ISOMO LYA 40
Gurhi Rhwakabamwo Bantu Bacîre omu Masu ga Nnâmahanga?
Orhanye kw’ebi omuzire w’obuzigire ajira nk’ali arheganya omwana wage embere aje emasomo. Anamushuke n’okumuyambisa emishangi ecîre. Okujira ntyo kwanarhabala oyo mwana agendekere aba n’amagala minja, na kandi kwanayerekana n’obwalagale oku ababusi bage banakamushibirira. Ko n’oko, Larha wirhu w’omu mpingu Yehova aba alonzize nirhu rhukabêra rhucîre omubiri na kandi rhube n’olugenzi lucîre. Okuca kwanarhulerhera obunguke, ci bwenene oko kwanalerhera Yehova olukengwa.
1. Gurhi rhwakajira lyo rhukaca omubiri?
Yehova arhubwizire ntya: ‘Mube batagatifu.’ (1 Petro 1:16) Okuba batagatifu kuhiziremwo okuca omubiri n’okuba n’olugenzi lucîre. Rhwanaba bantu bacîre omubiri erhi rhwakakayoga ngasi mango, n’okufula emishangi yirhu, okuhyajira (kukoropa) enyumpa zirhu n’okushuka emituga yirhu. Na kandi rhwanarhabala okukacesa Enyumpa y’Entimanano. Erhi rhugendekera rhwaba rhucîre omubiri, rhunakengese Yehova.—2 Abakorinti 6:3, 4.
2. Nkomêdu zihi rhushinganine rhuyake lyo rhugendekera rhwaba rhucîre?
Ebibliya erhubwizire oku “rhucicese ngasi izinga ly’omubiri n’ely’iroho.” (2 Abakorinti 7:1, NWT) K’okuderha oku rhushinganine rhuyake ngasi kantu kakacafula omubiri gwirhu n’obukengere bwirhu. Entanya zirhu zishinganine zishagaluse Yehova, co cirhuma rhujira okwirhu koshi lyo rhuleka entanya mbi. (Ennanga 104:34) Na kandi rhushinganine rhuyake enderho ncafu.—Asome Abakolosi 3:8.
Bici bindi byakarhuma rhurhaba bantu bacîre omubiri n’olugenzi? Hali bintu biguma na biguma byakashereza omubiri gwirhu. Co cirhuma rhuyaka okunywa irhabi, obugoro, ecimoge erhi mafumu g’okucilalusa mpu lyo rhucishagalusa. Erhi rhuyaka ebintu bya ntyo, rhunabe n’amagala minja, na kandi rhunayerekane oku rhushagalukire oluhembo lw’obuzine Yehova arhuhîre. Na kandi rhunayake ebindi bijiro bibi nk’okucigologorha erhi okulola epornografi. (Ennanga 119:37; Abefezi 5:5) Kwanaba kuzibu okuyaka erhi kuleka ebyo bijiro, cikone Yehova anarhurhabala rhubiyake.—Osome Izaya 41:13.
HUMBIRIRA LY’OHUGÛKWA
Olole gurhi okuca omubiri kulerhera Yehova olukengwa, na gurhi wakalwisa erhi kuleka enkomêdu mbi.
3. Abantu bacîre omubiri banalerhera Yehova olukengwa
Amarhegeko Yehova ahâga aba Israheli garhurhabire rhuhugûkwe oku Yehova asima abantu bacîre. Osome Olubungo 19:10 na 30:17-19, na buzinda oganirire aga madoso:
Bici eyo milongo edesire biyerekine oku Yehova anakabona okuca kw’omubiri oku kuli kwa bulagirire?
Bintu bihi wakakajira ly’ogendekera waba ocîre?
Binahûne akasanzi na bushiru bunji ly’omuntu agendekera aba acîre. Rhwanakaca ciru akaba rhulamire ngahi, erhi ciru akaba rhuli bakenyi, erhi bagale. Olole EVIDEO, na buzinda oganirire idoso likulikire.
Bulya gurhi okucesa ebintu birhu kwanarhuma abantu bakenga omukolo gwirhu gw’amahubiri?
4. Oleke enkomêdu mbi
Yehova anarhurhabala rhuleke ngasi nkomêdu mbi
Erhi akaba onakanywa irhabi erhi mafumu g’okucilalusa, kurhaba kulembu okuleka ezo nkomêdu. Bici byakakurhabala? Orhanye oku mazibu ezo nkomêdu zakakulerhera. Osome Mateyo 22:37-39, na buzinda muganirire gurhi okunywa irhabi erhi mafumu g’okucilalusa kwakahuma . . .
oku bwîra bwawe haguma na Yehova.
oku mulala gwawe erhi oku bandi bantu.
Oyandike ebi wakajira ly’oleka enkomêdu mbi.a Olole EVIDEO.
Osome Abafilipi 4:13, na buzinda oganirire er’idoso:
Gurhi okushenga ngasi mango, okuciyigiriza Ebibliya, n’okukaja oku ntimanano kwakarhabalamw’omuntu ahagalike enkomêdu mbi?
5. Olwise entanya n’ebijiro bicafu
Osome Abakolosi 3:5, na buzinda oganirire aga madoso:
Bici biyerekine oku okulola epornografi, okurhumirana amamesaje gaganirire eby’obugonyi (sexto), n’okucigologorha, biba bijiro bicafu omu masu ga Yehova?
K’orhanyize oku Yehova agwerhe ecirhumire cinja c’okurhuhûna oku rhube n’olugenzi lwinja? Bulya gurhi?
Olole gurhi wakajira ly’oleka entanya ncafu. Olole EVIDEO.
Yezu ahânyire olwiganyo lw’okurhuyereka oku rhushinganine rhukajira okwirhu koshi lyo rhugendekera rhwaba n’olugenzi lucîre. Osome Mateyo 5:29, 30, na buzinda oganirire er’idoso:
Omu kuderha ntyo, Yezu arhaderhaga oku rhushinganine rhuciyagaze, cikone alonzagya okuyerekana oku rhukwanine rhujire ho n’aho ecijiro c’okurhuyasa entanya ncafu. Mihigo ehi miguma na miguma omuntu ashinganine arhôle ly’aleka entanya ncafu?b
Erhi akaba oli wajira okwawe koshi ly’oleka entanya ncafu, ohugûkwe oku Yehova anashagalukire obo bushiru bwawe. Osome Ennanga 103:13, 14, na buzinda oganirire er’idoso:
Akaba oli wacihangana okuleka enkomêdu mbi, gurhi olo lwandiko lukuhiremwo omurhima oku ogendekere wacihangana?
Okucibijira igosa kurhali kuderha oku orhakalileka!
Biba bilembu okurhanya erhi: ‘Niehe nayabirwe, ciru nakajira gurhi ntakahasha okuleka eyo nkomêdu.’ Cikone okengere oku, omuntu oli omu kamashigwe erhi akasarhala erhi kuhirima, kurhaba kuderha oku anayabirwe birhanahuna mpu acib’irhonderera akamashigwe oku murhondero. Ko n’oko, okucibijira liry’igosa lyo na lirya kurhali kuderha oku wayabirwe okulwisa enkomêdu mbi erhi oku byanahûnaga oleke okujira okwawe koshi ly’olileka. Ciru na Yehova arhakayibagira amajambere n’obushiru wamakajira ly’ohagalika ezo nkomêdu mbi. Byanahashikana omuntu acibigalukira liry’igosa lyo na lirya, cikone orharhamaga! Kugerera oburhabale bwa Yehova, wanahikira aha waleka ezo nkomêdu mbi.
HALI ABANTU BADERHA NTYA: “Eyi nkomêdu yanywengerire. Ntakacihashiyileka.”
Lwandiko luhi wakakolesa ly’oyereka omuntu ogwerhe ezo entanya oku kugerera oburhabale bwa Yehova anahashileka enkomêdu mbi?
KWA BOFOFI
Rhunashagaluse Yehova erhi rhugendekera rhwaba n’omubiri gucîre, entanya zicîre n’olugenzi lucîre.
Okucikengeza
Bulya gurhi kuli kwa bulagirire okuba bantu bacîre?
Gurhi wakabamwo muntu ocîre omubiri?
Gurhi wakajira ly’ogendekera waba n’entanya zicîre n’olugenzi lucîre?
OCIYIGIRIZE KWA BULÎRI
Bici wakajira ly’ogendekera waca ciru akaba oli mukenyi?
Olole bintu biguma na biguma wakajira ly’oleka okukanywa irhabi.
“Mambo ya Kukusaidia Uache Kuvuta Tumbako” (Amuka!, y’Omwezi gwa 5, 2010)
Olole amazibu g’okulola epornografi.
“Ponografia—Ina Hatari ao Haina Hatari Yoyote?” (Ilabiro ly’Akalalizi, ly’omu lusiku 1/8/2013)
Olole gurhi mulume muguma ahikire aha aleka enkomêdu mbi y’okulola epornografi.
“Nilifikia Kuweza Kisha Kushindwa Mara Nyingi” (Ilabiro ly’Akalalizi, No. 4 2016)
a “Oku Omuntu Akalekamwo Okunywa Irhabi,” mwanzi guli omu Ociyigirize kwa Bulîri, mw’er’isomo, guhugwîre emihigo omuntu akarhôla ly’arhag’igendekera aba mujà w’okunywa irhabi.
b Ly’omanya ebi oshinganine ojire ly’oleka enkomêdu y’okucigologorha, olole omwanzi gudesire “Namna Gani Ninaweza Kuachana na Tabia ya Kugusa-gusa Viungo vya Uzazi Juu ya Kujitimizia Tamaa ya Ngono?” omu citabu Maulizo Yenye Vijana Wanajiulizaka—Majibu ya Kuwasaidia, Buku ya 1, Sura ya 25.