Bunguke buci rhwankakula omu kukenga amakanuni g’Ebibliya?

1. Bulya gurhi kuli kwa bulagirire rhulongolwe?

Omulemi wirhu agwerhe obwenge bunji kurhulusha. Bulya ali Larha w’obuzigire, anarhushibirire bwenene. Arharhulemaga mpu rhukacilongola rhwene. (Yeremiya 10:23) Nkoku omwana murho aba alagirire oku kulongolwa n’omubusi, ko nirhu rhulagirire oku kulongolwa na Nnamahanga. (Izaya 48:17, 18) Nnamahanga anarhulongole kugerera oku makanuni gage g’omu Bibliya, eyo eri nshokano arhuhire.​—Osome 2 Timoteyo 3:16.

Amarhegeko ga Yehova n’amakanuni gage binarhuyereke enjira y’okubona akalamo kinja ene n’oku rhwankayishibona aminja g’ensiku n’amango. Bulyala Nnamahanga ye warhulemaga, rhugwasirwe rhushimbulire amarhegeko gage n’okuleka yene arhulongole.​—Osome Ennanga 19:8, 12; Amafulûlo 4:11.

2. Amakanuni g’Ebibliya byo bici?

Akanuni k’Ebibliya kuli okuli kw’Ebibliya kulya kurhankahindulwa. Cikwone irhegeko lyohe linahanwe omu kanga kaguma. (Olushika 22:8) Ntyola, rhugwasirwe rhugerereze bwenene lyo rhumanya mangaci rhugwasirwe rhukolese kanuni kalebe. (Emigani 2:10-12) Rhurhole olwiganyo: Ebibliya eyigirizize oku obuzine eri nshokano erhenga emwa Nnamahanga. Ako kali kanuni kankarhurhabala amango rhuli omu mukolo, ahakà, nka rhuli rhwatembeza omutuga, ipigipigi, erhi ikinga. Erhi rhwankakengera ako kanuni k’obulagirire, rhurhakaheba akalamo kirhu erhi akalamo ka bandi omu mazibu.​—Osome Ebijiro 17:28.

3. Makanuni gabirhi gahi gali ga bulagirire bwenene?

Yezu ayerekine makanuni gabirhi ga bulagirire bwenene. Akanuni karhanzi kayerekine omuhigo gw’akalamo. Omuhigo gw’akalamo kirhu kuli kumanya Nnamahanga, kumusima, n’okumukolera n’obushinganyanya. Ntyola, omu ngasi mihigo rhwarhola, rhugwasirwe rhukengere ako kanuni. (Emigani 3:6) Abakenga ako kanuni banabe bira ba Nnamahanga, banabone omwishingo gw’okuli, na kandi babona obuzîne bw’ensiku n’amango.​—Osome Mateyo 22:36-38.

Akanuni ka kabirhi kanarhurhabala rhulame n’omurhula haguma n’abalungu birhu. (1 Abakorinti 13:4-7) Okukolesa ako kanuni ka kabirhi kurhuhunyire rhuyiganye oku Nnamahanga ajirira bene bantu.​—Osome Mateyo 7:12; 22:39, 40.

4. Bunguke buci rhwankakula omu kukenga amakanuni g’Ebibliya?

Amakanuni ganayigirize emilala gurhi obuzigire bwankalerha obumvikane omu mulala. (Abakolosi 3:12-14) Akanwa ka Nnamahanga kanalange omulala bulya kayigirizize akandi kanuni k’obulagirire omu buhya. Kadesire oku obuhya bugwasirwe bulame ensiku zoshi.​—Osome Omurhondêro 2:24.

Okukulikira amakanuni g’Ebibliya kwanarhurhabala rhurhabaga bantu bakulonza bintu binji binji, kwanarhurhabala rhube bantu barhuzize emirhima. Rhurhole olwiganyo: Kanji kanji abakolesa basima abakozi bashinganyanya na balya barhayoloha. (Emigani 10:4, 26; Abahabraniya 13:18) Kandi Ebibliya erhuhunyire rhukasima rhukabona ebintu by’obulagirire na kandi erhuhunyire rhusime Nnamahanga bwenene kulush’ebirugu.​—Osome Mateyo 6:24, 25, 33; 1 Timoteyo 6:8-10.

Okukolesa amakanuni g’Ebibliya omu kalamo kwanarhurhabala rhube n’amagala minja. (Emigani 14:30; 22:24, 25) Rhurhole olwiganyo: Okukolesa irhegeko lya Nnamahanga lihanzize endalwe kwanarhulanga n’endwala zankarhuyirha ciru n’obuhanya (aksida). (Emigani 23:20) Yehova arharhuhanzizi okuywa amamvu, cikwone alonzize rhuganywe n’olugero. (Ennanga 104:15; 1 Abakorinti 6:10) Rhunabone bunguke bunji omu kukenga amakanuni ga Nnamahanga bulya ganarhurhabale okucishoga ebijiro binja n’okuba n’enkengero nyinja. (Ennanga 119:97-100) Cikwone, arhali bunguke bwabo bone burhuma Abakristu b’okuli bakenga amarhegeko ga Nnamahanga. Banajire ntyo lyo bakenga Yehova.​—Osome Mateyo 5:14-16.