Amadoso g’Abantu Basoma Ebitabu Birhu

Kw’olwandiko lwa Omuhanûzi 5:8, luganirire abarhegesi ba bene bantu bone erhi luganirire na Yehova naye?

Olu lwandiko lusomirwe ntya: “Irhondo okabona banyaga omukenyi omu cihugo cawe, obone bamulyalyanye banalenganye, orhasomeragwa. Bulya mukulu mulebe ali abonwa n’owundi omukulîre, na kandi hali abandi bakulu bali enyanya zabo.”​—Muh. 5:8, NWT.

Bantu banji banarhanye mpu olu lwandiko luba luganirire oburhegesi bwa bene bantu bone. Cikone hali ecigabi c’ogo mustari ciba ciganirire Yehova, n’eyo myanzi emuli yanarhurhuliriza n’okurhuha obulangalire.

Ecigabi cirhanzi c’olwandiko lwa Omuhanûzi 5:8, ciganirire gurhi oburhegesi bwa bene bantu bukalyalyanya abakenyi n’okubalenganya. Cikone ecigabi ca kabirhi ciyerekine oku omurhegesi wa bene bantu ashinganine ahugûkwe oku haba owundi omukulire. Okwo kuli kuderha oku ashinganine ahugûkwe oku hali abandi bagwerhe obukulu buli enyanya z’obwage. Eby’okugayisa kuli kubona oku omu burhegesi bwa bene bantu, abarhegesi boshi banakalya ebituliro n’okwo kunarhume abantu balibuka.

Cikone ciru rhwakalibuka erhi kulenganywa omu ngasi njira, rhukwanine rhuyemere n’obwalagale oku Yehova ‘anakabona ebi abarhegesi ba bene bantu’ bali bajira. Na ntyo rhwanamulakira n’okumubwira amazibu girhu. (Enna. 55:22; Fl. 4:6, 7) Rhumanyire oku “amasu ga Yehova ganakasinza omw’igulu lyoshi mpu lyo arhabala abantu bamuzigira.”​—2 Nga. 16:9, NWT.

Ecigabi cirhanzi c’olwandiko lwa Omuhanûzi 5:8, ciyerekine oku omu burhegesi bwa bene bantu muba okulire owabo. Cikone akantu k’obulagirire bwenene kali omu cigabi ca kabirhi c’olu lwandiko, kuli kubona oku Yehova ye Mukulu wa boshi. Ali arhambula kugerera Omugala Yezu Kristu. Ogala Byoshi anasinze ngasi kantu na kandi Ye n’Omugala babà bashinganyanya.