Obe wa Burhwali aka Sadoki

1-2. Sadoki ali ndi? (1 Enganîro 12:22, 26-28)

OBONE aka kanga omu bwenge bwawe. Bantu balushire 340 000 barhimanine haguma lyo bajira Daudi abe mwami w’ishanja lyoshi ly’Abaisraheli. Omu nsiku isharhu, abo bantu babêzire omu rhurhondo rhw’amabuye-mabuye hofi n’e Hebroni, bakag’isheka, okushambala n’okuyimba enyimbo z’omwishingo z’okukuza Yehova. (1 Nga. 12:39) Mw’abo bantu, mwali omwana w’omusole wakag’ihamagalwa Sadoki, cikone bantu banji barhakamubwine. Cikoki, Yehova abwine Sadoki analonzize nirhu rhumanye oku Sadoki ali ho. (Osome 1 Enganîro 12:22, 26-28.) Sadoki ali ndi?

² Sadoki ali kuhani wakag’ikola bwenene haguma na Kuhani Mukulu Abiyatari. Kandi Mungu ahîre Sadoki obwenge bunji n’obuhashe bw’okuhugûkwa obulonza bwage. (2 Sam. 15:27) Abantu bakagigend’ibona Sadoki amango bakag’iba balagirire oku mahâno g’obwenge. Kandi ali mulume w’oburhwali. Obo buli buguma bw’omu morhere gage rhwasegezako obwenge mw’eci cigabi.

3. (a) Bulya gurhi abakozi ba Yehova bashinganine babe ba burhwali? (b) Bici rhwaganirira mw’eci cigabi?

³ Muli zino nsiku nzinda, Shetani ali acihangana bwenene okushereza obuyemere bw’abantu ba Mungu kulusha agandi mango goshi. (1 Pt. 5:8) Rhushinganine rhube ba burhwali amango rhuli rhwalinda oku Yehova ashereza Shetani n’igulu lyage libi. (Enna. 31:24) Lekagi rhuganirire njira isharhu rhwakayigamwo oburhwali bwa Sadoki.

OLUNGE OBWAMI BWA MUNGU OKUBOKO

4. Bulya gurhi abakozi ba Yehova baba balagirire oku burhwali lyo balunga okuboko Obwami bwage? (Olole n’enfoto.)

⁴ Rhwe bakozi ba Yehova, rhunalunge Obwami bwa Mungu okuboko n’omurhima goshi, cikone kanji-kanji rhuba rhulagirire oku burhwali lyo rhujira ntyo. (Mt. 6:33) Kwa lwiganyo, mw’er’igulu libi, rhulagirire oku burhwali lyo rhulama kushimbana n’amakanuni ga Yehova n’okuhubiri omwanzi mwinja gw’Obwami. (1 Ts. 2:2) Na kandi, kanji-kanji binahûne oburhwali lyo rhugendekera rhwalahira okulunga okuboko oluhande loshi-loshi omu by’epolitike mw’er’igulu ligendekire lyagabikanamwo. (Yn. 18:36) Banji b’omu bakozi ba Yehova bahikirwe n’amazibu g’okubula ensaranga, bashusirwe erhi kuhirwa omu prizo enyanya z’okulahira okulunga okuboko omu by’epolitike erhi kuja omu by’ecisoda.

5. Bulya gurhi Sadoki al’ilagirire oku burhwali ly’alunga Daudi okuboko?

⁵ Sadoki arhajaga e Hebroni mpu ly’ajishangira kone okw’idinye ly’okuyimika Mwami Daudi. Ajire yo anadwirhe ebikolanwa byage by’okulwa ivita anali tayari okulwa. (1 Nga. 12:38) Ali mubidu akukulikira Daudi omw’ivita n’okuhalira Abaisraheli oku bashombanyi babo. Nkaba sadoki arhal’igwerhe obulenga omu by’okulwa ivita, cikone ali mulume wa burhwali bwenene.

6. Gurhi Daudi ayeresiremwo Sadoki olwiganyo lw’oburhwali lw’okukulikira? (Ennanga 138:3)

⁶ Ngahi kuhani aka Sadoki ayigiraga okuba wa burhwali bwenene? Al’izungulusirwe n’abalume bali ba misi na ba burhwali. Buzira karhinda aciyigirizize kugerera olwiganyo lwabo. Kwa lwiganyo, abwine gurhi oburhwali bwa Daudi bw’okuba ‘cirongozi cabo omu matabaro’ bwashumyagya Abaisrahali boshi bamulunge okuboko n’omurhima gwabo goshi. (1 Nga. 11:1, 2, Mashi Bible) Daudi akag’ilangalira oburhabale bwa Yehova ly’alwisa abashombanyi bage. (Enna. 28:7; osome Ennanga 138:3.) Sadoki akaciyigirizize kugerera ezindi nyinganyo nyinja zali aha burhambi bwage, ko kuderha abalume nka Yehoyada n’omugala Benaya wali mulwi w’ivita n’abarhambo 22 b’agandi mûko bacilungaga haguma na Daudi. (1 Nga. 11:22-25; 12:26-28) Abo balume boshi bal’ihizire okujira Daudi abe mwami wabo n’okumulanga.

7. (a) Nyiganyo zihi z’oburhwali za muli gano mango zakarhuyigiriza? (b) Nk’oku biyerekinwe omu video, bici ociyigirizize kugerera olwiganyo lwa Mwene Wirhu Nsilu?

⁷ Rhunabe n’emisi n’oburhwali erhi rhurhanya oku nyiganyo z’abayerekine oburhwali omu kulunga okuboko oburhegesi bwa Yehova. Omwami wirhu, Kristu Yezu, alahire loshi-loshi okucihira omu by’epolitike by’er’igulu lya Shetani amango ali hanw’igulu. (Mt. 4:8-11; Yn. 6:14, 15) Ensiku zoshi, akag’iyegemera Yehova ly’amuha emisi. Muli gano mango girhu, kandi rhugwerhe nyiganyo nyinji z’emisole yalahire okucilunga omu by’ivita erhi omu by’epolitike. Wanasoma oku jw.org lugenda ebyabahikiraga.a

OKARHABALA BENE WINYU

8. Mangaci abagula bakaba balagirire oku burhwali lyo baha bene wabo na bali babo oburhabale balagirireko?

⁸ Abantu ba Yehova basima okurhabalana. (2 Kr. 8:4) Ciru akaba ntyo, hali amango bihûna oburhwali lyo rhujira ntyo. Kwa lwiganyo, erhi ivita lirhibuka, abagula omu eneo banahugûkwe oku bene wabo na bali babo balagirire oku kuhâbwa omurhima, oku burhabale, nkaba n’oku biryo by’omubiri n’eby’ekiroho. Bulya abagula baba bazigire ebibuzi, banahire obuzine bwabo bo nnene omu mazibu lyo baha bene wabo na bali babo oburhabale balagirireko. (Yn. 15:12, 13) Mw’eyo njira, banakulikire olwiganyo lwa Sadoki lw’oburhwali.

9. Nk’oku biyerekinwe omu 2 Samweli 15:27-29, bici Daudi arhegesire Sadoki ajire? (Olole n’enfoto.)

⁹ Obuzine bwa Daudi bwali omu mazibu. Omugala Absalomu al’ihizire okumunyaga obwami. (2 Sam. 15:12, 13) Daudi al’ishinganine arhenge e Yeruzalemu buzira kulegama! Abwira abambali ntya: “Kanyi rhuyake, bulya ntako rhufume Absalomu.” (2 Sam. 15:14) Erhi abakozi ba Daudi baba bali bayaka, Daudi ahugûkwa oku muntu mulebe al’ishinganine asigale eyo munda ly’akamumanyisa emipango ya Absalomu. Muli ntyo, agalula Sadoki n’abandi bakuhani omu lugo lyo bakamumanyisa emyanzi. (Osome 2 Samweli 15:27-29.) Bal’ishinganine babe masu bwenene omu kujira ntyo. Ebi Daudi abwiraga abo bakuhani byakabahizire omu mazibu na ciru byakarhumire baheza obuzine bwabo. Orhanye gurhi Absalomu, muntu wa kucikaliza, wa kucihôla na mulenzi, akajirire Sadoki n’abandi bakuhani acimanyage oku bali bamuyenja lyo balanga Daudi!

10. Gurhi Sadoki n’abali haguma naye balanziremwo Daudi?

¹⁰ Daudi ahûna Sadoki n’owundi mwîra wage mwishwekerezi wakag’ihamagalwa Hushayi, bamurhabale okuhikiriza mupango mulebe. (2 Sam. 15:32-37) Omu kukulikira ogo mupango, Hushayi al’igwasirwe acijire nka muntu oli walunga Absalomu okuboko anamuhe amahano lugenda oku akarheziremwo Daudi, n’oko kwarhuma Daudi aba n’akasanzi k’okucirheganya ly’arhera Absalomu. Enyuma z’aho, Hushayi amanyisa Sadoki na Abiyatari lugenda ogo mupango. (2 Sam. 17:8-16) Muli ntyo, abo balume babirhi baba n’obulyo bw’okurhumira Daudi omwanzi. (2 Sam. 17:17) Kugerera oburhabale bwa Yehova, Sadoki n’ababo bakuhani bajijire omukolo gw’obulagirire omu kulanga akalamo ka Daudi.—2 Sam. 17:21, 22.

11. Gurhi rhwakayigamwo oburhwali bwa Sadoki amango rhuli rhwarhabala bene wirhu na bali birhu?

¹¹ Erhi byakahûna rhurhabale bene wirhu na bali birhu omu mango mazibu, gurhi rhwakayerekanamwo oburhwali buli nk’obwa Sadoki? (1) Okulikire obulongozi. Omu kanga ka ntyo, kuli kwa bulagirire rhugendekere rhwabêra omu cinyabuguma. Okulikire obulongozi bw’etawi y’e mwinyu. (Hb. 13:17) Abagula bashinganine bakasoma ngasi mango emipango eyerekire e eneo yabo lugenda ebyakajirwa erhi obuhanya bwakarhibuka, n’okusoma obulongozi bw’ikubuliro lugenda ebyakajirwa erhi akaba obuhanya buyegerire. (1 Kr. 14:33, 40) (2) Obe wa burhwali cikone obe masu. (Mig. 22:3) Okolese obwenge. Orhacihiraga omu mazibu garhali ga bulagirire. (3) Olangalire Yehova. Okengere oku Yehova alonzize we na bene winyu na bali binyu mugendekere mwabêra omu bulanzi. Anakuhashisa okurhabala bene winyu na bali binyu buzira kucihira omu mazibu.

12-13. Bici ociyigirizize kugerera olwiganyo lwa Viktor na Vitalii? (Olole n’enfoto.)

¹² Rhuganirire olwiganyo lwa Viktor na Vitalii, bene wirhu babirhi b’ekiroho bakolaga lyo bakahisako ababo bemezi ebiryo n’amishi omu Ukraine. Viktor adesire ntya: “Rhwakag’ilonza ebiryo n’amishi ngasi hoshi, kanji-kanji rhwakag’igera omu masoro. Mwene wirhu muguma ahâna ebiryo by’omu depo yage. Obo burhabale bwage bwaha bahubiri banji ebi bal’ilagirireko lyo balama kasanzi kalebe. Erhi rhuba rhuli rhwapakiza ebyo biryo, ebombe yarhogera oku metre hofi 20 kurhenga aha rhwali. Mw’ogo mulegerege goshi, naja nasemberera Yehova ampe oburhwali nal’ilagirireko lyo ngendekera narhabala abahubiri.”

¹³ Vitali adesire ntya: “Oko kwahûnyire burhwali bunji, omubalamo gwani murhanzi gwarhôzire nsa 12. Nakag’ishenga Yehova omu njira yoshi.” Vitalii agwerhe oburhwali, cikone kandi ali masu. Acibir’iderha ntya: “Nagendekera nahûna Yehova antabale mbe wa burhwali cikone kandi mbe wa lugero. Nageza omutuga gwani omu mabarabara gal’iyemerirwe na leta gone. Nayungusire omu kucibonera gurhi bene wirhu na bali birhu bakolaga haguma. Barhenza ebihanzo omu njira, bashubuza oburhabale n’okubupakiza, banarhuha ebiryo n’ahantu h’okurhamukira omu njira.”

OBÊRE MWISHWEKEREZI KULI YEHOVA

14. Erhi omuntu rhuzigira akabula bubêra mwishekerezi kuli Yehova, gurhi oko kwakarhuma rhwaciyumva?

¹⁴ Erhi omuntu w’omulala erhi mwîra wa hofi-hofi akaleka Yehova, ago gaba maguma g’omu mazibu madarhi garhuma rhwavunika omurhima bwenene. (Enna. 78:40; Mig. 24:10) Oku rhwakaba rhuzigire omuntu bwenene, ko kwakanaba kuzibu bwenene kuli rhwe okulembera ako kanga. Akaba wahikirwe n’akanga ka ntyo k’okugayisa, olwiganyo lwa Sadoki lw’obwishwekerezi lwanakuzibuhya.

15. Bulya gurhi Sadoki al’ilagirire oku burhwali ly’agendekera abêra mwishwekerezi kuli Yehova? (1 Abami 1:5-8)

¹⁵ Sadoki agendekire abêra mwishwekerezi kuli Yehova erhi omwîra wage wa hofi-hofi Abiyatari acishoga okurhabêra mwishwekerezi. Oko kwabire oku buzinda bw’oburhegesi bwa Daudi. Erhi Daudi ali hofi bufâ, omugala Adoniya alonza okunyaga entebe y’obwami Yehova al’ilaganyize Solomoni. (1 Nga. 22:9, 10) Abiyatari acishoga okulunga Adoniya okuboko. (Osome 1 Abami 1:5-8.) Omu kujira ntyo, Abiyatari arhabulaga okuba mwishwekerezi kuli Daudi yene cikone na kuli Yehova! Orhanye kunganaci Sadoki aciyumvirhe agayire anavunisire omurhima. Omu myaka makumi 40 na kulusha, ye na Abiyatari bakozire haguma nka bakuhani. (2 Sam. 8:17) Bashibirire haguma “isanduku lya Nnâmahanga.” (2 Sam. 15:29, Mashi Bible) Oku murhondero, abo balume bombi balunzire oburhegesi bwa Daudi okuboko, banajijire bindi bintu binji omu mukolo gwa Yehova.​—2 Sam. 19:11-14.

16. Nkaba bici byarhabire Sadoki ly’abêra mwishwekerezi?

¹⁶ Sadoki abêzire mwishwekerezi kuli Yehova ciru akaba Abiyatari arhôzire omuhigo guli lubero. Daudi al’imanyire oku akalangalire Sadoki ensiku zoshi. Erhi obulyalya bwa Adoniya bufulûlwa, Daudi acishoga Sadoki, Natani na Benaya lyo bashîga Solomoni amavurha abe mwami. (1 Bam. 1:32-34) Okuba haguma n’abandi bakozi bishwekerezi ba Yehova, nka Natani n’abandi bal’ilunzire Mwami Daudi okuboko, kugwasirwe kube kwazibuhize Sadoki n’okumuha omurhima. (1 Bam. 1:38, 39) Erhi Solomoni aba mwami, ‘ayimika omudâhwa [kuhani] Sadoki ahali ha Abiyatari.’​—1 Bam. 2:35.

17. Gurhi wakayigamwo olwiganyo lwa Sadoki erhi muntu mulebe ozigira akabula bubêra mwishwekerezi kuli Yehova?

¹⁷ Gurhi rhwakayigamwo olwiganyo lwa Sadoki? Erhi omuntu ozigira akaleka Yehova, oyerese Yehova oku olonzize okubêra mwishwekerezi kuli ye. (Yoz. 24:15) Yehova akuha emisi n’oburhwali olagirireko. Oyerekane oku omuyegemire omu kukasalira n’omu kubêra hofi-hofi n’abinyu bemezi bishwekerezi. Yehova anashagalukire obwishwekerezi bwawe, ananakuhembe kuli bo.​—2 Sam. 22:26.

18. Bici ociyigirizize kugerera ebyahikiraga Marco na Sidse?

¹⁸ Rhuganirire olwiganyo lwa Marco na mukage, Sidse, bali babo babirhi bakola bakuzire balekaga okuli. Marco adesire ntya: “Kurhenga olusiku abana bawe baburhwa, onabe obazigire bwenene. Onajire oku wakanahasha koshi ly’obalanga oku mazibu. Co cirhumire erhi bacishoga okuleka Yehova, oko kunavune omurhima bwenene.” Acibir’iderha ntya: “Cikone Yehova abire olunda lwani. Arhabire bulya amango ndi muzamba, mukanie anabe agwerhe emisi, n’amango mukanie ali muzamba, na mbe ngerhe emisi.” Sidse acibir’iderha ntya: “Yehova arhacirhuhage emisi rhwal’ilagirireko, rhurhakahashire okulembera. Nakag’ilibuzibwa n’entanya z’okuciyumva nka nie narhumire byaba ntyo, co cirhumire nakabwira Yehova oku nakag’iciyumva. Enyuma za kasanzi kalebe, mwali wirhu muguma nal’igwerhe myaka minji ntabona ayisha angwarha oku birhugo, andola omu masu, anambwira ntya: ‘Kengera Sidse, lirhali igosa lyawe!’ Kugerera oburhabale bwa Yehova, nahashire okugendekera namukolera n’omwishingo.”

19. Bici ohizire okujira?

¹⁹ Yehova alonzize abakozi bage boshi babe n’oburhwali aka Sadoki. (2 Tm. 1:7) Cikone, arhaba alonzize rhulangalire emisi yirhu rhwe nnene. Aba alonzize rhumulangalire loshi-loshi. Co cirhumire, erhi wakacirhimana omu kanga olagiriremwo oku burhwali, ohûne Yehova oburhwali. Wanayemera n’obwalagale oku anakurhabala obe wa burhwali aka Sadoki!​—1 Pt. 5:10.