-
Obwami bwa Nnâmahanga Byo Bici?Oshagalukire Akalamo Ensiku n’Amango!—Oyige Ebibliya omu Kuganîra
-
-
ISOMO LYA 31
Obwami bwa Nnâmahanga Byo Bici?
Obwami bwa Nnâmahanga g’omwanzi mukulu guba omu Bibliya. Yehova anakolese obo Bwami ly’ahikiriza omuhigo agwerhe kurhangira aha murhondero okubiyerekire igulu. Obo Bwami byo bici? Gurhi rhumanyiremwo oku buli bwarhambula ene? Bici obo Bwami bwahikirizize? Na bici bwajira omu nsiku zayisha? Ago madoso gashuzibwako mw’er’isomo n’omu gandi masomo abirhi gakulikire.
1. Obwami bwa Nnâmahanga byo bici, n’Omwami wabo ye ndi?
Obwami bwa Nnâmahanga buli burhegesi erhi guvernema yahizirweho na Yehova. Yezu ye Mwami w’obo Bwami, ali arhambula erhi anali empingu. (Mateyo 4:17; Yowane 18:36) Okubiyerekire Yezu Ebibliya edesire ntya: “Ayîma [nka Mwami] . . . emyaka n’emyaka.” (Luka 1:32, 33) Bulya Yezu ye Mwami w’Obwami bwa Nnâmahanga, anarhambule abantu boshi hanw’igulu.
2. Bandi banarhambule haguma na Yezu?
Yezu arhakarhambula yene. Abantu barhenzire “omu ngasi bûko na ngasi lulimi na ngasi lubaga na ngasi ishanja . . . barhambula nka bami okw’igulu.” (Amafulûlo 5:9, 10, NWT) Bantu banga banarhambule haguma na Kristu? Kurhenga Yezu ayishire hanw’igulu, Bakristu banji bahikire aha baba banafunzi bage. Cikone bantu 144 000 bone banaje empingu lyo bajirhambula haguma na Yezu. (Osome Amafulûlo 14:1-4.) Abandi Bakristu banji boshi banalame hanw’igulu babe bacikala b’obo Bwami.—Ennanga 37:29.
3. Bulya gurhi Obwami bwa Nnâmahanga bulushire amarhegesi ga bene bantu?
Hali abarhegesi balonza okujira ebintu binja, cikone barhajira obuhashe bw’okujira ebintu byoshi baba balonzize bajire. Na kandi erhi hagera kasanzi banashanje murhegesi mulebe n’okuhiraho owundi, nkaba ciru orhashibiriri amalagirire ga bacikala bage. Cikone nta lusiku banashanje Yezu, Mwami w’Obwami bwa Nnâmahanga n’owundi muntu yeshi-yeshi. Nnâmahanga ‘ayishiyimanza obwami bulya burhankacishandwa ciru n’eriguma.’ (Daniyeli 2:44) Yezu anarhegeke igulu lyoshi, arhakanaba na nzingirizi. Aba wa buzigire, wa lukogo, na mushinganyanya, ananayigirize abandi bantu nabo bakayereka abandi, obuzigire, olukogo n’obushinganyanya.—Osome Izaya 11:9.
HUMBIRIRA LY’OHUGÛKWA
Oyige bulya gurhi Obwami bwa Nnâmahanga bulushire amarhegesi goshi ga bene bantu.
4. Oburhegesi bugwerhe obuhashe bwanarhegeke igulu lyoshi
Yezu Kristu agwerhe obuhashe bw’okurhegeka kulusha abandi barhegesi boshi. Osome Mateyo 28:18, na buzinda oganirire er’idoso:
Omu njira ehi obuhashe bw’okurhegeka bwa Yezu bulushire obuhashe bw’okurhegeka bwa bene bantu?
Amarhegesi ga bene bantu ganakashanja ngasi mango, na ngasi murhegesi ajira ehyage higabi hisungunu h’igulu aba arhegesire. Ka ntyo k’Obwami bwa Nnâmahanga nabo buba buyosire? Osome Daniyeli 7:14, Mashi Bible, na buzinda oganirire aga madoso:
Bulya gurhi kushagalwire okumanya oku Obwami bwa Nnâmahanga “burhakashe rera”?
Bulya gurhi kuli kwinja okumanya oku Obwami bwa Nnâmahanga bwanarhambule igulu lyoshi?
5. Oburhegesi bwa bene bantu bushinganine bushanjwe
Bulya gurhi Obwami bwa Nnâmahanga bushinganine burhôle enafasi y’amarhegesi ga bene bantu? Olole EVIDEO, na buzinda oganirire er’idoso likulikire.
Mazibu gahi amarhegesi ga bene bantu gadwirhire abantu?
Osome Omuhanûzi 8:9, na buzinda oganirire aga madoso:
K’orhanyize kobinali oku Obwami bwa Nnâmahanga bushinganine burhôle enafasi y’amarhegesi ga bene bantu? Bulya gurhi?
6. Obwami bwa Nnâmahanga bugwerhe abarhegesi baba barhumanyirire bwinja
Bulya Omwami wirhu Yezu alamire hanw’igulu nka mwene muntu ‘anahash’iyumva olukugo lw’obuzamba bwirhu.’ (Abahabraniya 4:15) Balya balume n’abakazi bishwekerezi 144 000 bayish’irhambula haguma na Yezu, Yehova acishozirebo kurhenga “omu ngasi bûko na ngasi lulimi na ngasi lubaga na ngasi ishanja.”—Amafulûlo 5:9, NWT.
K’oyumvirhe nka kurhulirizize okumanya oku Yezu n’abanarhambule haguma naye bamanyire amazibu bene bantu bageramwo? Bulya gurhi okumanya ntyo kukurhulirize?
Yehova acishozire abalume n’abakazi ba ngasi bûko na ngasi ishanja lyo bayish’irhambula haguma na Yezu
7. Amarhegeko gw’Obwami bwa Nnâmahanga gali minja kulusha ag’abarhegesi ba bene bantu
Erhi abarhegesi bahiraho amarhegeko banarhanye oku galerhera bacikala babo obunguke n’okubalanga. Obwami bwa Nnâmahanga nabo bugwerhe amarhegeko bacikala babo bashinganine bakulikire. Osome 1 Abakorinti 6:9-11, na buzinda oganirire aga madoso:
Gurhi orhanyize igulu lyayishiyorha amango abantu boshi bakakulikira amarhegeko g’olugenzi ga Nnâmahanga?a
K’orhanyize oku biyumvikine okubona Yehova ahûnyire bacikala b’Obwami bwage oku bakakenga ago marhegeko? Bulya gurhi?
Bici biyerekine oku abantu barhali barhumikira ago marhegeko banacihikira aha bashanja?—Olole omulongo gwa 11.
Amarhegesi ganahirireho bacikala bago amarhegeko gakabalerhera obunguke n’okubalanga. Amarhegeko g’Obwami bwa Nnâmahanga gaba galushire amarhegeko g’abarhegesi ba bene bantu ganaba gakulanga n’okuha bacikala babwo obunguke
HALI OMUNTU WAKADOSA NTYA: “Obwami bwa Nnâmahanga byo bici?”
Gurhi wakamushuza?
KWA BOFOFI
Obwami bwa Nnâmahanga buli burhegesi buli empingu, bwanarhambule igulu lyoshi.
Okucikengeza
Bandi bo barhegesi bw’Obwami bwa Nnâmahanga?
Bulya gurhi Obwami bwa Nnâmahanga bulushire amarhegesi ga bene bantu?
Bintu bihi biguma na biguma Yehova ahûnyire bacikala b’Obwami bwage bajire?
OCIYIGIRIZE KWA BULÎRI
Ngahi Obwami bwa Nnâmahanga buli? Olole ebintu Yezu ayigirizize lugenda obo Bwami.
“K’Obwami bwa Nnâmahanga Buba omu Murhima Gwawe?” (Mwanzi guli oku jw.org)
Bulya gurhi Abahamirizi ba Yehova bacishoga okubêra bishwekerezi oku Bwami bwa Nnâmahanga ahali h’okubêra bishwekerezi oku marhegesi ga bene bantu?
Oyige ebi Ebibliya ehugwîre okubiyerekire balya 144 000 Yehova acishozire lyo bayish’irhambula haguma na Yezu.
Bici byayemezize mukazi muguma wali omu mpamikwa oku Nnâmahanga yene wakalerha igulu lishinganyanya?
“Nilifikia Kujua Mwenye Anaweza Kuleta Haki ku Dunia” (Amuka!, y’Omwezi gwa 11, 2011)
a Rhwaganirira marhegeko maguma na maguma g’olugenzi ga Nnâmahanga omu Cigabi ca 3.
-
-
Obwami bwa Nnâmahanga Buli Bwarhambula!Oshagalukire Akalamo Ensiku n’Amango!—Oyige Ebibliya omu Kuganîra
-
-
ISOMO LYA 32
Obwami bwa Nnâmahanga Buli Bwarhambula!
Obwami bwa Nnâmahanga bwarhonderaga okurhambula empingu omu mwaka gwa 1914. Ago mango go ensiku nzinda z’amarhegesi ga bene bantu zarhonderaga. Gurhi rhumanyiremwo ntyo? Rhuganirire bulebi buguma buguma bw’Ebibliya, ehali ziri omw’igulu zarhonderaga okubonekana omu mwaka gwa 1914, n’amorhere bantu banji barhondire okuyerekana mw’ogo mwaka.
1. Bici obulebi bw’Ebibliya buyerekine?
Ecitabu ca Daniyeli ciyerekine oku Obwami bwa Nnâmahanga bwakarhondire bwarhambula oku buzinda bw’amango gahamagalwa “rhusanzi nda.” (Daniyeli 4:16, 17, NWT) Myaka minji enyuma z’aho, Yezu aderha oku orho rhusanzi rho rhuderhwa “amango g’amashanja,” anayigiriza oku orho rhusanzi rhurhali cihwa amango ali hanw’igulu. (Luka 21:24, NWT) Nk’oku rhwayishibona, orho rhusanzi nda, rhwahwaga omu mwaka gwa 1914.
2. Hali nci na morhere gahi g’abantu garhondire okubonekana omu mwaka gwa 1914?
Abanafunzi ba Yezu bamudosa ntya: ‘Orhubwîre ecabe cimanyiso c’okuyisha kwawe n’eco okuhwa kw’igulu.’ (Mateyo 24:3) Omw’ishuzo Yezu abahâga, alêba bintu binji byakabire embere arhondere arhambula omu Bwami bwa Nnâmahanga empingu. Ababwira bintu biguma biguma byakabire omw’igulu nk’ivita, ecizombo erhi ishali, n’emisisi y’igulu. (Osome Mateyo 24:7.) Na kandi Ebibliya yali erhi yalebire amorhere abantu bakabire nago omu “nsiku nzinda” gakahizire akalamo k’abantu omu “mazibu.” (2 Timoteyo 3:1-5) Ebyo bintu byoshi byabonekine n’obwalagale kurhondera omu mwaka gwa 1914.
3. Bulya gurhi ebintu byabire bibi bwenene erhi Obwami bwa Nnâmahanga burhondera bwarhambula?
Hisanzi hisungunu erhi Yezu ayusiba Mwami omu mpingu, arhondera okulwisa Shetani n’abazimu bage. Yezu ahima Shetani. Ebibliya edesire oku “bamukweba okw’igulu, bamukulikiza na Bamahika bage.” (Amafulûlo 12:9, 10, 12) Shetani akunîre bwenene bulya amanyire oku hano hofi-hofi asherezibwa. Co cirhumire ali alerha amazibu n’amalibuko omw’igulu lyoshi. Okumanya ntyo kurhurhabire rhuhugûkwe bulya gurhi ebintu bigendekire byabiha bwenene hanw’igulu! Cikone, Obwami bwa Nnâmahanga bwanayuse ebi bintu bibi byoshi.
HUMBIRIRA LY’OHUGÛKWA
Oyige ebirhuyemezize oku Obwami bwa Nnâmahanga bwarhonderaga okurhambula omu mwaka gwa 1914, na bici oko kwakarhushumya okujira.
4. Obulebi bw’Ebibliya buyerekine oku Obwami bwa Nnâmahanga bwarhonderaga bwarhambula omu mwaka gwa 1914
Nnâmahanga ajira Mwami Nebukadneza w’omu Babiloni ya mîra alorhe ecilôrho calimo obulebi by’ebyakabire. Eco cilôrho n’amahugûlo Daniyeli ahânaga byayerekana oku byaliganirire oburhegesi bwa Nebukadneza n’Obwami bwa Nnâmahanga.—Osome Daniyeli 4:17.a
Osome Daniyeli 4:20-26, na buzinda okolese etablo eri omu ly’oshuza oku madoso gakulikire:
(A) Bici Nebukadneza abwine omu cilôrho cage?—Olole omulongo gwa 20 n’ogwa 21.
(B) Gurhi byakaberire omurhi?—Olole omulongo gwa 23.
(C) Gurhi byakabire oku buzinda bwa rhulya “rhusanzi nda”?—Olole omulongo gwa 26.
Lushangi Luhi Luli Egarhi k’Omurhi n’Obwami bwa Nnâmahanga?
OBULEBI (Daniyeli 4:20-36, NWT)
Akalibwami
(A) Enduluma y’omurhi
Buzinda bw’akalibwami
(B) “Mukube omurhi,” munaleke “rhusanzi nda rhugere”
Akalibwami kacibigalulwa
(C) “Wacib’igalulirwa Obwami bwawe”
Okuhikirira kwa burhanzi kw’obo bulebi . . .
(D) Ndi omurhi gwalishushanyize?—Olole omulongo gwa 22.
(E) Mangaci obwami bwage bwayimanzibagwa okurhacirhambula?—Osome Daniyeli 4:29-33.
(F) Bici byahikire Nebukadneza oku buzinda bwa rhulya “rhusanzi nda”?—Osome Daniyeli 4:34-36.
OKUHIKIRIRA KWA BURHANZI KW’OBO BULEBI
Akalibwami
(D) Nebukadneza, Mwami w’e Babiloni
Buzinda bw’akalibwami
(E) Enyuma z’omwaka gwa 606 E.K.K.K., Nebukadneza aheza obukengere na ntyo omu kasanzi ka myaka nda arhacihashig’irhambula
Akalibwami kacibigalulwa
(F) Nebukadneza acibiba n’obukengere anacib’irhondera arhambula
Okuhikirira kwa kabirhi kw’obo bulebi . . .
(G) Ndi omurhi gwalishushanyize?—Osome 1 Enganîro 29:23.
(H) Mangaci oburhegesi bwabo bwayimanzibagwa? Bici birhurhabire okuhugûkwa oku obo burhegesi bwaciriyimanzibwe okurhegeka erhi Yezu ali hanw’igulu?—Osome Luka 21:24.
(I) Mangaci na ngahi ako kalibwami kacibig’igalulwa?
OKUHIKIRIRA KWA KABIRHI KW’OBO BULEBI
Akalibwami
(G) Abami bw’omw’ishanja lya Israheli bakagirhambula aha nafasi ya Nnâmahanga
Buzinda bw’akalibwami
(H) Yeruzalemu asherezibwa, hagera myaka 2 520 erhi nta mwami w’omw’ishanja lya Israheli oli warhambula
Akalibwami kacibigalulwa
(I) Yezu amarhondera arhambula omu mpingu nka Mwami w’Obwami bwa Nnâmahanga
Orho rhusanzi rhugwerhe bulirî bunganaci?
Bigabi biguma biguma by’Ebibliya binakarhurhabala okuhugûkwa ebindi bigabi. Kwa lwiganyo, ecitabu ca Amafulûlo cidesire oku rhusanzi rhusharhu n’enusu ziri nsiku 1 260. (Amafulûlo 12:6, 14) Orhusanzi nda kuli kurhôla rhusanzi rhusharhu n’enusu kabirhi, zanaba nsiku 2 520. Mango maguma na maguma Ebibliya enakolese oluderho lusiku ly’eganirira omwaka. (Ezekiyeli 4:6) Co cirhumire, orhusanzi nda rhuganirirwe omu citabu ca Daniyeli rhugwerhe bulîri bwa myaka 2 520.
5. Igulu lyashanjire kurhondera omu mwaka gwa 1914
Yezu aleba ebyakabonekine omw’igulu amango akarhondire arhambula. Osome Luka 21:9-11, na buzinda oganirire er’idoso:
Bintu bihi bya muli ebyo bintu okola ocibwinire erhi kubiyumva?
Entumwa Paolo yaganirire amorhere abantu bakabire nago omu nsiku nzinda z’oburhegesi bwa bene bantu. Osome 2 Timoteyo 3:1-5, na buzinda oganirire er’idoso:
Morhere gahi ga muli ago oli wacibonera abantu bagwerhe ene?
6. Okumanya oku Obwami bwa Nnâmahanga bukola buli bwarhambula kwanarhushumya rhujire kantu kalebe
Osome Mateyo 24:3, 14, na buzinda oganirire aga madoso:
Mukolo guhi gwa bulagirire guli gwajirwa ene guyerekine oku Obwami bwa Nnâmahanga bukola buli bwarhambula?
Gurhi wakajira nawe ly’okajira k’ogo mukolo?
Obwami bwa Nnâmahanga buli bwarhambula na hano hofi-hofi bwarhondera okurhambula igulu. Osome Abahabraniya 10:24, 25, na buzinda oganirire er’idoso:
Okubona “Olusiku luli hofi,” bici ngasi muguma ashinganine ajire?
Bici oshinganine ojire erhi wakaciyigiriza akantu kinja kakarhabala abandi erhi kabacungule?
HALI OMUNTU WAKADOSA NTYA: “Bulya gurhi Abahamirizi ba Yehova baganirira bwenene omwaka gwa 1914?”
Gurhi wakamushuza?
KWA BOFOFI
Obulebi bw’Ebibliya, n’ehali ziri omw’’igulu, biyerekine n’obwalagale oku Obwami bwa Nnâmahanga buli bwarhambula. Rhwanayerekana oku rhuyemire ntyo omu kuyaliza omwanzi mwinja gw’obo Bwami n’omu kukaja oku ntimanano.
Okucikengeza
Bici byabire oku buzinda bw’orhusanzi nda rhuganirirwe omu citabu ca Daniyeli?
Bulya gurhi oyemire oku Obwami bwa Nnâmahanga bwarhonderaga bwarhambula omu mwaka gwa 1914?
Gurhi wakayerekanamwo oku oyemire oku Obwami bwa Nnâmahanga buli bwarhambula?
OCIYIGIRIZE KWA BULÎRI
Olole ebi abasoma ehistware n’abandi bantu badesire okubiyerekire empindûlo zajirikanaga omw’igulu kurhondera omu mwaka gwa 1914.
“Wakati Tabia za Watu Ziliharibika Kabisa” (Amuka!, y’Omwezi gwa 4, 2007)
Olole gurhi obulebi buli omu Mateyo 24:14 bwahumire oku kalamo ka mulume muguma.
“Nilipenda Besiboli Kuliko Kitu Kingine!” (Ilabiro ly’Akalalizi, No. 3 2017)
Gurhi rhumanyiremwo oku obulebi buli omu Daniyeli cigabi 4 buganirire Obwami bwa Nnâmahanga?
Bici biyerekine oku “orhusanzi nda” rhuganirirwe omu Daniyeli cigabi ca 4 rhwahwaga omu mwaka gwa 1914?
a Olole emyanzi ibirhi mizinda eri omu higabi “Ociyigirize kwa bulîri” hy’er’isomo.
-
-
Bici Obwami bwa Nnâmahanga Bwayish’ihikiriza?Oshagalukire Akalamo Ensiku n’Amango!—Oyige Ebibliya omu Kuganîra
-
-
ISOMO LYA 33
Bici Obwami bwa Nnâmahanga Bwayish’ihikiriza?
Obwami bwa Nnâmahanga bukola buli bwarhambula. Hano hofi-hofi bwalerha empindûlo hanw’igulu. Rhulole bintu binja biguma na biguma Obwami bwa Nnâmahanga bwayishilerha.
1. Gurhi Obwami bwa Nnâmahanga bwayishigalulamwo omurhula n’obushinganyanya hanw’igulu?
Yezu, Mwami w’Obwami bwa Nnâmahanga, ayishishereza banyankola maligo n’eguvernema za bene bantu okw’ivita ly’Armagedoni. (Amafulûlo 16:14, 16) Ako kasanzi eci ciragane Ebibliya ehânyire cahikirira bwinja-bwinja: “Omubî hano kasanzi [kasungunu] erhi arhacihali.” (Ennanga 37:10) Kugerera Obwami bwa Nnâmahanga, Yezu agalula omurhula n’obushinganyanya omw’igulu lyoshi.—Osome Izaya 11:4.
2. Gurhi akalamo kayishiyorha hano obulonza bwa Nnâmahanga bujirikana okw’igulu?
Amango Obwami bwa Nnâmahanga bwarhambula hanw’igulu, “abashinganyanya bo balya igulu [kuyima omw’igulu, NWT] bo banalibêrekwo ensiku n’amango.” (Ennanga 37:29) Orhanye olamire omw’igulu lirimo abantu bashinganyanya bone bazigire Yehova banazigirine! Nta muntu olwazire na ngasi muntu alama ensiku n’amango.
3. Bici Obwami bwa Nnâmahanga bwayish’ihikiriza enyuma z’abantu babi okusherezibwa?
Enyuma z’abantu babi okusherezibwa, Yezu ayishirhambula myaka 1 000. Mw’eyo myaka cihumbi, ye haguma na balya 144 000 bayishirhambula boshi, bayishihashisa bene bantu bahikire okuba bimana. Oku buzinda bw’eyo myaka 1 000, igulu lyoshi lyayishiba paradizo nyinja bwenene, abantu boshi bayishiba n’obushagaluke bulya bayishikarhumikira amarhegeko ga Yehova. Buzinda Yezu anagalulire Ishe Obwami. Izino lya Yehova ‘lyayishicesibwa’ kulusha agandi mango goshi. (Mateyo 6:9, 10, NWT) Byanabonekane n’obwalagale oku Yehova ali Murhegesi mwinja oshibirire bacikala bage. N’enyuma z’aho Yehova ayishishereza Shetani n’abazimu bage na ngasi muntu wayishicishoga okugomera oburhegesi bwage. (Amafulûlo 20:7-10) Ebintu binja Obwami bwa Nnâmahanga bwayishijira byayishigendekera ensiku n’amango.
HUMBIRIRA LY’OHUGÛKWA
Olole bulya gurhi wakayemera oku Nnâmahanga ayishikolesa Obwami bwage ly’ahikiriza ebiragane byage biyerekire amango gayisha.
4. Obwami bwa Nnâmahanga bwanashereze amarhegesi ga bene bantu
Ebibliya edesire oku amango “omuntu arhegesire owabo muntu, buhanya bwage.” (Omuhanûzi 8:9) Yehova anayuse obubule bw’obushinganyanya kugerera Obwami bwage.
Osome Daniyeli 2:44 na 2 Abatesalonika 1:6-8, na buzinda oganirire aga madoso:
Gurhi Yehova n’Omugala Yezu, banajire amarhegesi ga bene bantu na bala bagalunga okuboko?
Gurhi ebi waciyigirizize kuli Yehova na Yezu bikuyemezize oku ebi bayishikajirira abantu byayishiba bya bushinganyanya birhanalimo nzigirizi?
5. Yezu ye Mwami mwinja kulusha
Yezu nka Mwami w’Obwami bwa Nnâmahanga, anajire bintu binji oku bunguke bwa bacikala b’obo Bwami ba hanw’igulu. Olole EVIDEO ly’obona ebintu Yezu ajijire biyerekine oku agwerhe irala ly’okurhabala abantu n’oku Yehova amuhîre obuhashe bw’okujira ntyo.
Erhi Yezu âli hanw’igulu, ayerekine ebi Obwami bwa Nnâmahanga bwanahikirize. Migisho ehi ya mw’eyi eganirirwe mw’aga mandiko oli walindirira bwenene? Osome amandiko gaganirire ebyo biragane.
AMANGO YEZU ALI HANW’IGULU . . .
EBI YEZU AYISHIJIRA ERHI ANALI EMPINGU . . .
agwerhe obuhashe oku misi y’igulu.—Marko 4:36-41.
anajire igulu libe nafasi nyinja y’okulama.—Izaya 35:1, 2.
alisa ebihumbi by’abantu kugerera ecisomerine.—Mateyo 14:17-21.
ayishiyusa ishali.—Ennanga 72:16.
afumya abalwala.—Luka 18:35-43.
ayishirhabala abantu babe n’amagala mimana.—Izaya 33:24.
afûla abalifîre.—Luka 8:49-55.
ayishifûla abafîre n’okuyusa olufû.—Amafulûlo 21:3, 4.
6. Obwami bwa Nnâmahanga bwayishilerhera abantu akalamo kinja hanw’igulu
Obwami bwa Nnâmahanga bwayish’ihikiriza omuhigo Nnâmahanga agwerhe kuli bene bantu kurhangira aha murhondero. Banalame emyaka n’emyaka omu paradizo hanw’igulu. Olole EVIDEO ly’obona ebi Yehova ayishijira kugerera Omugala, Yezu, ly’ahikiriza ogo muhigo.
Osome Ennanga 145:16, NWT, na buzinda oganirire er’idoso:
Gurhi ociyumvirhe okumanya oku Yehova ‘anahikirize irala lya ngasi ciremwa cirimo obuzine?’
HALI ABANTU BADERHA NTYA: “Erhi rhweshi rhwakacilunga haguma, rhwanayusa amazibu ga mw’er’igulu.”
Mazibu gahi gayabire amarhegesi ga bene bantu Obwami bwa Nnâmahanga bwanayuse?
KWA BOFOFI
Obwami bwa Nnâmahanga bwanahikirize omuhigo gwabo. Bwayishijira igulu lyoshi libe paradizo erimw’abantu bayishikaharamya Yehova ensiku n’amango.
Okucikengeza
Gurhi Obwami bwa Nnâmahanga bwayishicesamwo izino lya Yehova?
Bici byakarhuma rhwayemera oku Obwami bwa Nnâmahanga bwayish’ihikiriza ebiragane bya Nnâmahanga bidesirwe omu Bibliya?
Bici nawe oli walindirira oku byayish’ihikirizibwa n’Obwami bwa Nnâmahanga?
OCIYIGIRIZE KWA BULÎRI
Olole Armagedoni byo bici.
Olole ebintu byayish’ijirikana omu mango Yezu ahamagalaga “malibuko [madarhi]”—Mateyo 24:21.
Olole gurhi abantu b’omu mulala bakarhanya haguma oku migisho Obwami bwa Nnâmahanga bwayishilerha omu mango gayisha.
Omu mwanzi gudesire “Maulizo Mingi Sana Ilikuwa Nanihangaisha,” olole gurhi muntu muguma wakagihagalika oburhegesi ahikire aha abona ebi akagilonza.
“Biblia Inabadilisha Maisha ya Watu” (Ilabiro ly’Akalalizi, ly’omu lusiku 1/1/2012)
-