ISOMO LYA 46
Bulya Gurhi Okwanine Ocihâne Emwa Yehova n’Okubatizibwa?
Wanacihâna emwa Yehova erhi wakamulaganya omw’isala oku okola wakamuharamya yenene n’oku wahîra obulonza bwage oku nafasi ntanzi omu kalamo kawe. (Ennanga 40:8) Na buzinda bw’aho, lyo wakabatizibwa. Omu kubatizibwa wanayereka abandi oku wacihânyire emwa Nnâmahanga. Okucihâna emwa Yehova go muhigo gw’obulagirire bwenene wakarhôla omu kalamo. Bici byakakushumya okurhôla ogo muhigo gw’okurhôlwa buzibu-zibu na gwa kulerha empindûlo omu kalamo kawe?
1. Bici bishumya omuntu acihâne emwa Nnâmahanga?
Buzigire kuli Yehova burhushumya rhucihâne emwage. (1 Yowane 4:10, 19) Ebibliya erhubwizire ntya: “Oshinganine ozigire Yehova Nyamuzinda wawe n’omurhima gwawe goshi n’obugumaguma bwawe boshi n’obwenge bwawe boshi n’emisi yawe yoshi.” (Marko 12:30, NWT) Arhali nderho zirhu zone rhuyerekanamwo oku rhuzigire Yehova, cikone rhunanayerekane ntyo kugerera ebijiro birhu. Nka kula obuzigire bushumya omulume n’omukazi bajire obuhya, ko n’obuzigire rhujirako Yehova burhushumya rhucihâne emwage n’okubatizibwa.
2. Migisho ehi Yehova aha Abahamirizi bage babatize?
Erhi omuntu abatizibwa, anabe muguma w’omu mulala gwa Yehova gugwerhe omwishingo. Wanacibonera obuzigire bwage kuli we omu njira nyinji, na kandi wanaba mwîra wage kulusha oku oyosire ene. (Osome Malakiya 3:16-18.) Yehova aba Sho, na kandi waba n’omulala gw’ekiroho gwa bene wirhu na bali birhu b’omw’igulu lyoshi bazigira Yehova banakuzigire. (Osome Marko 10:29, 30.) Cikone, hali ebi oshinganine okujira embere obatizibwe. Oshinganine oyige okubiyerekire Yehova, omuzigire, n’okuba n’obuyemere muli Mugala wage. N’enyuma z’aho, wanacihânaga emwa Yehova. Erhi wakajira ebyo rhuganirire n’okubatizibwa, wanaba n’obulangalire bw’okuyishishagalukira akalamo ensiku n’amango. Akanwa ka Nnâmahanga kadesire ntya: “Obubatizo bummuciza bunola ninyu.”—1 Petro 3:21.
HUMBIRIRA LY’OHUGÛKWA
Olole bulya gurhi kuli kwa bulagirire ocihâne emwa Yehova n’okubatizibwa.
3. Rhweshi rhushinganine rhucishoge indi rhwakolera
Omu ishanja ly’aba Israheli ba mîra, bantu baguma baguma bakagirhanya oku banaba bali baharamya Yehova n’agandi mango baharamye nnâmahanga w’obunywesi wakagihamagalwa Baali. Cikone, Yehova arhuma omulebi wage Eliya oku ajibayeresa oku oko bali barhanya kuli kubi bwenene. Osome 1 Abami 18:21, na buzinda oganirire er’idoso:
Muhigo guhi aba Israheli balishinganine barhôle?
Ak’aba Israheli, nirhu rhushinganine rhucishoge indi rhwakolera. Osome Luka 16:13, na buzinda oganirire aga madoso:
Bulya gurhi rhurhakaharamya Yehova n’agandi mango rhuli rhwaharamya muntu mulebe erhi kantu kalebe?
Gurhi rhwakayerekamwo Yehova oku ye rhucishozire okukaharamya?
4. Orhanye kunganaci Yehova aba akuzigire
Yehova arhuhîre bintu binji binja bwenene. Bicigi nirhu rhwakamuha? Olole EVIDEO.
Njira zihi na zihi Yehova ayerekinemwo oku akuzigire? Osome Ennanga 104:14, 15 na 1 Yowane 4:9, 10, na buzinda oganirire aga madoso:
Bintu bihi oshagalukira bwenene egarhi k’ebintu Yehova arhuhîre?
Gurhi ebyo akuhîre birhuma waciyumva enyanya zage?
Erhi omuntu akarhuha engalo rhushagalukire bwenene, rhunalonze gurhi rhwakamuvugamwo omunkwa kuli eyo ngalo. Osome Olushika 16:17, na buzinda oganirire er’idoso:
Erhi obona ebintu bya ngasi lubero Yehova akuhîre, bici orhanya nawe wakamuha?
5. Okucihâna emwa Nnâmahanga kunalerhe migisho minji
Bantu banji baba bayemire oku okumanyikana, okuba n’akazi kinja, okugwarha ensaranga byo birhuma omuntu aba n’obushagaluke. Ka kobinali ntyo? Olole EVIDEO, na buzinda oganirire aga madoso gakulikire.
Ciru ankaba omuntu oganirirwe mw’eyo video alisimire bwenene okusharha akabumbu, bulya gurhi ahikire aha aleka okusharha?
Ahîga okucihâna emwa Yehova ci arhali oku kabambu. K’orhanyize oku muhigo mwinja ogo arhôzire? Bulya gurhi?
Embere entumwa Paolo abe Mukristu, akagishimbulira akazi kakarhumire amanyikana bwenene. Ayigirizibagwa amarhegeko g’Eciyahudi n’omwalimu walimanyikine bwenene. Cikone aleka ebyo byoshi ly’aba Mukristu. Ka hali amango aciyunjuzize enyanya z’ogo muhigo arhôlaga? Osome Abafilipi 3:8, na buzinda oganirire aga madoso:
Bulya gurhi Paolo aderhaga oku ebi akagijira embere abe Mukristu byali nka “bikabulirwa,” erhi bucafu?
Migisho ehi ahâbirwe?
Gurhi wakashushanyamwo okukolera Yehova n’akandi kantu kalebe wakajijire omu kalamo kawe?
Emigisho Paolo ahâbirwe erhi ayemera okuba Mukristu yo yali minji kulusha ebintu alekaga
HALI ABANTU BADERHA NTYA: “Okucihâna emwa Nnâmahanga kuba nka kucihira olukoba emumiro.”
Bulya gurhi orhanyize oku kuli kwinja okucihâna emwa Yehova?
KWA BOFOFI
Buzigire kuli Yehova burhushumya okucihâna emwage n’okubatizibwa.
Okucikengeza
Bulya gurhi Yehova yene rhushinganine rhuharamye n’okumuzigira n’omurhima goshi?
Migisho ehi Yehova aha Abahamirizi babatize?
Ka nawe olonzize okucihâna emwa Yehova?
OCIYIGIRIZE KWA BULÎRI
Olole bulya gurhi mizisye muguma na mushasi mulebe bahigaga okucihâna emwa Yehova.
Emisole Enacidose—Gurhi Nakolesa Akalamo Kani?—Bamakengera Ebyagezire (6:54)
Olole ebindi bintu binji byakakushumya ocihâne emwa Yehova.
“Juu ya Nini Ujitoe kwa Yehova?” (Ilabiro ly’Akalalizi, l’omu nsiku 15/1/2010)
Mw’eyi video y’omuziki, olole omwishingo abacihâna emwa Yehova baba nago.
Omu mwanzi gudesire “Kwa Miaka Mingi Nilijiuliza, ‘Sababu Gani Tunaishi?’”, olole bici mukazi muguma alihizire oku nafasi ntanzi omu kalamo kage.
“Biblia Inabadilisha Maisha ya Watu” (Ilabiro ly’Akalalizi, ly’omu lusiku 1/11/2012)