Okumwemwerhwa Kwarhumire Binji Byaba!

BANYERE babirhi bakag’ilambagira omu eneyo y’okugulizamo ebintu omu lugo lw’e Baguio omu cihugo c’e Philippines, buzinda babona eprezantware y’ebitabu birhu, cikone barhayiyegeraga. Mwali wirhu Helen waliyimanyire hofi n’eyo prezantware abalaba, buzinda amwemwerhwa. Abo banyere bagendekera emunda bajaga, cikone bajabacidosa bici birhumire Helen amwemwerhwa.

Buzinda, erhi abo banyere bali omu bisi bakola bagaluka emwabo, balangira epancarte ya jw.org aha Nyumpa y’Entimanano. Bakengera oku eyo myandiko yo yali oku prezantware babonaga ene bagenda. Barhenga omu mutuga, baj’ilola eprograme y’entimanano z’ebigamba byakag’ijirira entimanano mw’eyo Nyumpa y’Entimanano.

Abo banyere bayisha oku ntimanano olusiku lwa kulikiraga. Indi barhanziri bona eri baja omu Nyumpa y’Entimanano? Helen! Bamukengerera kw’oko kumwemwerhwa kwage. Helen adesire ntya: “Erhi bayisha bajà emunda ndi, omurhima gwani gwarhondera gwadûrha. Narhanya nti nkaba najijire amagosa.” Cikone abo banyere bahugûlira Helen oku byabaga koshi erhi babona eprezantware.

Abo banyere bashagalukira entimanano n’ecinyabuguma cirhu; baciyumva nk’abanali aha mwabo. Erhi babona abandi bali bakoropa Enyumpa y’Entimanano, badosa erhi nabo banajira kw’ogo mukolo. Muguma mulibo ayish’ihama mw’eco cihugo, cikone owundi anarhondera okuyisha oku ntimanano nʼokuyiga Ebibliya​—ebyo byoshi byahashikine enyanya z’okumwemwerhwa!