Ebyakakurhabala ly’Okajira Ifunzo Lyawe Ngasi Mugobe
KA KUBA kuzibu kuli we okujira ifunzo lyawe ly’Ebibliya ngasi mugobe? Ka hali amango oyumva nk’ifunzo lyawe ly’Ebibliya liri lyakurhamya? Hali amango rhweshi rhuciyumva ntyo. Cikone, orhanye lugenda ebindi bintu rhujira ngasi mango nk’okuyoga. Okuyoga kunarhôle akasanzi kunaba kuhûnyire obushiru, cikone enyuma z’okujira ntyo, rhunaciyumve bwinja bwenene! Rhwanashushanya ifunzo ly’Ebibliya n’oku omuntu aciyumva bwinja omu ‘kucishuka n’amishi haguma n’oluderho.’ (Ef. 5:26) Olole mahano malebe gakakurhabala:
Opange eprograme. Ifunzo ly’Ebibliya ly’omuntu yenene kali kaguma k’omu “bintu by’obulagirire bwenene” Omukristu agwasirwe ajire. (Fl. 1:10, NWT) Ly’okakengera eyo programe yawe, wanayiyandika oku karatasi n’okuyihira ahantu wakayibona bwinja. Erhi kandi, wanabona oku kuli kwinja okuhira e alarme omu telefone yawe ly’ekakukengeza embere ensa zawe z’ifunzo zihike.
Ocishoge akasanzi n’ensa y’okuyiga byakaba binja kuli we. Ka kuba kulembu kuli we okusegeza obwenge kw’ebi oli wayiga omu kasanzi kalî erhi onahash’ijira ntyo omu rhusanzi rhunji rhofofi? We manyire bwinja bwenene akanga kawe. Ntyo, amango oli wapanga akasanzi kawe, orhanye oku kanga kawe. Erhi mango malebe wakayumva oku orhahashe okuyiga omu kasanzi wacipangire, wanapima okuyiga omu miniti ikumi. Okuyiga mw’eyo miniti ikumi kuli kwinja bwenene ahali h’okurhayiga kantu koshi-koshi. N’enyuma z’okurhondera nkaba wanaba n’irala ly’okugendekera.—Fl. 2:13.
Ocishoge emyanzi y’okuyiga embere z’akasanzi. Erhi wakakalinda akasanzi kawe k’ifunzo kahike ly’ohiga bici wayiga, wanaba orhali wakolesa bwinja ‘amango ohîrwe’ (Ef. 5:16) Opime okuyandika emyanzi wakasima oyige. Kwa lwiganyo, erhi wakaba n’idoso lugenda mwanzi mulebe orhahugûsirwi bwinja, wanaliyandika. N’enyuma za ngasi ifunzo, wanayushûla oku liste yawe ezindi ntanya wakasima oyige.
Ojire empindûlo amango hali obulagirire. Opime okujira mpindûlo ndebe okubiyerekire eprograme yawe, kwa lwiganyo lugenda akasanzi oyusa oli wayiga, erhi emyanzi ocishoga okuyiga. Akantu k’obulagirire arhali mangaci, kasanzi kanganaci erhi bici oyiga, cikone kuli kukajira ifunzo lyawe ngasi mugobe.
Okuba n’enkomedu y’okujira ifunzo ngasi mango kunarhulerhere bunguke bunji. Rhunayegerere Yehova bwenene, rhunayige okukarhôla emihigo y’obwenge, rhunanaciyumve bwinja.—Yoz. 1:8.