ISOMO LYA 36
Obe Mwikubagirwa omu Bintu Byoshi
Ngasi muntu asima abîra bali bikubagirwa. Yehova naye asima abîra bage babe bikubagirwa. Cikone oko kurhali kulembu bulya bantu banji ene barhali bikubagirwa. Obunguke bw’okuba mwikubagirwa omu bintu byoshi buli buhi?
1. Bulya gurhi kuli kwa bulagirire bwenene okuba mwikubagirwa?
Erhi rhuba bikubagirwa, rhunayerekane oku rhuzigire Yehova rhunamukenzire. Rhuhugûkwe oku Yehova anabone ebintu byoshi rhurhanya n’ebi rhujira. (Abahabraniya 4:13) Anabone kunganaci rhuli rhwacihangana okuba bikubagirwa, n’oko kunamushagaluse. Akanwa kage kadesire ntya: “Bulyala abarhebanyi Yehova arhababâkwo, cikoki abantu bikubagirwa bwo arhonya.”—Emigani 3:32, NWT.
2. Njira nguma na nguma zihi rhwakakabamwo bikubagirwa?
Yehova asima “ngasi muguma akaz’ibwira mulungu wage okuli.” (Zakariya 8:16, 17) Oko kw’okuderha gurhi? Amango rhuli rhwaganira haguma n’abantu b’omu mulala gwirhu, abirhu banyakazi, bene wirhu na bali birhu, erhi abakulu b’ecihugo rhurhashinganini rhuderhe obunywesi erhi kubabwira emyanzi erhali y’okuli. Abantu bikubagirwa barhazimba barhanaderha bunywesi. (Osome Emigani 24:28 n’Abefezi 4:28.) Banalipe amakoli (taxes) goshi banahûnyirwe. (Abaroma 13:5-7) Omukujira ntyo, “rhunacigendese n’obwikubagirwa omu bintu byoshi.”—Abahabraniya 13:18, NWT.
3. Bunguke buhi rhwakabanabo erhi rhwakaba bikubagirwa?
Abandi banakarhulangalira erhi bakamanya oku rhuba bikubagirwa. Na kandi, rhwanarhuma ngasi muntu oli omu cigamba ayumva omurhula nk’oli omu mulala gwage, na ngasi muntu anazigira owabo. Rhwanaba n’ezamiri zicîre. Na kandi nka rhuli bikubagirwa abantu ‘banakenga enyigirizo z’Omuciza wirhu Nyamuzinda,’ na ntyo rhwanashumya abandi bacilunge haguma na nirhu omu kuharamya Yehova omu nterekêro ecîre.—Tito 2:10.
HUMBIRIRA LY’OHUGÛKWA
Olole gurhi okuba mwikubagirwa kwakashagalusa Yehova n’obunguke kwakakulerhera, oyige na gurhi wakaba mwikubagirwa omu ngasi kanga k’akalamo.
4. Abantu bikubagirwa banakashagalusa Yehova
Osome Ennanga 44:21 na Malakiya 3:16, na buzinda oganirire aga madoso:
Bulya gurhi orhanyize oku buli buhwinja okucibwira oku rhwanafulika okuli?
Gurhi orhanyize Yehova aciyumva erhi rhuhiga okuderha okuli, ciru ankaba kuli kuzibu okujira ntyo?
Erhi abana baderha okuli ababusi babo banashagaluke. Na nirhu erhi rhuderha okuli Yehova anashagaluke
5. Ngasi mango okakola n’obwikubagirwa
Bantu banji baba bayemire oku birhakahashikana omuntu abe mwikubagirwa ngasi mango. Cikone olole bulya gurhi rhushinganine okuba bikubagirwa ngasi mango. Olole EVIDEO.
Osome Abahabraniya 13:18, na buzinda oganirire gurhi rhwakaba bikubagirwa . . .
omu mulala.
ebwa kazi erhi ebwa masomo.
omu kandi kanga.
6. Okuba bikubagirwa kunarhulerhere obunguke
Hali amango okuba mwikubagirwa kurhulerhera amazibu. Ciru akaba ntyo, okuba mwikubagirwa kuba kwinja ensiku zoshi. Osome Ennanga 34:12-16, na buzinda oganirire er’idoso:
Gurhi okuba mwikubagirwa kwajijire akalamo kawe kabe kinja kulusha?
Omulume n’omukazi bali bikubagirwa banazibuhye obuhya bwabo
Ba bose banakalangalira abanyakazi bali bikubagirwa
Abakulu b’ecihugo banaderhe bwinja abantu bikubagirwa
HALI ABANTU BADERHA NTYA: “Okunywerha hisungunu kurhaba kubi.”
Bulya gurhi oyemire oku Yehova aba ashombire ngasi bunywesi boshi?
KWA BOFOFI
Yehova aba alonzize abîra bage babe bikubagirwa omu ngasi byoshi badesire na ngasi byoshi bakajira.
Okucikengeza
Njira nguma na nguma zihi rhwakakabamwo bikubagirwa?
Bulya gurhi orhanyize oku buli buhwinja okucibwira oku rhwanafulika okuli?
Bulya gurhi olonzize okuba mwikubagirwa omu ngasi kanga?
OCIYIGIRIZE KWA BULÎRI
Gurhi ababusi bakahashiyigiriza abana babo bakaderha okuli?
Bunguke buci rhwakaba nabo erhi rhwakakahikiriza ebiragane birhu?
Olole bulya gurhi rhushinganine okulipa ikoli ciru ankaba ensaranga rhuli rhwalipa ziri zakolesibwa kubi.
“Ni Lazima Tu Tulipe Kodi?” (Ilabiro ly’Akalalizi, ly’omu lusiku 1/9/2011)
Bici byashumyagya mulume muguma orhâli mwikubagirwa ahindule akalamo kage n’okuba mwikubagirwa omu bintu byoshi?