulya gurhi kuli kwinja okaja omu ntimanano z’Abahamirizi ba Yehova? Bunguke buci wankakulamwo?

Waba haguma n’abantu bakusimire bwenene banakushibirire. Omu mango g’Entumwa, Abakristu boshi bali gabirwe omu bigamba, na kandi bakagirhimanana lyo baharamya Nnamahanga, bayig’Ebibliya, n’okuhebana omurhima omu nda. (Abahabraniya 10:24, 25) Bulya bakazigiyerekana obuzigire omu ntimanano, ngasi muguma akazigiciyumva ali ahagarhi k’abira bage, kwo kuderha benewabo na balibabo bazigirwa. (2 Abatesalonika 1:3; 3 Yowane 14,) Nirhu rhunashimbe olwiganyo lwabo, n’okwo kunarhulerhere omwishingo.

Wayiga gurhi wankakolesa amarhegeko g’Ebibliya omu kalamo kawe. Nk’oku byali burhanzi, abalume, abakazi, emisole n’abana, rhweshi rhunarhimanane haguma. Abigiriza banakolese Ebibliya lyo barhuyereka gurhi rhwankakolesa amarhegeko g’Ebibliya omu kalamo kirhu. (Olushika 31:12; Nehemiya 8:8) Omu ntimanano zirhu, ngasi muntu anayerekane obulangalire bwage omu kushuza n’omu kuyimba.​—Abahabraniya 10:23.

Entimanano zirhu zazibuhya obuyemere bwawe. Entumwa Paolo ayandikire ecigamba ciguma c’Abakristu erhi: “Bulya bwenene ncifinjire okumubona, . . . rhubone oku rhwahânana omurhima, mw’oyo nani, omu buyemere bwirhu rhweshi.” (Abaroma 1:11, 12) Okurhimanana ngasi mugobe haguma na bene wirhu kunarhuhe emisi y’okukenga amarhegeko g’Ebibliya n’okuzibuhya obuyemere bwirhu.

Rhukuhunyire oyishe oku ntimanano zirhu lyo wene ocibonera ebyo byoshi. Rhwakuyankirira n’omwishingo. Nta kantu bakuhuna ly’ojamwo na ntako kasanzi bakuhuna entulo.

• Lwiganyo luhi entimanano zirhu zikulikira?

• Bunguke buci rhukula omu ntimanano zirhu?

Ciru ankaba bagera omu muzirhu, cirhu enkuba yakanya, ciru hankaba emboho, erhi izuba likali bwenene, ebyo byoshi birhahanza Abahamirizi ba Yehova okugenda oku ntimanano zabo. Bici birhuma embaka z’akalamo n’omurhamo birharhuhanza okurhimanana na bene wirhu na bali birhu?

Entimanano zirhu zinayinjihye akalamo kirhu k’Obukristu. Entumwa Paolo ayandikira Akakristu ntya: “Rhushibirirane rhwene na rhwene.” (Abahabraniya 10:24, NW) Ezo nderho za Paulo zanahindulwa “kugerereza bwenene” kuli bene wirhu na bali birhu, kuli kuderha oku rhuhunyirwe rhubamanye. Mwezo nderho, Paolo arhuhunyire rhushibirire bene wirhu na bali birhu. Omu kumanya eyindi milala ya bene wirhu, rhwanamanya oku baguma mulibo bahimire amazibu gashushine n’agirhu. Muli ntyo banarhurhabala nirhu rhuhime amazibu girhu.

Wakula abira b’okuli omu ntimanano zirhu. Erhi rhurhimanana na bene wirhu, barhaba bantu rhumanyire kone, ci baba bira birhu b’okuli. N’agandi mango rhunarhimanane na bene wirhu lyo rhushagalukira akalamo. Bunguke buci rhubona omu kurhimanana na bene wirhu? Rhunabone oku ngasi muguma ali wa bulagirire n’okwo kunarhume rhwasimana bwenene. N’erhi muguma mulirhwe ankaja omu madarhi, abandi banamurhabale oku galwisa bulya rhukola rhuli bira. (Emigani 17:17) Okurhimanana haguma na bene wirhu na bali birhu kunayerekane oku ‘rhunashibirirane.’​—1 Abakorinti 12:25, 26.

Rhukuhunyire nawe ocishoge abira omugarhi k’abantu bali bajira obulonza bwa Nnamahanga. Abo bira bantyo wanababona omu Bahamirizi ba Yehova. Orhalekaga akantu koshi koshi kakuhanze okuyisha omu ntimanano zirhu.

• Bunguke buci rhubona omu kurhimanana na bene wirhu n’abali birhu bazigirwa?

• Mangaci wayisha omu ntimanano zirhu ly’orhumanya bwinja?

Abakristu b’amango g’entumwa bakagi rhimanana ngasi mango lyo baharamya Nnamahanga omu kuyimba, kushenga, n’okuyiga Amandiko. Barhankajijire akandi kantu karhagwarhini n’Ebibliya. (1 Abakorinti 14:26) Entimanano zirhu nazo ntyo ko zijirikana kuhika ene.

Enyigirizo zirhu zirhenga omu Bibliya, zinarhurhabale omu kalamo. Ngasi buzinda bw’omugobe (lw’iposo erhi lw’iyinga), bene wirhu na bali birhu ba ngasi cigamba banarhimanane lyo bayumva ehotuba y’abantu boshi (Enyigirizo z’abantu boshi) y’eminiti 30, eyo hotuba enarhuyereke gurhi rhwankakolesa amandiko omu kalamo n’okumanya ngahi amango gahika. Oli wayigiriza, erhi aderha olwandiko, ngasi muntu analusome omu Bibliya yage. Erhi ehotuba ehwa rhunayige omu nsa ngumana mwanzi muguma gurhenzire omu jurnale rhuderha “Munara wa Mulinzi.” Ngasi muntu ahunyirwe ashuze oku madoso erhi kulerha ezindi ntimanya z’okurhabala abandi. Ezo nshambalo zinarhurhabale okukolesa enyigirizo z’Ebibliya omu kalamo kirhu. N’olo lusiku, ebigamba kulusha 110 000 by’Abahamirizi ba Yehova omw’igulu lyoshi banayige ogwo mwanzi muguma.

Entimanano zirhu zinarhujire rhube bigiriza binja b’Akanwa ka Nnamahanga. Kandi, omu mugobe, rhunajire eyindi ntimanano y’ebigabi bisharhu ederhwa Akalamo n’Omukolo g’Omukristu. Emyanzi rhuyiga kw’eyo ntimanano rhunayipate ngasi mwezi omw’ Ibuku ly’Akalamo n’Omukolo g’Omukristo. Ecigabi cirhanzi c’eyo ntimanano ciderhwa Obugale bw’Akanwa ka Nnamahanga, cinarhurhabale rhuyumve bwinja emyanzi eli omu bigabi by’Ebibliya rhwasomîre eka. Ecigabi cha kabirhi ciderhwa Rhucihane Bwenene Omu Mukolo gw’Okuyigiriza, cinarhuyereke gurhi rhwankashambalira Ebibliya haguma n’abandi bantu. Erhi ngasi muntu amala ecigabi cage, hali mwene wirhu omuha amahano lyo amanya okusoma bwinja n’okuderha embere z’abantu. (1 Timoteyo 4:13) Omu cigabi cizinda ciderhwa Akalamo k’Omukristo, rhunashambalire gurhi rhwankakolesa amakanuni g’Ebibliya omu kalamo kirhu ka ngasi lusiku. Muli eco cigabi muba enshambalo z’amadoso n’amashuzo, ezo nshambalo zinarhurhabale okuyumba Ebibliya bwinja.

Olusiku wayisha omu ntimanano zirhu, wasimisibwa bwenene n’enyigirizo rhuhâbwa.​—Izaya 54:13.

• Myanzi mici wankayumva omu ntimanano z’Abahamirizi ba Yehova?

• Egarhi k’entimanano zirhu za ngasi mugobe, ntimanano ehi olonzize oyishekwo?

Kobwine kugerera oku nfoto zirimw’eci citabu oku Abahamirizi ba Yehova banayambale bwinja nka baja omu ntimanano zabo? Bulya gurhi rhwe Bahamirizi ba Yehova rhushibirira emyambalo n’okuciyinjihya kwirhu?

Rhunalonze okukenga n’okukengesa Nnamahanga wirhu. Rhumanyire oku Nnamahanga arharhulolera oku iranga lirhu lyone. (1 Samweli 16:7) Cikwone, erhi rhugendi muharamya omu ntimanano zirhu, rhugwasirwe rhumukenge n’okukenga benewirhu na bali birhu Bakristu. Rhurhole olwiganyo: Erhi wankahamagalwa embere za mwami, wanalolereza bwinja iranga n’emyambalo yawe. Ntyo nirhu iranga n’emyambalo yirhu egwasirwe emulerhere obukenge Yehova, “Mwami w’ensiku n’amango,” n’okukengesa Enyumpa y’Obwami rhumushengeramwo.​—1 Timoteyo 1:17.

Lyo abantu babona oku rhunakenge amarhegeko g’Ebibliya. Ebibliya ehunyire Abakristu bayambale “n’obukenge n’olugero.” (1 Timoteyo 2:9, 10) Okuyambala “n’obukenge” kuli kurhayambala emishangi ya “ndola ko,” kurhayambala emishangi y’okuzusa irala ly’okujira ebyenshonyi na kurhayambala emishangi y’okurhuleka bushunzi. Okuyambala “n’olugero” kuli kuderha kurhayambala emishangi migalugalu erhi y’okuciyerekana oku rhuli ba birhi bibishi. Ciru ankaba rhukenzire ago marhegeko g’Ebibliya, ngasi muntu agwerhe oluhya lw’okucishoga emyambalo asimire. Ciru ankaba rhurhadesiri kanwa koshi koshi, emyambalo yirhu minja n’iranga lirhu ‘byanakengesa enyigirizo z’Omuciza wirhu’ n’okurhuma abantu ‘bakuza’ Nnamahanga. (Tito 2:10; 1 Petro 2:12) Okukayambala n’obukenge n’olugero amango rhwaja omu ntimanano kwanarhuma abandi bantu bayishiharamya Yehova.

Cikwone, omanyage wayoboha okuyisha omu ntimanano zirhu mpu bulya emyambalo n’iranga lyawe birhakwanini. Wanayisha n’omushangi gucire gunakwanine ciru ankaba gurhali gwa ngulo ndarhi.

• Emyambalo n’iranga lirhu ka biri bya bulagirire nka rhwajiharamya Nnamahanga?

• Mandiko gahi rhugwasirwe rhukengere nka rhwacishoga emishangi n’amango rhuli rhwayinjihya iranga lirhu?

Ankaba okola oyiga Ebibliya n’Omuhamirizi wa Yehova, nkaba onarheganye ngasi mango omwanzi mwayishiyiga. N’entimanano zirhu nazo ntyo, ly’oyumva n’okuyunguka n’ebya yigirizibwamwo, ogwasirwe obirheganye embere z’akasanzi. Wabona bunguke bunji okakarheganya ngasi mango entimanano zirhu.

Ocishoge akasanzi n’ahantu hakwanine. Nsa ehi oyumva wankayiga n’obwenge burhuzize? Ka sezi-sezi erhi budufu amango abana bamagwishira? Ciru ankaba kasanzi kasungunu kone wajira, kuli kwinja okaba omanyire kasanzi kanganaci wamala oliwayiga. Olonze ahali akahwenyenye, okule ngasi kantu kankakusharha obwenge. Kwa lwiganyo, ozimye etelevizyo, eradio erhi telefone. Oshenge embere orhondere okuyiga ly’oyibagira embaka wabwine omu lusiku. Okujira ntyo kwarhuma obwenge bwawe bwoshi bwarhulula kw’ebi oliwayiga.​—Abafilipi 4:6, 7.

Orheganye entimanya z’obulagirire lyo oyishi shuza bwinja. Orhengi manyirira bwinja omwanzi oliwayiga. Orhengi soma enshokolezi y’ogwo mwanzi onayigererezekwo, olole gurhi ngasi nshokolezi nsungunu egwarhine n’eyo nshokolezi nene. Ololereze bwinja ngasi nfoto n’amadoso g’okucikengeza eby’obulagiriremw’ogo mwanzi oli wayiga. Buzinda bwaho, wanarhonderaga okusoma ngasi cifungo n’okulonza ishuzo lya ngasi idoso. Olonze omu Bibliya amandiko gadesirwe onagasome, onalonze okumanya gurhi ago mandiko gagwarhine n’enshokolezi nkulu. (Ebijiro 17:11) Hano obona aha ishuzo liri, olihebe kw’ecimanyiso ly’orhagi liyibagira. Han’oba oli omu ntimanano, orhayobohaga okuyinamula okuboko nkaba olonzize okushuza. Okashuza, oderhe ishuzo omu nderho zawe wene bulya warheganyize.

Okakarheganya emyanzi rhwashambalira omu ntimanano zirhu ngasi mugobe, obumanye bwawe bwayushuka.​—Mateyo 13:51, 52.

• Gurhi wankajira ly’orheganya bwinja entimanano zirhu?

• Gurhi wankacirheganya ly’oshuza omu ntimanano zirhu?

Kurhenga mira, Yehova aba alonzize abantu ba ngasi mulala badamale n’okuyiga Akanwa kage haguma lyo bazibuhya obwira n’obumvikane bwabo haguma naye. (Olushika 6:6, 7) Co cirhuma ngasi mulala gw’Abahamirizi ba Yehova gunacishoge kasanzi kaguma omu mugobe lyo baharamya Nnamahanga haguma. Mw’ako kasanzi, bulya boshi baba barhuzize banalonze omwanzi gw’Ebibliya bashambalira kushimbana n’obulagirire bw’omulala gwabo. Ciru ankala wene oli Muhamirizi wa Yehova omu mulala gwinyu, wanaciha ako kasanzi k’okushenga Nnamahanga omu kuyiga omwanzi gw’Ebibliya olonzize okuyumva erhi kumanya bwinja.

Kali kasanzi k’okuyegera Yehova. Ebibliya edesire ntya: “Yegeri Nyamuzinda, naye ammuyegerera.” (Yakobo 4:8) Rhunahikire okumanya Yehova bwinja amango rhuyiga obworhere bwage n’ebijiro byage kugerera oku Bibliya. Enjira ndembu y’okurhangira okuharamya omu mulala kuli kusoma Ebibliya n’izu mweshi haguma. Mwanashimbulira entondekanye y’okusoma Ebibliya ngasi mugobe y’Entimanano ederhwa Akalamo n’Omukolo g’Omukristu. Ngasi muntu anahabwa ecigabi cage c’okusoma buzinda mwanashambalira obunguke mukuzire mw’ebyo bigabi musomire.

Kali kasanzi k’okuyegerana bwenene omu mulala. Amango omulume na mukage, ababusi n’abana babo bali bayiga Ebibliya haguma, obwira bwabo bunazibuhe bwenene. Ako kasanzi kagwasirwe kabe ka mwishingo n’omurhula na ngasi muntu omu mulala agwasirwe akalinde n’obushagaluke. Kushimbana n’emyaka y’abana babo, ababusi banalongereza emyanzi ebakwanine y’oku bashambalira yankabarhabala okucilikuza n’amadarhi emasomo; n’eyo myanzi ababusi banayikula omu jurnale yirhu ederhwa Munara wa Mulinzi erhi omu Amuka! kandi erhi oku adresi yirhu ye Enterneti jw.org. Mwanabona haguma ecipindi ca ngasi mwezi ca JW Télediffusion (tv.jw.org) na buzinda mwanacishambalira. Mwanayiga ciru enyimbo zayishi yimbwa omu ntimanano zirhu na buzinda omulala gwanashangira ecijumbu cabo erhi kushagalukira akandi kantu k’okucisimisa.

Ako kasanzi omulala gugeza haguma ngasi mugobe kali ka bulagirire bwenene bulya kanarhabala abantu boshi omu mulala basimisibwe n’okuyiga Akanwa ka Nnamahanga. Erhi omulala gwankagenderera ntyo, Nnamahanga anagisha obushiru bwabo.​—Ennanga 1:1-3.

• Bulya gurhi omulala gw’Abakristu b’okuli gugwasirwe gucihe akasanzi k’okuharamya Nnamahanga haguma?

• Gurhi ababusi bankajira lyo ako kasanzi kaba ka kusimisa ngasi muntu omu mulala?

Bulya gurhi aba bantu bali kw’eyi nfoto bagwerhe omwishingo? Bulya bali oku ntimanano yirhu nguma nkulu (nnene). Abakozi ba Yehova ba mira balihunyirwe bakajira ntimanano zisharhu nkulu omu mwaka. Nkabo, nirhu rhunalinde n’omwishingo munji olusiku lw’entimanano yirhu ya bantu banji bwenene. (Olushika 16:16) Rhunajire ntimanano zisharhu nkulu omu mwaka: entimanano nkulu zibirhi za lusiku luguma-luguma, n’entimanano nkulu y’ensiku zisharhu. Bunguke buci rhukula mw’ezo ntimanano zirhu nkulu?

Ezo ntimanano nkulu zinazibuhye obuzigire bwirhu kuli benewirhu. Nk’oku Abaisraheli bakazigi cishingira okukuza Yehova omu ntimanano z’abantu banji, nirhu rhunacishingire okuharamya Nnamahanga haguma na benewirhu na bali birhu omu ntimanano zirhu nkulu. (Ennanga 26:12; 111:1) Ezo ntimanano gaba mango minja g’okurhimanana na benewirhu b’omu bindi bigamba nisi erhi b’omu bindi bihugo. Omu kasanzi k’oku luhuka rhunashangire ebiryo haguma na bene wirhu na bali birhu n’okwo kunayushule omwishingo gwirhu. (Ebijiro 2:42) Kw’ezo ntimanano nkulu wanacibonera wene obuzigire buba omu cinyabuguma c’Abahamirizi ba Yehova b’omwigulu lyoshi.​—1 Petro 2:17.

Ezo ntimanano zinarhurhabale rhukule omu bunyamuka. Amango Abaisraheli bakazigi ba oku ntimanano zabo nkulu, bakazigi yunguka bulya bakazigi ‘bayumvisa ebinwa byoshi’ bakazigi yigirizibwa. (Nehemiya 8:8, 12) Nirhu, enyigirizo z’Ebibliya rhuyigirizibwa omu ntimanano zirhu nkulu zinarhusimise bwenene. Entondekanye (programe) y’enyigirizo za ngasi lusiku eba eyimangire oku lwandiko luguma lw’Ebibliya. Ehotuba z’okusimisa, n’ehotuba z’ebigabi binji, n’okusharha ebyagezire, ebyo byoshi binarhuyereke gurhi rhwankajira obulonza bwa Mungu omu kalamo kirhu. Erhi bene wirhu baderha amarhangulo balibageramwo mw’ezi nsiku za buzinda na gurhi bali bagahima, okwo kunarhuyushulire emisi n’okurhuheba omurhima omu nda. Eteatre (drame) rhubona oku ntimanano nkulu y’ensiku zisharhu enarhurhabale okuyumva bwinja emyanzi rhusoma omu Bibliya na kandi enarhuyigirize nyigirizo nyinji rhwankakolesa omu kalamo kirhu. Kw’ezo ntimanano nkulu, abantu banabatizibwe lyo bayerekana oku bacihire Nnamahanga lyo bajira obulonza bwage.

• Bici birhuma entimanano zirhu nkulu kaba kasanzi ka bushagaluke?

• Bunguke buci wankabona okayisha oku ntimanano yirhu nkulu?

Embere z’okufa kwage, Yesu adesire erhi: “Ogu mwanzi mwinja gw’Obwami gwayishiyalagazibwa omw’igulu lyoshi, cibe cimanyiso oku mashanja goshi, obwo lyo olusiku luzinda lwayishe.” (Mateyo 24:14, NW) Cikwone, gurhi ogwo mwanzi mwinja gw’Obwami gwankayalagazibwe omw’igulu lyoshi? Omu kushimba olwiganyo Yezu àrhusigîre amango ali han’igulu.​—Luka 8:1.

Rhunayalagaze nyumpa oku yindi. Yezu akomerezize abanafunzi bage okuyalagaza omwanzi gw’Obwami nyumpa oku yindi. (Mateyo 10:11-13; Ebijiro 5:42; 20:20) Abo bakazigiyalagaza omwanzi gw’akalembe omu mango g’entumwa baligabirwe ebishagala by’okuyalagazamw’omwanzi gw’akalembe. (Mateyo 10:5, 6; 2 Abakorinti 10:13) N’ene ntyo ko omukolo gwirhu gw’okuyalagaza guli gwajirwa: Ngasi cigamba cinahabwe ecishagala erhi bishagala. Muli ntyo, rhunahikirize irhegeko Yezu arhuhire mpu ‘rhuyigirize olubaga, rhunahamirize.’​—Ebijiro 10:42.

Rhunayalagaze omwanzi gw’Obwami ngasi hoshi rhwankarhimana abantu. Yezu arhusigire olundi lwiganyo: akagi yigiriza ngasi hantu hali abantu banji, nk’oku burhambi bw’enyanja erhi ah’iriba ly’okudomera amishi. (Marko 4:1; Yowane 4:5-15) Nirhu rhunashambale n’abantu oku biyerekire Ebibliya ngasi hoshi rhwankababugana: omw’ibarabara, omu cambu, omu mashwa, ciru rhunakolese n’etelefone. Amango bihashikine, rhunayalagaze omwanzi gw’Obwami oku balungu birhu, aba rhulegerera n’abo omu mukolo, ebwa masomo, n’abantu bw’omu milala yirhu. Okukolesa ezo njira zoshi kunarhume bantu banji omw’igulu lyoshi bayumva omwanzi mwinja g’obucire.​—Ennanga 96:2.

Ndi wankashambalira oku mwanzi mwinja gw’Obwami bwa Nnamahanga? K’okengire na bunguke buci ankayishibona bulya wamubwizire ogwo mwanzi? Omanye wankaleka okushambalira abandi kw’ogu mwanzi gw’obulangalire. Okajira ntyo ngasi mango nka kuhashikine!

• “Mwanzi mwinja” guhi rhugwasirwe rhuyalagaze?

• Njira zihi Yezu arhusigire, Abahamirizi ba Yehova nabo bakolesa omu kuyalagaza omwanzi gw’Obwami?

Kanjikanji “painiya” aba muntu ogenda burhangiriza kuji rhangula ahantu hahyahya n’okuyereka abandi enjira bashimba. Rwanaderha oku Yezu ali painiya bulya arhumirwe han’igulu lyo ajira omukolo gw’okuha benebantu obuzine n’okubayigulira enjira y’okubona obucire. (Mateyo 20:28) Ene, abashimbulizi bage banamuyiganye omu kugeza kasanzi kanji omu mukolo gw’okujira abanafunzi. (Mateyo 28:19, 20) Banji bajira ogwo mukolo omu kuba bapainiya.

Painiya ali muntu oyalagaza omwanzi gw’akalembe akasanzi koshi. Abahamirizi ba Yehova boshi banayalagaze omwanzi gw’akalembe. Cikwone, abandi mulibo bacirheganyize omu kalamo kabo lyo babona akasanzi k’okuyalagaza omwanzi gw’Obwami akasanzi koshi, banaderhwe bapainiya b’akasanzi koshi, banageze nsa 70 ngasi mwezi omu mukolo gw’okuyalagaza Obwami. Lyo bahisa ezo nsa, banajire emikolo erhabarhola akasanzi koshi. N’abandi mulibo banahikire okuba bapainiya bakulu, abo bo barhumwa omu bishagala bilagirire oku bantu b’okuyalagaza Obwami. Banageze nsa 130 erhi kurhaluka ngasi mwezi omu mukolo gw’okuyigiriza. Bacishozire okulembuhya akalamo kabo bulya bacikubagire oku Yehova abayushulira ebi balagirireko omu kalamo. (Mateyo 6:31-33; 1 Timoteyo 6:6-8) Abahamirizi barhagwerhi obuhashe bw’okuyalagaza omwanzi gw’Obwami akasanzi koshi banacishoge okuba bapainiya barhabazi. Abo bo baciseza okugeza nsa 30 erhi 50 ngasi mwezi omu mukolo gw’okuyalagaza.

Okuzigira Nnamahanga n’abandi bantu kwokurhuma omuntu acishoga okuba painiya. Nka Yezu, rhunabone oku bantu banji balagirire oku burhabale, balonzize okumanya Nnamahanga n’emihigo yage. (Marko 6:34) Cikwone, rhugwerhe obumanye bwankabarhabala n’okubaha obulangalire bw’okuli bw’akasanzi kayishire. Okuzigira abalungu ko kurhuma painiya ahana akasanzi kage n’emisi yage lyo abarhabala bamanye omwazi gw’Obwami. (Mateyo 22:39; 1 Abatesalonika 2:8) Oko kucihana kwa painiya omu kuyalagaza Obwami kunarhume obuyemere bwage bwazibuha, anayegere Yehova bwenene, anabe n’omwishingo munji.​—Ebijiro 20:35.

• Painiya ye ndi?

• Bici birhuma Bahamirizi baguma bacishoga okuba bapainiya?

Abahamirizi ba Yehova bamanyikine oku masomo g’eciteokrasi bakajira kurhenga mira. Hali amasomo garheganyizibwe balya bacihana okasanzi koshi omu mukolo gw’okuyalagaza Obwami. Ago masomo gaba ga kubarhabala bahikirize bwinja omukolo gwabo.​—2 Timoteyo 4:5.

Amasomo ga bapainiya. Oku buzinda bw’omwaka murhanzi omu mukolo gw’okuyalagaza Obwami akasanzi kosho, painiya w’akasanzi koshi anayandikwe oku masomo g’ensiku ndarhu. Ago masomo ganajirikane omu Nyumpa y’Obwami eri hofi. Omuhigo gw’ago masomo guba gwa kurhabaza bapainiya bayegere Yehova bwenene, babe n’obuhashe bunji omu njira zoshi z’okuyalagaza Obwami, na kandi bagenderere omu mukolo gwabo.

Amasomo g’abigiriza b’Obwami. Ago masomo ga miezi ibirhi gaba ga kukomeza bapainiya b’obuhashe bunji balya bagwerhe obulonza bw’okuleka ecishagala cabo n’okugendi kolera ahali obulagirire. Bali nka banaderhe erhi: “Nie ono, ontume!” Omu kujira ntyo, banashimbe olwiganyo lwa Yezu, Mwigiriza mukulu bwenene omu bigiriza boshi b’Obwami bàlabasire han’igulu. (Izaya 6:8; Yowane 7:29) Okuhamira kuli n’eka kwanahuna omuntu alembuhye akalamo kage. Akalamo k’abantu abuganyire, emboho erh’idurhu, n’ebiryo byabo, ebyo byoshi anabugana oku birhashushini n’eby’emwabo. Na kandi byanamuhuna ayige alulimi luhyahya lyo ahasha akashambaza abantu. Ago masomo ganarhabale bene wirhu na bali birhu balamba, n’Abakristu barholine, babe n’oborherhe bukwanine Abakristu bulya buhunyirwe omu mukolo gwabo ciri n’obuhashe bwankarhuma Yehova abakolesa bwenene n’ecinyabuguma cage. Abaja kw’ago masomo bahunyirwe babe na miaka egarhi ka 23 na 65.

Amasomo g’Ebibliya g’Egileadi. Oluderho “Gileadi” lw’Ecihabraniya lulimw’iwazo ly’“Omuhamirizi.” Kurhenga ago masomo garhondezibagwa omu mwaka gwa 1943, gamayigiriza bamisionere kulusha 8 000. Abo bamisionere barhumirwe bagendi yalagaza omwanzi gw’Obwami “kuhika emunda igulu lihekera,” n’omukolo gwabo gwayanyire malehe manji. (Ebijiro 13:47) Alaga olwiganyo: Erhi bamisionere barhanzi barhumwa omu Pérou, ntaco cigamba c’Abahamirizi cali mw’eco cihuho. Ene, wanaganja bigamba 1 000 mw’eco cihugo. N’omu cihugo ciderhwa Japon, orhankaganjire Bahamirizi ba Yehova 10 embere bamisionere bahikemwo. Cikwone, ene muli Bahamirizi ba Yehova kulusha 200 000. Emyezi irhanu y’Amasomo g’Egileadi eba ya kuyiga bwinja-bwinja Akanwa ka Nnamahanga. Bapainiya bakulu na bamisionere bali bakolera oku ishami ly’ecihugo erhi balya bali bajira omukolo gw’abagula b’omuzunguko, banahamagalwa kw’ago masomo lyo bahabwa enyigirizo z’okubarhala basere bwenene omu mukolo gw’okuyalagaza guli gwajirwa omw’igulu lyoshi.

• Omuhigo gw’amasomo ga bapainiya guba muhi?

• Bandi baja oku masomo g’abigiriza b’Obwami?