Oyige Oborhere bwa Yehova bw’Okulembera

1-2. Gurhi enderho za Yehova ziri omu lwandiko lwa Izaya 65:16, 17 zirhurhabire rhugendekere rhwalembera?

“USIACHE HATA KIDOGO!” co càli cirhwe c’okushagalusa c’entimanano y’e eneo y’omwaka gwa 2017 (omu Ciswahiri cʼe Congo). Eyo ntimanano yarhuyeresire gurhi rhwakagendekera rhwalembera amalibuko garhuhikire. Hamagera myaka ini kurhenga rhujijire eyo ntimanano, na kuhika buno rhucigendekire rhwalembera akalamo kazibu ka mw’er’igulu ligalugalu.

² Mazibu gahi gazind’igikuhikira? Ka wafîrirwe na mwene winyu w’omu mulala erhi mwîra wawe? Ka ndwala erhafuma? Ka mazibu g’omu bushosi? Ka wahikirwe n’obuhanya, erhi ka hali omuntu wakuminyize, erhi k’oli walibuzibwa? Ka wahikirwe n’amazibu galerhagwa n’obulwala; kwa lwiganyo obu bulwala bw’okuyahukira bw’e Korona? Rhuli rhwalindirira olusiku ebyo byoshi byaba byagezire; rhurhakacibikengera birhakanacihaba bundi!​—Osome Izaya 65:16, 17.

3. Bici rhushinganine rhujire muli gano mango, na bulya gurhi?

³ Akalamo ka mw’er’igulu kali kazibu bwenene, na kandi omu mango gayisha rhwarhimanana na mazibu manji galushire aga. (Mt. 24:21) Co cirhumire, rhushinganine rhugendekere rhwazibuhya oborhere bwirhu bw’okulembera. Bulya gurhi? Bulya Yezu adesire erhi: “Bulêmbezi bwinyu mwacizemwo obuzine bwinyu!” (Lk. 21:19) Okurhanya gurhi abandi bali balwisa amazibu gashushine n’agirhu kwanarhuzibuhya rhugendekere rhwalembera.

4. Bulya gurhi rhwakaderha oku Yehova ye lwiganyo lwinja lw’okulembera?

⁴ Indi oba lwiganyo lwinja lw’okulembera? Yehova Nnamahanga. K’er’ishuzo likusomezize? Nkaba erhi wakalirhanyako lirhakacikusomera. Er’igulu liri lyarhegekwa n’Omubi, co cirhumire lirimo mazibu manji. Yehova agwerhe obuhashe bw’okushereza bo na buno er’igulu ligalugalu, cikone acigendekire alembera kuhika olusiku ahizireho luhike. (Rm. 9:22) Nnamahanga wirhu agendekire alembera kuhika olo lusiku luhike. Rhuganirirage bintu mwenda Yehova ali alembera.

BICI YEHOVA ALI ALEMBERA?

5. Gurhi izino lya Nnamahanga lyahizirwekw’izinga, na gurhi ociyumvirhe enyanya z’oko?

⁵ Izinga lyahizirwe okw’izino lyage. Yehova aba azigire izino lyage, anaba alonzize ngasi muntu alikenge. (Iz. 42:8) Cikone hakola hali myaka 6 000, er’izino lyage linja lihizirwekw’izinga. (Enna. 74:10, 18, 23) Oko kwarhondereraga omu bustani bw’e Edeni amango Ibilisi (kw’okuderha “Kakoza”) ashobekaga Nnamahanga oku ayimire Adamu na Eva kantu kalebe kinja balilagirireko lyo babà n’obushagaluke. (Murh. 3:1-5) Kurhondera ago mango, Yehova agenderire ashobekwa oku ayimire bene bantu ebintu bàlilagirireko. Yezu agayisibwa bwenene n’er’izinga lyahiragwa okw’izino l’Ishe. Co carhumaga ayigiriza abanafunzi bage oku bakashenga ntya: “Larha wirhu oli omu mpingu, izino lyawe licesibwe.”​—Mt. 6:9, NWT.

6. Bulya gurhi Yehova alesire kasanzi kanji kagere embere ahâne ishuzo okubiyerekire amashtaki lugenda ehaki yage y’okurhambula?

⁶ Okuhagalika ehaki yage y’okurhambula. Yehova yene ojira ehaki y’okurhambula empingu n’igulu, n’oku arhambula ko kuba kwinja. (Maf. 4:11) Cikone Ibilisi ajira akwage koshi lyajira bamalahika na bene bantu barhanye oku Nnamahanga arhajira eyo haki. Amashtaki okubiyerekire ehaki ya Yehova y’okurhambula garhakayusibwe omu kasanzi kasungunu kone. Nnamahanga akolesa obwenge omu kulekera bene bantu kasanzi kanji k’okucirhambula lyo babona oku erhi bakalonza okucirhambula buzira kulangalira Omulemi wabo, ntaco bakahash’ihikiriza. (Yer. 10:23) Kugerera okulembera kwa Nnamahanga, ago mashtaki lugenda ehaki yage y’okurhambula ganashuzibwe liguma lya loshi. Abantu boshi banayemere oku Bwami bwage bone bo bwakalerha omurhula g’okunali hanw’igulu.

7. Bandi bagomire Yehova, na gurhi ayishibajira?

⁷ Obugoma bw’abana bage baguma na baguma. Erhi Yehova alema abana bage b’ekiroho n’aba bene bantu, boshi bali bimana, barhali kw’izabyo lyoshi-lyoshi. Cikone Shetani (kw’okuderha “Mugoma”) ashumya Adamu na Eva, nabo bagomera Nnamahanga. Abandi bamalahika na bene bantu nabo bamushimba mw’obo bugoma bwage. (Yd. 6) Enyuma z’aho, ciru n’abantu b’omw’ishanja lya Israheli, bantu bishogwa ba Nnamahanga, bahikire aha bamugomera, barhondera okuharamya bannamahanga b’obunywesi. (Iz. 63:8, 10) Yehova aciyumva oku bamamulenganya. Cikone alembera, anacigendekire alembera kuhika amango ashereza abo bagoma gahike. Oko kwayish’irhuliriza n’okugisha abakozi bage bishwekerezi bagendekire balembera akage obubi buli mw’er’igulu!

8-9. Bunywesi buhi baderhera Yehova, na gurhi rhwakayerekana oku ebyo bamushobeka birhaba by’okuli?

⁸ Obunywesi nkununu bwa Ibilisi. Shetani ashobeka omukozi mwishwekerezi wa Yehova wakag’ihamagalwa Ayubu, aderha oku abakozi ba Yehova boshi banamukolere bulya abahîre ecituliro. (Ayu. 1:8-11; 2:3-5) Kuhika buno Ibilisi acigendekire ashobeka bene bantu. (Maf. 12:10) Rhwanajira okwirhu koshi lyo rhuyereka Shetani oku oko aderhaga kurhaba kw’okuli omu kulembera amazibu girhu n’omu kubera bishwekerezi kuli Yehova bulya rhumuzigire. Aka Ayubu, nirhu rhwanayishigishwa enyanya z’obulembêdu bwirhu.​—Yk. 5:11.

⁹ Shetani anakolese abakulu b’amadîni g’obunywesi lyo baderha oku Yehova arhajira bonjo n’okuyelerhera bene bantu amalibuko. Ciru erhi abana bafâ, baguma baguma banaderhe oku Nnamahanga anabahesire mpu bulya alilagirire kuli bamalahika banji eyo munda empingu. Oko kuba kunywerhera Nnamahanga! Rhuyishi oku Yehova aba Larha w’obuzigire. Co cirhuma erhi rhwakalwala bwenene erhi kandi rhufîrwe na muntu mulebe rhwalizigire, rhurhakashobeka Nnamahanga wirhu oku ye wajijire ntyo. Lubero n’oko, rhujira obuyemere oku lusiku luguma anakubûle ebintu bicibiba binja. Rhwanabwira ngasi yeshi wakarhuyumvirhiza kunganaci Nnamahanga Yehova aba wabuzigire. Oko kunamuhe ishuzo aha ola oka musholoshonza.​—Mig. 27:11.

10. Bici olwandiko lwa Ennanga 22:23, 24 luyerekine lugenda Yehova?

¹⁰ Amalibuko g’abakozi bage bazigirwa. Yehova aba Nnamahanga wa bonjo. Anaciyumve kubi bwenene erhi ayumva rhuli rhwabanda endûlù nkaba enyanya z’amalibuko rhuli rhwalembera, enyanya z’okulibuzibwa erhi izino lyage lirhumire, erhi bulwala, erhi kurhaba kwirhu bimana. (Osome Ennanga 22:23, 24.) Yehova anayumve amalibuko rhuli rhwageramo; ananalonze okugayusa, na kobinali anagayuse. (Oshushanye na Olubungo 3:7, 8; Izaya 63:9.) Olusiku lwanahike amango “ahôrhola ngasi mulenge [gurhuli] omu masu: olufû ntalwo lwacihabê; emishîbo n’endûlù n’amababale birhakacihabâ bundi.”​—Maf. 21:4.

11. Gurhi Yehova aciyumva lugenda abakozi bage bishwekerezi bafîre?

¹¹ Okuberulwa n’abîra bage enyanya z’olufû. Gurhi Yehova aciyumva okubiyerekire abakozi bage bishwekerezi bafîre? Ali alinguza okucibibabona! (Ayu. 14:15) Ka wanarhanya kunganaci Yehova acifinja okucibibona omwîra wage Abrahamu? (Yk. 2:23) Erhi kandi Musa bakagishambala naye “busu oku busu”? (Lub. 33:11) Na kandi ali alindirira oku amango gahikage acibirhondera ayumvirhiza zirya nyimbo z’okuhâna obukuze Daudi n’ababo bazihi b’ennanga bakagiyimba! (Enna. 104:33) Ciru akaba abo bîra ba Nnamahanga bafîre, Yehova arhabayibagiri. (Iz. 49:15) Akengire ngasi kantu okubiyerekire obumuntu bwabo. Kuli kuderha oku yehe, “kwanabona nka boshi baba bazine.” (Lk. 20:38, NWT, amahugûlo g’idako.) Lusiku luguma anacibagalulire obuzine, na buzinda acibirhondera ayumva amasala gabo garhenzire oku murhima n’okucibirhondera ayemera enterekêro yabo. Ezi ntanya zanakurhuliriza, erhi akaba wafîrirwe n’omuzigirwa wawe.

12. Bici biri byagayisa Yehova bwenene muli zino nsiku mbi rhulamiremo?

¹² Okubona banya-nkola maligo bali balibuza abantu. Erhi obugoma burhondera omu Edeni, Yehova alimanyire oku akalamo k’abantu kakabire kazibu embere kacibiba kinja. Yehova aba ashombire obubi, obubule bw’obushinganyanya, n’obushungu buyunjwire mw’er’igulu ene. Ensiku zoshi anayumvize obonjo abantu barhagwerhi buhashe, kwa lwiganyo abazamba n’abarhagwerhi owabaderhera, abakana n’enfuzi. (Zak. 7:9, 10) Yehova anaciyumve kubi bwenene erhi abona abakozi bage bishwekerezi bali balibuzibwa n’okuhirwa omu mpamikwa. Oyemere n’obwalagale oku, azigire ngasi baguma ba mulimwe bagendekire balembera akage.

13. Lugenzi lubi luhi na luhi Nnamahanga ali abona omw’igulu ene, na gurhi ànajire okubiyerekire olo lugenzi?

¹³ Olugenzi lubi lwa bene bantu. Shetani aba alonzize bene bantu balemagwa oku nshusho ya Nnamahanga baje omu lugenzi lubi. Erhi Nnamahanga “àbona oku amabî g’omuntu garhalusire olugero” omu mango ga Nuhu “acîganya [erhi kugaya] mpu eci alemeraga omuntu hano igulu, alumwa bwenene omu murhima gwage.” (Murh. 6:5, 6, 11) K’oko byaliyosire kwàshanjire? Buzira karhinda nanga! Shetani ali acishinga bwenene omu kubona obugonyi bwa ngasi lubero buli bwajirwa omw’igulu, kwa lwiganyo omulume okujira ecijiro c’obuhya n’omuntu orhali mukage erhi ecijiro c’obuhya akarhi k’abalume n’ababo balume erhi bakazi n’ababo bakazi. (Ef. 4:18, 19) Shetani anacishinge bwenene erhi ashumya bala baharamya Nnamahanga omu njira y’okuli bajire ecaha. Hano oborhere bwa Yehova bw’okulembera buhika ebuzinda, anayerekane kunganaci aba ashombire olugenzi lubi omu kushereza balya boshi balahire kushanja.

14. Bici bene bantu bali bajirira obulemi bwa Nnamahanga buli hanw’igulu?

¹⁴ Okubona abantu bali bashereza igulu. Kobinali, omuntu ‘ali arhegeka awabo muntu amulibuze bwenene’ na kandi ali ashereza igulu n’ensimba Yehova amuhâga oku ashibirire. (Muh. 8:9, Mashi Bible; Murh. 1:28) Bantu baguma baguma basoma esiyanse badesire oku enyanya z’ebijiro by’abantu, milalab muliyoni muguma gw’ensimba gwahera omu myaka misungunu yayisha. Co cirhumire rhurhakasomerwa okuyumva oku abantu bali bayoboha enyanya z’e hali y’igulu! Rhushagalusire bwenene okubona Yehova alaganyize oku ‘aherêrekeza balya bashereza igulu’ na buzinda ahindule igulu lyoshi libe paradizo.​—Maf. 11:18; Iz. 35:1.

BICI OKULEMBERA KWA YEHOVA KURHUYIGIRIZIZE

15-16. Bici byakarhushumya rhugendekere rhwalembera aka Yehova? Ohâne olwiganyo.

¹⁵ Orhanye okubiyerekire amazibu goshi Larha wirhu w’omu mpingu amakalembera omu bihumbi by’emyaka. (Olole ecisanduku cidesire “Ebi Yehova Ali Alembera.”) Yehova acilonzagya akasherezize er’igulu ho n’aho. Cikone okulembera kwage kwarhurhabire bwenene! Orhanye kw’olu lwiganyo. Babwire omulume na mukage oli izimi oku omwana waburhwa agwerhe amazibu manji g’amagala, akalamo kage kayishiba kazibu n’oku ayishifâ anaciri musole. Ciru akaba ntyo, abo babusi bashagalukire bwenene okuburhwa k’oyo mwana, ciru akaba okumulera kwaba kuzibu bwenene. Obuzigire bwabo kuli oyo mwana, bwanarhuma balembera amazibu goshi bageramo lyo balola gurhi akalama.

¹⁶ Ko n’oko, ngasi muntu yeshi w’omw’iburha lya Adamu na Eva anaburhwe erhi arhanali mwimana. Ciru ankaba ntyo Yehova aba abazigire anaba abashibirire. (1 Yn. 4:19) Na lubero na balya babusi rhwaganiriraga, Yehova yehe agwerhe obuhashe bw’okujira kantu kalebe ly’ayusa amazibu girhu. Ahizireho olusiku anayukirize obulwala n’agandi mahanya galibuza abantu. (Mt. 24:36) K’obuzigire bwage burhakarhushumya nirhu rhugendekere rhwalembera nsiku nyinji akage kuhika olo lusiku luhike?

17. Gurhi ebi olwandiko lwa Abahabraniya 12:2, 3 ludesire okubiyerekire Yezu, birhuhîremwo omurhima rhugendekere rhwalembera?

¹⁷ Yehova ayerekine olwiganyo lwinja lw’okulembera. Yezu ahashiriyiga olwiganyo lw’Ishe lw’okulembera. Erhi Yezu ali hanw’igulu, alembera enderho mbi, okubonesibwa nshonyi, n’okumanikwa oku murhi g’amalibuko erhi rhwê rhurhuma. (Osome Abahabraniya 12:2, 3.) Buzira karhinda, olwiganyo lwa Yehova lw’okulembera lwahîre Yezu emisi y’okulembera. Nirhu lwanarhuha emisi y’okulembera.

18. Gurhi olwandiko lwa 2 Petro 3:9 lurhurhabiremwo okuhugûkwa bici okulembera kwa Yehova kuli kwahikiriza?

¹⁸ Osome 2 Petro 3:9. Yehova amanyire akasanzi kinja k’okuyusa obubi buli mw’er’igulu. Okulembera kwage kwarhabire okugusha haguma ehitû hinene hirimo emiliyoni y’abantu bali bamuharamya n’okumuha irenge. Boshi baba bashagalusire bwenene okubona Yehova alembire nsiku nyinji kuhika bahikira aha baburhwa, bayiga gurhi bakamuzigira, banahikira aha bacihâna emwage. Okulembera kwa Yehova kwanabonekane oku gwali muhigo mwinja amango anahembe emiliyoni ya muli rhwê yagendekire yalembera kuhika ebuzinda!

19. Bici rhushinganine rhuhige okujira, na luhembo luhi rhwayish’ihâbwa?

¹⁹ Kugerera olwiganyo lwa Yehova, rhunayige gurhi rhwakalembera n’omwishingo. Ciru ankaba amalumwa n’amalibuko goshi Shetani adwirhè, Yehova agendekire ebêra “Nnamahanga w’obushagaluke.” (1 Tm. 1:11, NWT) Nirhu akage rhwanagendekera rhwaba n’obushagaluke omu kulindirira kuhika amango Nnamahanga acêsa izino lyage, ahalire ehaki yage y’okurhambula, akule obubi boshi, n’okumaliriza amazibu girhu goshi. Rhweshi rhuhige okugendekera kwalembera, na kandi rhucirhulirize omu kumanya oku Larha wirhu w’omu mpingu naye ali alembera. Erhi rhwakajira ntyo, ezi nderho zanayishihikirira kuli ngasi muguma wirhu: “Iragi lyage omuntu olembera amarhangulo! Bulya erhi aba amagahima anayish’ihâbwa ishungwe ly’obuzine Nyamuzinda alaganyagya abamuzigira.”​—Yk. 1:12.