K’Ocikengire?

Ka wasomire bwinja-bwinja enimero z’Ilabiro ly’Akalalizi z’ogu mwaka? Ololage erhi wanashuzagya kw’aga madoso:

‘Okujira buhyahya enjira yirhu y’okurhanya’ bici kuhiziremwo? (Rm. 12:2, NWT)

Kuhiziremwo binji kulusha okujira ebijiro binja bisungunu byone omu kalamo kirhu. Kuhiziremwo okulabiriza gurhi rhuyorha ekandalala n’okujira ngasi mpindulo zihûnyirwe lyo rhurhumikira amakanuni ga Yehova omu kalamo kirhu nk’oku rhwakanahasha.—w23.01, buk. 8-9.

Gurhi rhwakabamwo ba lugero amango rhuli rhwalola ebiri byajirikana omw’igulu?

Rhunashagalukire okumanya gurhi ebiri byajirikana omw’igulu ene biri byahikirizamwo obulebi bw’Ebibliya. Ahali h’okuderha ebi rhwene rhuli rhwarhanya mpu nkaba byanabe, byakarhuma abantu bagabikanamwo omu cigamba, kuli kwinja enshambalo zirhu zikayimangira oku nyigirizo rhuhâbwa n’ikubuliro lya Yehova. (1 Kr. 1:10)—w23.02, buk. 16.

Gurhi obubatizo bwa Yezu bulimwo lubero n’obw’abanafunzi bage?

Yezu arhal’ilagirire oku kucihâna emwa Nnâmahanga nk’oku rhwehe rhujira, bulya aburhagwa omw’ishanja lyal’ihânyirwe emwage. Yezu ali muntu mwimana orhagwerhe caha. Arhal’ilagirire oku kuciyunjuza ebyaha byage.—w23.03, buk. 5.

Gurhi rhwakarhabalamwo abandi lyo bahâna amashuzo oku ntimanano?

Rhwanajira amashuzo girhu gabe mofofi, na muli ntyo rhwanalekera abandi akasanzi k’okuhâna amashuzo. Kandi rhwanayaka okuganirira bintu binji bwenene. Erhi rhwakajira ntyo abandi banaba n’entanya z’okuganirira.—w23.04, buk. 23.

Bici ‘enjira ntagatifu’ eganirirwe omu Izaya 35:8 ehugwîre?

Er’ibarabara ligali ly’olwiganyo burhangiriza lyal’ihugwîre enjira Abayahudi bageragamwo erhi barhenga e Babiloni kuja omu cihugo cabo. Gurhigi lugenda ‘enjira ntagatifu’ ya muli gano mango girhu? Omu magana g’emyaka embere z’omwaka gwa 1919, omukolo gw’okurheganya ibarabara ly’ekiroho gwajirwa: okucapisa n’okuhindula Ebibliya kuli egarhi k’ebintu byajijirwe. Abantu ba Nnâmahanga barhondire balambagira omu “njira ntagatifu” banaja omu paradizo y’ekiroho, yabahisa oku migisho y’Obwami.—w23.05, buk. 15-19.

Ecitabu c’Emigani cigabi ca 9 cihânyire amahano gayimangire oku bakazi bahi babirhi b’olwiganyo?

Ecitabu c’Emigani ciganirire “nyamusirhye w’omukazi” olya omulali gwage guhêsire ebwa “lufû” n’“obwenge bw’okunali,” bushushanyizibwe n’omukazi, olya omulali gwage guhêsire ebwa “njira y’obwenge” n’ebwa buzine. (Mig. 9:1, 6, 13, 18)—w23.06, buk. 22-24.

Gurhi obwirhohye bwa Nnâmahanga n’olugero lwage byabonekine muli oku ajiriraga Loti?

Yehova arhegeka omulume mushinganyanya Loti oku arhenge omu Sodoma ayakire omu eneo y’entondo. Erhi Loti ayinginga Yehova oku amuyemerere ayakire e Sowari, Nnâmahanga ayemera ebi amuhûnaga.—w23.07, buk. 21.

Gurhi omukazi akajira erhi akaba iba analole epornografi?

Agwasirwe akengere oku arhali ye wakatumuzibwa enyanya z’oko. Ashinganine asegeze obwenge oku bwîra bwage haguma na Yehova n’okurhanya bwenene oku myanzi eri omu Bibliya eganirire abakazi bal’igwerhe amahangayiko manji, cikone barhulirizibwa naye. Anarhabala iba okuyaka akanga kakarhuma ashumikwa okujira ntyo.—w23.08, buk. 14-17.

Erhi omuntu akarhujisa mbaka lugenda obwemere bwirhu, gurhi oburhimanya bwakarhurhabalamwo rhube batûdu?

Rhwanabona er’idoso lyage erhi eyo mbaka nka njira y’okurhurhabala rhumanye ebi omuntu ali arhanya erhi ebiri bya bulagirire kuli ye. Omu kumanya ntyo, rhwanahasha okumushuza omu njira y’obutûdu.—w23.09, buk. 17.

Bici olwiganyo lwa Mariya lurhuyigirizize lugenda oku rhwakahâbwamwo emisi?

Erhi amanyisibwa oku akabire nnina wa Masiya, Mariya ahâbwa emisi kugerera abandi. Gabriyeli na Elizabeti baganirira Mariya Amandiko g’okuhâna omurhima. Nirhu rhwanahâbwa emisi kugerera bene wirhu na bali birhu.—w23.10, buk. 15.

Gurhi Yehova akashuzamwo amasala girhu?

Arhulaganyize oku ayumvirhiza amasala girhu na kandi analole erhi gapatine n’obulonza bwage. (Yer. 29:12) Anashuza omu njira ziri lubero amasala g’abakozi bage bali bamuhûna ebintu byo n’ebyo, cikone arhurhabala ensiku zoshi.—w23.11, buk. 21-22.

Olwandiko lw’Abaroma 5:2 luganirire “obulangalire,” bulya gurhi bucibir’iganirirwa omu mulongo gwa 4?

Omu kuyumva omwanzi mwinja, omuntu anaba n’obulangalire bw’okushagalukira obuzine omu paradizo hanw’igulu. Cikone erhi ahikirwa n’amalibuko, agalembere, n’okuyemerwa na Nnâmahanga, obulangalire bwage bunazibuhe bwenene ananabushagalukire bwenene.—w23.12, buk. 12-13.