ISOMO LYA 41
Bici Ebibliya Edesire Okubiyerekire Ecijiro c’Obuhya?
Bantu banji banakarhanya mpu kurhali kwinja okuganirira ebiyerekire ecijiro c’obuhya. Cikone erhi Ebibliya eganirira eco cijiro, enaciganirire omu njira y’obwalagale cikone n’obukenge. Ebi edesire binarhulerhere obunguke. Ebyo biyumvikine bulya Yehova ye Mulemi wirhu. Aba amanyire ebyakarhulerhera obunguke. Anarhuyereke ebi rhwakajira lyo rhumushagalusa n’ebi rhushinganine rhujire lyo rhushagalukira akalamo ensiku n’amango.
1. Entanya za Yehova kuyerekera ecijiro c’obuhya ziba zihi?
Ecijiro c’obuhya eba ngalo erhenga emwa Yehova. Aba alonzize eco cijiro cikajirwa egarhi kw’omulume n’omukazi barhôline nk’oku amarhegeko gage gadesire. Eco cijiro cirharhabala abarhôline okuba n’abana kone, cikone kandi cinabahashise bayerekane obuzigire bonene omu njira y’akaburhano na yakushagalusa. Co cirhumire Akanwa ka Nnâmahanga kadesire ntya: “Oshagalukire omukazi w’obusole bwawe.” (Emigani 5:18, 19, NWT) Yehova ahûnyire omulume n’omukazi Mukristu wajire omu buhya oku ngasi muguma abe mwishwekerezi oku wabo, na muli ntyo banayake okujira obuhushi (kujira ecijiro c’obuhya n’orhali mukage erhi iba).—Osome Abahabraniya 13:4.
2. Eby’enshonyi byo bici?
Ebibliya erhubwizire oku “abajira eby’enshonyi . . . barhalimwo owayime omu Bwami bwa Nyamuzinda.” (1 Abakorinti 6:9, 10) Abayandikaga ecigabi c’Ebibliya omu Cigiriki bakolesize oluderho por·nei’a lyo bahugûla eby’enshonyi. Olo luderho luhiziremo (1) ecijiro c’obuhyaa egarhi ka bantu babirhi barharhôlini nk’oku amarhegeko ga Nnâmahanga gadesire, (2) ecijiro c’obuhya egarhi k’omulume n’owabo erhi mukazi n’owabo, na (3) ecijiro c’obuhya egarhi k’omuntu n’ensimba. Rhunashagaluse Yehova n’okuba na bunguke bunji erhi rhuciyasa okujira “eby’enshonyi.”—1 Abatesalonika 4:3.
HUMBIRIRA LY’OHUGÛKWA
Olole ebyakakurhabala oyake okujira eby’enshonyi n’obunguke wakaba nabo omu kujira ntyo.
3. Oyake okujira eby’enshonyi
Omulume mwishwekerezi wakag’ihamagalwa Yozefu alahira oku arhakajira ecijiro c’obuhya na muka nnawabo. Osome Omurhondêro 39:1-12, na buzinda oganirire aga madoso:
Bici byarhumaga Yozefu alibirha?—Olole omulongo gwa 9.
K’orhanyize oku Yozefu ajijire bwinja erhi alibirha? Bulya gurhi?
Gurhi emisole y’ene yakayigamwo olwiganyo lwa Yozefu n’okuyaka olugenzi lw’okujira eby’enshonyi? Olole EVIDEO.
Yehova alonzize ngasi muguma wirhu ayake okujira eby’enshonyi. Osome 1 Abakorinti 6:18, na buzinda oganirire aga madoso:
Bici byakashumya omuntu ahikire aha ajira eby’enshonyi?
Gurhi wakajira ly’oyaka eby’enshonyi?
4. Wanahima amashumi
Bici byakarhuma kwaba kuzibu okuhima amashumi gw’okujira eby’enshonyi? Olole EVIDEO, na buzinda oganirire er’idoso likulikire.
Nk’oku obwine mw’eyo video, gurhi mwene wirhu anajijire ene abona oku entanya zage n’ebijiro byage byayish’irhuma arhacigendekera abêra mwishwekerezi kuli mukage?
Ciru hali n’amango Abakristu bishwekerezi baba n’entanya ncafu. Gurhi wakajira ly’orhagigendekera warhanya oku by’enshonyi? Osome Abafilipi 4:8, na buzinda oganirire aga madoso:
Bintu bihi rhushinganine rhukarhanyako?
Gurhi okusoma Ebibliya n’okucihâna loshi omu mukolo gwa Yehova kwakarhurhabala lyo rhuhima amashumi g’okujira ecaha?
5. Amakanuni ga Yehova ganarhulerhere obunguke
Yehova aba amanyire ebintu byakarhulerhera obunguke. Anarhubwire gurhi rhwakagendekera rhwaba n’olugenzi lucîre, n’obunguke rhwakaba nabo erhi rhwakajira ntyo. Osome Emigani 7:7-27 erhi olole EVIDEO, na buzinda oganirire amadoso gakulikire.
Gurhi ogo musole gwacihiziremwo omu marhangulo?—Olole Emigani 7:8, 9.
Nk’oku biyerekinwe omu Emigani 7:23, 26, okujira eby’enshonyi kwanalerhera omuntu mazibu manji. Mazibu gahi rhurhakahikirwa nago erhi rhwakayaka okujira eby’enshonyi?
Gurhi okuba n’olugenzi lwinja kwakarhurhabala rhushagalukire akalamo ensiku n’amango?
Bantu baguma na baguma banarhanye mpu, okubona Ebibliya eb’ehanzize ecijiro c’obuhya egarhi k’omulume n’owabo erhi omukazi n’owabo, k’okuderha oku erhaba elonzize bashagalukire akalamo. Cikone Yehova, Nnâmahanga w’obuzigire alonzize ngasi muntu ayishishagalukira akalamo ensiku n’amango. Lyo rhuyish’ikashagalukira, bihûnyire rhulame nk’oku amakanuni gage gadesire. Osome 1 Abakorinti 6:9-11, na buzinda oganirire er’idoso:
Omu masu ga Nnâmahanga, k’ecijiro c’obuhya egarhi k’omulume n’owabo erhi mukazi n’owabo cone abona oku cirhashinganini?
Rhweshi rhushinganine rhugendekere rhwajira empindûlo lyo rhushagalusa Nnâmahanga. Ka hali obunguke rhwakaba nabo erhi rhwakajira ntyo? Osome Ennanga 19:8, 11, na buzinda oganirire aga madoso:
K’orhanyize oku amakanuni ga Yehova g’olugenzi gaba gashinganine? Bulya gurhi orhanyize ntyo, erhi bulya gurhi obwine oku garhaba gashinganine?
Yehova arhabire bantu banji bahashilama nk’oku amakanuni gage g’olugenzi gadesire. Na nawe anakurhabala
HALI ABANTU BADERHA NTYA: “Erhi akaba mwembi musimine, nta bubi buhali okujira ecijiro c’obuhya.”
Gurhi nawe orhanyize?
KWA BOFOFI
Ecijiro c’obuhya eba ngalo Yehova ahîre omulume n’omukazi oku bayishagalukire.
Okucikengeza
Bici eby’enshonyi bihiziremo?
Bici byakarhurhabala lyo rhuyaka okujira eby’enshonyi?
Bunguke buhi rhuba nabo erhi rhukulikira amakanuni g’olugenzi ga Yehova?
OCIYIGIRIZE KWA BULÎRI
Olole bulya gurhi Nnâmahanga ahûnyire omulume n’omukazi barhangirhôlana nk’oku amarhegeko gage gadesire lyo barhondera okulama haguma.
Olole ebi Ebibliya edesire lugenda ecijiro c’obuhya egarhi k’omulume n’owabo erhi mukazi n’owabo, n’oko kurhali kuderha oku rhwanashomba bala bajira ntyo.
Olole gurhi amarhegeko ga Nnâmahanga gayerekire ecijiro c’obuhya garhulangamwo.
Omu mwanzi gudesire “Walinitendea kwa Heshima,” olole bici byarhabire mulume muguma wakagijira ecijiro c’obuhya n’ababo balume ajire empindûlo omu kalamo kage, na ntyo arhondera okusimisa Nnâmahanga.
“Biblia Inabadilisha Maisha ya Watu” (Ilabiro ly’Akalalizi, ly’omu lusiku 1/4/2011)
a Ebijiro by’obuhya birhashinganini bihiziremo bintu binji, nk’ecijiro c’obuhya kugerera ebirhumbu by’obuhya, okujirira ecijiro c’obuhya ekanwa, omu nio, okuhumahuma oku birhumbu by’obuhya by’owundi muntu orhali balo erhi mukawe ly’omuzukiza irala ly’okujira ecijiro c’obuhya.