1921 Hakola Hali Myaka Igana

“MUKOLO guhi gwago-gwago rhwakabona duba-duba guli embere zirhu mw’ogu mwaka?” Ilabiro ly’Akalalizi ly’omu lusiku 1/1/1921, lyo lyadosagya Abanafunzi b’Ebibliya er’idoso. Omu kuhâna ishuzo, ly’ahâna olwandiko lwa Izaya 61:1, 2, lwabakengezagya omukolo bahâbirwe gw’okuhubiri. “Nyakasane [Yehova, NWT] anshîzire amavurha; antuma mpu ngend’iyigiriza abakenyi emyanzi y’akalembe . . . , ndâlike omwaka gw’obwonjo bwa Nyakasane n’olusiku lw’olwihôlo lwa Nyamuzinda wirhu.”

BAHUBIRI BARHAL’IYOBOHIRE KANTU

Lyo bahikiriza ogo mukolo bahâbagwa, Abanafunzi b’Ebibliya balishinganine barhayobohaga kantu. Arhali “emyanzi y’akalembe” yone balishinganine bayigirize abakenyi, ci “n’olusiku lw’olwihôlo” kuli banyankola maligo.

Mwene wirhu Hoskin, wal’ilamire e Canada, ahubiri buzira boba ciru akaba ahagalisirwe. Omu mpondo y’omwaka gwa 1921, abuganana n’omuhubiri waba Metodiste. Mwene wirhu Hoskin arhondeza enshambalo omu kuderha ntya: “Rhwal’ishinganine rhuganirire bwinja oku Mandiko, ciru akaba hali bintu biguma biguma rhurhayumvikaneko, erhi hakaba okurhayumvikana rhwanalekera enganîro zirhu aho na ngasi muguma agende n’omurhula rhunanabêre bîra.” Cikone arhajiraga nk’oko namubwiraga. Mwene wirhu Hoskin aganire ntya: “Rhwalikola rhugwerhe miniti misungunu yone rhul’irhwaganira erhi oyo [muhubiri] ashurha omulango narhanya mpu nkaba ebiyo byali oku mulango birhogire okw’idaho.”

Oyo muhubiri amoka ntya: “Bulya gurhi orhakaj’ikalambagirire abapagani ly’obayigiriza?” Mwene wirhu Hoskin arhashuzagya kantu koshi-koshi, cikone erhi agenda acibwira ntya: ‘Ntanyize oku muguma w’abapagani nakagiganiza!’

Olusiku lwakulikiraga erhi oyo muhubiri ajira enyigirizo zage, agendekeza okunderha kubi. Mwene wirhu Hoskin akengire ntya: “Abwira abemezi bage oku bajire hange na nani, abwira abantu oku ndi munywesi bwenene kulusha abanywesi bamakaboneka mw’eyo vile n’oku bashinganine banige.” Oko kurhahanzagya oyo mwene wirhu okuhubiri, agendekera ahubiri na bantu banji bamuyumvirhiza. Adesire ntya: “Nta mango nsig’ihubiri nk’oku. Ciru na bantu baguma baguma bakaderha erhi, ‘Manyire oku oli mukozi wa Nnâmahanga!’ bakandosa erhi banantabala na bintu bilebe lyo mpikiriza amalagirire gani.”

OKUYIGA EBIBLIYA OMUNTU YENE N’OMU MULALA

Lyo barhabala abantu basimisibwe bajire amajambere, Abanafunzi b’Ebibliya barhondera okucapisa eprograme y’Ifunzo ly’Ebibliya omu L’Âge d’Or.a Eprograme y’Okuyiga Ebibliya y’emisole yal’imo amadoso ababusi bakaganirira haguma n’abana babo. Ababusi bakajire badosa “abana babo aga madoso lyo babarhabala balonze amashuzo omu Bibliya.” Madoso maguma maguma, nk’aga: “Bitabu binga biba omu Bibliya?,” ago madoso gakayigiriza ebintu by’omusingi. N’agandi, gali nk’aga: “Ka ngasi Mukristu w’okuli yeshi analibuzibwe omu njira nguma erhi omu yindi?,” gakarheganya emisole bayishiba bahubiri barhanayobohiri bici.

Eprograme yalidesire Divin Plan des Âges yalimo amadoso g’okushumya galiyimangire oku citabu Etudes des Écritures. Ebihumbi by’abantu byayungûka n’okusoma ezo programe, cikone omu nsiku 21/12/1921 ecitabu L’Âge d’Or catangaza oku ezo programe ibirhi zirhacigendekere. Bulya gurhi ebintu byashanjagya ntyo duba-duba?

ECITABU CIHYAHYA!

Ecitabu *La Harpe de Dieu*

Ecitabu cirimo aha omwanafunzi al’ishinganine asome

Karte kaliko amadoso

Bene wirhu bakagilongoza bahugûkwa oku abanafunzi bahyahya bali omu bulagirire bw’okuyiga okuli kw’omusingi omu njira epanzirwe bwinja. Na ntyo ecitabu La Harpe de Dieu cahânwa omu Mwezi gwa 11, 1921. Abantu bal’isimisibwe bakagiyemera eco citabu bayandikisibwa oku liste y’abantu bayiga ecitabu La Harpe de Dieu. Oko kuciyigiriza kwarhabala abakagisoma eco citabu bamanye “omuhigo gwa Nnâmahanga gw’okugisha bene bantu n’okubaha obuzine bw’ensiku n’amango.” Gurhi ifunzo lyakagijirwa?

Erhi muntu mulebe akayemire eco citabu, banamuhe ehy’akarte hisungunu hiyerekine ngahi asoma muli eco citabu. Omu mugobe gukulikire bakag’imuha akandi karte kaliko amadoso gayerekire ebi anasomire muli eco citabu. Ako karte kanacib’imuyeresa ngahi acibisoma omu mugobe gukulikire.

Ngasi mugobe omu kasanzi ka migobe 12, omwanafunzi akagihâbwa akarte kahyahya karhenga ebw’isomo erhi cigamba c’emwabo. Kanji-kanji amakarte gakagirhumwa na bene wirhu b’omu cigamba balikola bashosi erhi abarhagwerhi misi. Kwa lwiganyo, Anna Gardner, alilamire e Millvale, e Pennsylvanie, omu États-Unis, akengire ntya: “Erhi ecitabu La Harpe de Dieu cihânwa, caha mukulu wani Thayle walikola mugikulu omukolo gw’okuja kwarhumira abantu ago makarte galiko amadoso.” Erhi akayusize asoma ebyo bamuyeresire, omwanafunzi akagilambagirirwa lyo bamurhabala agendekeze ifunzo lyage ly’Ebibliya.

Thayle Gardner adamire omu citi cage c’amapine

OMUKOLO GULI EMBERE

Okubuzinda bw’omwaka, Mwene wirhu Joseph Rutherford arhumira ebigamba byoshi amaruba. Ayerekana oku “obuhamirizi buhânyirwe mw’ogo mwaka bwali bunji na bwinja kulusha obwahânagwa omu yindi myaka yoshi y’akasanzi kw’okusarula.” Okubiyerekire akasanzi kayisha, ayushula ntya: “Haciri binji bya kujira. Muhe abandi omurhima bacilunge haguma na nirhu muli ogu mukolo mugishe.” Kobinali Abanafunzi b’Ebibliya bajira nk’oko anabahanulaga. Omu mwaka gwa 1922 bahubiri n’obushiru boshi omwanzi gw’Obwami kulusha oku byali embere.

Abîra Barhal’iyobohire Kantu

Abanafunzi b’Ebibliya bayerekana obuzigire omu kurhabalana. Nk’oku eyi myanzi ekulikire eyerekine, Abanafunzi b’Ebibliya bali bîra barhal’iyobohire bici ‘babusirwe omu mango mazibu.’—Mig. 17:17, NWT.

Lwa Kabirhi omu nsiku 31/5/1921, ebihamagalwa Bunizi bw’e Tulsa bwajirikana omu Tulsa, Oklahoma, e États-Unis, enyuma za mulume muguma mwiru okukwebwa omu mpamikwa banamushobeka oku anashambulire mukazi muguma w’omuzungu. Erhi ecigusho c’abalume bazungu calimo bantu balushire 1 000 balwisa ehigusho hisungunu hy’abalume biru, ivita lyalandira duba-duba kuhika lyaja omu lugo lw’abantu biru e Greenwood, eyo munda nyumpa 1 400 zadulikwa muliro n’oburhunzi bwahêkwa. Abakulu b’ecihugo baderha oku bantu 36 bone bafîre, cikone omubalè gw’okuli gw’abantu bafâga mw’er’ivita bakabire magana g’abantu.

Mwene wirhu Richard Hill, wali Mwanafunzi w’Ebibliya mwiru al’ilamire e Greenwood, adesire ntya: “Omu budufu ebyo byajirikanaga rhwagwerhe enyigirizo z’isomo (cigamba) nk’oku rhwanakagijira. Enyuma z’okuyusa ezo nyigirizo, rhwayumva bali bashurha amasasi omu santre y’evile. Rhwaja aha nshingo erhi rhunali rhwagayumva. Lwa Kasharhu sezi, omu lusiku 1, l’Omwezi gwa 6, ebintu byaba bibi bwenene. “Bantu baguma bayisha baderha oku akaba rhulonzize rhurhafâga, kuli kwinja rhuje ebwa Nyumpa y’Entimanano Nkulu.” Na ntya Mwene wirhu Hill haguma na mukage na bana bage barhanu balibirhira omu Nyumpa y’Entimanano Nkulu y’eyo munda. Barhanyize oku balume na bakazi biru 3 000 bo bayegerezibwe omo n’Abalanzi b’Ecihugo bahamagalwa oku bayishe bahire omurhula aho.

Muli ako kasanzi, Mwene wirhu Arthur Claus, wali muzungu, arhôla omuhigo gw’oburhwali. “Erhi nyumva oku abo bakagilwa bajire bagera ngasi hoshi omu Greenwood, bakaheka ebirugu n’okudulika enyumpa omuliro, nahiga okujilola gurhi omwîra wani muzigirwa, na Mwene wirhu Hill ayosire.”

Arthur Claus ali ayigiriza bana 14 ecitabu La Harpe de Dieu

Erhi ahika ahamwa Mwene wirhu Hill, abona omulungu wa Hill wali muzungu agwerhe ebunduki omu nfune. Oyo mulungu anali mwîra wa Mwene wirhu Hill, arhanya mpu Arthur naye ali muguma wa muli balya bakagilwa ivita. Amudosa ntya n’izu linene: “Bici oli wajira omu cogo c’oyu mulume?”

Arthur akengire ntya: “Ncibulaga bumuha ishuzo linja, ho n’aho akanshusire amasasi. Namuyemeza n’obwalagale oku nali mwîra wa Mwene wirhu Hill n’oku nakag’imulambagirira ngasi mango.” Arthur n’oyo mulungu bahashilanga ebirugu by’oyo mwene wirhu ly’abo bakagilwa ivita barhag’ibihêka.

Ho n’aho, Arthur amanya oku Mwene wirhu Hill n’omulala gwage bali omu Nyumpa y’Entimanano Nkulu. Babwira Arthur oku abantu biru barhakarhenga aho buzira luhusa luhânyirwe na Jenerale Barrett. Arthur akengire ntya: “Gwali mukolo muzibu okujibona jenarale. Erhi mubwira emihigo yani, andosa ntya: ‘Ka walanga ogu mulala onahikirize amalagirire gago?’ Nayemera n’omurhima gwani goshi oku najira ntyo.”

Erhi mwene wirhu Arthur ahâbwa olu luhusa, alibirhira ebwa Nyumpa y’Entimanano Nkulu. Ayereka omukulu wali aho ako karadasi kaliko oluhusa; oyo mukulu amoko ntya: “Bulya gurhi kali kasinye na jenerale yenene! K’omanyire oku we murhanzi okurhôla muntu mulebe aha mw’ogu mulegerege?” Mwene wirhu Hill n’omulala gwage balonzibwa ho n’aho. Boshi bashonera omu mutuga gwa Arthur bagaluka emwabo.

Mwene wirhu Arthur ajira okwage koshi ly’alanga Mwene wirhu Hill n’omulala gwage. Olo lwiganyo lwage lw’okucihâna kuli mwene wabo lwahûma abandi oku murhima. Arthur akengire ntya: “Omulungu wantabalaga okulanga ebirugu bya Mwene wirhu Hill arhondera okukenga Abahamirizi ba Yehova kulusha embere. N’abandi bantu banja basimisibwa n’omwanzi g’Obwami bulya bacibwinire n’oku rhweshi rhwaliyumanine egarhi k’abantu ba Nnâmahanga bacihânyire emwage.”

a Ecitabu L’Âge d’Or carhondera okuhamagalwa Consolation omu 1937 n’omu mwaka gwa 1946 carhondera okuhamagalwa Amuka!.