Bulya Gurhi Hali Malibuko Manji na Bubi Bunji?

Erhi akantu kabi kakahikira, rhunacidose ntya: “Bulya gurhi oko kuhisire?” Rhushagalusire bwenene bulya Ebibliya erhubwizire bulya gurhi ebintu bibi bihikira!

1. Gurhi Shetani orhondezagyamwo obubi hanw’igulu?

Shetani Ibilisi agomera Nnâmahanga. Shetani alilonzize okurhambula abandi, co carhumaga ashumika Adamu na Eva nabo bagomere Nnâmahanga. Shetani ajira ntyo erhi arheba Eva. (Omurhondêro 3:1-5) Ajira Eva arhanye mpu nkaba hali akantu kinja bwenene Yehova amufulisire. Amuyereka oku bene bantu banaba n’omwishingo munji erhi akaba barharhumikiri Nnâmahanga. Shetani aderhaga obunywesi burhanzi erhi abwira Eva oku arhakafâ erhi akabula burhumikira Nnâmahanga. Co cirhuma Ebibliya edesire oku Shetani aba “munywesi ye n’ishe w’obunywesi.”​—Yowane 8:44.

2. Bici Adamu na Eva bacishozire okujira?

Yehova alihîre Adamu na Eva ngasi kantu kinja bal’ilagirireko. Alibabwizire oku banalya amalehe ga ngasi murhi gw’omw’ishwa ly’e Edeni, cikone abahanza okulya malehe ga murhi muguma gone. (Omurhondêro 2:15-17) Bacishoga okulya amalehe g’og’omurhi Yehova abahanzagya. Eva ‘akonolakwo ilehe alya.’ Buzinda, Adamu “naye alya.” (Omurhondêro 3:6) Adamu na Eva barharhumikiraga Nnâmahanga. Bulya Adamu na Eva bali bimana, bagwerhe obulyo b’okujira ebintu binja. Cikone erhi bacishoga n’obulonza bwabo okurharhumikira Nnâmahanga, bajira ecaha banalahira okulongozibwa na Nnâmahanga. Ogo muhigo barhôlaga gwabalerhera malibuko manji.​—Omurhondêro 3:16-19.

3. Mazibu maci ecaha ca Adamu na Eva carhudwirhire?

Erhi Adamu na Eva bajira ecaha, barhacigendekeraga baba bimana. N’oko kurhaba bimana kwayahukira iburha lyabo lyoshi. Ebibliya edesire ntya: “Ecaha cadwirhwe en’igulu na muntu muguma, naco ecaha caburha olufu, n’olufu lwayahukira abantu boshi.”​—Abaroma 5:12.

Hali bintu binji birhuma rhwalibuka. Hali amango rhulibuka erhi mihigo yirhu mibi erhumire. Hali n’agandi mango rhulibuka erhi mihigo mibi y’abandi bantu erhumire. Haligi n’agandi mango rhulibuka bulya rhuli ahantu habi n’omu kasanzi karhashinganini.​—Osome Omuhanûzi 9:11.

HUMBIRIRA LY’OHUGÛKWA

4. Orhulerhera amalibuko

Bantu banji banarhanye mpu Nnâmahanga yeri warhegeka igulu. K’ezo ntanya ziba z’okuli? Olole EVIDEO.

VIDEO: Ndi Oli Warhegeka Igulu? (1:24)

Osome Yakobo 1:13 na 1 Yowane 5:19, na buzinda oganirire er’idoso:

• Ka Nnâmahanga yelerha obubi n’amalibuko hanw’igulu?

5. Olole amazibu oburhegesi bwa Shetani bwalesire

VIDEO: Bulya Gurhi Nnâmahanga Alekerire Amalibuko?​—Hihimbi (3:07)

Osome Omurhondêro 3:1-6, na buzinda oganirire aga madoso:

• Bunywesi buhi Shetani adesire?​—Olole omulongo gwa 4 n’ogwa 5.

• Gurhi Shetani ayerekinemwo oku hali ebintu binja Nnâmahanga afulisire bene bantu?

• Shetani ayerekine oku bene bantu barhalagiriri oku burhegesi bwa Yehova lyo baba n’obushagaluke, gurhi nawe orhanyize?

Osome Omuhanûzi 8:9, na buzinda oganirire er’idoso:

• Bici biri byajirikana mw’er’igulu bulya arhali Yehova yeri walirhegeka?

1. Adamu na Eva bali bimana banal’ilamire omu Paradizo. Cikone bayumvirhiza Shetani bagomera Yehova

2. Erhi bayusigoma, igulu lyoshi lyajamw’ecaha, amalibuko n’olufû

3. Yehova ayusa ecaha, amalibuko, n’olufû. Bene bantu banacibiba bimana, banacib’ilama omu Paradizo

6. Yehova anaciyumve kubi erhi abona rhuli rhwalibuka

K’orhanyize oku Yehova anababazibwe n’amalibuko girhu? Olole ebi Mwami Daudi n’entumwa Petro bayandisire. Osome Ennanga 31:7 na 1 Petro 5:7, na buzinda oganirire er’idoso:

• Gurhi ociyumvirhe okumanya oku Yehova anabone amalibuko girhu n’oku ganamubabaze?

KWA BOFOFI

Shetani Ibilisi na Adamu na Eva bo balerhaga obubi hanw’igulu. Yehova anababazibwe erhi abona rhuli rhwalibuka, na hano hofi-hofi akûla obubi boshi omw’igulu.

Okucikengeza

• Bunywesi buhi Shetani Ibilisi abwiraga Eva?

• Bici obugoma bwa Adamu na Eva bwarhudwirhire?

• Bici biyerekine oku Yehova anababazibwe nka rhuli rhwalibuka?

OCIYIGIRIZE KWA BULÎRI

Olole gurhi Ebibliya ehugwire ecaha.

“Ecaha Byo Bici?” (Mwanzi guli oku jw.org)

Oyige binji okubiyerekire amashitaki Shetani Ibilisi arhondezagya omw’ishwa ly’e Edeni.

“Sababu Gani Mungu Anaacha Watu Wateseke?” (Ilabiro ly’Akalalizi, ly’omu lusiku 1/1/2014)

Olole amashuzo g’oburhulirize Ebibliya ehânyire okw’idoso lizibu bwenene.

Bulya Gurhi Bayahudi Banji Banigagwa? Bulya Gurhi Nnâmahanga Arhahanzagya oko Kurhahikiraga?” (Mwanzi guli oku jw.org)

Olole ebi mulume muguma ­aciyigirizize okubiyerekire amalibuko akagibona.

Ntaciri Kahumba (5:09)